ត្បូងឃ្មុំៈ លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃរំឭកឲ្យមន្ត្រីរាជការ ជាពិសេសកងកម្លាំងប្រដាប់អាវុធត្រូវមានភាពអត់ធ្មត់ក្នុងការដោះស្រាយបញ្ហាដែលកើតមានឡើង ជាមួយពលរដ្ឋដោយសន្តិវិធី ចៀសវាងការប្រើនូវអំពើហិង្សាដែលអាចបង្កឲ្យក្លាយទៅជម្លោះរ៉ាំរ៉ៃ ហើយការប្រឆាំងបដិវត្ដន៍ពណ៌គឺត្រូវផ្តើមចេញដោយការធ្វើអំពើល្អ។
ការថ្លែងបែបនេះធ្វើឡើងពីម្សិលមិញក្នុងអំឡុងពេលលោកអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ជាផ្លូវការនូវសមិទ្ធផលនានារបស់ស្នងការដ្ឋាននគរបាលខេត្តត្បូងឃ្មុំស្របពេលដែលលោកបារម្ភថា ការប្រើប្រាស់អំពើហិង្សារបស់កងកម្លាំងប្រដាប់អាវុធនឹងបន្តកើតមាន នៅពេលខាងមុខជាពិសេសគឺចាប់ពីពេលនេះរហូតដល់ឆ្នាំ ២០២២ ឬ ២០២៣។
លោកបញ្ជាក់ថា៖ «យើងថា យើងប្រឆាំងដាច់ខាតបដិវត្ដន៍ពណ៌ ឥឡូវនិយមន័យពិតប្រាកដប្រឆាំងដាច់ខាតបដិវត្តន៍ពណ៌ត្រូវធ្វើម៉េច មិនមែនយកកាំភ្លើងទៅបាញ់គេទេ។ ធ្វើអ៊ីចឹងខុសហើយ គឺយើងត្រូវប្រឆាំងខ្លួនយើងជាមុនសិន។ ចង់និយាយថា យើងត្រូវធ្វើល្អជាមួយប្រជាពលរដ្ឋអាហ្នឹងហើយ ជាអាវុធដ៏ធំបំផុត»។
លោក ស ខេង សង្កត់ធ្ងន់ថា ក្នុងករណីដែលមន្ត្រីអាងអំណាចទៅរំលោភយកដីប្រជាជនទៅរំលោភសិទ្ធិ ឬផលប្រយោជន៍អ្វីផ្សេងទៀតរបស់ពលរដ្ឋនោះនឹងមានការតវ៉ាហើយ ព្រោះពលរដ្ឋមានសិទ្ធិតវ៉ា។ ដូច្នេះលោកថាការដោះស្រាយបញ្ហាទាំងនេះ មន្ត្រីត្រូវតែមានការអត់ធ្មត់ និងព្យាយាមដោះស្រាយបញ្ហាដោយសន្តិវិធី ហើយមិនត្រូវបែងចែកពលរដ្ឋ ឬរើសអើងបក្សនយោបាយនោះទេ គឺត្រូវបម្រើឲ្យបានស្មើភាពគ្នា។
លោកបន្ថែមថា៖ «កុំទៅយកចាញ់ឈ្នះជាមួយពលរដ្ឋ គួរតែចាញ់ពលរដ្ឋទៅ ព្រោះបើករណីដែលមានការប្រើអំពើហិង្សា នោះរឿងនឹងមិនអាចចប់នោះទេ។ ដូច្នេះជាបទពិសោធក្នុងនាមជាមន្ត្រីមុខងារសាធារណៈ ទាំងស៊ីវិល ទាំងនគរបាលក្នុងពេលបំពេញការងារគឺត្រូវបំពេញតាមតួនាទីជាមន្ត្រីមុខងារសាធារណៈ ហើយប្រកាន់ខ្ជាប់នូវវិជ្ជាជីវៈនគរបាល មន្ត្រីរាជការស៊ីវិល»។
ក្រៅពីលើកឡើងយ៉ាងដូច្នេះលោក ស ខេង បានលើកឧទាហរណ៍រឿងជម្លោះដីធ្លីនៅខេត្តព្រៃវែង និងខេត្តមួយចំនួនទៀតដែលទទួលបានជោគជ័យបន្ទាប់ពីមានការចុះដោះស្រាយប្រកបដោយភាពត្រឹមត្រូវ និងអាចទទួលយកបានទាំងអស់គ្នាដោយការមិនប្រើប្រាស់អំពើហិង្សា ខណៈដែលលោកក៏បានលើកពីឧទាហរណ៍ដែលមិនត្រូវបានគេបំភ្លេចក្នុងការបង្ក្រាបដោយហិង្សានៅលើផ្លូវវេងស្រេងកាលពីអំឡុងចុងឆ្នាំ ២០១៣ ដើមឆ្នាំ ២០១៤ ផងដែរ។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានសម្តែងការគាំទ្រចំពោះការលើកឡើងរបស់លោក ស ខេង ដែលលោកថា ស្របទៅនឹងរដ្ឋធម្មនុញ្ញដែលជាច្បាប់កំពូលរបស់រដ្ឋក្នុងការផ្តល់អំណាចដល់ប្រជាពលរដ្ឋអាចមានសិទ្ធិចូលរួមសកម្មភាពនយោបាយសេដ្ឋកិច្ច សង្គម វប្បធម៌។
លោកថា ដូច្នេះគ្រប់ពលរដ្ឋគឺអាចស្នើទៅអាជ្ញាធរមានសមត្ថកិច្ចឲ្យជួយពិនិត្យ និងដោះស្រាយបញ្ហារបស់ពួកគេឲ្យបានហ្មត់ចត់ស្របពេលដែលមន្ត្រីរាជការ កងរាជអាវុធហត្ថ ត្រូវមានតួនាទីក្នុងការបម្រើ និងការពារប្រជាពលរដ្ឋ។ លោកបន្ថែមថា មានតែការបម្រើប្រជាពលរដ្ឋ ដោយការអត់ធ្មត់ដោយមានក្រមសីលធម៌ក្នុងការបំពេញតួនាទីរបស់ខ្លួនឯងបានត្រឹមត្រូវទើបជាវិធីដ៏ល្អប្រសើរ ហើយលោក ស ខេង ក៏គួរតែមានវិធានការជាក់លាក់បន្ថែមទៀតពីព្រោះពេលខ្លះការអនុវត្តច្បាប់មិនមែនជាការស្នើនោះទេ។
លោកបានបញ្ជាក់ថា៖ «វាគឺជាបញ្ជាដែលទាមទារឲ្យមានការពិនិត្យឲ្យបានច្បាស់លាស់ដល់កងកម្លាំង ឬសមត្ថកិច្ចណាដែលប្រើប្រាស់អំពើហិង្សាទៅប្រជាពលរដ្ឋដោយប្រយោលក្តីដោយផ្ទាល់ក្តី ដើម្បីធានាថា មិនមានកងកម្លាំងសមត្ថកិច្ចរួមទាំងកងរាជអាវុធហត្ថណាបានរំលោភច្បាប់ ប្រើប្រាស់សិទ្ធិអំណាចរបស់ខ្លួនដែលបានប្រគល់ឲ្យហួសព្រំដែនទៅធ្វើទុក្ខបុកម្នេញប្រជាពលរដ្ឋ»៕