.jpg)
លោក ស ខេង រដ្ឋមន្ត្រីក្រសួងមហាផ្ទៃបានព្រមានដល់អ្នកដែលបំផុសព័ត៌មានមិនពិតអំពីបញ្ហាជំងឺកូវីដ-១៩ ដើម្បីផ្សព្វផ្សាយធ្វើឲ្យសង្គមច្របូកច្របល់អាចនឹងទទួលខុសត្រូវចំពោះមុខច្បាប់។ Sar Kheng Page
ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃបានព្រមានដល់អ្នកដែលបំផុសព័ត៌មានមិនពិតអំពីបញ្ហាជំងឺកូវីដ-១៩ដើម្បីផ្សព្វផ្សាយធ្វើឲ្យសង្គមច្របូកច្របល់អាចនឹងទទួលខុសត្រូវចំពោះមុខច្បាប់។ យោងតាមលោកឧបនាយករដ្ឋមន្ត្រី ស ខេង ថ្លែងទៅកាន់អ្នកសារព័ត៌មានក្រោយបញ្ចប់កិច្ចប្រជុំស្ដីពីវិធានការការពារជំងឺកូវីដ ១៩ កាលពីថ្ងៃសុក្រ ទី ២០ ខែមីនា ឆ្នាំ ២០២០ នៅទីស្ដីការក្រសួងមហាផ្ទៃ។
លោក ស ខេង បានថ្លែងថា៖ «ក្នុងពេលនេះសកលលោកទាំងមូលកំពុងសាមគ្គីគ្នាដើម្បីទប់ស្កាត់នឹងជំងឺកូវីដ១៩នេះ។ ដូច្នេះខ្មែរយើងក៏ដូចគ្នាដែរ ខ្ញុំនៅតែបន្តអំពាវនាវថា ទុកដាក់ផលប្រយោជន៍បុគ្គលនោះនៅដោយឡែកទៅ ប្រយោជន៍ក្រុម បក្ខពួក ពណ៌សម្បុរដោយឡែកសិនទៅដើម្បីរួមគ្នា។ វាមានបញ្ហា ២ ដោយឡែកពីគ្នាទី ១ ទាក់ទងនឹងព័ត៌មានពិត យើងសូមស្វាគមន៍។ ព័ត៌មានពិតជួនអីគេប្រឆាំងនឹងរាជរដ្ឋាភិបាលក្នុងក្របខ័ណ្ឌប្រជាធិបតេយ្យ គេថារដ្ឋាភិបាលមិនយកចិត្ដទុកដាក់ ឬក៏ទិតៀនយ៉ាងនេះ យ៉ាងនោះ វាគឺជាព័ត៌មានពិតទេយើងត្រូវស្វាគមន៍។ ប៉ុន្ដែមួយទៀតព័ត៌មានវាអត់មានទេ រួចហើយគាត់ (អ្នកផ្សព្វផ្សាយព័ត៌មានមិនពិត) បំផុស។ អាហ្នឹងដែលខ្ញុំសុំថាសូមមេត្ដាកាត់បន្ថយ ហើយឈានទៅដល់ការលុបបំបាត់ ដើម្បីយើងរួមគ្នាការពារជីវិត សង្គម និងប្រជាជនរបស់យើង»។
លោកបញ្ជាក់ថា៖ «ឥឡូវនេះវាមានបញ្ហាហ្នឹង អ៊ីចឹងហើយប្រហែលជាតាមច្បាប់យើងជាអាជ្ញាធរអាចថាអ្នកទាំងឡាយណានៅតែប្រើប្រាស់វោហារស័ព្ទដែលនាំឱ្យច្របូកច្របល់អាចនឹងត្រូវទទួលខុសត្រូវចំពោះមុខច្បាប់»។ ក្រោយពីជំងឺកូវីដ ១៩ កំពុងមានកំណើននៃការឆ្លងនៅកម្ពុជាលោក ស ខេង ក៏បានធ្វើការអំពាវនាវទៅដល់ប្រជាពលរដ្ឋខ្មែរទាំងអស់ថា កុំមានការរើសអើងបក្ខពួក និងពណ៌សម្បុរ ចំណែកអ្នកបង្ហោះព័ត៌មានមិនពិត ជុំវិញបញ្ហា កូវីដ១៩ នឹងត្រូវទទួលខុសត្រូវមុខច្បាប់ជាមិនខាន។
លោកថ្លែងថា៖ «សម្ដេចតេជោលោកបានណែនាំថា មិនត្រូវចែកខ្មែរអ៊ិស្លាម ខ្មែរនេះ ខ្មែរនោះទេ គឺបងប្អូនខ្មែរយើងបានផ្សាយហើយ។ ក្នុងសេចក្ដីណែនាំរបស់ក្រសួងមហាផ្ទៃទៅតាមខេត្តបញ្ជាក់ចំណុចនេះផងដែរ គឺថាមិនត្រូវរើសអើងទេ ហើយមិនត្រឹមតែខ្មែរអ៊ិស្លាមទេ ជនជាតិណាក៏ដោយ ដែលបានមកកម្ពុជា ជួបបញ្ហានឹង (កូវីដ ១៩) យើងក៏មិនត្រូវរើសអើងដែរ»។
ក្រសួងព័ត៌មានកាលពីថ្ងៃពុធ ទី ១៨ ខែមីនា បានបង្ហាញពីគណនីហ្វេសប៊ុក និងគេហទំព័រហ្វេសប៊ុកចំនួន ៤៧ ដែលបានផ្សព្វផ្សាយព័ត៌មានមិនពិតអំពីការឆ្លងជំងឺកូវីដ ១៩ នៅកម្ពុជា ដែលការផ្សព្វផ្សាយព័ត៌មានមិនពិតនោះមានចេតនាបង្កាច់បង្ខូចឈ្មោះរាជរដ្ឋាភិបាល និងបង្កឱ្យពលរដ្ឋមានការភ័យខ្លាច។ ជាមួយគ្នានោះក្រសួងព័ត៌មានក៏បានព្រមានចាត់វិធានការផ្លូវច្បាប់ផងដែរ ប្រសិនបើគណនីហ្វេសប៊ុក ឬគេហទំព័រទាំងនោះមិនព្រមធ្វើការកែប្រែឡើងវិញ។
ក្រសួងនេះឲ្យដឹងថា៖ «ទន្ទឹមនឹងការខិតខំប្រឹងប្រែងរបស់ក្រសួងសុខាភិបាល ក្រសួងស្ថាប័នពាក់ព័ន្ធសាធារណជន និងអ្នកសារព័ត៌មានក្នុងការប្រយុទ្ធនឹងជំងឺកូវីដ ១៩ ក៏មានអ្នកប្រើប្រាស់បណ្ដាញសង្គមមួយចំនួនបែរជាបង្កើតព័ត៌មានមិនពិតក្នុងចេតនាបន្លំ បំភ្លៃ បំភាន់ បង្វែរស្ថានការណ៍ដើម្បីបង្កាច់បង្ខូចឈ្មោះរាជរដ្ឋាភិបាលកម្ពុជា និងបង្កឱ្យប្រជាពលរដ្ឋមានការភ័យខ្លាច»៕
