.jpg)
លោក ស ខេង ថ្លែងក្នុងពិធីនៅបណ្ឌិត្យសភានគរបាលកាលពីម្សិលមិញ។ រូបថត ក្រសួងមហាផ្ទៃ
ភ្នំពេញៈ រដ្ឋមន្ត្រីក្រសួងមហាផ្ទៃលោក ស ខេង បានផ្ដល់អនុសាសន៍ឲ្យជ្រើសរើសអ្នករស់នៅក្នុងមូលដ្ឋានចូលធ្វើជានគរបាល និងបានក្រើនរំឭកថា មុននឹងទទួលយកសិក្ខាកាមណាមួយមកចូលរៀន បណ្ឌិត្យសភានគរបាលកម្ពុជាត្រូវពិនិត្យឲ្យបានច្បាស់ ហើយអង្គភាពសាមីត្រូវផ្ដល់តម្លៃដល់មន្ត្រីដែលត្រូវបានបណ្ដុះបណ្ដាល។
បណ្ឌិត្យសភានគរបាលកម្ពុជាកាលពីម្សិលមិញបានប្រជុំបូកសរុបលទ្ធផលនៃការអនុវត្តផែនការយុទ្ធសាស្ត្ររយៈពេល ៥ ឆ្នាំ ២០១៥-២០១៩។
លោក សេង ផល្លី ប្រធានបណ្ឌិត្យសភានគរបាលកម្ពុជាបានថ្លែងថា ក្នុងរយៈពេល ៥ ឆ្នាំនេះ បណ្ឌិត្យសភានគរបាលកម្ពុជាបានបើកបណ្ដុះបណ្ដាលចំនួន ២០៩ វគ្គ មានសិក្ខាកាមចូលរួមចំនួន ២០ ៩៩៦ នាក់។ បើគិតជាចំនួនមធ្យមក្នុង ១ ឆ្នាំ បណ្ឌិត្យសភានគរបាលកម្ពុជាបានបើកវគ្គបណ្ដុះបណ្ដាលចំនួន ៤២ វគ្គដែលមានអ្នកសិក្សាជាមធ្យមចំនួន ៤ ២០០ នាក់។
ក្រៅពីលើកឡើងពីសមិទ្ធផលជាច្រើនដែលសម្រេចបានលោក សេង ផល្លី ក៏បានលើកឡើងនូវការប្រព្រឹត្តខុសឆ្គងរបស់មន្ត្រីប៉ូលិសដែលមន្ត្រីទាំងនោះត្រូវបានអប់រំ ធ្វើកិច្ចសន្យា សម្រួលភារកិច្ច ដកតួនាទី និងបណ្ដេញចេញពីក្របខ័ណ្ឌ។ ប៉ុន្តែលោកមិនបានបញ្ជាក់ពីចំនួនប៉ូលិសដែលបានប្រព្រឹត្តខុសទាំងនោះទេ។
លោក ស ខេង ដែលបានធ្វើជាអធិបតីក្នុងពិធីបូកសរុបការងារនេះបានកោតសរសើរដល់លទ្ធផលសម្រេចរបស់បណ្ឌិត្យសភានគរបាល ជាពិសេសការបណ្ដុះបណ្ដាលនរគបាលដោយម្ចាស់ការដោយខ្លួនឯង និងកាត់បន្ថយការចេញទៅទទួលវគ្គបណ្ដុះបណ្ដាលនៅបរទេស។ លោកថា មន្ត្រីនគរបាល ដែលមានសមត្ថភាពពីការបណ្ដុះបណ្ដាលនេះបានចូលរួមការពារបូរណភាពទឹកដី រក្សាសន្តិសុខ សណ្ដាប់ធ្នាប់សង្គម និងផ្តល់សេវាសាធារណៈដល់ពលរដ្ឋប្រកបដោយប្រសិទ្ធភាព។ ពួកគេមានសីលធម៌វិជ្ជាជីវៈក្នុងការបំពេញការងារ។
លោកក្រើនរំឭកថា មុននឹងទទួលយកសិក្ខាកាមណាមួយមកចូលរៀន បណ្ឌិត្យសភានគរបាលកម្ពុជាត្រូវពិនិត្យឲ្យបានច្បាស់ ហើយអង្គភាពសាមី ត្រូវផ្ដល់តម្លៃដល់មន្ត្រីដែលបានបណ្ដុះបណ្ដាល។ លោកថ្លែងថា កន្លងមកធ្លាប់មានមន្ត្រីដែលចេះជំនាញ តែមិនមានគុណធម៌ហើយបានធ្វើសកម្មភាពផ្ដេសផ្ដាសពេលចេញទៅវិញ។
លោកមានប្រសាសន៍ថា៖ «ជួនអីគឺថា ទៅប្រើប្រាស់មុខជំនាញទៅជាចោរប្លន់ ចោរលួចអីក៏មាន។ អាហ្នឹងវាមាន តែអាហ្នឹងរឿងផ្សេង អ្នកដែលមានគុណភាពល្អ មានសីលធម៌ល្អចំណេះដឹងល្អដែលបានលត់ដំ រៀនសូត្រហើយនោះ យើងត្រូវតែប្រើប្រាស់គេ ហើយចៀសវាងកុំឲ្យសល់គំនិតចាស់ពីមុនមកថា បើអញប្រើមិនកើត ឯងទៅរៀនទៅ នៅធ្វើការនាំទើសមុខមាត់គេ ហើយលើកក្រោយឲ្យមករៀនទៀត។ អ៊ីចឹងមុខរបរគាត់គិតតែរៀនតែម្ដង»។
លោក ស ខេង បានលើកឡើងករណី ១ ដែលប៉ូលិសម្នាក់នៅភ្នំពេញបានប្រព្រឹត្តបទល្មើសឆបោក និងគ្រឿងញៀន ហើយត្រូវបានដេញចោលពីក្របខ័ណ្ឌ។ ប៉ុន្តែប៉ូលិសរូបនេះបានដាក់ពាក្យចូលធ្វើប៉ូលិស ហើយបានប្រឡងជាប់ ធ្វើការនៅបណ្ឌិត្យសភានគរបាល។ ប៉ុន្តែរឿងនេះត្រូវបានលោកនាយករដ្ឋមន្ត្រី ហ៊ុន សែន ដឹង ហើយបានប្រាប់លោក។ តែប៉ូលិសរូបនេះត្រូវបានដកចោលវិញហើយ។
លោកលើកទឹកចិត្តឲ្យជ្រើសរើសបេក្ខជនមានសមត្ថភាពពីមូលដ្ឋាន សម្រាប់ក្របខ័ណ្ឌមន្ត្រីនគរបាលប៉ុស្តិ៍រដ្ឋបាលទាំងអស់ពីព្រោះអ្នកនៅមូលដ្ឋាននោះផ្ទាល់បានស្គាល់មូលដ្ឋានរបស់ខ្លួនយ៉ាងច្បាស់។ ពួកគេងាយស្រួលធ្វើការងារជាមួយប្រជាពលរដ្ឋ និងអាចគ្រប់គ្រងមូលដ្ឋានប្រកបដោយប្រសិទ្ធភាព។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានថ្លែងពីម្សិលមិញថា ស្រុកទេសមានសុខសុវត្ថិភាពអាស្រ័យលើគុណភាពនៃការការពារសុខសុវត្ថិភាពជូនប្រជាជនពីសំណាក់នគរបាល និងកងកម្លាំងប្រដាប់អាវុធ។ ប៉ុន្តែលោកយល់ថា កងកម្លាំងប្រដាប់អាវុធមួយចំនួនមានសមត្ថភាព តែសីលធម៌របស់ពួកគាត់ហាក់ដូចជានៅទាបនៅឡើយ។ ពួកគាត់ខ្លះហាក់ដូចមិនទាន់យល់ច្បាស់ពីគោលការណ៍ប្រជាធិបតេយ្យ និងសិទ្ធិមនុស្ស។ ការប្រើប្រាស់អំណាចក៏ហាក់ដូចជាហួសពីសមត្ថកិច្ច និងមានអំពើពុករលួយ។
លោកថ្លែងថា៖ «ខ្ញុំចង់ឃើញកងកម្លាំងប្រដាប់អាវុធជាពិសេសនគរបាលគឺជាមិត្តរបស់ប្រជាពលរដ្ឋ ព្រោះអាកប្បកិរិយារបស់កងកម្លាំងមានសមត្ថកិច្ចយើងកន្លងមក ទំនាក់ទំនងជាមួយពលរដ្ឋហាក់ដូចជាបែងចែកដាច់ស្រឡះ។ ប្រជាពលរដ្ឋយើងខ្លាចអាជ្ញាធរជាជាងខ្លាចច្បាប់។ បើសិនទំនាក់ទំនងមានភាពជិតស្និទ្ធជាមួយគ្នា ខ្ញុំជឿថា កងកម្លាំងនគរបាលនឹងទទួលបានការគោរពពីប្រជាពលរដ្ឋ។ នៅពេលពលរដ្ឋគោរពនគរបាល ពេលនោះការគោរពច្បាប់ក៏មានភាពប្រសើរឡើង»។ លោកថា គុណភាពនៃការគោរពច្បាប់នៅក្នុងសង្គមនឹងប្រសើរឡើងនៅពេលពលរដ្ឋ និងកងកម្លាំងនគរបាល ផ្លាស់ប្ដូរទៅជាបរិយាកាសមួយមានការគោរពគ្នាទៅវិញទៅមក៕
វីដេអូ៖
