ភ្នំពេញៈ លោក ស ថេត ស្នងការនគរបាលរាជធានីភ្នំពេញបានណែនាំដល់អធិការនគរបាលខណ្ឌទាំង ១៤ ឲ្យបង្កើនការអនុវត្ដច្បាប់ ចំពោះពលរដ្ឋដែលប្រកបរបរស្ថានីយលក់ប្រេងឥន្ធនៈ ទីតាំងលក់ និងបញ្ចូលហ្គាស ជាពិសេសទីតាំងដែលងាយរងគ្រោះផ្សេងៗទៀត បន្ទាប់ពីមានការផ្ទុះឆេះផ្ទះលក់ហ្គាសមួយបណ្តាលឲ្យស្លាប់ ៤ នាក់របួស ៥ នាក់។
លោក ស ថេត បានណែនាំបែបនេះកាលពីថ្ងៃទី ២១ ខែកក្កដា ក្នុងពេលដឹកនាំកិច្ចប្រជុំផ្សព្វផ្សាយ និងដាក់វិធានការចុះអនុវត្តត្រួតពិនិត្យតាមបណ្តាក្លិបកម្សាន្ត ខារ៉ាអូខេ ដើម្បីណែនាំ អប់រំ និងផ្សព្វផ្សាយវិធានការរបស់ក្រសួងសុខាភិបាល និងសេចក្តីជូនដំណឹងរបស់សាលារាជធានីក្នុងការប្រែក្លាយទីកន្លែងទាំងនោះទៅជាភោជនីយដ្ឋាន។
លោក ស ថេត ថ្លែងថា៖ «ត្រូវបង្កើនការចុះណែនាំអប់រំជាប្រចាំដល់អ្នកប្រកបមុខរបរ ដែលងាយរងគ្រោះដូចជាស្ថានីយលក់ប្រេង ទីតាំងលក់ និងបញ្ចូលហ្គាស ជាពិសេសទីតាំងដែលងាយរងគ្រោះផ្សេងៗទៀតដែលទីតាំងទាំងនោះ គួរតែមានបំពង់ពន្លត់អគ្គិភ័យ ដើម្បីត្រៀមជួយសង្គ្រោះបឋមក្នុងករណីមានអគ្គិភ័យកើតឡើងជាយថាហេតុ»។
លោក នេត វន្ថា ស្នងការរង រាជធានីភ្នំពេញប្រាប់ភ្នំពេញប៉ុស្ដិ៍ថា ការណែនាំរបស់លោកស្នងការនេះ គឺដើម្បីបង្កើនការអនុវត្ដច្បាប់តាមអនុក្រឹត្យលេខ ១៣១ របស់រាជរដ្ឋាភិបាលស្ដីអំពីលក្ខខណ្ឌ និងវិធានការនានាក្នុងការបង្ការទប់ស្កាត់គ្រោះអគ្គិភ័យ។ «ពលរដ្ឋគាត់មិនទាន់យល់ដឹងនិងចូលរួមបានទូលំទូលាយ ហើយការផ្សព្វផ្សាយរបស់សមត្ថកិច្ចយើងក៏មិនទាន់បានទូលំទូលាយដែរ។
និយាយរួមពលរដ្ឋជាអ្នកប្រកបរបរលក់ដូរ ប្រេងឥន្ធនៈ លក់ និងបញ្ចូលហ្គាសជាដើម ពួកគាត់នៅមិនទាន់បានអនុវត្ដតាមអនុក្រឹត្យលេខ ១៣១ ដែលអនុក្រឹត្យនេះ មិនអនុញ្ញាតឱ្យពួកគាត់លក់ដូរទំនិញងាយបង្កហានិភ័យបែបនេះនៅទីប្រជុំជនទេ។ បើពលរដ្ឋនៅតែបន្តលក់នោះនឹងប្រឈមនឹងការផាកពិន័យជាប្រាក់»។
លោក វន្ថា ឱ្យដឹងថា វិធានការបន្តអាជ្ញាធរ និងមន្ទីរពាក់ព័ន្ធដែលមានសមត្ថកិច្ច គឺត្រូវតែអនុវត្ដច្បាប់ព្រោះអនុក្រឹត្យរបស់រាជរដ្ឋាភិបាលបានចេញរួចហើយគឺមានសុពលភាពក្នុងការអនុវត្ដ ប្រសិនបើពលរដ្ឋបានធ្វើផ្ទុយពីច្បាប់។ ដូច្នេះតាមការណែនាំរបស់លោកស្នងការគឺត្រូវតែបន្តអនុវត្ដច្បាប់ឱ្យបានទូលំទូលាយបន្ថែមទៀតចំពោះការបើកមុខរបរងាយរងគ្រោះដូចជាស្ថានីយលក់ប្រេង ទីតាំងលក់ និងបញ្ចូលហ្គាស។
បើតាមលោក វន្ថា ការណែនាំរបស់លោក ស ថេត ធ្វើឡើងក្រោយពីមានអគ្គិភ័យឆេះផ្ទះលក់ហ្គាសនៅសង្កាត់បឹងរាំង ខណ្ឌដូនពេញកាលពីល្ងាចថ្ងៃ ១៨ ខែកក្កដា ដែលបណ្ដាលឲ្យមនុស្សចំនួន ៤ នាក់ស្លាប់ និង ៥ នាក់ទៀតរបួស៕
វីដេអូ៖