ភ្នំពេញៈ អគ្គស្នងការរងនគរបាលជាតិ លោក ស ថេត ជំរុញឱ្យ កងកម្លាំងប្រដាប់អាវុធ និងមន្ត្រីរាជការត្រូវធ្វើជាគំរូដ៏ល្អសម្រាប់ប្រជាពលរដ្ឋទូទៅក្នុងការគោរពច្បាប់ចរាចរណ៍នៅលើដងផ្លូវ ដោយលោកប្រាប់ឱ្យមន្ត្រីនគរបាលចរាចរណ៍កុំភ័យខ្លាចក្នុងការអនុវត្តច្បាប់លើមន្ត្រីជាន់ខ្ពស់ណាដែលប្រព្រឹត្តខុស ខណៈការបើកបរល្មើសច្បាប់នៅតែជាបញ្ហាសម្រាប់កម្ពុជា។
លោក ស ថេត ដែលក៏ជាស្នងការនគរបាលរាជធានីភ្នំពេញផងនោះបានសរសេរនៅលើទំព័រហ្វេសប៊ុករបស់លោកកាលពីម្សិលមិញថា៖ «ទាំងកងកម្លាំង ទាំងមន្ត្រីរាជការស៊ីវិលទាំងអស់ត្រូវតែធ្វើជាគំរូដ៏ល្អសម្រាប់ប្រជាពលរដ្ឋទូទៅក្នុងការគោរពច្បាប់ចរាចរណ៍។ សូមបើកបរដោយប្រុងប្រយ័ត្ន និងគោរពច្បាប់ចរាចរណ៍គ្រប់ពេលបើកបរ»។
បន្ថែមពីនេះលោក ស ថេត ក៏បានបញ្ជាក់យ៉ាងច្បាស់ដល់មន្ត្រីចរាចរណ៍ទាំងអស់ត្រូវតែអនុវត្តឱ្យបានត្រឹមត្រូវតាមច្បាប់ដោយកុំមានការភ័យខ្លាចការអន្តរាគមន៍ណាមួយ ចំពោះអ្នកដែលបើកបរខុសច្បាប់។ លោកក៏ធ្លាប់ព្រមានឱ្យចាត់វិធានការឱ្យបានស្មើភាពគ្នា បើទោះជាឋាន:ណាក៏ដោយឱ្យតែបើកបរមិនគោរពច្បាប់គឺត្រូវតែធ្វើការផាកពិន័យ។
តាមរបាយការណ៍នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈការរឹតបន្ដឹងការអនុវត្តច្បាប់ស្ដីពីចរាចរណ៍ផ្លូវគោកក្នុងរយៈពេល ២២ ថ្ងៃចាប់ពីថ្ងៃទី ១ ដល់ថ្ងៃទី ២២ វិច្ឆិកា មានមធ្យោបាយល្មើសសរុបចំនួន ១៦ ៣៩៨ គ្រឿង ត្រូវបានផាកពិន័យនៅទូទាំងប្រទេស ខណៈរយៈពេលតែ ១ ថ្ងៃ គឺនៅថ្ងៃទី ២២ ខែវិច្ឆិកា មានមធ្យោបាយល្មើសសរុបជិត ១ ០០០ គ្រឿង នៅទូទាំងប្រទេសត្រូវបានផាកពិន័យ។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ ប្រាប់ ភ្នំពេញ ប៉ុស្តិ៍ ពីម្សិលមិញថាការដែលថ្នាក់ដឹកនាំបន្តជំរុញយ៉ាងដូច្នេះ ក៏ព្រោះតែមើលឃើញថា នៅតែមានមន្ត្រីមួយចំនួនតូច បន្តប្រព្រឹត្តកំហុស ធ្វើឱ្យប៉ះពាល់ដល់មុខមាត់មន្ត្រីរាជការដទៃទៀត ហើយវាក៏ជាគំរូអាក្រក់សម្រាប់ពលរដ្ឋផងដែរ។
លោកបញ្ជាក់ថា៖ «ក្នុងនាមជាកងកម្លាំង ជាមន្ត្រីរាជការទូទៅមានន័យថា គឺគាត់ជាអ្នកតំណាងឱ្យជាតិ ជាអ្នកតំណាងឱ្យស្ថាប័ន ដូច្នេះទាក់ទងនឹងបញ្ហាទាំងនេះ គាត់គួរតែធ្វើជាគំរូ។ នៅពេលដែលក្នុងនាមជាកងកម្លាំង មន្ត្រីរាជការទូទៅ គាត់ជាអ្នកអនុវត្តច្បាប់ ហើយគាត់គោរពច្បាប់អាចធ្វើឱ្យប្រជាពលរដ្ឋយកគំរូតាម ព្រោះប្រជាពលរដ្ឋទូទៅគាត់ច្រើនតែសម្លឹងមើលមកលើអង្គភាពស្ថាប័នរដ្ឋ ឬអ្នកបើកបរដែលមានស្លាកលេខ ន.ប. ខ.ម. ឬរាជការអីជាដើម»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាយល់ថា ការជំរុញដាស់តឿនរបស់ថ្នាក់ដឹកនាំនេះ គឺជារឿងដដែលៗ ហើយនេះគ្រាន់ជាការរំឭកជាថ្មីប៉ុណ្ណោះ ស្របពេលដែលឥរិយាបថមន្ត្រីរាជការ ឬកងកម្លាំងប្រដាប់អាវុធមួយចំនួននៅតែប្រព្រឹត្តទង្វើមិនល្អក្នុងការបង្ហាញជាគំរូអាក្រក់ដល់ពលរដ្ឋ។ លោកថា ពេលខ្លះកងកម្លាំងប្រដាប់អាវុធមួយចំនួនតូច ត្រូវបានគេប្រទះឃើញថា បំពានច្បាប់ចរាចរណ៍ ដូចជា ការបើកបរបំពានភ្លើងសញ្ញា បើកបរក្នុងឥរិយបថមិនត្រឹមត្រូវ ព្រមទាំងបង្កហិង្សាជាដើម។
លោកថ្លែងថា៖ «ការគ្រប់គ្រងអាវុធរបស់កងកម្លាំង និងពិនិត្យមើលសាវតារ និងឥរិយាបថពួកគេ [ត្រូវអនុវត្ត] មុនពេលចូលបម្រើការងារ និងពេលបានបំពេញការងាររួចហើយ។ វាជារឿងអស់សំណើច បើមានកងកម្លាំងប្រព្រឹត្តល្មើស ដូចជាគំរាម និងរំលោភស្រីភេទដោយប្រើកាំភ្លើង ជាមធ្យោបាយសម្លុត។ ក្រៅពីនោះកងកម្លាំងត្រូវនៅឱ្យឆ្ងាយពីការកាងល្បែងស៊ីសង និងបទល្មើសគ្រឿងញៀនជាដើម»។
លោក គង់ សុវណ្ណ ទីប្រឹក្សាជំនាញ និងជាអនុប្រធានក្រុមកម្មវិធី សុវត្ថិភាពចរាចរណ៍សហគមន៍នៃគម្រោងអភិវឌ្ឍន៍ផ្លូវជនបទជំហានទី ២ របស់ក្រសួងអភិវឌ្ឍន៍ជនបទ ចង់ឱ្យមានការដាស់តឿនបែបនេះជារឿយៗ ដើម្បីក្រើនរំឭកដល់មន្ត្រីរាជការ និងកម្លាំងប្រដាប់អាវុធជាប្រចាំ។
ការធ្វើដូច្នេះ គឺមានសារៈសំខាន់ណាស់សម្រាប់ពលរដ្ឋ និងសង្គមជាតិ ព្រោះថាមន្ត្រីអ្នកអនុវត្តច្បាប់ គឺជាតួអង្គគំរូដល់ប្រជាពលរដ្ឋ។ លោកក៏ចង់ឱ្យមន្ត្រីមានសមត្ថកិច្ចទាំងអស់ត្រូវអនុវត្តច្បាប់ឱ្យបានស្មើភាពគ្នា ចៀសវាងមានការអនុវត្តស្តង់ដា ២ ដែលនាំឱ្យបាត់ជំនឿពីពលរដ្ឋ។
លោកថា៖ «បើសិនជាមន្ត្រីគ្រប់រូបកាន់តែច្រើនធ្វើជាគំរូបានគឺជាការផ្តើម និងជំរុញចលករត្រឹមត្រូវបំផុតដែលឱ្យពលរដ្ឋឈានទៅរក ការគោរពច្បាប់ទូទាំងប្រទេស។ បើមិនអ៊ីចឹងទេ នៅតែមានអ្នកយកលេសអ៊ីចឹង ថាគោរពយ៉ាងម៉េច បើប៉ូលិស ទាហាន ដូចគ្នា មិនគោរពផង»៕
វីដេអូ៖