.jpg)
កម្មកររោចក្រចេញពីធ្វើការក្នុងរោងចក្រមួយកន្លែងស្ថិតនៅសង្កាត់ចាក់អង្រែ ខណ្ឌមានជ័យ នាពេលកន្លងមក។ ហេង ជីវ័ន
ភ្នំពេញ៖ លោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ អំពាវនាវដល់ម្ចាស់រោងចក្រ សហគ្រាស នៅតាមខេត្តដែលមិនស្ថិតនៅក្នុងតំបន់បិទខ្ទប់ ត្រូវផ្លាស់ប្តូររបៀបប្រតិបត្តិការហិរញ្ញវត្ថុរបស់ខ្លួន ដោយត្រូវប្រើប្រាស់ប្រព័ន្ធធនាគារ ដើម្បីផ្ទេរសាច់ប្រាក់យកទៅបើកប្រាក់ឈ្នួលជូនបងប្អូនកម្មករនិយោជិត។
លោក ហេង សួរ បានថ្លែងក្នុងទំព័រហ្វេសប៊ុករបស់លោក នៅថ្ងៃទី ២២ ខែមេសាថា៖ «នៅក្នុងដំណាក់កាលបិទខ្ទប់នេះ ម្ចាស់រោងចក្រ សហគ្រាសនៅតាមបណ្តាខេត្ត ត្រូវប្រើប្រាស់ប្រព័ន្ធធនាគារ ដើម្បីផ្ទេរសាច់ប្រាក់ពីគណនីធនាគាររបស់ខ្លួននៅរាជធានីភ្នំពេញទៅសាខាធនាគារណាមួយ ដែលមានទីតាំងនៅក្បែររោងចក្រ សហគ្រាសរបស់ខ្លួន ឬនៅទីរួមខេត្ត ដែលរោងចក្រ សហគ្រាសរបស់ខ្លួនមានអាសយដ្ឋាននៅ»។
ការអំពាវនាវយ៉ាងដូច្នេះ ដោយលោកលើកមូលហេតុថា ការនាំគ្នាសម្រុកស្នើសុំលិខិតបេសកកម្មពីច្រកចេញចូលតែមួយរបស់រដ្ឋបាលខេត្តនានា ដើម្បីឡើងមកភ្នំពេញបើកសាច់ប្រាក់ និងដឹកសាច់ប្រាក់ពីភ្នំពេញទៅខេត្តវិញ មិនមែនជាជម្រើសដែលឆ្លាតវៃ និងសុវត្ថិភាពនោះទេ។
ទន្ទឹមនឹងនេះ លោកក៏សូមសំណូមពរដល់បងប្អូនកម្មករនិយោជិត ដែលត្រូវបើកប្រាក់ឈ្នួលនៅចុងសប្តាហ៍នេះ សូមមេត្តាអត់ធ្មត់រង់ចាំដល់ដើមសប្តាហ៍ក្រោយ ដើម្បីរោងចក្រ សហគ្រាសនីមួយៗ ប្រើវិធីសាស្ត្រថ្មីក្នុងការផ្ទេរសាច់ប្រាក់របស់ខ្លួនទៅបើកជូនបងប្អូន ខណៈក្រសួងនឹងព្យាយាមសម្របសម្រួលជាមួយគ្រប់ភាគីពាក់ព័ន្ធ ជំរុញឱ្យគ្រប់រោងចក្រ សហគ្រាស ដែលមិនស្ថិតនៅក្នុងតំបន់បិទខ្ទប់ឲ្យផ្លាស់ប្តូររបៀបប្រតិបត្តិការហិរញ្ញវត្ថុរបស់ខ្លួន៕
