ភ្នំពេញៈ លោក ស ថាវី និងមនុស្សមួយក្រុមទៀតត្រូវបានព្រះរាជអាជ្ញាអមសាលាដំបូងរាជធានីភ្នំពេញសម្រេចធ្វើការចោទប្រកាន់ពាក់ព័ន្ធនឹងការលួចលក់ដីរបស់អ្នកដទៃនៅសង្កាត់សំរោង ខណ្ឌព្រែកព្នៅ។
កាលពីថ្ងៃទី ២ ខែ មីនា ឆ្នាំ ២០២០ លោក សាយ ណូរ៉ា ព្រះរាជអាជ្ញារងអមសាលាដំបូងរាជធានីភ្នំពេញបានធ្វើការចោទប្រកាន់លោក ស ថាវី អតីតអភិបាលខេត្តឧត្តរមានជ័យពីបទ «ផ្តើមគំនិតក្នុងអំពើលួចលក់អចលនវត្ថុដែលមិនមែនជារបស់ខ្លួន» និងមនុស្សមួយក្រុមទៀតត្រូវបានចោទពីបទលួចលក់អចលនវត្ថុអ្នកដទៃ។
កាលពីថ្ងៃទី ២៧ ខែ កុម្ភ: ឆ្នាំ ២០២០ សមត្ថកិច្ចបានធ្វើការឃាត់ខ្លួន ជនសង្ស័យចំនួន ៣ នាក់ និងបានបញ្ចូនទៅតុលាការកាលពីថ្ងៃទី ២៩ ខែកុម្ភៈ បន្ទាប់ពីមានជាប់ពាក់ព័ន្ធរឿងលួចលក់ដីអ្នកដទៃមានទំហំ ២២ ៩០០ ម៉ែត្រការ៉េមានទីតាំងស្ថិតនៅភូមិសំរោងត្បូង សង្កាត់សំរោង ខណ្ឌព្រែកព្នៅ កាលពីអំឡុងឆ្នាំ ២០១៨។
បើតាមកំណត់ហេតុរបស់សមត្ថកិច្ចកាលពីឆ្នាំ ២០១៨ ឈ្មោះ ឡុង ដារ៉ា បានលក់ដីទំហំ ២២ ៩០០ ម៉ែត្រការ៉េ ទៅឱ្យឈ្មោះ ប៉ូច ថេន ក្នុងតម្លៃទឹកប្រាក់ ១៥ ម៉ឺនដុល្លារអាមេរិក ហើយបានចែកលុយនោះឲ្យទៅមេធាវីចំនួន ៧ ម៉ឺនដុល្លារចែកទៅឲ្យលោក យិន អ៊ិម ចៅសង្កាត់សំរោង ៤ ម៉ឺនដុល្លារជាថ្លៃធ្វើឯកសារលក់ដីខាងលើ និងចែកមនុស្សមួយចំនួនទៀត។
កំណត់ហេតុដដែលបានបន្តថា ក្រោយមកឈ្មោះ ឡុង ដារ៉ា បានសារភាពថា ខ្លួននៅសល់ប្រាក់ត្រឹម ៣០០០០ ដុល្លារប៉ុណ្ណោះ ខណៈដែលដីនេះឈ្មោះ ប៉ូច ថេន ជាអ្នកឈរឈ្មោះទិញទៅឲ្យលោក ស ថាវី។
ទោះជាយ៉ាងណាក្នុងចំណោមអ្នកដែលត្រូវចោទប្រកាន់ទាំងនោះមានតែ ៣ រូបប៉ុណ្ណោះ ដែលត្រូវបានសមត្ថកិច្ចចាប់ខ្លួនរួមមានលោក ឡុង ដារ៉ា អាយុ ៣៥ ឆ្នាំលោក ឡូញ រស់ អាយុ ៤០ ឆ្នាំ និងលោក ប៉ូច ថេន អាយុ ៥២ ឆ្នាំ។ ចំណែកលោក ស ថាវី អាយុ ៥៣ ឆ្នាំ លោក អ៊ុក ភក្តី អាយុ ៥៤ ឆ្នាំ លោក យិន អ៊ិម លោក ម៉ាត់ ឌី អាយុ ៥០ ឆ្នាំ និងអ្នកស្រី យស់ ម៉ាលីណា បច្ចុប្បន្នមិនត្រូវបានឃាត់ខ្លួននោះទេ។ នេះបើតាមដីកាសន្និដ្ឋានបញ្ជូនរឿងឲ្យស៊ើបសួរដែលត្រូវបានដកស្រង់ដោយសារព័ត៌មាន Freshnews។
លោក គុជ គឹមឡុង អ្នកនាំពាក្យស្ថាប័នអយ្យការអមសាលាដំបូងរាជធានីភ្នំពេញ បានបដិសេធធ្វើអត្ថាធិប្បាយកាលពីម្សិលមិញ។ ចំណែកលោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញបានឆ្លើយតបយ៉ាងខ្លីថា៖ «(សំណុំរឿងនេះ) ជាកិច្ចនីតិវិធីរបស់ចៅក្រមស៊ើបសួរត្រូវរក្សាការសម្ងាត់»។
លោក យិន អ៊ិម ចៅសង្កាត់សំរោងបានប្រាប់ ភ្នំពេញប៉ុស្តិ៍កាលពីម្សិលមិញ ដោយបានបដិសេធចំពោះការចោទប្រកាន់ដែលថា លោកបានទទួលប្រាក់ ៤ ម៉ឺនដុល្លារពីការលួចលក់ដីឯកជនរបស់អ្នកដទៃ។ លោកអះអាងថា លោកក៏ត្រូវបានបុគ្គលខាងលើឆបោកថា ដីនេះជារបស់ពួកគេផងដែរ។ ប៉ុន្តែក្រោយពីទទួលបានព័ត៌មានថា ដីនេះមានម្ចាស់កម្មសិទ្ធិផ្សេងត្រឹមត្រូវស្របច្បាប់ លោកក៏បានចេញលិខិតបដិសេធ និងហាមមិនឲ្យមានការសាងសង់សំណង់នៅលើដីនេះនោះទេ។
ទោះយ៉ាងណាលោកអះអាងថា លិខិតបដិសេធរបស់លោកមិនត្រូវបានគោរពតាមនោះទេ ហើយបុគ្គលទាំងនោះនៅតែបន្តកាន់កាប់ដីនេះរហូតដល់មានការប្តឹងផ្តល់មកតុលាការដល់សព្វថ្ងៃ។ លោក ចៅសង្កាត់ បញ្ជាក់ថា៖ «ម្ចាស់ដីដើមមានឈ្មោះ ភឺន ផល្លា ដែលមានងារជាឧកញ៉ា ហើយដីនោះត្រូវបានម្ចាស់ដីប្រគល់ឲ្យឈ្មោះ ម៉ាត់ ឌី ជាអ្នកចាំដីឲ្យ ប៉ុន្តែក្រោយមកបែរជាបុគ្គលឈ្មោះ ម៉ាត់ ឌីនេះ បានសមគំនិតជាមួយ ឈ្មោះ ឡុង ដារ៉ា ដែលតាំងខ្លួនជាម្ចាស់ដីលក់ទៅឲ្យឈ្មោះ ប៉ូច ថេន ដែលជាអ្នកទិញតំណាងឲ្យលោក ស ថាវី»។
លោកនិយាយថា នៅពាក់កណ្តាលខែមីនាលោកនឹងចូលខ្លួនទៅបំភ្លឺនៅតុលាការជាថ្មីទៀតជុំវិញការបំពានលួចលក់ដីរបស់អ្នកដទៃនេះ ដោយលោកក៏បានទទួលស្គាល់នូវកំហុសខុសឆ្គងមួយចំនួនផងដែរបន្ទាប់ពីបានប្រថាប់ត្រាលើលិខិតទិញ-លក់ដីនេះដោយមិនបានពិនិត្យឲ្យបានត្រឹមត្រូវដោយសារតែលោកក៏ត្រូវបានបុគ្គលទាំងនោះកុហកផងដែរ។
ចំណែកលោក ស ថាវី ក៏បានបដិសេធការចោទប្រកាន់នេះផងដែរ។ លោកបានប្រាប់ភ្នំពេញប៉ុស្តិ៍ពីម្សិលមិញថា លោកមិនបានប្រព្រឹត្តដូចការចោទប្រកាន់នោះទេ ហើយការដែលលោកទិញដីនេះគឺធ្វើឡើងតាមរយៈការទិញតៗគ្នា ដោយមិនបានដឹងថា ដីនេះមានកម្មសិទ្ធិរបស់អ្នកដទៃនោះឡើយ។ លោកបញ្ជាក់ថា៖ «ករណីនេះវាមិនបានជាប់ពាក់ព័ន្ធនឹងខ្ញុំទេ ទាល់តែមើលឯកសារ ព្រោះខ្ញុំមិនបានទៅប្រព្រឹត្តនូវការលួចលក់ដីអីហ្នឹងទេ គឺយើងទិញទៅតាមគ្នា និងបន្តៗគ្នាអីអ៊ីចឹងទៅ។ ដូច្នេះសូមឲ្យមេធាវីគេបញ្ជាក់ទៅ ព្រោះមានឯកសារនៅហ្នឹងដៃ»។
លោក ទៀ បាញ់ រដ្ឋមន្ត្រីការពារជាតិបានប្រាប់ភ្នំពេញ-ប៉ុស្តិ៍កាលពីម្សិលមិញថា លោកមិនបានដឹងពីករណីដែលថា លោក ស ថាវី មានជាប់ពាក់ព័ន្ធនឹងករណីលួចលក់ដីអ្នកដទៃនេះទេ។ លោកបញ្ជាក់ថា បើទោះជាមានករណីបែបនេះក៏មិនមានជាប់ពាក់ព័ន្ធអ្វីទៅនឹងក្រសួងការពារជាតិដែរ ហើយក្រសួងក៏មិនចាំបាច់អ្វីត្រូវធ្វើការស៊ើបអង្កេតនោះទេ។ ប៉ុន្តែលោកបញ្ជាក់ថា៖ «បើទោះគាត់មានងារក្នុងក្រសួងការពារជាតិក៏ដោយ ទុកឲ្យតុលាការគេធ្វើការរបស់គេទៅ។ យើងក៏មិនធ្វើការស្រាវជ្រាវអ្វីបន្ថែម ជុំវិញករណីនេះដែរ យើងមិនមានវិធានការអ្វីទៅគាត់ទេ បើខ្ញុំមិនទាន់បានដឹងរឿងហ្នឹងផង ទុកឲ្យតុលាការ គេធ្វើការរបស់គេហើយ»៕