.jpg)
លោក កឹម សុខា អតីតប្រធានអតីតគណបក្សសង្គ្រោះជាតិពិសាបាយជាមួយគ្រួសារនៅឯផ្ទះរបស់លោក។ រូបថតហ្វេសប៊ុក Muth Chantha
ព្រៃវែងៈ លោក ស ខេង បានរៀបរាប់លម្អិតអំពីអ្វីដែលលោកបានបើកកិច្ចប្រជុំដើម្បីយកលោក កឹម សុខា ពីការឃុំខ្លួននៅក្នុងពន្ធនាគារត្រពាំងផ្លុង ក្នុងខេត្តត្បូងឃ្មុំ មកឃុំខ្លួននៅក្នុងផ្ទះរបស់លោកនៅក្នុងខណ្ឌទួលគោក ខណៈដែលសហគមន៍អន្តរជាតិ និងអ្នកវិភាគបានទទូចឲ្យមានការទម្លាក់ចោលបទចោទប្រកាន់ទាំងស្រុងទៅលើអតីតមេដឹកនាំគណបក្សប្រឆាំងរូបនេះ។
អនុប្រធានគណបក្សប្រជាជនកម្ពុជាលោក ស ខេង ដែលជាឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានថ្លែងនៅក្នុងកិច្ចប្រជុំបូកសរុបសកម្មភាពការងារ និងលទ្ធផលនៃការបោះឆ្នោតជ្រើសតាំងតំណាងរាស្ត្រកាលពីខែកក្កដាដែលត្រូវបានផ្សាយផ្ទាល់តាមទំព័រហ្វេសប៊ុករបស់លោកកាលពីថ្ងៃអាទិត្យម្សិលមិញ នៅទីស្នាក់ការបក្សប្រជាជនកម្ពុជានៅខេត្តព្រៃវែងដោយលោកបានរៀបរាប់ពីដំណើរការយកលោក កឹម សុខា អតីតប្រធានគណបក្សសង្គ្រោះជាតិមកឃុំខ្លួននៅក្នុងផ្ទះរបស់លោកក្នុងក្រុងភ្នំពេញ។
លោក ស ខេង ថ្លែងថា៖ «អ៊ីចឹង កឹម សុខា ឥឡូវនេះយើងយកមកទុកនៅផ្ទះ។ ច្បាប់យើងអត់មានច្បាប់ព្រហ្មទណ្ឌហ្នឹងណា អត់អនុញ្ញាតឲ្យឃុំខ្លួននៅផ្ទះទេ អត់មានទេ។ គេថា ឃុំខ្លួននៅក្នុងដែនដីណាមួយជាកំណត់។ អ៊ីចឹងធ្វើម៉េចឥឡូវ? ចន្លោះដែលអ្នកសរសេរច្បាប់ព្រហ្មទណ្ឌអត់មានឃុំខ្លួននៅផ្ទះ។ ដល់អ៊ីចឹងរកវិធី។ ខ្ញុំថា ឥឡូវព្រាងឲ្យហើយទៅឲ្យផានយកទៅ (ប៉ាវ ហមផាន)។ ព្រាងឲ្យហើយ កាន់ពីហ្នឹងទៅ ទៅដល់ចរចាជាមួយនឹង កឹម សុខា ខ្លួនឯង ព្រោះ ផាន ហ្នឹងទៅយកមក។ និយាយគ្នាម៉ោង ៣ (ថ្ងៃ ៩ កញ្ញា) ប៉ុន្តែថា ធ្វើម៉េចម៉ោង ៥ ភ្លឺយ៉ាងយូរត្រូវយកមនុស្សហ្នឹងមកឲ្យដល់ភ្នំពេញប្រកបដោយសុវត្ថិភាព ហើយទម្រាំជជែកគ្នាហើយ ប្រហែលម៉ោង ៦ ហើយបានចែកផ្លូវគ្នាធ្វើការ»។
លោកបន្តថា៖ «ឥឡូវយើងពិបាកការពារណា។ បើកម្លាំងយើង ដាក់នៅផ្ទះអត់កើតទេ ពីព្រោះឃុំខ្លួននៅផ្ទះវាអត់មានច្បាប់ តែយើងដាក់ (គឺ) ខុសច្បាប់។ អ៊ីចឹងវាមានតែគូសរង្វង់ផ្លូវហ្នឹង ផ្ទះ កឹម សុខា នៅត្រង់ហ្នឹងអ៊ីចឹងទៅអារង្វង់ផ្លូវខាងជើងខាងត្បូងខាងលិចខាងកើត ប៉ុន្មានៗអ៊ីចឹងទៅ យើងការពារហ្នឹងដល់អ៊ីចឹងវានៅបរិវេណក្នុងរង្វង់ហ្នឹងវាទូលាយពេក។ ដល់អ៊ីចឹងយើងរកវិធីមួយថា ឥឡូវអីចេះព្រាងសំបុត្រមួយឲ្យហើយ ដើម្បីធានាសន្តិសុខ។ រដ្ឋាភិបាលមានភារកិច្ចទទួលខុសត្រូវសន្តិសុខរដ្ឋាភិបាលគ្មានហេតុផលណាធ្វើបាប ចង់និយាយថា ទៅសម្លាប់ កឹម សុខា ទេ»។
លោក ស ខេង បានរៀបរាប់ពីដំណើរការនៃការសម្រេចចិត្តយកលោក កឹម សុខា មកឃុំនៅក្នុងផ្ទះដោយលោកថ្លែងថាធ្វើឡើងនៅក្នុងកិច្ចប្រជុំមួយ មួយថ្ងៃមុនពេលនាំខ្លួនលោក កឹម សុខា ពីពន្ធនាគារត្រពាំងផ្លុងយកមកឃុំនៅក្នុងផ្ទះ ដោយមានការពិភាក្សាគ្នាពីម៉ោង ៣ រហូតដល់ម៉ោង ៦ ល្ងាចថ្ងៃទី ៩ ខែកញ្ញា និងសម្រេចថាធ្វើយ៉ាងណាយកលោក កឹម សុខា មកដល់ផ្ទះរបស់លោកយ៉ាងយូរម៉ោង ៥ ព្រឹកថ្ងៃទី ១០។ សូម្បីតែសំបុត្ររបស់លោក កឹម សុខា ដែលស្នើសុំការការពារសន្តិសុខក៏លោក ស ខេង បានទម្លាយឲ្យដឹងដែរ គឺថាជាការរៀបចំឡើងដោយលោក ប៉ាវ ហមផាន រដ្ឋលេខាធិការក្រសួងមហាផ្ទៃ។
លោក ស ខេង បានរៀបរាប់ថា៖ «ដល់ហើយសរសេរថាដោយសារបញ្ហាសន្តិសុខ អ៊ីចឹងទៅខ្ញុំសុំស្នើអគ្គស្នងការនគរបាលជាតិជួយរៀបចំការពារសន្តិសុខ សុវត្ថិភាពសម្រាប់ខ្ញុំ ហើយ ផាន គេយកទៅចរចា។ ដល់ចរចាទៅក៏ឯកភាព។ ឯកភាពប៉ុន្តែយើងអត់យកអាក្រដាសវាយពុម្ពអក្សរទៅហើយ អូសពីកុំព្យូទ័រទៅទេ គឺឲ្យសរសេរដៃ។ ដំបូងដាក់ថាការពារគេហដ្ឋាន ហើយដល់បងប្អូនរាយការណ៍មកថា ឥឡូវសុំលុបពាក្យគេហដ្ឋានហ្នឹង ខ្ញុំថាក៏បានដែរ ឲ្យតែការពារសន្តិសុខក៏បានដែរ។ សន្តិសុខមិនមែនទៅការពារ ២ គីឡូទេ ការពារសន្តិសុខវានៅជាប់ហ្នឹងបានការពារបាន។ អ៊ីចឹងលុបអាពាក្យហ្នឹងដល់លុបពាក្យហ្នឹងយើង មិនមែនថាដាក់ផ្ទះមិនបានដើម្បីការពារសន្តិសុខ ដាក់នៅនឹងផ្ទះនោះហើយ។ មានអីគាត់អត់ចោទយើងកើតទេ ពីព្រោះគាត់អ្នកសុំកម្លាំងការពារ។ ព្រោះច្បាប់យើងអ៊ីចឹង ច្បាប់យើងអត់ឲ្យមានឃុំខ្លួនក្នុងផ្ទះផង»។
លោក កឹម សុខា ឱបម្តាយរបស់លោកនៅផ្ទះក្នុងខណ្ឌទួលគោក។ រូបថត ហ្វេសប៊ុក
លោក ស ខេង ក៏បញ្ជាក់ថាការការពារសន្តិសុខសម្រាប់លោក សុខា ក៏ជារឿងជាក់ស្ដែងដែលត្រូវធ្វើហើយលោកក៏បានធ្វើការវាយប្រហារទៅលើលោក សម រង្ស៊ី ដែលកំពុងនៅក្រៅប្រទេស។
លោកនិយាយថា បញ្ហាផ្ទៃក្នុងរបស់គណបក្សសង្គ្រោះជាតិគឺការបែកបាក់គ្នារវាងលោក សម រង្ស៊ី នឹងក្រុមរបស់លោក កឹម សុខា។ លោកថាលោក សម រង្ស៊ី ចង់ធ្វើប្រធានគណបក្សសង្គ្រោះជាតិឡើងវិញ ហើយមិនចង់ឲ្យលោក កឹម សុខា ចេញពីពន្ធនាគារទេ ខណៈពេលដែលលោក កឹម សុខា ក៏មិនចង់ឲ្យលោក សម រង្ស៊ី វិលត្រឡប់ចូលមកស្រុកវិញដែរ។
លោកបានហៅលោក សម រង្ស៊ី ថា ជាមនុស្សកំសាក មិនទទួលខុសត្រូវចំពោះទង្វើដែលខ្លួនបានធ្វើដោយថ្លែងថា៖ «មែនទែន សម រង្ស៊ី ជាមនុស្សកំសាកបំផុត កំសាកគ្មានលក្ខណៈ។ តែខ្ញុំនិយាយអ៊ីចឹងមិនមែនថា វាយប្រហារបុគ្គលទេ ប៉ុន្តែធម្មតាយើងត្រូវមើលឃើញដែរថា ជាមនុស្សកំសាក កំសាកណាស់។ ថាតែមិនទទួលខុស-ត្រូវ ធ្វើតែមិនទទួលខុសត្រូវ។ ចង់និយាយថាម៉េច? គាត់វាយប្រហារនិយាយបរិហារកេរ្តិ៍ ឬមួយក៏ធ្វើសកម្មភាពផ្សេងៗដោយខុសច្បាប់ដល់ពេលគេចោទប្រកាន់ហ្នឹងគឺថាប្រូច...នេះហើយដែលកំសាក ហើយចាប់ផ្តើមទៅដល់ អត់មានអីទេ ស្រែកចំកោងពីក្រៅហ្នឹងមក ស្រែកជេរពីក្រៅមក»។
ប៉ុន្តែទោះជាយ៉ាងណាការរៀបរាប់របស់លោក ស ខេង គឺពុំបានបញ្ជាក់ពីមូលហេតុដែលឈានដល់ការសម្រេចផ្ទេរលោក កឹម សុខា ពីពន្ធនាគារ ម ៣ មកឃុំខ្លួននៅក្នុងផ្ទះនោះទេ ខណៈដែលលោកនាយករដ្ឋមន្ត្រី ហ៊ុន សែន និងសាលដីការបស់តុលាការបានបញ្ជាក់ថាការដោះលែងឲ្យនៅក្រៅឃុំបណ្តោះអាសន្នក្រោមលក្ខខណ្ឌតឹងរ៉ឹងនេះគឺដោយផ្អែកលើហេតុផលសុខភាពដែលលោក សុខា និងក្រុមមេធាវីរបស់លោកបានស្នើជាច្រើនលើកមកហើយ។
លោក ខៀវ សុភ័គ អ្នកនាំពាក្យក្រសួងមហាផ្ទៃ មិនអាចទាក់ទងសុំការបញ្ជាក់បន្ថែមលើបញ្ហានេះបានទេកាលពីម្សិលមិញ ដោយទូរស័ព្ទរបស់លោកមិនអាចទាក់ទងបាន។
ទោះយ៉ាងណាលោក ស ខេង បានបញ្ជាក់យ៉ាងច្បាស់ថា ករណីលោក កឹម សុខា នឹងត្រូវបញ្ចប់តាមនីតិវិធីរបស់តុលាការ ដើម្បីបញ្ចៀសការចោទប្រកាន់មកលើរដ្ឋាភិបាល។ «ប៉ុន្តែសម្រាប់ កឹម សុខា នេះយើងត្រូវតែដំណើរការតាមនីតិវិធីតុលាការឲ្យចប់។ ពីព្រោះបើយើងមិនធ្វើតាមនីតិវិធីតុលាការទេ រដ្ឋាភិបាលជាអ្នកខុសការចោទប្រកាន់គេគឺមិនត្រឹមត្រូវ នេះហើយជាបញ្ហាដែលយើងត្រូវដឹងទាំងអស់គ្នាថាអ៊ីចឹង។ ទោះបីយ៉ាងណាក៏ដោយត្រូវមានទីបញ្ចប់បញ្ហា»។
ជាមួយគ្នានេះលោក ស ខេង ថ្លែងដែរថាឯកអគ្គរដ្ឋទូតថ្មីរបស់សហរដ្ឋអាមេរិកគឺលោក Patrick Murphy ដែលនឹងមកជំនួសលោក William A. Heidt ធ្លាប់បានជួបជាមួយលោកហើយនិយាយថា៖ «កាត់ទោសយ៉ាងម៉េចកាត់ទោសទៅតែសុំកុំឲ្យមានឈ្មោះអាមេរិកាំង ហើយខ្ញុំបានប្រាប់គាត់វិញថា រឿងឈ្មោះអាមេរិកាំងហ្នឹង កឹម សុខា ទេគាត់បាននិយាយមិនមែនយើងខ្ញុំអ្នកនិយាយឯណា? គាត់ក៏បាត់មាត់ទៅ»។
លោក សម រង្ស៊ី ដែលកំពុងស្ថិតនៅក្រៅប្រទេសបានថ្លែងប្រាប់ភ្នំពេញ-ប៉ុស្តិ៍តាមសារអេឡិចត្រូនិកកាលពីម្សិលមិញថាការលើកឡើងរបស់លោក ស ខេង ដែលថាអតីតគណបក្សសង្គ្រោះជាតិមានការបែកបាក់ផ្ទៃក្នុងគឺគ្រាន់តែជាការប្រឌិតប៉ុណ្ណោះ។
លោកថ្លែងថា៖ «នេះជារឿងប្រឌិតសុទ្ធសាធ។ នេះជាការចង់បានរបស់គណបក្សប្រជាជនកម្ពុជា។ លោក កឹម សុខា ហើយនិងខ្ញុំ បើទោះបីជាលោកត្រូវបានចាប់ជាចំណាប់ខ្មាំងដោយលោក ហ៊ុន សែន ក៏ដោយ ក៏ពួកយើងនឹងប្រយុទ្ធទាំងអស់គ្នាប្រឆាំងនឹងគណបក្សប្រជាជនកម្ពុជា ពីព្រោះយើងដឹងថាសាមគ្គីភាពរបស់យើងធានាបាននូវជ័យជម្នះ»។
ការលើកឡើងរបស់លោក ស ខេង ត្រូវបានលោក ឡៅ ម៉ុងហៃ អ្នកវិភាគនយោបាយយល់ថាជាការបង្ហាញពីភាពមិនឯករាជ្យរបស់តុលាការ។ លោកបានរំឭកនូវអនុសាសន៍របស់លោក Surya Subedi អតីតអ្នករាយការណ៍ពិសេសអង្គការសហប្រជាជាតិផ្នែកសិទ្ធិមនុស្សប្រចាំនៅកម្ពុជាដែលបានថ្លែងកាលពីឆ្នាំ ២០១៤ ថា «តុលាការត្រូវបានប្រើម្ដងហើយម្ដងទៀត ជាឧបករណ៍របស់ស្ថាប័ននីតិប្រតិបត្តិ»។
ពាក់ព័ន្ធនឹងករណីលោក កឹម សុខា លោក ឡៅ ម៉ុងហៃ ថ្លែងថាមានភាពខុសគ្នាពីការដោះលែងលោក ញឹក ប៊ុនឆៃ ប្រធានគណបក្សខ្មែររួបរួមជាតិ ដែលត្រូវគេចោទប្រកាន់ថាមានពាក់ព័ន្ធនឹងគ្រឿងញៀន។ «លោក ញឹក ប៊ុនឆៃ បានទទួលជីវិតជាជនមានសេរីភាព។ លោក កឹម សុខា ក៏គួរតែទទួលបានការនៅក្រៅឃុំបណ្ដោះអាសន្នដូចគ្នាដែរ»។
ចំពោះការឃុំឃាំងក្នុងផ្ទះវិញ លោក ម៉ុងហៃ ថ្លែងថាទោះបីជាមិនមានច្បាប់ក៏ដោយ ក៏ការឃុំឃាំងបែបនេះគួរធ្វើឡើងក្រោយពេលកាត់ទោស ហើយរកឃើញថាមានកំហុសគឺដូចករណីលោកស្រី អ៊ុងសាន ស៊ូជី នៃប្រទេសមីយ៉ាន់ម៉ា។
ករណីលោក កឹម សុខា ដែរ លោកមេធាវី ផែង ហេង បានឲ្យដឹងកាលពីម្សិលមិញថានឹងមិនមានសវនាការនៅសាលាឧទ្ធរណ៍ក្នុងបណ្ដឹងជំទាស់នឹងការពន្យារការឃុំខ្លួនលោក សុខា ទេ នៅព្រឹកថ្ងៃចន្ទនេះដោយសារក្រុមមេធាវីបានដកពាក្យបណ្ដឹងវិញរួចហើយ៕
