ភ្នំពេញៈ លោក ហេង សួរ អ្នកនាំពាក្យ និងជាប្រធានអនុគណៈកម្មការចំពោះកិច្ចសម្រាប់ចាក់វ៉ាក់សាំងការពារកូវីដ១៩ ប្រចាំក្រសួងការងារ និងបណ្តុះបណ្តាលវិជ្ជាជីវៈបានប្រកាសឱ្យកម្មករ-កម្មការិនី និងបុគ្គលិកនៃរោងចក្រដែលបានចាក់វ៉ាក់សាំងដូសទី ១ រួចហើយ ត្រូវទៅចាក់វ៉ាក់សាំងដូសទី ២ ចាប់ពីថ្ងៃទី ២៥ ខែមេសា ដល់ថ្ងៃទី ៦ ខែឧសភា ឆ្នាំ២០២១។
លោក ហេង សួរ បានឱ្យដឹងថា កម្មករ និងបុគ្គលិកនៅម្តុំទួលពង្រ និងផ្លូវវេងស្រេង ក្នុងខណ្ឌពោធិ៍សែនជ័យដែលធ្លាប់ចាក់វ៉ាក់សាំងដូសទី១ នៅសួនឧស្សាហកម្មកាណាឌីយ៉ា និងសួនឧស្សាហកម្ម ISI ត្រូវទៅចាក់ដូសទី ២ ចាប់ពីព្រឹកថ្ងៃទី ២៥ ខែមេសា ដល់ថ្ងៃទី ៦ ខែឧសភា។
លោកថា៖ «ក្រុមគ្រូពេទ្យការងារនឹងចាប់ផ្តើមចាក់វ៉ាក់សាំងដូសទី ២ ជូនបងប្អូនដែលធ្លាប់ចាក់នៅទីតាំងទាំង ២ នោះ»។
លោក ហេង សួរ បានបន្ថែមថា ដោយឡែកកម្មករ និងបុគ្គលិក ដែលធ្លាប់បានចាក់វ៉ាក់សាំង ដោយក្រុមគ្រូពេទ្យការងារនៅទីតាំងផ្សេង ហើយពេលនេះកំពុងស្ថិតក្នុងតំបន់ទួលពង្រ និងផ្លូវវេងស្រេងគឺអាចទៅទទួលវ៉ាក់សាំងដូសទី ២ នៅរៀងរាល់ពេលរសៀលចាប់ពីថ្ងៃទី ២៦ ខែមេសាតទៅ។
លោកបានបញ្ជាក់ថា៖ «ចំពោះមុខ អនុគណៈកម្មការចំពោះកិច្ចនៃក្រសួងការងារ និងបណ្តុះបណ្តាលវិជ្ជាជីវៈកំពុងសម្របសម្រួលឱ្យមានទីតាំងចាក់វ៉ាក់សាំងដូសទី ២ នៅខណ្ឌចំនួន ១០ នៃរាជធានីភ្នំពេញ ជាពិសេសខណ្ឌមានជ័យ ខណ្ឌកំបូល ខណ្ឌដង្កោ ខណ្ឌឫស្សីកែវ និងស្រុកចំនួន ២ នៃខេត្តកណ្តាលផងដែរ»។
លោកថា អនុគណៈកម្មការចំពោះកិច្ចនឹងជូនដំណឹងលម្អិតផ្លូវការជាបន្តទៀត ហើយអនុគណៈកម្មការចំពោះកិច្ចនឹងធ្វើការជាមួយគណៈកម្មការចំពោះកិច្ចថ្នាក់ជាតិ ព្រមទាំងភាគីពាក់ព័ន្ធក្នុងការរៀបចំចាក់ដូសទី ២ ជូនកម្មករ និងបុគ្គលិក ដោយក្រុមគ្រូពេទ្យការងារនៅតាមមូលដ្ឋានខណ្ឌនីមួយ។
អ្នកនាំពាក្យក្រសួងការងាររូបនេះបានស្នើដល់កម្មករ និងបុគ្គលិកនៃវិស័យឯកជនទាំងអស់ឱ្យរក្សាភាពនឹងនរ ក្រមសីលធម៌ សេចក្តីថ្លៃថ្នូរ និងសណ្តាប់ធ្នាប់ក្នុងការទៅចាក់វ៉ាក់សាំងដូសទី ២ ដោយបន្តអត់ធ្មត់ និងគោរពឱ្យបាននូវរាល់បទបញ្ជារបស់រាជរដ្ឋាភិបាលក្នុងអំឡុងពេលបិទខ្ទប់នេះ។
ក្រសួងការងារ និងបណ្តុះបណ្តាលវិជ្ជាជីវៈបានចាប់ផ្តើមចាក់វ៉ាក់សាំងដូសទី១ដល់កម្មករ និងបុគ្គលិករោងចក្រកាលពីថ្ងៃទី ៧ ខែមេសា ឆ្នាំ ២០២១ ដោយផ្តោតលើតំបន់អាទិភាព។
កាលពីសប្តាហ៍មុនលោក ហេង សួរ ធ្លាប់បានបញ្ជាក់ថា នៅថ្ងៃទី ២៩ ខែមេសា ក្រសួងក៏នឹងរៀបចំចាក់វ៉ាក់សាំងដូសទី ២ ទៅដល់កម្មករនៅតំបន់សួនវឌ្ឍនៈ២ នៅផ្លូវជាតិលេខ ៣ តំបន់សេដ្ឋកិច្ចពិសេសភ្នំពេញ និងរោងចក្រផ្សេងទៀតដែលមិនស្ថិតក្នុងតំបន់ក្រហម។
ក្រៅពីតំបន់សំខាន់ៗទាំងនេះក្រសួងការងារ និងបណ្តុះបណ្តាលវិជ្ជាជីវៈក៏កំពុងទាក់ទងនៅតាមរោងចក្រក្នុងស្រុកនានានៃខេត្តកណ្តាលនៅជុំវិញរាជធានីភ្នំពេញដែលមិនស្ថិតក្នុងតំបន់បិទខ្ទប់ ដើម្បីចាក់វ៉ាក់សាំងដូសទី ១ ជូនកម្មករផងដែរ ដោយក្រសួងបាននិងកំពុងផ្តោតលើស្រុកអង្គស្នួល កណ្តាលស្ទឹង ខ្សាច់កណ្តាល មុខកំពូល និងស្រុកពញាឮ ជាទិសដៅដែលក្រសួងនឹងរៀបចំចាក់វ៉ាក់សាំងដល់កម្មករនៅក្នុងសប្តាហ៍ក្រោយនេះ។
ជាមួយនេះដែរក្រសួងការងារ និងបណ្តុះបណ្តាលវិជ្ជាជីវៈនឹងពង្រីកការចាក់វ៉ាក់សាំងការពារជំងឺកូវីដ១៩នេះទៅកាន់ខេត្តដទៃទៀតដូចជា ខេត្តព្រះសីហនុ ខេត្តស្វាយរៀង និងខេត្តតាកែវ ដែលជាខេត្តគោលដៅកំណត់អាទិភាព បន្ទាប់ពីរាជធានីភ្នំពេញ និងខេត្តកណ្តាល។
ចាប់ពីថ្ងៃទី ៧ ដល់ទី ១៦ ខែមេសា កម្មករ និងបុគ្គលិកចំនួន ៨៨ ៨៩៩ នាក់ (បរទេសចំនួន ៣ ៧៦៩ នាក់) បានទទួលការចាក់វ៉ាក់សាំងការពារវីរុសកូវីដ១៩៕