ភ្នំពេញ: លោក ស ខេង កាលពីថ្ងៃម្សិលមិញបានស្នើដល់ប្រទេសក្នុងតំបន់ ជាពិសេសរដ្ឋសមាជិកនៅក្នុងអនុតំបន់ទន្លេមេគង្គត្រូវតែបន្តកិច្ចសហប្រតិបត្តិការ គាំទ្រគ្នាទៅវិញទៅមកក្នុងការងារប្រយុទ្ធប្រឆាំងគ្រឿងញៀន និងឧក្រិដ្ឋកម្មឆ្លងដែននានាឱ្យកាន់តែសកម្មថែមទៀត ដើម្បីភាពសុខដុមរមនារបស់ប្រជាជនក្នុងតំបន់។
លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានថ្លែងក្នុងកិច្ចប្រជុំថ្នាក់រដ្ឋមន្ត្រីអាស៊ានស្តីពីការប្រឆាំងឧក្រិដ្ឋកម្មឆ្លងដែនលើកទី ១៤ តាមប្រព័ន្ធវីដេអូថា កម្ពុជាសម្រេចបានក្នុងបរិបទនៃឧក្រិដ្ឋកម្មឆ្លងដែនទាក់ទងបញ្ហាគ្រឿងញៀនដោយកម្ពុជាមើលឃើញនូវគ្រោះថ្នាក់ និងមហន្តរាយសង្គមធ្ងន់ធ្ងរ ដែលបង្កឡើងដោយបញ្ហាគ្រឿងញៀន។
លោកបន្តថា រាជរដ្ឋាភិបាលកម្ពុជាបានដាក់ចេញនូវយន្តការជាក់លាក់ទាំងនៅថ្នាក់ជាតិ និងថ្នាក់ក្រោមជាតិតាមរយៈការអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់រៀងរាល់ ៦ ខែម្តងដោយចាប់តាំងពីបានបង្កើតឡើងនៅក្នុងឆ្នាំ ២០១៧។ យុទ្ធនាការនេះត្រូវបានចាត់តាំងអនុវត្តចំនួន ៥ លើក ដោយបានរឹបអូសគ្រឿងញៀនគ្រប់ប្រភេទជាច្រើនតោន និងបានបញ្ជូនជនល្មើសទៅផ្តន្ទាទោសជាច្រើនរយនាក់។
លោកបញ្ជាក់ថា៖ «ខ្ញុំស្នើដល់ប្រទេសក្នុងតំបន់ ជាពិសេសរដ្ឋសមាជិកនៅក្នុងអនុតំបន់ទន្លេមេគង្គ សូមបន្តកិច្ចសហប្រតិបត្តិការគាំទ្រគ្នាទៅវិញទៅមកក្នុងការងារប្រយុទ្ធប្រឆាំងគ្រឿងញៀនខុសច្បាប់ឱ្យកាន់តែសកម្មថែមទៀត ដើម្បីឱ្យប្រជាជនយើងរស់នៅសុខសាន្ដ»។ បើតាមលោក ស ខេង បច្ចុប្បន្នក្រុមឧក្រិដ្ឋជនកំពុងប្រើប្រាស់បច្ចេកវិទ្យាទំនើបៗ ដើម្បីប្រព្រឹត្តបទល្មើស ដោយឥតព្រំដែនទាំងនៅក្នុងប្រទេស ឆ្លងកាត់តំបន់ និងសកលលោក។
លោកបញ្ជាក់ថា៖ «ដូច្នេះរដ្ឋជាសមាជិកអាស៊ានត្រូវតែសហការគ្នាឱ្យបានស្អិតល្មួតថែមទៀតដើម្បីបង្ក្រាបបទល្មើសទាំងអស់នេះ»។
លោក ម៉ក់ ជីតូ អគ្គស្នងការរងនគរបាលជាតិទទួលបន្ទុកផែនគ្រឿងញៀនបានថ្លែងពីម្សិលមិញថា កម្ពុជាជាទីកន្លែងដែលក្រុមជនល្មើសបានដឹកជញ្ជូនគ្រឿងញៀនចេញពីតំបន់ត្រីកោណមាសនៃប្រទេសឡាវយកមកលាក់ទុក និងចែកចាយមួយចំនួននៅកម្ពុជា បន្ទាប់មកពួកគេនាំបន្តទៅប្រទេសទី ៣ ដូចជា ចិន តៃវ៉ាន់ អូស្ដ្រាលី និងប្រទេសគោលដៅមួយចំនួនទៀត។
លោកបញ្ជាក់ថា៖ «ចំពោះឆ្នាំ ២០២០ នេះករណីគ្រឿងញៀនឆ្លងដែន មានការថយចុះ ប៉ុន្ដែរាល់ករណីដែលបង្ក្រាបបាននីមួយៗ គឺមានចំនួនគ្រឿងញៀនច្រើនគួរឱ្យកត់សម្គាល់»។
លោកបន្តថា ទោះបីជាសមត្ថកិច្ចកម្ពុជាមើលឃើញពីភាពជោគជ័យទាំងនេះក៏ដោយ ក៏សមត្ថកិច្ចនៅតែបន្តដាក់កំហិតក្នុងការបង្ក្រាបការជួញដូរគ្រឿងញៀនបន្ថែមទៀត។ លោកឱ្យដឹងថា កម្ពុជាតែងតែស្នើសុំការសហការជាមួយប្រទេសជិតខាង ដើម្បីងាយស្រួលក្នុងការបង្ក្រាបបទល្មើសជួញដូរគ្រឿងញៀន។
លោកបន្ថែមថា ប្រសិនអាជ្ញាធរកម្ពុជាអាចបង្ក្រាបបទល្មើសជួញដូរគ្រឿងញៀនដែលនាំចូលឆ្លងកាត់ទៅប្រទេសទី ៣ បាននោះប្រទេសដែលជាគោលដៅនាំចូលគ្រឿងញៀននោះនឹងអាចបានធូរស្រាលពីទំនិញគ្រឿងញៀន ព្រោះកម្ពុជាបានបង្ក្រាបមុនពេលនាំចូលទៅដល់ប្រទេសទី ៣។ «ដូច្នេះប្រទេសក្នុងតំបន់ត្រូវតែសហការគ្នាបន្ថែមទៀតទាក់ទងការផ្លាស់ប្ដូរព័ត៌មានឱ្យគ្នាទៅវិញទៅមក»។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា (TI) បានថ្លែងពីម្សិលមិញថា ក្នុងនាមសង្គមស៊ីវិលលោកលើកទឹកចិត្តឱ្យកម្ពុជាចូលរួមធ្វើកិច្ចសហការលក្ខណៈតំបន់អាស៊ាន ឬអន្តរជាតិក្នុងការចូលរួមប្រយុទ្ធប្រឆាំងឧក្រិដ្ឋកម្មឆ្លងដែននានាជាពិសេសការលាងលុយកខ្វក់ ការជួញដូរគ្រឿងញៀន និងការជួញដូរមនុស្សជាដើម ដើម្បីរក្សាសន្ដិសុខ និងសណ្ដាប់ធ្នាប់ក្នុងប្រទេស និងតំបន់អាស៊ាន។
លោកបន្តថា លោកអំពាវនាវឱ្យរដ្ឋជាសមាជិកក្នុងអនុតំបន់ទន្លេមេគង្គត្រូវតែធ្វើការរួមគ្នាមានលក្ខណៈជាប្រព័ន្ធ ដើម្បីងាយស្រួលជូនដំណឹងទាក់ទងនឹងការផ្លាស់ប្ដូរព័ត៌មានឱ្យគ្នាទៅវិញទៅមកបានទាន់ពេលវេលា ព្រោះកន្លងមករាល់បទឧក្រិដ្ឋ តែងតែមានភាពស្មុគស្មាញក្នុងការស្រាវជ្រាវ និងមានការពិបាកក្នុងការធ្វើការងារជាឯកតោភាគី ខណៈបច្ចុប្បន្នប្រព័ន្ធបច្ចេកវិទ្យាទំនើបបានធ្វើឱ្យឧក្រិដ្ឋជនកាន់តែមានឱកាសច្រើនក្នុងការប្រព្រឹត្តបទល្មើស។
លោក ប៉ិច ពិសី បញ្ជាក់ថា ដោយសារមានការវាយតម្លៃរបស់អង្គការអន្តរជាតិមួយ គឺគាត់រកឃើញថា កម្ពុជាយើងមានកិច្ចសហប្រតិបត្តិការអន្តរជាតិក្នុងតំបន់ក្ដី ឬកិច្ចការសកលក្ដី គឺនៅមានកម្រិតនៅឡើយ ប៉ុន្ដែដោយសារពីមុនកម្ពុជាមិនទាន់មានច្បាប់ ឬគោលការណ៍គតិយុត្តធ្វើជាមូលដ្ឋាន។ «ដូច្នេះគេផ្ដល់អនុសាសន៍ឱ្យយើងបង្កើតច្បាប់ប្រឆាំងឧក្រិដ្ឋកម្ម ប្រឆាំងការលាងលុយកខ្វក់ឱ្យស្របតាមគោលការណ៍អន្តរជាតិដើម្បីមានឱកាសចូលរួមជាមួយប្រទេសក្នុងតំបន់ដែរ»។
ជាមួយគ្នានេះលោក ស ខេង ក៏បានលើកឡើងផងដែរថា កម្ពុជាសម្រេចបានសមិទ្ធផលលិខិតុបករណ៍ច្បាប់សំខាន់ៗមួយចំនួនរួមមានច្បាប់ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ និងច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។ ច្បាប់ទាំងនេះ នឹងជួយឱ្យកម្ពុជាមានមូលដ្ឋានគតិយុត្តរឹងមាំទទួលស្គាល់ពីអន្តរជាតិក្នុងការជួយពង្រឹងប្រព័ន្ធហិរញ្ញវត្ថុ និងធនាគារឱ្យមានស្ថិរភាព ដើម្បីចូលរួមចំណែកគាំទ្រកំណើនសេដ្ឋកិច្ច ព្រមទាំងរក្សាកេរ្តិ៍ឈ្មោះកម្ពុជាលើឆាកអន្តរជាតិ និងបញ្ជាក់កាន់តែច្បាស់ពីឆន្ទៈរបស់កម្ពុជាក្នុងការចូលរួមជាមួយប្រទេសនានាទាំងក្នុងតំបន់ និងសកលលោក៕