.jpg)
សិស្សកំពុងរៀនក្នុងថ្នាក់រៀនមួយនៅវិទ្យាល័យទួលទំពូង។ ហេង ជីវ័ន
ភ្នំពេញៈ លោកនាយករដ្ឋមន្ដ្រី ហ៊ុន សែន បានតែងតាំងលោក ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡាជាប្រធានគណៈកម្មាធិការអន្តរក្រសួងស្ដីពីសុខភាពសិក្សាដែលមានរដ្ឋលេខាធិការនៅតាមក្រសួងពាក់ព័ន្ធជាង ២០ រូបទៀតជាអនុប្រធាន និងសមាជិកក្នុងគោលបំណងដើម្បីលើកកម្ពស់គុណភាពអប់រំ។
យោងតាមសេចក្ដីសម្រេចតែងតាំងរបស់លោកនាយករដ្ឋមន្ដ្រីចុះហត្ថលេខាកាលពីថ្ងៃទី ៤ ខែ ធ្នូ ឆ្នាំ ២០២០ ដែល ភ្នំពេញ ប៉ុស្ដិ៍ ទើបទទួលបានកាលពីម្សិលមិញ គណៈម្មាធិការអន្តរក្រសួងស្ដីពីសុខភាពសិក្សានេះមានរដ្ឋលេខាធិការនៅតាមបណ្តាក្រសួងពាក់ព័ន្ធចំនួន ២៣ រូបទៀតជាអនុប្រធាននិងសមាជិករួមនឹងអភិបាលរាជធានី-ខេត្ត ក៏ត្រូវបានតែងតាំងជាសមាជិកផងដែរ។
រាជរដ្ឋាភិបាលកម្ពុជាកាលពីកិច្ចប្រជុំពេញអង្គគណៈរដ្ឋមន្ដ្រីនៅថ្ងៃទី ៥ ខែ មេសា ឆ្នាំ ២០១៩ បានឯកភាពដាក់ចេញគោលនយោបាយជាតិស្ដីពីសុខភាពសិក្សាក្នុងគោលបំណងរួមចំណែកលើកកម្ពស់គុណភាពអប់រំ និងផ្ដល់ឱ្យអ្នកសិក្សា និងបុគ្គលិកអប់រំនូវលទ្ធភាពក្នុងការទទួលបាននូវសុខភាពល្អ និងសុខុមាលភាពដើម្បីក្លាយជាធនធានមនុស្សប្រកបដោយសក្តានុពល។
ទាក់ទងនឹងការតែងតាំងលោករដ្ឋមន្ដ្រីក្រសួងអប់រំនេះលោក រស់ សុវាចា អ្នកនាំពាក្យក្រសួងអប់រំបានថ្លែងនៅថ្ងៃទី ៦ ខែមករា ថា៖ «គោលបំណងរួមគឺលើកកម្ពស់សុខភាពសិក្សា»។
តាមអត្ថបទអារម្ភកថារបស់លោក ហ៊ុន សែន នៅក្នុងគោលនយោបាយជាតិស្ដីពីសុខភាពសិក្សានេះ រាជរដ្ឋាភិបាលបាននិងកំពុងយកចិត្ដទុកដាក់យ៉ាងខ្លាំងក្នុងការលើកកម្ពស់សុខភាពសិក្សា ដោយបានរៀបចំជាសំណុំយុទ្ធសាស្ដ្រ និងសកម្មភាពអន្តរកម្មរវាងគ្រឹះស្ថានសិក្សា និងសេវាកម្មសុខភាពនានា ដើម្បីលើកកម្ពស់សុខភាព សិក្សាតាមរយៈការអប់រំសុខភាព ការបង្ការជំងឺ ការផ្ដល់សេវា សុខភាពចាំបាច់ ការលើកកម្ពស់អនាម័យ បរិស្ថាន និងការផ្គត់ផ្គង់ទឹកស្អាតដល់បុគ្គលិកអប់រំ និងអ្នកសិក្សាជាដំណាក់កាលៗ។
លោកនាយករដ្ឋមន្ត្រីបានបញ្ជាក់ថា គោលនយោបាយនេះនឹងចូលរួមលើកកម្ពស់គុណភាពអប់រំ ដើម្បីឱ្យកម្ពុជាសម្រេចបានគោលដៅនៃការអប់រំ តាមរយៈការផ្ដល់នូវចំណេះដឹង សុខភាព ស្របតាមការលូតលាស់រាងកាយ និងស្មារតីប្រកបដោយលក្ខណៈវិទ្យាសាស្ដ្របំណិនសម្រាប់បង្ការជំងឺឆ្លង ជំងឺមិនឆ្លង គ្រោះថ្នាក់ផ្សេងៗ និងវិធីជួយសង្គ្រោះបឋម គុណតម្លៃ និងឥរិយាបថដែលនាំឱ្យពួកគេអភិវឌ្ឍខ្លួនប្រកបដោយសុខភាពពេញលេញទាំងកាយ ទាំងប្រាជ្ញា ស្មារតីនិងចេះទទួលខុសត្រូវចំពោះទង្វើរបស់ខ្លួន។
លោក ប៉ិច បូឡែន ប្រធានក្រុមប្រឹក្សាភិបាលសហព័ន្ធសេវាអប់រំនៅកម្ពុជា លើកឡើងថា តាមរយៈគោលនយោបាយសុខភាពសិក្សានេះក្រោយការដាក់ឱ្យអនុវត្ដគោលនយោបាយនៅតាមសាលារៀនឯកជនក៏បានរៀបចំបានល្អដើម្បីលើកកម្ពស់សុខភាពសិក្សាដល់បុគ្គលិកសិក្សា និងសិស្សានុសិស្ស។
លោកថ្លែងថា៖ «សាលារៀនឯកជនរៀបចំបានល្អចំពោះការលើកកម្ពស់សុខភាពសិក្សានេះមានដូចជា ការរៀបចំឱ្យមានពេទ្យប្រចាំការនៅតាមសាលា ការបង្ហាត់ការសង្គ្រោះបឋមដល់បុគ្គលិកសិក្សា និងសិស្ស និងការត្រួតពិនិត្យលើសុវត្ថិភាពចំណីអាហារនៅតាមសាលារៀនជាប្រចាំជាដើម»។
បើតាមលោក បូឡែន កាលពីមិនទាន់មានគោលនយោបាយជាតិស្ដីពីសុខភាពសិក្សា កុមារ និងយុវជនរបស់កម្ពុជាមានបញ្ហាកង្វះអាហារូបត្ថម្ភ ព្រោះមិនទាន់មានការថែទាំ គាំពារ លើសុវត្ថិភាពចំណីអាហារសារពាង្គកាយបានល្អធ្វើឲ្យប៉ះពាល់ដល់ការលូតលាស់ប្រាជ្ញា ស្មារតីរបស់ពួកគេថែមទៀត។ ប៉ុន្ដែតាមរយៈគោលនយោបាយថ្មីនេះបានគាំទ្រចំពោះសុខភាពរបស់សិស្ស លើការផ្ដល់អាហារូបត្ថម្ភ និងសុខភាពផ្លូវចិត្ដរបស់សិស្សធ្វើឱ្យកុមារ និងយុវជនកម្ពុជាមានប្រាជ្ញាស្មារតីល្អប្រសើរឡើង។
យោងតាមសៀវភៅគោលនយោបាយជាតិស្ដីពីសុខភាពសិក្សា និងអ្នកសិក្សា បញ្ជាក់ថា សុខភាពសិក្សា និងអ្នកសិក្សា គឺជាកត្តាសំខាន់មួយដែលបានរួមចំណែកដល់ការធានាបាននូវការសិក្សាប្រកបដោយគុណភាព និងបង្កើនអត្រាបញ្ចប់ការសិក្សា។
គោលដៅនៃគោលនយោបាយនេះក៏ដើម្បីលើកកម្ពស់ការផ្ដល់សេវាសុខភាពចាំបាច់ដល់អ្នកសិក្សា និងបុគ្គលិកអប់រំក្នុងការលើកកម្ពស់ការផ្ដល់អាហារូបត្ថម្ភបរិស្ថានសិក្សាប្រកបដោយបរិយាបន្ន បណ្ដុះបណ្ដាលវប្បធម៌ ថែរក្សាសុខភាពផ្ទាល់ខ្លួនគ្រួសារ និងសង្គម និងជំរុញឲ្យមានការចូលរួមពីគ្រប់ភាគីពាក់ព័ន្ធក្នុងការលើកកម្ពស់សុខភាពសិក្សា៕
