The Phnom Penh Post Search

Search form




Logo of Phnom Penh Post newspaper Phnom Penh Post - លោក ស ខេង សរសើរ​ការអនុវត្ត​ច្បាប់​ ខណៈ​គ្រោះថ្នាក់​ចរាចរណ៍​បាន​ថយចុះ

លោក ស ខេង សរសើរ​ការអនុវត្ត​ច្បាប់​ ខណៈ​គ្រោះថ្នាក់​ចរាចរណ៍​បាន​ថយចុះ

Content image - Phnom Penh Post
ទិដ្ឋភាព​គ្រោះថ្នាក់​ចរាចរណ៍​នៅ​ភ្នំពេញ​កាលពី​ខែកុម្ភៈ ឆ្នាំនេះ​។ ហេង ជីវ័ន

លោក ស ខេង សរសើរ​ការអនុវត្ត​ច្បាប់​ ខណៈ​គ្រោះថ្នាក់​ចរាចរណ៍​បាន​ថយចុះ

ភ្នំពេញៈ ​លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ និង​ជា​ប្រធាន​គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវគោក​បាន​កោតសរសើរ​ចំពោះ​ការអនុវត្ត​ច្បាប់​ស្ដីពី​ចរាចរណ៍​ផ្លូវគោក​ក្នុង​ត្រីមាស​ទី​ ១ ខណៈ​ចំនួន​អ្នកស្លាប់ និង​អ្នករបួស​ដោយសារ​គ្រោះថ្នាក់​ចរាចរណ៍​មាន​ការថយចុះ​បើ​ធៀប​ត្រីមាស​ទី​១ ​ក្នុង​ឆ្នាំមុន​។

តាម​របាយការណ៍​គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវគោក​ដែល​បាន​ផ្សព្វផ្សាយ​ពីថ្ងៃ​ ២ ​មេសា​ បាន​ឱ្យ​ដឹងថា ក្នុង​ត្រីមាស​ទី​១ ​ឆ្នាំ​ ២០២១ ​នេះ គ្រោះថ្នាក់​ចរាចរណ៍​​ផ្លូវគោក​បានកើត​ឡើង​ ៧៦៣ ​លើក ថយចុះ​ ១៥៣ ​លើក ស្មើនឹង​ ១៧ ​ភាគរយ បើ​ធៀប​នឹង​រយៈពេល​ដូចគ្នា​កាលពី​ឆ្នាំ​ ២០២០ ដែលមាន​គ្រោះថ្នាក់​ចំនួន​ ៩១៦ ​លើក​។

របាយការណ៍​បង្ហាញថា​ «​អត្រា​អ្នកស្លាប់​ក្នុង​គ្រោះថ្នាក់​ចរាចរណ៍​បាន​ថយចុះ​រហូតដល់​ ៦០ ​នាក់ បើ​ប្រៀបធៀប​ត្រីមាស​ទី​១ ឆ្នាំ​ ២០២០ ​ដែលមាន​អ្នកស្លាប់​ចំនួន ៤៩៣ ​នាក់ ហើយ​នៅ​ត្រីមាស​ទី​១ ឆ្នាំ​ ២០២១ ​នេះ​​ចំនួន​អ្នក​ស្លាប់មាន​ ៤៣៣​ នាក់​។ រីឯ​អ្នករងរបួស​ដោយសារ​គ្រោះថ្នាក់​ចរាចរណ៍​វិញ​នៅ​ត្រីមាស​ទី​១ ឆ្នាំ​ ២០២១ ​នេះ​មាន​ចំនួន ១ ១១៣ ​នាក់ ថយចុះ​ ២០២ ​នាក់ ស្មើនឹង​ ១៥ ​ភាគរយ បើ​ធៀប​នឹង​រយៈពេល​ ១ ​ត្រីមាស​ដូចគ្នា​កាលពី​ឆ្នាំ​ ២០២០ ដែល​​មាន​អ្នក​រងបួស​ ១ ៣១៥ ​នាក់​» ។

តាមរយៈ​របាយការណ៍​នេះ​លោក ស ខេង បាន​កោតសរសើរ និង​វាយតម្លៃ​ខ្ពស់​ចំពោះ​ការអនុវត្ត​ច្បាប់​ស្ដីពី​ចរាចរណ៍​ផ្លូវគោក​ក្នុង​ត្រីមាស​ទី​១ គិត​ចាប់ពី​ខែមករា ដល់​ដំណាច់​ខែមីនា ឆ្នាំ​ ២០២១​។

លោក​បានបញ្ជាក់​នៅលើ​ហ្វេសប៊ុក​របស់លោក​ថា​៖ «​ក្នុងនាម​ប្រធាន​គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវគោក​សូម​ថ្លែងអំណរគុណ​ និង​កោតសរសើរ​ខ្ពស់​ចំពោះ​ស្មារតី​យកចិត្ត​ទុកដាក់​បំពេញ​ភារកិច្ច​ដឹកនាំ​ការអនុវត្ត​ច្បាប់​ស្ដីពី​ចរាចរណ៍​ផ្លូវគោក​ទាំងយប់​ទាំង​ថ្ងៃ​របស់​ថ្នាក់​ដឹកនាំ និង​មន្ត្រីនគរបាល​នៃ​អគ្គស្នងការដ្ឋាន​នគរបាលជាតិ គណៈបញ្ជាការ​ឯកភាព​រដ្ឋបាល​រាជធានី-ខេត្ត ស្នងការដ្ឋាន​នគរបាល​រាជធានី​ខេត្ត អធិការដ្ឋាន​នគរបាល​ក្រុង​ស្រុក-ខណ្ឌ និង​សមត្ថកិច្ច​រួមសហការ​ផ្សេងទៀត​»​។

ជាមួយ​គ្នា​នេះ​លោក ស ខេង ក៏បាន​ថ្លែងអំណរគុណ​ចំពោះ​ជន​រួមជាតិ​ដែលជា​អ្នកបញ្ជា​មធ្យោបាយ​ធ្វើដំណើរ​គ្រប់​ប្រភេទ​ផងដែរ​ចំពោះ​ការប្រកាន់​នូវ​ឥរិយាបថ​ជា​ពលរដ្ឋ​ល្អ​តាមរយៈ​ការចូលរួម​គោរព​ច្បាប់​ចរាចរណ៍​យ៉ាង​ខ្ជាប់ខ្ជួន​គ្រប់ពេល​ធ្វើ​ដំណើរ​។ «​ដោយសារ​ការគោរព​ច្បាប់​ដ៏ខ្ជាប់ខ្ជួន​ពី​សំណាក់​បងប្អូន​ជនរួមជាតិ​នេះហើយ​ដែល​បានធ្វើឱ្យ​អត្រា​គ្រោះថ្នាក់​ចរាចរណ៍​ចំនួន​អ្នកស្លាប់ និង​អ្នករងរបួស​មាន​ការថយចុះ​»​។

លោក គង់ សុវណ្ណ ជា​ទីប្រឹក្សា​ជំនាញ និង​ជា​អនុប្រធាន​ក្រុម​កម្មវិធី​សុវត្ថិភាព​ចរាចរណ៍​សហគមន៍​នៃ​គម្រោង​អភិវឌ្ឍន៍​ផ្លូវ​ជនបទ​ជំហាន​ទី​២ ​របស់​ក្រសួង​អភិវឌ្ឍន៍ជនបទ​ថ្លែងថា ការថយចុះ​នៃ​ចំនួន​អ្នកស្លាប់ និង​របួស​ដោយ​គ្រោះថ្នាក់​ចរាចរណ៍​ជា​សញ្ញាណ​ល្អ ប៉ុន្តែ​ត្រូវតែ​មានការ​រឹតបន្តឹង​បន្តទៀត ហើយ​រដ្ឋាភិបាល​គួរតែ​ជំរុញ​ឱ្យ​មាន​វិនិយោគ​ចំនួន​ថវិកា​ឱ្យ​ច្រើន​ថែមទៀត​លើ​ការងារ​សុវត្ថិភាព​ចរាចរណ៍​។

លោក​ថា​៖ «​កាលណា​រដ្ឋាភិបាល​ ឬ​ប្រទេស​នីមួយៗ​ដាក់​លុយ​ធ្វើការ​អប់រំ​ផ្សព្វផ្សាយ​លើ​ការ​រឹតបន្តឹង​ពង្រឹង​ខាង​ផ្នែក​បច្ចេកវិទ្យា ទីផ្សារ សង្គម​ផ្សេងៗ​ទៅលើ​ផ្នែក​ចរាចរណ៍​ហ្នឹង ការវិនិយោគ​នោះ​ជាការ​សង្គ្រោះ​ជីវិត​មនុស្ស និង​ធ្វើឱ្យ​សុខុមាលភាព ប្រជាពលរដ្ឋ​នឹង​បាន​ប្រសើរ​ឡើង​ស្របពេល​ប្រទេស​កំពុង​វិវឌ្ឍ​ទៅមុខ​» ។

លោក សុវណ្ណ បានកត់សម្គាល់​ឃើញ​ថា ការបញ្ជ្រាប​សារ​អប់រំ​ពី​សុវត្ថិភាព​ចរាចរណ៍​មិនទាន់​បាន​ជ្រាប​ពេញលេញ​ទេ ព្រោះ​កាលណា​អវត្តមាន​នៃ​ការរឹតបន្តឹង និង​ការអប់រំ​ផ្សព្វផ្សាយ​នោះ ចំនួន​គ្រោះថ្នាក់​ចរាចរណ៍​តែងតែ​កើនឡើង​វិញ​៕

វីដេអូ៖

អត្ថបទគួរចាប់អារម្មណ៍