.jpg)
គ្រោះថ្នាក់ចរាចរណ៍កើតឡើងនៅលើផ្លូវមួយ ក្នុងរាជធានីភ្នំពេញ។ ហេង ជីវ័ន
ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃ បានជំរុញឲ្យសាលារាជធានីភ្នំពេញ សហការជាមួយក្រុមហ៊ុនដឹកជញ្ជូនទាំងអស់ដើម្បីយកទឹកនោមអ្នកបើកបររថយន្តធំមកធ្វើតេស្តរកសារធាតុញៀន ក្រោយពីមានការសង្ស័យថា អ្នកបើកបរបានប្រើប្រាស់គ្រឿងញៀន បណ្ដាលឲ្យករណីស្លាប់ និងរបួសដោយសារគ្រោះថ្នាក់ចរាចរណ៍នៅកម្ពុជានាពេលបច្ចុប្បន្នមានការកើនឡើងគួរឲ្យព្រួយបារម្ភ។
ក្នុងពិធីបិទសន្និបាតបូកសរុបលទ្ធផលការងារឆ្នាំ ២០១៨ និងលើកទិសដៅការងារសម្រាប់អនុវត្តឆ្នាំ ២០១៩ របស់រដ្ឋបាលរាជធានីភ្នំពេញកាលពីថ្ងៃអង្គារ លោក ស ខេង បានថ្លែងថា៖ «អ្នកបើកឡានធំៗហ្នឹង យ៉ាងតិច ១០% ដែលប្រើប្រាស់គ្រឿងញៀនសាកមើលៗឥឡូវហ្នឹង ព្រោះកន្លងមកយើងធ្លាប់ធ្វើតេស្ដដែរតើ ឥឡូវគួរតែសហការជាមួយក្រុមហ៊ុនមានឡានដឹកជញ្ជូនធំៗ យកទឹកនោមមកធ្វើតេស្ដ ហើយបើថា ចេញគ្រឿងញៀនហើយសុំឱ្យដកឃ្លាចេញ។ យើងមិនដឹងធ្វើម៉េច ពីព្រោះបើឱ្យគាត់បើក គាត់ទៅបុកគេរញ៉េរញ៉ៃពីព្រោះប្រើគ្រឿងញៀន»។
លោកថ្លែងបន្តថា៖ «ឬវិធានការណាដែលស័ក្តិសិ្ធ និងសមស្របជាង សុំឱ្យពិចារណាអាហ្នឹង (ការធ្វើតេស្ដ) មិនមែនសម្រាប់តែរាជធានីទេ មែនទែននៅទូទាំងប្រទេស ក្រុមហ៊ុនមានអ្នកបើកបរ ដឹកជញ្ជូនដី ដឹកជញ្ជូនខ្សាច់ ដឹកជញ្ជូនសំណង់ និងសម្ភារផ្សេងទៀត»។
អ្នកបើកបរ ដែលមានសារធាតុញៀន ឬ គ្រឿងស្រវឹង ក្នុងខ្លួន ភាគច្រើនមិនគោរពច្បាប់និងស្លាកសញ្ញាចរាចរណ៍នោះទេ ហើយភាគច្រើន ជាអ្នកបង្កឲ្យមានគ្រោះថ្នាក់ចរាចរណ៍កើតឡើង។
ជាក់ស្ដែង កាលពីថ្ងៃទី ១៩ ខែ មីនា ឆ្នាំ ២០១៩ កន្លងមកនេះ ករណីគ្រោះថ្នាក់ចរាចរណ៍ នៅទូទាំងប្រទេសបានកើតឡើងចំនួន ១៩ លើក បង្កឲ្យមនុស្ស ១៥ នាក់ស្លាប់ និង ២៥ នាក់ទៀត រងរបួសធ្ងន់ និងស្រាល ព្រមទាំងបង្កការខូចខាតម៉ូតូចំនួន ១៧ គ្រឿង, រថយន្តតូច ១១ គ្រឿង, រថយន្ដធុនធំ ៥ គ្រឿង និងយានផ្សេងៗ ១ គ្រឿង។
នេះបើយោងរបាយការណ៍ព័ត៌មាន របស់នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃអគ្គស្នងការដ្ឋាននគរបាល ដែលបានចេញផ្សាយកាលពីព្រឹកថ្ងៃពុធ។
របាយការណ៍នោះបានបង្ហាញថា រាជធានី-ខេត្តដែលមានអ្នកស្លាប់ក្នុងគ្រោះថ្នាក់ចរាចរណ៍ច្រើនជាងគេនាថ្ងៃទី ១៩ ខែ មីនា ឆ្នាំ ២០១៩ នោះ រួមមាន ខេត្តកំពង់ឆ្នាំង ១ លើកស្លាប់ ៣ នាក់, ខេត្តត្បូងឃ្មុំ ១ លើកស្លាប់ ៣ នាក់, ខេត្តព្រៃវែង ២ លើកស្លាប់ ២ នាក់, ខេត្តបាត់ដំបង ២ លើក ស្លាប់ម្នាក់របួស ១៣ នាក់, រាជធានីភ្នំពេញ ៣ លើកស្លាប់ម្នាក់របួស ៥ នាក់, ខេត្តព្រះសីហនុ ៣ លើកស្លាប់ម្នាក់ របួស ២ នាក់, ខេត្តព្រះវិហារ ១ លើកស្លាប់ម្នាក់ខេត្តកំពង់ធំ ១ លើកស្លាប់ម្នាក់របួសម្នាក់,ខេត្តកណ្តាល ១ លើកស្លាប់ម្នាក់របួសម្នាក់ និងខេត្តកោះកុង ១ លើក ស្លាប់ម្នាក់របួសម្នាក់។
មូលហេតុដែលនាំឲ្យកើតមានគ្រោះថ្នាក់ចរាចរណ៍ទាំង ១៩ លើកនេះ គឺ ភាគច្រើនបណ្ដាលមកពីការបើកបរលើសល្បឿនកំណត់, មិនគោរពសិទ្ធិជាអាទិភាព, បត់ឆ្វេងស្ដាំដោយ មិនគោរពតាមភ្លើង និងស្លាកសញ្ញាចរាចរណ៍, បើកប្រជែងក្នុងស្ថានភាពផ្លូវមានគ្រោះថ្នាក់ បើកបរក្នុងសភាពងងុយដេក និងដោយសារកត្តាយានយន្ដ។
របាយការណ៍បានបញ្ជាក់ទៀតថា៖ «ក្នុងរយៈពេល ១៩ ថ្ងៃ ចាប់ពីថ្ងៃទី ១ ដល់ថ្ងៃទី ១៩ ខែ មីនា ឆ្នាំ ២០១៩ នេះ មានករណីគ្រោះថ្នាក់ចរាចរណ៍កើតឡើង ២៣០ លើក បណ្ដាលឲ្យមនុស្សស្លាប់ចំនួន ១៣៤ នាក់, របួសធ្ងន់ ១៧៣ នាក់ និងរបួសស្រាល ១៣១ នាក់»។
ជុំវិញករណីខាងលើនេះ លោក ខូវ លី ស្នងការនគរបាលខេត្តកំពង់ឆ្នាំង បានប្រាប់ភ្នំពេញប៉ុស្តិ៍ថា កន្លងមកកម្លាំងសមត្ថកិច្ចនគរបាលថ្នាក់ខេត្ត បានសហការយ៉ាងជិតស្និទ្ធជាមួយ កម្លាំងសមត្ថកិច្ចនគរបាលតាមមូលដ្ឋាន និងស្ថាប័នពាក់ព័ន្ធមួយចំនួនទៀត ចុះធ្វើការផ្សព្វផ្សាយច្បាប់ និងស្លាកសញ្ញាចរាចរណ៍ ជាបន្តបន្ទាប់ ដល់ប្រជាពលរដ្ឋនៅតាមមូលដ្ឋាន ទីប្រជុំជនសាធារណៈ និងសាលារៀន។
លោកបានបញ្ជាក់ថា៖ «បច្ចុប្បន្ន កម្លាំងសមត្ថកិច្ចនគរបាលជំនាញរបស់យើងកំពុងបន្តចុះ ផ្សព្វផ្សាយអប់រំអំពីសុវត្ថិភាពចរាចរណ៍នៅតាមមូលដ្ឋាន តាមរយៈការបិទផ្សាយផ្ទាំងរូបភាព ណែនាំសុវត្ថិភាពចរាចរណ៍ និងចែកមួកសុវត្ថិភាព ព្រមទាំងកូនសៀវភៅផ្សព្វផ្សាយអប់រំ ដែលមានរូបសញ្ញាចរាចរណ៍ នៅតាមសាលារៀន និងដល់សាធារណជនមួយចំនួន»។
ចំណែក លោក អ៊ុយ ម៉ាប់ មន្ត្រីផ្នែកគម្រោងអប់រំផ្សព្វផ្សាយសុវត្ថិភាពចរាចរណ៍នៃក្រសួងអភិវឌ្ឍន៍ជនបទ បាននិយាយនៅថ្ងៃពុធថា ការចុះអប់រំផ្សព្វផ្សាយច្បាប់ស្ដីពីសុវត្ថិភាពចរាចរណ៍ ដល់ប្រជាពលរដ្ឋដែលរស់នៅតាមតំបន់ទីជនបទ ស្រែចម្ការ គឺ សំខាន់ណាស់ ព្រោះប្រជាពលរដ្ឋដែលរស់នៅតាមតំបន់ទីជនបទដាច់ស្រយាល ភាគច្រើននៅពុំមានការយល់ដឹងជ្រួតជ្រាបអំពីច្បាប់និងស្លាកសញ្ញាចរាចរណ៍ ព្រមទាំងការប្រើប្រាស់ផ្លូវ និង ប្រើប្រាស់មធ្យោបាយនៅលើដងផ្លូវនៅឡើយ។
ទោះជាបែបណាក្ដី លោក អ៊ុយ ម៉ាប់ ដែលជាមន្ត្រីគណៈកម្មាធិការជាតិសុវត្ថិភាពចរាចរណ៍ផងដែរនោះ បានគូសបញ្ជាក់ថា៖ «ជាទូទៅផ្លូវក្នុងតំបន់ដែលមានចរាចរណ៍មមាញឹកខ្លាំងផ្លូវក្នុងតំបន់នោះនឹងមានបញ្ហាប្រឈមគ្រោះថ្នាក់ចរាចរណ៍ច្រើន ដូច្នេះ អ្នកប្រើប្រាស់ផ្លូវទាំងអស់ ទាំងអ្នកថ្មើរជើង និង យានជំនិះគ្រប់ប្រភេទ ត្រូវបង្កើនការប្រុងប្រយ័ត្ន និងកុំបំពានច្បាប់និងស្លាកសញ្ញាចរាចរណ៍»។
ដោយឡែក ក្នុងរយៈពេល ២ ខែដើមឆ្នាំ ២០១៩ កន្លងទៅនេះ គ្រោះថ្នាក់ចរាចរណ៍បានកើតឡើងចំនួន ៦៩៣ លើក បណ្ដាលឲ្យស្លាប់មនុស្សចំនួន ៣១០ នាក់ និងរបួសចំនួន ១ ០៧៧ នាក់ ភាគច្រើននៅរាជធានីភ្នំពេញ ចំនួន ៥២ នាក់ ខេត្តកណ្តាល ២៧ នាក់ និងខេត្តកំពង់ស្ពឺមានអ្នកស្លាប់ ២១ នាក់។ នេះបើយោងតាមរបាយការណ៍ របស់គណៈកម្មាធិការជាតិសុវត្ថិភាពចរាចរណ៍ផ្លូវគោក ដែលបានចេញផ្សាយកាលពីថ្ងៃពុធ។
របាយការណ៍បន្ថែមថា ក្នុងចំណោមជនរងគ្រោះ ដែលស្លាប់ចំនួន ៣១០ នាក់នោះ ភាគច្រើនជាអ្នកជិះម៉ូតូ មានចំនួន ២៤១ នាក់ស្មើ ៧៨ ភាគរយ (ប្រភេទ ១២៥ សេសេចុះក្រោម) ក្នុងនោះមិនពាក់មួកសុវត្ថិភាពមានចំនួន ១៨៨ នាក់ ស្មើ ៧៨ ភាគរយ។
ករណីគ្រោះថ្នាក់ត្រូវបានដោះស្រាយចប់មានចំនួន ១០៨ ករណី បញ្ជូនទៅតុលាការ ១៩២ ករណី មានជនល្មើសចំនួន ៥៦ នាក់ និងកំពុងអង្កេតចំនួន ១២៨ ករណី។
របាយការណ៍បានបញ្ជាក់ទៀតថា ក្នុងរយៈពេល ២ ខែ (មករា-កុម្ភៈ) ដើមឆ្នាំឆ្នាំ ២០១៩ នេះកងកម្លាំងនគរបាលចរាចរណ៍ផ្លូវគោកទូទាំងប្រទេស បានត្រួតពិនិត្យ យានយន្តសរុបចំនួន ២៦៤ ៨៥៤ គ្រឿង ក្នុងនោះម៉ូតូចំនួន ៥៩ ភាគរយ ដោយរកឃើញយានយន្តល្មើសចំនួន ៤៤ ៩៣៩ គ្រឿង ស្មើ ១៧ ភាគរយ បានធ្វើការអប់រំចំនួន ១៥ ៤៧១ គ្រឿងស្មើ ៣៤ ភាគរយ ធ្វើការពិន័យចំនួន ២៩ ៤៦៨ គ្រឿងស្មើ ៦៦ ភាគរយ។
អនុវត្តការបង់ប្រាក់ពិន័យ តាមស្នាក់ការនគរបាលចរាចរណ៍ ផ្លូវគោក ដែលបានកំណត់ទទួលបានប្រាក់ពិន័យចំនួន ៦៩៨ ០៨៥ ០០០ រៀល៕
