ភ្នំពេញៈ លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានអំពាវនាវដល់ប្រជាពលរដ្ឋដែលមានដីធ្លីនៅតំបន់មានគ្រាប់មីន ត្រូវបញ្ឈប់សកម្មភាពដោះមីនដោយខ្លួនឯង ឬជួលអ្នកដោះមីនគ្មានវិជ្ជាជីវៈដោះមីន ព្រោះអាចរងគ្រោះថ្នាក់ធ្ងន់ធ្ងរ និងឈានដល់បាត់បង់ជីវិត ប៉ុន្ដែត្រូវបែរមកសហការជាមួយអាជ្ញាធរដើម្បីស្នើសុំបោសសម្អាតមីនដោយឥតគិតថ្លៃវិញ។
លោក ហេង រតនា បានថ្លែងប្រាប់ភ្នំពេញប៉ុស្ដិ៍កាលពីថ្ងៃទី ២ ខែមិថុនា ថា កម្លាំងនគរបាលមូលដ្ឋានតាមបណ្ដាខេត្ដដែលជាតំបន់ដីមានមីន និងកងកម្លាំងស៊ីម៉ាក់កំពុងបន្ដចុះណែនាំ និងបញ្ឈប់សកម្មភាពអ្នកភូមិដែលបានប្រកបរបរស៊ីឈ្នួលដោះមីនដោយខ្លួនឯង ដោយមិនប្រាប់អាជ្ញាធរឲ្យបានដឹង។
លោក រតនា ថ្លែងថាសកម្មភាពពលរដ្ឋ ដោះមីនដោយខ្លួនឯងនៅដីធ្លីមានមីនភាគច្រើនស្ថិតនៅខេត្ដឧត្ដរមានជ័យ ព្រះវិហារ និងបន្ទាយមានជ័យ។ ក្រោយពេលពួកគាត់ធ្វើសកម្មភាពដោះមីនហើយជួបគ្រោះថ្នាក់ទើបប្រាប់មកអាជ្ញាធរ និងស៊ីម៉ាក់ឲ្យចុះទៅជួយសង្គ្រោះ។
លោក រតនា ថ្លែងថា៖ «នៅពេលពួកគាត់ជួបគ្រោះថ្នាក់រួចហើយទើបក្រុមការងារជំនាញយើងធ្វើការស៊ើបអង្កេតទៅដឹងថា ពួកគាត់ប្រកបរបរដើរដោះមីនបែបនេះ។ ពួកគាត់មិនអាចដោះមីនអស់ពីដីដែលមានមីនទេ ព្រោះគ្មានសម្ភារសម្រាប់ដោះមីនគ្រប់គ្រាន់។ សំខាន់ជាងនេះ ការដោះមីនបែបនេះ គឺគ្រោះថ្នាក់ដល់អ្នកដោះផង និងអ្នកប្រើប្រាស់ដីផងដែរ ព្រោះថាក្រោយជួលអ្នកដោះមីនបែបនេះរួចពលរដ្ឋយល់ថាដីនោះមានសុវត្ថិភាពហើយ តែការពិតមិនដូច្នោះទេ ព្រោះខ្វះសម្ភារ និងបច្ចេកទេស ហើយដីនោះអាចមិនទាន់អស់គ្រាប់មីនទេ»។
លោក ហេង រតនា ថ្លែងថាពលរដ្ឋដែលស៊ីឈ្នួលដោះមីននោះគ្មានបច្ចេកទេសច្បាស់លាស់នោះទេ គ្រាន់តែពួកគាត់ជាអតីតកងទ័ព ហើយកន្លងមកក៏ធ្លាប់មានអ្នកស្លាប់ដោយសារការដោះមីនបែបនេះជាច្រើនករណីដែរ។ ពលរដ្ឋខ្លះជាអតីតទាហាន ប៉ុន្ដែក៏មានករណីខ្លះមានពលរដ្ឋវ័យក្មេងជំនាន់ក្រោយសម័យសង្គ្រាមដែរ ដូចជាករណីស្លាប់យុវជនម្នាក់នៅខេត្ដឧត្ដរមានជ័យកាលពីឆ្នាំ ២០១៩ បុរសម្នាក់នោះទើបតែមានវ័យជាង ២០ ឆ្នាំ ប៉ុន្ដែគាត់ប្រកបរបរដោះមីនជាមួយអតីតពលទាហានចូលនិវត្ដន៍ម្នាក់។
លោកបញ្ជាក់ថា ទង្វើនេះគ្រោះថ្នាក់ណាស់ទី១ ដោយខ្វះសម្ភារបច្ចេកទេស និងជំនាញបច្ចេកទេសត្រឹមត្រូវ ទី២ ខ្វះនីតិវិធីគ្រប់គ្រងត្រួតពិនិត្យប្រកបដោយសុវត្ថិភាព ទី៣ ខុសច្បាប់តែម្តងដោយសារមិនដឹងត្រូវយកគ្រាប់មីន និងជាតិផ្ទុះទៅរក្សាទុកនៅឯណា។
លោក រតនា ថ្លែងថា៖ «ខ្ញុំសូមអំពាវនាវប្រជាពលរដ្ឋដែលមានដីធ្លីក្នុងតំបន់មានគ្រាប់មីន សូមសហការជាមួយអាជ្ញាធរមូលដ្ឋានដើម្បីស្នើសុំបោសសម្អាតមីនដោយឥតគិតថ្លៃ ចៀសវាងដាច់ខ្លួនក្នុងការប្រថុយប្រថានបោសសម្អាតគ្រាប់មីនដោយខ្លួនឯង ឬជួលអ្នកដោះមីនដែលគ្មានវិជ្ជាជីវៈដោះមីន»។
លោក ម៉ិញ ស្រ៊ន ប្រធានកងឯកភាពកម្ចាត់មីន ទី៦ ប្រចាំខេត្ដព្រះវិហារ ឧត្តរមានជ័យ និងខេត្ដស្ទឹងត្រែងបានឲ្យដឹងកាលពីថ្ងៃទី ២ ខែមិថុនា ថា បច្ចុប្បន្នស៊ីម៉ាក់បានសហការជាមួយស្នងការដ្ឋាននគរបាលជាតិក្នុងការចុះអប់រំផ្សព្វផ្សាយពីផលប៉ះពាល់នៃការដោះមីនដោយខ្លួនឯងពីសំណាក់ប្រជាពលរដ្ឋ និងណែនាំពលរដ្ឋឲ្យស្នើមកអាជ្ញាធរមូលដ្ឋានបើសិនជួបប្រទះអាវុធយុទ្ធភណ្ឌមិនទាន់ផ្ទុះ ដើម្បីឲ្យសមត្ថកិច្ចជំនាញរបស់ស៊ីម៉ាក់ចុះយក។
លោក ស្រ៊ន បានថ្លែងថា ទៀតថាកាលពីឆ្នាំ ២០១៩ កន្លងទៅក៏ធ្លាប់មានករណីពលរដ្ឋទៅស៊ីឈ្នួលដោះមីន បណ្ដាលឲ្យគ្រោះថ្នាក់ដល់អាយុជីវិត ១ ករណីស្ថិតនៅស្រុកត្រពាំងប្រាសាទ ខេត្ដឧត្ដរមានជ័យ បណ្ដាលឲ្យមនុស្ស ២ នាក់ស្លាប់បាត់បង់ជីវិត។
លោកថា ពលរដ្ឋដែលប្រកបរបរស៊ីឈ្នួលដោះមីននេះភាគច្រើនជាអតីតទាហាន និងមានអ្នកខ្លះជាសាច់ញាតិទាហាននោះហើយ ដែលទទួលបានការណែនាំបន្តពីគ្នាពីជំនាញដោះមីននោះក៏បង្កើតរបរស៊ីឈ្នួលដោះមីនដើម្បីបានកម្រៃបន្តិចបន្ទួច។
លោក ស្រ៊ន ថ្លែងថា៖ «ឥឡូវនេះកងកម្លាំង ស្នងការដ្ឋាននគរបាលជាតិ និងស៊ីម៉ាក់ជាដៃគូក្នុងការធ្វើការងារជាមួយគ្នាដើម្បីចូលរួមផ្សព្វផ្សាយពីផលវិបាកនៃការរងគ្រោះដោយអាវុធយុទ្ធភណ្ឌមិនទាន់ផ្ទុះដែលបន្សល់ទុកពីសម័យសង្គ្រាមនេះ។ យើងបានចុះណែនាំពួកគាត់ បើពួកគាត់ឃើញគ្រាប់យុទ្ធភណ្ឌមិនទាន់ផ្ទុះ ឬគ្រាប់មីននៅកន្លែងណាត្រូវរាយការណ៍ទៅប៉ុស្ដិ៍នគរបាល ឬរាយការណ៍ផ្ទាល់មកកាន់មន្ដ្រីស៊ីម៉ាក់នៅក្នុងតំបន់នោះតែម្ដង»៕