The Phnom Penh Post Search

Search form

Logo of Phnom Penh Post newspaper Phnom Penh Post - លោក​ ស ខេង ​ព្រមាន​សមត្ថកិច្ច​កុំ​ឲ្យ​ពាក់ព័ន្ធ​នឹង​ការ​ជួញដូរ​គ្រឿងញៀន

លោក​ ស ខេង ​ព្រមាន​សមត្ថកិច្ច​កុំ​ឲ្យ​ពាក់ព័ន្ធ​នឹង​ការ​ជួញដូរ​គ្រឿងញៀន

Content image - Phnom Penh Post

លោក​ ស ខេង ​ព្រមាន​សមត្ថកិច្ច​កុំ​ឲ្យ​ពាក់ព័ន្ធ​នឹង​ការ​ជួញដូរ​គ្រឿងញៀន

ភ្នំពេញៈ រដ្ឋមន្ត្រី​ក្រសួង​មហាផ្ទៃ និង​ជា​ប្រធាន​យុទ្ធនាការ​ប្រឆាំង​គ្រឿង​ញៀន​លោក ស ខេង បាន​បញ្ជា​ឱ្យ​ដាក់​ប៉ុស្តិ៍​ត្រួតពិនិត្យ​គឿង​ញៀន​នៅ​តាម​ព្រំដែន​ដើម្បី​ទប់ស្កាត់​ចរាចរណ៍​គ្រឿងញៀន និង​បង្កើន​សន្តិសុខ​​ក្នុង​ប្រទេស​ជាមួយ​នឹង​ការ​​ព្រមាន​សមត្ថកិច្ច​កុំ​ឱ្យ​ពាក់ព័ន្ធ​ការ​ជួញដូរ​គ្រឿងញៀន ខណៈ​គ្រឿងញៀន​កាន់តែ​រីករាលដាល​ខ្លាំង​ឡើង​នៅ​​ស្ទើរ​គ្រប់​ច្រក​ល្ហក​ទូទាំង​ប្រទេស​។

ការ​ជំរុញ​នេះ​ធ្វើ​ឡើង​ក្នុង​កម្មវិធី​ប្រជុំ​ផ្សព្វផ្សាយ​ផែនការ​ស្តីពី​យុទ្ធនាការ​ប្រឆាំង​គ្រឿងញៀន​លើក​ទី ១ កាលពី​ម្សិលមិញ​នៅ​វិទ្យាស្ថាន​ជាតិ​អប់រំ​ដែល​មាន​សមាសភាព​មន្ត្រី​នគរបាល និង​អាជ្ញាធរ​ពាក់ព័ន្ធ​ជាច្រើន​បាន​ចូលរួម។ យុទ្ធនាការ​នេះ​នឹង​ចាប់ផ្តើម​ពី​ថ្ងៃ​ទី ១ មករា​ដល់​ថ្ងៃ​ទី ៣០ មិថុនា​ឆ្នាំ ២០១៧ ដែល​មាន​ទាំង​វិធានការ​ក្តៅ​ និង​​វិធានការ​អប់រំ​។

លោក ស ខេង បាន​ថ្លែង​ថា​ការ​បង្ក្រាប​គ្រឿងញៀន​របស់​កងកម្លាំង​នគរបាល និង​កងរាជ​អាវុធហត្ថ​ទទួល​បាន​លទ្ធផល​កាន់តែ​ខ្ពស់​ខណៈ​តួលេខ​នៃ​ការ​បង្ក្រាប​ឆ្នាំ ២០១៥ និង​ឆ្នាំ ២០១៦ មាន​កម្រិត​កើន​ឡើង​ទ្វេគុណ ឬ​ត្រីគុណ​ទាំង​មុខ​សញ្ញា​ល្មើស​ដែល​ចាប់​បាន និង​បរិមាណ​សារធាតុញៀន។

តែ​លោក​ថា ​លទ្ធផល​នេះ​បង្ហាញ​ភាព​វិជ្ជមាន​ផង​ និង​អវិជ្ជមាន​ផង​។ «មាន​ន័យ​ថា​តួលេខ​កើនឡើង​នៃ​លទ្ធផល​ក្នុង​ការ​បង្ក្រាប​កើន​បាន​បញ្ជាក់​អំពី​ស្នាដៃ​ធំធេង​របស់​កម្លាំង​អនុវត្ត​ច្បាប់​ប៉ុន្តែ​វា​ក៏​បង្ហាញ​ឱ្យ​ឃើញ​ផង​ដែរ​ថា​សកម្មភាព​ចរាចរណ៍​ជួញដូរ​គ្រឿងញៀន​នៅក្នុង​ប្រទេស​យើង​មិន​មាន​ការ​ថមថយ​ឡើយ​»។

លោក​បន្ថែម​ថា​តួលេខ​នៃ​ការ​ប្រើប្រាស់​គ្រឿងញៀន​មាន​ការ​កើនឡើង​ជាពិសេស​ក្នុង​ស្រទាប់​យុវវ័យ។ «ខ្ញុំ​នឹង​សើរើ​សមាសភាព​បញ្ជី​ការ​រៀបចំ​ទី​បញ្ជាការ​មួយ​នៅ​កន្លែង​ហ្នឹង​ច្រក​ចូល​ដែល​ធំ​ជាង​គេ​គឺ​ព្រំប្រទល់​កម្ពុជា ឡាវ ...និង​ដាក់​ប៉ុស្តិ៍​ត្រួតពិនិត្យ​តាម​ច្រក​ប្រៃសណីយ៍​ច្រក​តាម​ព្រលាន​យន្តហោះ​»។

លោក​ក៏​ព្រមាន​ដល់​សមត្ថកិច្ច​កុំ​ឱ្យ​ពាក់ព័ន្ធ​នឹង​ការ​ជួញដូរ​គឿង​ញៀន។ «សមត្ថកិច្ច និង​មន្ត្រី​រាជការ​យើង​ទាំងអស់​សូម​មេត្តា​ត្រូវ​ដាក់​ខ្លួន​ឱ្យ​ឆ្ងាយ​ពី​គ្រឿង​ញៀន​ពិសេស​សមត្ថកិច្ច​ដែល​បង្ក្រាប​អ្នក​អនុវត្ត​ច្បាប់​ព្រោះ​សមត្ថកិច្ច​ហ្នឹង​បើ​យើង​ធ្មេច​ភ្នែក​ចុះ​ឡើង​គឺ​ទៅ​ហើយ (ជួញដូរ​ហើយ) ហើយ​សូម​កុំ​ឱ្យ​មាន​អន្តរាគមន៍ បើ​សមត្ថកិច្ច​ធ្វើ​ខុស​ត្រូវ​ទទួល​ខុស​មុខ​ច្បាប់...»។ «ព្រោះ​កន្លងមក​មាន​សមត្ថកិច្ច​មួយ​ចំនួន​ យើង​បាន​ដឹង​ហើយ​ឱ្យ​ទៅ​ធ្វើការ ​(បង្ក្រាប​គ្រឿង​ញៀន) ទៅ​រកស៊ី​​គ្រឿង​ញឿន​វិញ​ចាប់​របស់​គេ​មក​យក​ទៅ​លក់​ចឹង​ធ្វើ​ម៉េច​ឈ្នះ​​​»​។

ក្នុង​កិច្ចប្រជុំ​នោះ​ដែរ​ប្រធាន​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​លោក កែ គឹមយ៉ាន ក៏​បាន​ព្រមាន​​ដែរ​ថា​នឹង​ដាក់​ទោស​កាន់​តែ​ធ្ងន់​លើ​មន្ត្រី​អនុវត្ត​ច្បាប់​ណា​ដែល​ពាក់ព័ន្ធ​នឹង​គ្រឿងញៀន​ដោយ​លោក​សង្កត់ធ្ងន់​ថា «បើ​មន្ត្រី​របស់​យើង​មាន​ឋានៈ​កាន់តែ​ខ្ពស់​ទោស​កាន់​តែ​​ធ្ងន់​ក្នុង​ពេល​ប្រតិបត្តិការ​គឺ​ទោស​ត្រូវ​ទ្វេដង​មិនមែន​ត្រូវ​បន្ថយ​ទេ...ក្នុង​ករណី​នាយ​ទាហាន ឬ​​​​មន្ត្រី​ជាន់​ខ្ពស់​ផ្សេង​ទៀត​គឺ​មាន​ទម្ងន់​ទ្វេទោស​ដូច​គ្នា... មួយ​ទៀត​ខ្ញុំ​​ក៏​មិន​យល់​ដែរ​ថ្មីៗ​នេះ​ខាង​កងអាវុធហត្ថ​បង្ក្រាប​ជន​ជួញដូរ​គ្រឿងញៀន​បាញ់​សម្លាប់​សមត្ថកិច្ច​តែ​ដាក់គុក​តែ ៤ ឬ ៥ ឆ្នាំ​ទេ​តែ​ករណី​មួយ​ទៀត​គ្រាន់តែ​ឈ្លោះ​ជាមួយ​សង្សារ​បាញ់​ងាប់​ដាក់​គុក​មួយ​ជីវិត​យើង​​មើល​ទោស​អត់​សមហេតុផល​»។

យុទ្ធនាការ​ប្រយុទ្ធ​ប្រឆាំង​គ្រឿង​ញៀន​រួម​មាន​បើក​យុទ្ធនាការ​ជា​ប្រចាំ​បោស​សម្អាត​ពួក​​ជួញដូរ​គ្រឿងញៀន​ជា​ក្រុម​តូចៗ​អនុវត្ត​ច្បាប់​ឱ្យ​តឹងរ៉ឹង​ត្រូវ​តាមដាន​ឱ្យ​ម៉ឺងម៉ាត់​នូវ​សកម្មភាព​ផលិត​កែច្នៃ​គ្រឿង​ញៀន​។

លោក David Harding ដែល​ជា​អ្នក​ឯកទេស​ឯករាជ្យ​ស្តីពី​គ្រឿងញៀន​បាន​ថ្លែង​ថា «ការ​តម្រង់​ទិសដៅ​ទៅ​រក​ឈ្មួញ​ជួញដូរ​ទ្រង់ទ្រាយ​តូច​ដែល​មិន​សំខាន់​នឹង​មិន​មាន​ឥទ្ធិពល» ទៅ​លើ​បញ្ហា​ធំ​នៃ​ការ​ជួញដូរ​ទេ។ «ទាំង​នោះ​គឺ​មាន​និន្នាការ​ចាប់​អ្នក​ជួញដូរ​ទ្រង់ទ្រាយ​តូច​ដាក់​ពេញ​ពន្ធនាគារ​ និង​បង្កើត​នូវ​បញ្ហា​សុខភាព​ធំ​ដល់​អ្នក​ប្រើប្រាស់​គ្រឿងញៀន»។ «ប្រសិន​បើ​រដ្ឋាភិបាល​កម្ពុជា​ពិត​ជា​ចង់​ចាប់ផ្តើម​ឲ្យ​មាន​ផល​ទៅ​លើ​ការ​កាត់​បន្ថយ​ការ​ផ្គត់ផ្គង់​ចូល​មក​ក្នុង​ប្រទេស​រដ្ឋាភិបាល​ត្រូវ​តែ​ធ្វើការ​សង្កត់​ធ្ងន់​បន្ថែម​ និង​ដាក់​ធនធាន​បន្ថែម​ទៀត​ដើម្បី​ឈាន​ទៅ​ដល់​ការ​ចាប់​អ្នក​ដែល​ពិត​ជា​កំពុង​ធ្វើឲ្យ​មាន​ការ​ជួញដូរ»៕ PS/រាយការណ៍​បន្ថែមៈ ERIN Handley

អត្ថបទគួរចាប់អារម្មណ៍