ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃកាលពីម្សិលមិញបានអំពាវនាវឱ្យក្រសួង ស្ថាប័ន និងអាជ្ញាធរពាក់ព័ន្ធទាំងអស់បន្តពង្រឹងប្រសិទ្ធភាពទៅលើវិធានការក្នុងការទប់ស្កាត់ពិការភាព ជាពិសេសបណ្ដាលមកពីគ្រោះថ្នាក់ចរាចរណ៍ ខណៈដែលមានអ្នករបួសអាចលើសពី ៥ នាក់ ក្នុង ១ ថ្ងៃ។
ការអំពាវនាវរបស់លោក ស ខេង បានធ្វើឡើងតាមរយៈសុន្ទរកថាទៅកាន់អង្គសន្និបាតបូកសរុបការអនុវត្តផែនការយុទ្ធសាស្ត្រជាតិស្តីពីពិការភាព ២០១៤-២០១៨ និងប្រកាសជាផ្លូវការដាក់ឲ្យអនុវត្តផែនការយុទ្ធសាស្ត្រជាតិស្តីពីពិការភាព ២០១៩-២០២៣ ព្រមទាំងទិវាជនមានពិការភាពកម្ពុជាលើកទី ២១ និងអន្តរជាតិលើកទី ៣៧ ដែលបានប្រារព្ធនៅសាលមហោស្រពកោះពេជ្រកាលពីថ្ងៃទី ៣ ខែ ធ្នូ ឆ្នាំ ២០១៩។
លោក ស ខេង ថ្លែងថា៖ «ខ្ញុំសូមធ្វើការអំពាវនាវគ្រប់ក្រសួង ស្ថាប័ន ព្រមទាំងអាជ្ញាធរមានសមត្ថកិច្ចគ្រប់លំដាប់ថ្នាក់ត្រូវបន្តពង្រឹងពង្រីកវិធានការទប់ស្កាត់ពិការភាពឱ្យកាន់តែមានប្រសិទ្ធភាពថែមទៀត។ កាត់បន្ថយភាពងាយរងគ្រោះក្នុងសង្គម ទប់ស្កាត់អំពើហិង្សា គ្រោះថ្នាក់ចរាចរណ៍»។
លោក ស ខេង ក៏បានប្រកាសផងដែរពីភាពជោគជ័យដែលរាជរដ្ឋាភិបាលបានទប់ស្កាត់ចំនួនអ្នកស្លាប់ដោយសារគ្រោះថ្នាក់ចរាចរណ៍ដែលរហូតដល់ដំណាច់ឆ្នាំ ២០១៩ គឺមានអ្នកស្លាប់ក្នុងរង្វង់ពី ១ ៦០០ នាក់ ទៅ ១ ៧០០ នាក់។ ដូច្នេះធ្វើយ៉ាងណាកុំឱ្យចំនួនអ្នកស្លាប់ដោយសារគ្រោះថ្នាក់ចរាចរណ៍នៅក្នុងឆ្នាំ ២០២០ ឡើងដល់ ៣ ០០០ នាក់ ក្នុង ១ ឆ្នាំ។
លោក ស ខេង ថ្លែងថា៖ «វាអត់ទៅដល់ ២ ០០០ (នាក់) ផង។ នេះជាជោគជ័យរបស់យើងមួយហើយ។ ប៉ុន្តែសម្រាប់ជនពិការ វាច្រើនអ្នកស្លាប់ (គ្រោះថ្នាក់ចរាចរណ៍) ជាមធ្យម ៥ នាក់ក្នុង ១ ថ្ងៃ។ (ប៉ុន្តែ) អ្នករបួសប្រហែលជាលើសហ្នឹង អ្នករបួសហ្នឹងហើយដែលបន្សល់ទុកនូវផលវិបាកផ្សេងៗជាឧបសគ្គរារាំងដល់ជីវិតដល់សង្គមរបស់យើងទាំងអស់។ ខ្ញុំឧទាហរណ៍តែរឿងចរាចរណ៍មួយទេ»។
ទោះជាយ៉ាងណាក៏ដោយលោក ស ខេង ក៏បានអះអាងផងដែរថា កម្ពុជាប្រារព្ធទិវាជនមានពិការភាព បំណងដើម្បីរំឭកអំពីមហាវិនាសកម្មកើតឡើងដោយសារសង្គ្រាមជាពិសេសដោយរបបប្រល័យពូជសាសន៍ ប៉ុលពត ដែលបានបន្សល់ទុកនូវគ្រាប់មីន និងកាកសំណល់យុទ្ធភណ្ឌមិនទាន់ផ្ទុះសល់ពីសង្គ្រាមរាប់សែនតោនដែលជាសោកនាដកម្មមួយរបស់កម្ពុជា ដែលប្រជាជនកម្ពុជាធ្លាប់ទទួលរងពីការទម្លាក់គ្រាប់បែករាប់លានតោនបានធ្វើឲ្យរបួសពិការ និងស្លាប់។
លោក ស ខេង ថ្លែងថា៖ «កម្ពុជាសម្រេចបាននូវសុខសន្តិភាពពេញលេញក្នុងន័យនេះរាជរដ្ឋាភិបាលប្ដេជ្ញាការពារឲ្យបាននូវសុខសន្តិភាពនេះ ទោះជាត្រូវចំណាយតម្លៃណាក៏ដោយពីព្រោះកម្ពុជាស្គាល់ហើយរសជាតិ វិនាសកម្មកើតពីសង្គ្រាម»។
លោក ស ខេង ក៏បានអំពាវនាវផងដែរឱ្យក្រសួង ស្ថាប័ន និងអាជ្ញាធរបន្តយកចិត្តទុកដាក់ និងគិតគូរពីផលប្រយោជន៍ និងលើកកម្ពស់ជីវភាពរស់នៅរបស់ជនមានពិការភាពឱ្យបានសមស្រប។
ទោះយ៉ាងណាក៏ដោយលោក ឯម ច័ន្ទមករា អគ្គលេខាធិការក្រុមប្រឹក្សាសកម្មភាពជនពិការកម្ពុជាបានឲ្យដឹងថា ពិការភាពមិនអាចទប់ស្កាត់បាននោះទេ ពីព្រោះវាមានរូបភាពផ្សេងៗគ្នាដែលបណ្តាលឱ្យមានពិការភាព។
លោក ឯម ច័ន្ទមករា ថ្លែងថា៖ «ពិការភាពពេលខ្លះមិនមែនបង្ការតែនៅក្នុងពោះទេ នៅពេលដែលគាត់ (កើត) ចេញមក ជួនកាលបាន ១ ឆ្នាំ ២ ឆ្នាំអីហ្នឹង គាត់ទៅជាមានបញ្ហាអូទីសឹម។ល និងល។»។
យោងតាមរបាយការណ៍របស់អគ្គស្នងការនគរបាលជាតិបានឲ្យដឹងថា បញ្ហាគ្រោះថ្នាក់ចរាចរណ៍ក្នុងត្រីមាសទី ៣ ឆ្នាំនេះបានកើតឡើងចំនួន ៩៨៨ លើក បណ្តាលឲ្យមនុស្សស្លាប់ចំនួន ៤៨៨ នាក់ និងរបួស ចំនួន ១ ៤៩៤ នាក់៕