ភ្នំពេញៈ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃកាលពីម្សិលមិញបានសម្រេចផ្អាកការងារឧត្តមសេនីយ៍ទោ (ផ្កាយ ២) លោក អ៊ុក កុសល ស្នងការនគរបាលខេត្តកំពង់ធំជាបណ្តោះអាសន្ន បន្ទាប់ពីក្រុមជនរងគ្រោះ ៤ រូបជាមន្ត្រីនគរបាលនារីក្រោមឱវាទបានប្តឹងលោកពាក់ព័ន្ធនឹងករណីបៀតបៀនផ្លូវភេទ និងបំពានលើពួកគេ។
យោងតាមសេចក្តីប្រកាសស្តីពីការផ្អាកការងារ លោក អ៊ុក កុសល ជាបណ្តោះអាសន្ននេះលោក ស ខេង បានតម្រូវឲ្យសាមីខ្លួនត្រូវមកបង្ហាញខ្លួន នៅនាយកដ្ឋានបុគ្គលិករៀងរាល់ម៉ោងធ្វើការ ដើម្បីរង់ចាំការសម្រេចជាថ្មី។ ជាមួយគ្នានេះដែរ លោក ស ខេង ក៏បានប្រកាសប្រគល់ភារកិច្ចឱ្យលោក អ៊ិត គឹមស្រ៊ន ស្នងការរងនគរបាលខេត្តកំពង់ធំឲ្យធ្វើជាស្នងការស្តីទីដែលត្រូវទទួលបន្ទុកដឹកនាំការងាររួមនៅស្នងការដ្ឋាននគរបាលខេត្តកំពង់ធំរហូតដល់ពេលមានការសម្រេចជាថ្មី។
កាលពីថ្ងៃម្សិលមិញនេះដែរ លោក ស ខេង ក៏បានសម្រេចផ្ទេរភារកិច្ចលោក អ៊ឹម សុគឿន ពីស្នងការរងទទួលផែនការងារធនធានមនុស្សនៃស្នងការដ្ឋាននគរបាលខេត្តកំពង់ធំឱ្យមកបម្រើការងារនៅនាយកដ្ឋានបុគ្គលិកវិញ។
គួរបញ្ជាក់ផងដែរថា ក្រោយពីទទួលបានពាក្យបណ្ដឹងពីក្រុមមន្ត្រីនគរបាលជានារីចំនួន ៤ រូប លោកឧបនាយករដ្ឋមន្ត្រី ស ខេង បានបញ្ជាឱ្យក្រុមការងារនៃក្រសួងមហាផ្ទៃ និងអគ្គស្នងការដ្ឋាននគរបាលជាតិចុះធ្វើការស្រាវជ្រាវក្នុងករណីមានការចោទប្រកាន់ និងប្តឹងលោក អ៊ុក កុសល ប្រព្រឹត្តអំពើមិនគប្បីមកលើជនរងគ្រោះដែលជានារីនគរបាលនៃស្នងការដ្ឋានខេត្តកំពង់ធំនេះ។
លោក ស៊ឹង សែនករុណា អ្នកនាំពាក្យសមាគមការពារ សិទ្ធិមនុស្សអាដហុកបានថ្លែងកាលពីថ្ងៃម្សិលមិញថា ការសម្រេចផ្អាកការងារតួនាទីស្នងការរូបនេះទាល់តែថ្នាក់ដឹកនាំមានតម្រុយ ឬមានការរកឃើញនូវទោសកំហុសណាមួយនៃការប្រព្រឹត្តកំហុស។
លោក ស៊ឹង សែនករុណា បានបញ្ជាក់ថា៖ «វាជាមធ្យោបាយមួយដ៏ល្អដែរដើម្បីឱ្យមន្ត្រីថ្នាក់ក្រោមរបស់ខ្លួនមានទំនុកចិត្តក្នុងការបន្តនីតិវិធីតាមផ្លូវច្បាប់ឱ្យស្មើភាពគ្នាចំពោះមុខច្បាប់។ ខ្ញុំចាត់ទុកថា នេះជារឿងមួយល្អសម្រាប់ដំណើរការនីតិវិធីរកយុត្តិធម៌សម្រាប់ស្ត្រីរងគ្រោះដោយសារការបៀតបៀននេះ»។
លោកបានបន្តទៀតថា ប្រសិនបើតុលាការស្រាវជ្រាវរកឃើញថា ស្នងការរូបនេះពិតជាបានប្រព្រឹត្តដូចការចោទប្រកាន់មែន គួរតែបន្តអនុវត្តច្បាប់ទៅតាមក្រមព្រហ្មទណ្ឌរបស់ប្រទេសកម្ពុជាសម្រាប់ដាក់ទោសទណ្ឌទៅលើបុគ្គលរូបនេះ៕