ភ្នំពេញៈ រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានបង្ហាញលទ្ធផលការអប់រំកម្រិតមត្តេយ្យសិក្សា និងអប់រំចំណេះទូទៅរបស់កម្ពុជា ដល់រដ្ឋមន្រ្ដីអប់រំ នៃបណ្ដាប្រទេសអាស៊ានចំនួន១០ តាមរយៈសន្និសីទស្តីពីលទ្ធផលការអប់រំរៀបចំដោយអង្គការរដ្ឋមន្ត្រីអប់រំអាស៊ាន (SEAMEO) កាលពីថ្ងៃទី ១ ខែធ្នូ។
លោក ហង់ជួន ណារ៉ុន បង្ហាញលទ្ធផលនៃការអប់រំរបស់កម្ពុជានេះ តាមរយៈវីដេអូ (Zoom) ក្នុងកម្មវិធីផ្សព្វផ្សាយថ្នាក់តំបន់ពីចម្ងាយ ស្តីពីលទ្ធផលការអប់រំកម្រិតមត្តេយ្យសិក្សា និង អប់រំចំណេះទូទៅថ្នាក់ជាតិ ថ្នាក់តំបន់ និង អន្តរជាតិ The Southeast Asia Primary Learning Metrics (SEA-PLM) រៀបចំដោយអង្គការរដ្ឋមន្ត្រីអប់រំអាស៊ាន The Southeast Asian Ministers of Education Organization (SEAMEO) ដល់រដ្ឋមន្រ្តីអប់រំនៃប្រទេស ប្រ៊ុយណេ ឥណ្ឌូនេស៊ី ឡាវ ម៉ាឡេស៊ី ហ្វីលីពីន សឹង្ហបូរី ថៃ ទីម័រខាងកើត មីយ៉ាន់ម៉ា និងវៀតណាម។
លោករដ្ឋមន្រ្តីថ្លែងថា ក្រសួងអប់រំកម្ពុជាបានរៀបចំវិធានការកម្រិតគោលនយោបាយឆ្លើយតបនឹងលទ្ធផល SEA-PLM ទៅលើ «ការពង្រឹងកម្មវិធីបណ្ដុះបណ្ដាល និងបំប៉នគ្រូបង្រៀន ដោយផ្តោតលើវិធីសាស្ត្របង្រៀនអំណាន និងគណិតវិទ្យាថ្នាក់ដំបូង និងលើកកម្ពស់គុណវឌ្ឍិ និងគន្លងអាជីពគ្រូបង្រៀនគន្លងអាជីពនាយកសាលា ព្រមទាំងពង្រឹងយន្តការការវាយតម្លៃដើម្បីលើកទឹកចិត្តគ្រូបង្រៀនល្អ និងនាយកសាលាល្អ»។
បើតាមលោករដ្ឋមន្រ្ដី ដើម្បីឆ្លើយតបនឹងលទ្ធផលការអប់រំ SEA-PLM ក្រសួងអប់រំ ក៏បានពង្រីកមត្តេយ្យសិក្សាសហគមន៍និងបង្កើនចំនួនមតេ្តយ្យសិក្សាសហគមន៍ ដែលមានស្តង់ដា ឱ្យប្រែក្លាយជាមត្តេយ្យសិក្សារដ្ឋ ព្រមទាំងត្រូវពង្រឹងគុណភាពបណ្តុះបណ្តាលគ្រូមត្តេយ្យសហគមន៍ និងការផ្តល់ជូនសម្ភារឧបទេសផងដែរ។
ក្រសួងអប់រំកម្ពុជា ក៏បានពង្រឹងគុណភាពអប់រំកុមារតូច ដើម្បីកាត់បន្ថយអត្រាត្រួតថ្នាក់ និងអត្រាបោះបង់ការសិក្សានៅថ្នាក់ទី១ និងត្រូវផ្តល់អាហារូបត្ថម្ភដើម្បីបំប៉នបន្ថែមជូនកុមារ នៅតំបន់ក្រីក្រជួបការលំបាក ព្រមទាំងដោះស្រាយបញ្ហាអនាម័យ និងទឹកស្អាតនៅតាមសាលារៀនជនបទដាច់ស្រយាល។ បង្កើនម៉ោងសរសេរតាមអានសរសេរអត្ថបទខ្លីៗ និងតែងសេចក្តីក្នុងកម្មវិធីសិក្សាកម្រិតបឋមសិក្សាជាដើម។
បើតាម The Southeast Asian Ministers of Education Organization (SEAMEO) លទ្ធផលនៃសន្និសីទរបស់រដ្ឋមន្រ្ដីអប់រំអាស៊ាននេះ គឺបានផ្តល់នូវព័ត៌មានដែលមានអត្ថន័យ ដើម្បីស្វែងយល់ពីកម្រិតនៃធនធានក្នុងការអនុវត្ត និងលទ្ធផលនៃការសិក្សានៅក្នុងមូលដ្ឋានគ្រឹះ នៅទូទាំងប្រទេសអាស៊ីអាគ្នេយ៍។
SEAMEO បញ្ជាក់ថា៖«យើងសង្ឃឹមថា របាយការណ៍និងការស្រាវជ្រាវថ្នាក់ជាតិ និងថ្នាក់តំបន់នេះ នឹងផ្តល់នូវសន្ទុះគោលនយោបាយថ្មី ក្នុងចំណោមបណ្តាប្រទេសអាស៊ាននិងដៃគូផ្សេងៗទៀត»។
បើតាមលោក ហង់ជួន ណារ៉ុន ដើម្បីឆ្លើយតបទៅនឹងលទ្ធផលការអប់រំ SEA-PLM ក្រសួងអប់រំ ក៏បានលើកទឹកចិត្តឱ្យមាតាបិតា សហគមន៍ និងអាជ្ញាធរមូលដ្ឋាន ចូលរួមក្នុងសមាសភាពគណៈកម្មការគ្រប់គ្រងសាលារៀន ដើម្បីពិភាក្សាពីការជួយលើកកម្ពស់លទ្ធផលសិក្សារបស់សិស្សប្រចាំខែ ដោយមានការចូលរួម ពីក្រុមប្រឹក្សាកុមារផងដែរ។ រៀបចំបណ្ណាល័យនៅតាមសាលារៀន ឱ្យស្របតាមស្តង់ដាបណ្ណាល័យដែលបានកំណត់ ព្រមទាំងបណ្តុះបណ្តាលបណ្ណារក្ស ពីការគ្រប់គ្រងនិងប្រើប្រាស់សៀវភៅ វិធីសាស្ត្រអំណានក្នុងបណ្ណាល័យ ដើម្បីលើកម្ពស់សកម្មភាពអំណានក្រៅថ្នាក់របស់សិស្សប្រកបដោយប្រសិទ្ធភាព៕