ភ្នំពេញៈ រដ្ឋមន្ត្រីក្រសួងមហាផ្ទៃ លោក ស ខេង ស្នើសុំការយោគយល់និងសុំអភ័យទោសចំពោះសាធារណជននូវរាល់ការរំខានដែលប៉ះពាល់ដល់ការកកស្ទះចរាចរណ៍ ក្នុងអំឡុងពេលរៀបចំពិធីមង្គលការកូនប្រុសលោកកាលពីសប្តាហ៍មុន។
ការសុំអធ្យាស្រ័យពីសាធារណជនធ្វើឡើង បន្ទាប់ពីមានការត្អូញត្អែរពីពលរដ្ឋមួយចំនួនដែលជិះឆ្លងកាត់ផ្លូវនោះ និងមានព័ត៌មានចុះផ្សាយថា ពលរដ្ឋខ្លះអាចសាងសង់រោងការនៅលើចិញ្ចើមផ្លូវបាន តែពលរដ្ឋខ្លះមិនអាចធ្វើបាន។ ចំណែកពលរដ្ឋខ្លះរអ៊ូថា ឲ្យតែមានពិធីមង្គលការរបស់អ្នកធំម្តងៗធ្វើឲ្យកកស្ទះចរាចរណ៍ផងដែរ។
លិខិតថ្លែងអំណរគុណរបស់ខុទ្ទកាល័យរដ្ឋមន្ត្រីក្រសួងមហាផ្ទៃ ចុះថ្ងៃទី១៨ ខែមករា បានលើកឡើងថា ក្នុងរយៈពេល៣ថ្ងៃកន្លងមក ចាប់ពីថ្ងៃទី១៥ ដល់ថ្ងៃទី១៧ ខែមករា នៅគេហដ្ឋានលោក ស ខេង បានរៀបចំប្រារព្ធពិធីអាពាហ៍ពិពាហ៍កូនប្រុសស្រីទៅតាមប្រពៃណីនិងទំនៀមទម្លាប់។
លិខិតបន្តថា ក្នុងនោះដែរសមត្ថកិច្ចពាក់ព័ន្ធបានខិតខំប្រឹងប្រែងយកចិត្តទុកដាក់ រៀបចំសណ្តាប់ធ្នាប់សាធារណៈនិងរក្សាលំហូរជាប្រក្រតីនៃចរាចរណ៍ដោយពុំមានតម្រូវឲ្យមានការបិទកំណាត់មហាវិថីព្រះនរោត្តមនិងកំណាត់ផ្លូវ២៤០នោះឡើយ។
លិខិតបញ្ជាក់ថា៖«ទោះជាបែបនេះក្តី សម្តេចក្រឡាហោម ស ខេង សូមអភ័យទោស ចំពោះសាធារណជនចំពោះការរំខានឬការប៉ះពាល់ដោយអចេតនា ដែលអាចកើតមានក្នុងអំឡុងពេលនៃការប្រារព្ធពិធីមង្គលការខាងលើ»។
លិខិតបន្តថា៖«សម្តេចក្រឡាហោម ស ខេង សូមថ្លែងអំណរគុណយ៉ាងជ្រាលជ្រៅចំពោះបងប្អូនប្រជាពលរដ្ឋទូទៅដែលបានផ្តល់នូវការយោគយល់និងការអធ្យាស្រ័យ ប្រកបដោយសមានចិត្តដ៏ថ្លៃថ្លាចំពោះសម្តេចក្រឡាហោម ក្នុងឱកាសនៃការបំពេញកាតព្វកិច្ចតាមប្រពៃណីទំនៀមទម្លាប់ខ្មែរដែល មាតាបិតាគ្រប់រូបតែងមានចំពោះបុត្រធីតា»។
អ្នកនាំពាក្យសាលារាជធានីភ្នំពេញលោក ឡុង ឌីម៉ង់ ប្រាប់ភ្នំពេញប៉ុស្តិ៍កាលពីម្សិលមិញថា កន្លងទៅសាលារាជធានីភ្នំពេញបានចេញសេចក្តីណែនាំមួយដល់អាជ្ញាធរគ្រប់ខណ្ឌ និងសង្កាត់ ដោយពុំអនុញ្ញាតឲ្យពលរដ្ឋសាងសង់រោងការ ឬពិធីបុណ្យផ្សេងៗលើចិញ្ចើមថ្នល់សាធារណៈនោះដើម្បីចៀសវាងការកកស្ទះចរាចរណ៍។
តែលោកថា មានករណីមួយចំនួនអាចលើកលែងបាន អាស្រ័យលើស្ថានភាពជាក់ស្តែង។
លោកថ្លែងថា៖«គាត់(ផ្ទះ ស ខេង )អត់មានធ្វើលើផ្លូវទេ សូម្បីតែផ្លូវនរោត្តមត្រូវបិទមួយចំហៀងដើម្បីការពារសុវត្ថិភាព ព្រោះថ្នាក់ដឹកនាំទៅទាំងអស់ផង តែសម្តេចក្រឡាហោម អត់ឲ្យបិទផង តែយើងត្រូវការពារសុវត្ថិភាពជូនគាត់ ព្រោះថ្នាក់ដឹកធំៗអញ្ជើញចូលរួម»។
អ្នកស្រាវជ្រាវពីការអភិវឌ្ឍសង្គមលោក កែម ឡី សម្តែងការគាំទ្រចំពោះលិខិតសុំការអធ្យាស្រ័យរបស់លោក ស ខេង តែលោកស្នើឲ្យថ្នាក់ដឹកនាំធំៗក៏ដូចជាពលរដ្ឋមួយចំនួនគួរចៀសវាងការរៀបចំពិធីផ្សេងៗនៅលើផ្លូវសាធារណៈ។ លោកថា៖«ការចេញសេចក្តីសុំទោស យើងអបអរសាទរ ប៉ុន្តែឈប់យកគំរូអាក្រក់ហ្នឹង ទៅដល់សាធារណជនទៀត»។
យ៉ាងនេះក្តីលោក កែម ឡី ស្នើឲ្យអាជ្ញាធរអនុវត្តស្មើភាពគ្នាចំពោះមុខច្បាប់ ក្នុងករណីប្រជាពលរដ្ឋធម្មតាឬមន្ត្រីថ្នាក់ខ្ពស់ រៀបចំពិធីផ្សេងៗនៅលើផ្លូវសាធារណៈ។ បើតាមអ្នកស្រាវជ្រាវរូបនេះ សាលារាជធានីភ្នំពេញ ពុំគួរបិទផ្លូវនៅក្រោយស្ថានទូតអាមេរិក ផ្លូវក្រោយផ្ទះនាយករដ្ឋមន្ត្រី ផ្លូវមុខព្រះបរមរាជវាំង និងផ្លូវក្រោយទីស្តីការគណៈរដ្ឋមន្ត្រីទេ ដោយលោកចាត់ទុកថា ការបិទផ្លូវនេះជាចំណែកមួយធ្វើឲ្យមានការកកស្ទះចរាចរណ៍ដល់ផ្លូវផ្សេងទៀត៕
