មណ្ឌលគិរី: លោក ស ខេង បានប្រាប់ឱ្យក្រសួងពាក់ព័ន្ធ និងអភិបាលខេត្តដែលសម្បូរទៅដោយព្រៃឈើជាពិសេសខេត្តមណ្ឌលគិរី ត្រូវជិះឧទ្ធម្ភាគចក្រចុះពិនិត្យស្ថានភាពព្រៃឈើ និងធនធានធម្មជាតិដែល «ជាទ្រព្យសម្បត្តិដូនតារបស់យើង» ឲ្យបានទៀងទាត់ ដោយមិនត្រូវពឹងតែទៅលើការជិះរថយន្ត ឬដើរមើលព្រៃឈើដែលគេកាប់បំផ្លាញនោះទេ។
លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានថ្លែងនៅក្នុងពិធីសម្រួលភារកិច្ច និងចាត់តាំងក្រុមការងារគណបក្សចុះមូលដ្ឋានខេត្តមណ្ឌលគិរីកាលពីថ្ងៃទី ២៧ ខែវិច្ឆិកាថា ក្រសួងពាក់ព័ន្ធ និងថ្នាក់ដឹកនាំខេត្តមណ្ឌលគិរីត្រូវតែធានាការពារឱ្យបាននូវធនធានធម្មជាតិ ដែលការងារនេះគឺជាយុទ្ធសាស្ត្រដើម្បីទាក់ទាញការគាំទ្រពីពលរដ្ឋ ទាក់ទាញទេសចរ ទាក់ទាញការវិនិយោគ ដោយមិនត្រូវចាត់ទុកបញ្ហានេះជាបញ្ហាធម្មតាទេ ព្រោះការងារនេះគឺជាការងារ ដើម្បីផលប្រយោជន៍ជាតិ ប្រជាជន និងកូនចៅជំនាន់ក្រោយ។
លោកបានលើកទឹកចិត្តឱ្យថ្នាក់ដឹកនាំក្រសួងពាក់ព័ន្ធ ព្រមទាំងអភិបាលខេត្ត ជាពិសេសខេត្តដែលសម្បូរធនធានធម្មជាតិដូចជាព្រៃឈើ ឬដីដែនជម្រកសត្វព្រៃអាចពិចារណារៀបចំប្រតិទិនទៀងទាត់ ១ ដើម្បីរួមគ្នាជិះឧទ្ធម្ភាគចក្រពិនិត្យស្ថានភាពព្រៃឈើ និងធនធានធម្មជាតិ ដោយមិនត្រូវពឹងផ្អែកទៅលើការជិះរថយន្ត ឬដើរមើលព្រៃឈើតែមួយមុខនោះឡើយ។
លោក ស ខេង បានចាត់ទុកធនធានធម្មជាតិ «ជាទ្រព្យសម្បត្តិដូនតារបស់យើង» ដោយលោករំឭកថា «ខ្ញុំបានទៅបំពេញទស្សនកិច្ចនៅចិន ហើយគេក៏បានធ្វើបទបង្ហាញប្រាប់ខ្ញុំអំពីគម្រោងអភិវឌ្ឍន៍ធំៗ។ ខ្ញុំក៏បានសួរថា តើលុយនោះបានមកពីណា? ចម្លើយគឺលុយបានមកពី ៣ ប្រភព គឺទី ១- លុយដូនតា ទី ២-លុយយើង និងទី ៣-លុយកូនចៅយើង»។
លោកបានពន្យល់ចំពោះការលើកឡើងនេះថា លុយដូនតា គឺសំដៅដល់ធនធានធម្មជាតិមានព្រៃ ភ្នំជាដើមដែលអាចទាក់ទាញការវិនិយោគ ប៉ុន្ដែមិនមែនបានពីការកាប់ឈើលក់ទេ។
លោកបន្តថា៖ «លុយយើង គឺលុយដែលបានមកពីការខិតខំប្រឹងប្រែងវិនិយោគបានផលចំណេញ មានពន្ធ មានការងារធ្វើជាដើម និងលុយកូនចៅយើង គឺសំដៅដល់លុយដែលបានខ្ចីសម្រាប់យកមកអភិវឌ្ឍ ហើយកូនចៅយើងជាអ្នកបន្តទទួលខុសត្រូវដែលការខ្ចីនោះត្រូវមានដែនកំណត់ ហើយប្រទេសណាក៏ធ្លាប់ និងកំពុងជំពាក់បំណុលគ្នាទៅវិញទៅមកដែរ»។
លោក ស្វាយ សំអ៊ាង អភិបាលខេត្តមណ្ឌលគិរីបានថ្លែងនៅថ្ងៃទី ២៧ វិច្ឆិកាថា រដ្ឋបាលខេត្តមណ្ឌលគិរីកន្លងមកបានអនុវត្តសេចក្ដីជូនដំណឹង និងសារាចរណែនាំពីរាជរដ្ឋាភិបាលក៏ដូចជាលិខិតបទដ្ឋានគតិយុត្តនានារបស់ក្រសួងមហាផ្ទៃដើម្បីចុះបង្ក្រាបបទល្មើសនានា ជាពិសេសចុះបង្ក្រាបបទល្មើសព្រៃឈើ និងការទន្ទ្រានដីព្រៃរបស់រដ្ឋដែលមានជនខិលខូចមួយចំនួនរំលោភយកដីព្រៃនៅតំបន់ការពារធ្វើជាកម្មសិទ្ធិផ្ទាល់ខ្លួន។
បើតាមលោក សំអ៊ាង ទន្ទឹមនឹងការអនុវត្តការងារទាំងនេះ រដ្ឋបាលខេត្តបានជួបបញ្ហាប្រឈមមួយចំនួនជុំវិញភូមិសាស្ត្រខេត្ត ដោយសារខេត្តមណ្ឌលគិរីមានព្រំដែនជាប់វៀតណាម ហើយសម្បូរទៅដោយព្រៃឈើ ភ្នំ ជ្រោះ ប៉ុន្ដែខ្វះកម្លាំងមន្ត្រីប្រដាប់អាវុធ ដែលធ្វើឱ្យមានការលំបាកក្នុងការបង្ក្រាបបទល្មើសព្រៃឈើ ការជួញដូរសត្វព្រៃ និងការកាប់ទន្ទ្រានដីព្រៃពីសំណាក់ជនខិលខូចមួយចំនួន។ លើសពីនេះ ប្រជាពលរដ្ឋចំណាកស្រុកមកពីតំបន់ ឬខេត្តផ្សេងៗមកតាំងលំនៅថ្មី និងកាប់ទន្ទ្រានដីព្រៃជាហូរហែ ដែលធ្វើឱ្យបទល្មើសមានការកើនឡើងគួរឱ្យកត់សម្គាល់។
លោក ស្វាយ សំអ៊ាង បញ្ជាក់ថា៖ «ក្នុងនាមខ្ញុំតំណាងរដ្ឋបាលខេត្តមណ្ឌលគិរីសូមស្នើសុំឱ្យរាជរដ្ឋាភិបាលជួយកាត់ឆ្វៀលដីពីដែនជម្រកសត្វព្រៃមួយចំនួននៅខេត្តមណ្ឌលគិរី ដើម្បីចែកជូនទៅពលរដ្ឋដែលបានរស់នៅអាស្រ័យផលជាច្រើនឆ្នាំមកហើយ និងចេញបណ្ណកម្មសិទ្ធិដីធ្លីជូនពួកគាត់តាមច្បាប់»។
ជាមួយគ្នានេះលោក សំអ៊ាង បានប្ដេជ្ញាចិត្តអនុវត្តការងារបន្ថែមទៀតតាមរយៈការចង្អុលបង្ហាញពីថ្នាក់ដឹកនាំនៃរាជរដ្ឋាភិបាល ដើម្បីពង្រឹងប្រសិទ្ធភាពការងារឱ្យបានល្អប្រសើរថែមទៀត។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមការពារសិទ្ធិមនុស្សអាដហុកបានថ្លែងពីម្សិលមិញថា ទោះបីជាមន្ត្រីបានចុះទៅពិនិត្យ ឬមិនបានពិនិត្យ មិនមែនជារឿងសំខាន់ទេ ប៉ុន្ដែអ្វីដែលសំខាន់គឺការអនុវត្តច្បាប់ជាក់ស្ដែង។ ប្រសិនមន្ត្រីជំនាញពង្រឹងការអនុវត្តច្បាប់បានល្អ អំពើល្មើសច្បាប់ទាំងនេះនឹងមិនមានកើតឡើងចោទជាបញ្ហាទេ។
លោកលើកឡើងថា នៅពេលបុគ្គលណាម្នាក់ធ្វើជាម្ចាស់កម្មសិទ្ធិដីធ្លីនៅតំបន់ណាមួយត្រូវតែមានការដឹងឮ ទទួលស្គាល់ពីអាជ្ញាធរមូលដ្ឋាន អាជ្ញាធរស្រុក អាជ្ញាធរខេត្ត ហើយបើអាជ្ញាធរទាំងអស់នេះធ្វើការដោយយកចិត្តទុកដាក់ គឺគ្មានអ្នកធ្វើល្មើសច្បាប់ទេ។
លោកបញ្ជាក់ថា៖ «ប៉ុន្ដែបញ្ហាដែលតែងតែកើតឡើងកន្លងមកនេះ គឺអាជ្ញាធរភាគច្រើនគឺជាប់ពាក់ព័ន្ធនឹងអំពើឃុបឃិតគ្នាជាមួយឈ្មួញ គឺគាត់ស៊ីញ៉េលើលិខិតផ្សេងៗ ដើម្បីបានលាភសក្ការៈតិចតួចដោយមិនខ្វល់ពីបញ្ហានៅថ្ងៃក្រោយ»។
បើតាមលោក ប៊ុណ្ណារ៍ ប្រសិនមន្ត្រីជំនាញថ្នាក់ជាតិ បានរកឃើញភាពមិនប្រក្រតីរបស់មន្ត្រីថ្នាក់ក្រោមជាតិ ត្រូវតែចាត់វិធានការយ៉ាងតឹងរ៉ឹងទៅតាមច្បាប់ ហើយឈ្មួញដែលពាក់ព័ន្ធក៏ត្រូវតែទទួលទោសទណ្ឌតាមច្បាប់ដែរ។ ចំណែកដីធ្លីដែលមានលិខិតក្លែងក្លាយទាំងអស់នោះ ត្រូវតែនិរាករណ៍ចោលវិញ ដោយប្រកាសយកដីដែលរងការរំលោភបំពាននោះទុកជាសម្បត្តិរដ្ឋវិញ៕