ភ្នំពេញ៖ លោក ស ខេង រដ្ឋមន្ត្រីក្រសួងមហាផ្ទៃផ្តល់ថវិកាលើកទឹកចិត្តដល់កងកម្លាំងសមត្ថកិច្ច ដែលការពារតាមគោលដៅ និងប្រចាំការត្រៀមអន្តរាគមន៍ ក្នុងអំឡុងពេលបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ខណៈអំណោយលោកនាយករដ្ឋមន្ត្រី ហ៊ុន សែន និងភរិយាត្រូវបានប្រគេនដល់ព្រះសង្ឃនៅតាមវត្តចំនួន ១៤២ ទូទាំងរាជធានីភ្នំពេញ។
លិខិតផ្ញើទៅកាន់លោក នេត សាវឿន អគ្គស្នងការគរបាលជាតិរបស់លោក ស ខេង នៅល្ងាចថ្ងៃទី ២២ ខែមេសា ឆ្នាំ ២០២១ បានសរសេរថា លោកឧបត្ថម្ភនូវថវិកាចំនួន ៣៤៨ ៣២០ ០០០ រៀល ដើម្បីជាការលើកទឹកចិត្តដល់កងកម្លាំងនគរបាលជាតិចំនួន ១ ២៤៤ នាក់ ដែលកំពុងការពារតាមគោលដៅ និងប្រចាំការត្រៀមអន្តរាគមន៍ក្នុងដំណាក់កាលបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល។
លោកបញ្ជាក់ថា៖ «សូមឯកឧត្តមនាយឧត្តមសេនីយ៍ ចាត់ចែងថវិកានេះជូនដល់បងប្អូនកងកម្លាំងដោយក្នុង ១ នាក់ទទួលបានថវិកាចំនួន ២៨ ម៉ឺនរៀល»។
ជាមួយគ្នានេះក្រសួងព័ត៌មានបានឲ្យដឹងកាលពីថ្ងៃ ២២ មេសា ថា ក្នុងដំណាក់កាលដែលប្រទេសកម្ពុជាកំពុងទទួលរងនូវការឆ្លងរីករាលដាលនៃជំងឺកូវីដ១៩ចូលក្នុងសហគមន៍ដែលតម្រូវឱ្យរាជរដ្ឋាភិបាលមានការបិទខ្ទប់ទីក្រុងភ្នំពេញ និងក្រុងតាខ្មៅនៃខេត្តកណ្ដាល ដើម្បីទប់ស្កាត់ការឆ្លងរាលដាលជំងឺកូវីដ១៩នោះលោកនាយករដ្ឋមន្ត្រី ហ៊ុន សែន និងភរិយាបានចាត់ឲ្យតំណាងរបស់លោកនាំយកនូវអំណោយទេយ្យទានមួយចំនួនធំប្រគេនដល់ព្រះសង្ឃដែលគង់នៅគ្រប់វត្តចំនួន ១៤២ វត្តក្នុងរាជធានីភ្នំពេញ។
ក្រសួងបានបញ្ជាក់ថា៖ «ដោយថ្ងៃដំបូងនេះបានប្រគេនចំនួន ៤១ វត្តសិន ហើយក្រុមការងារនឹងជំរុញប្រគេនឱ្យបានគ្រប់ ១៤២ វត្តក្នុងរយៈពេល ២ ឬ ៣ ថ្ងៃខាងមុខនេះ»៕