.jpg)
អ្នកជំនាញជាតិ និងអន្តរជាតិក្នុងសិក្ខាសាលាលើវិស័យកាត់ដេរ។ រូបថត ក្រសួងការងារ
ភ្នំពេញៈ លោក ហេង សួរ រដ្ឋលេខាធិការ និងជាអ្នកនាំពាក្យនៃក្រសួងការងារ និងបណ្តុះបណ្តាលវិជ្ជាជីវៈបានអំពាវនាវដល់ក្រុមអ្នកបញ្ជាទិញអន្តរជាតិឱ្យបន្តទិញផលិតផលពីកម្ពុជា ដើម្បីជួយលើកតម្កើងជីវភាព និងលក្ខខណ្ឌការងាររបស់កម្មករនិយោជិត។
ការអំពាវនាវនេះបានធ្វើឡើងនៅក្នុងចំណោមមន្ត្រីជំនាញជាច្រើនរូបមកពីក្រសួងស្ថាប័ន អង្គការជាតិ-អន្តរជាតិ តំណាងសហជីព តំណាងរោងចក្រ សហគ្រាសក្នុងវិស័យវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរ និងកាបូប និងក្រុមអ្នកបញ្ជាទិញអន្តរជាតិដែលបានចូលរួមសិក្ខាសាលាស្ដីពី «ការអភិវឌ្ឍផែនការរួមសម្រាប់និរន្តរភាពនៃការអនុលោមតាមច្បាប់ក្នុងវិស័យវាយនភណ្ឌកាត់ដេរ ផលិតស្បែកជើង ផលិតផលធ្វើដំណើរ និងកាបូប» របស់គម្រោងរោងចក្រកាន់តែប្រសើរនៅកម្ពុជា (ILO-BFC) កាលពីថ្ងៃទី ៤ ខែវិច្ឆិកាក្នុងរាជធានីភ្នំពេញ។
លោក កាំង ម៉ូនីកា អគ្គលេខាធិការងនៃសមាគមរោងចក្រកាត់ដេរនៅកម្ពុជា (GMAC) ដែលបានចូលរួមក្នុងសិក្ខាសាលានោះបានប្រាប់ភ្នំពេញប៉ុស្តិ៍ម្សិលមិញនេះថា សិក្ខាសាលានេះបានពិភាក្សាគ្នាទៅលើផែនការរួមក្នុងការលើកកម្ពស់អនុលោមភាពផ្នែកច្បាប់ការងារ និងបទដ្ឋានការងារអន្តរជាតិប្រកបដោយចីរភាព។
ទាំងក្រសួងការងារ ទាំងសមាគមរោងចក្រកាត់ដេរនៅកម្ពុជាយល់ដូចគ្នាថា ការធានាឱ្យមាននិរន្តរភាពនៃអនុលោមភាពផ្នែកច្បាប់ការងារ និងបទដ្ឋានការងារអន្តរជាតិ គឺជាអ្វីដែលភាគីពាក់ព័ន្ធត្រូវតែធ្វើការលើកកម្ពស់ ក៏ប៉ុន្តែវាក៏មានបុរេលក្ខខណ្ឌផងដែរថា មុននឹងមានចីរភាពផ្នែកអនុលោមភាពក៏ត្រូវតែមាននូវចីរភាពនៃឧស្សាហកម្មដែរ បានន័យថា វិស័យឧស្សាហកម្មកម្ពុជាត្រូវតែរក្សាបាននូវការរស់រានមានជីវិតប្រកបដោយភាពប្រកួតប្រជែងផងដែរ។
លោក កាំង ម៉ូនីកា បានថ្លែងបញ្ជាក់ថា៖ «នៅក្នុងន័យនេះហើយដែលយើងបានជម្រាបទៅអ្នកបញ្ជាទិញផងដែរថា ត្រូវបន្តការគាំទ្រដល់ប្រទេសកម្ពុជា អ៊ីចឹង! នៅពេលដែលយើងទទួលបានការគាំទ្រពេញលេញពីអ្នកបញ្ជាទិញ យើងមានឧស្សាហកម្មមួយដ៏ល្អដែលវាស្ថិរភាព វាក៏ជាកត្តាជួយបង្កើតឡើងនូវនិរន្តរភាពនៃអនុលោមភាពផ្នែកច្បាប់ការងារ និងបទដ្ឋានការងារអន្តរជាតិដែរ»។
លោក កាំង ម៉ូនីកា បានបន្តទៀតថា ការពិភាក្សានេះជាការពិភាក្សាពីផែនការរួមដែលមានការពាក់ព័ន្ធនឹងដៃគូពាក់ព័ន្ធច្រើននៅក្នុងនោះគឺរាប់ទាំងអ្នកបញ្ជាទិញផងដែរ។ ដូចនេះអ្វីដែលចូលរួមចំណែករបស់អ្នកបញ្ជាទិញគឺការជួយគាំទ្រដល់កម្ពុជាក្នុងការបន្តដាក់នូវការបញ្ជាទិញឱ្យបានគ្រប់គ្រាន់ដល់រោងចក្រ។
លោក អាត់ ធន់ ប្រធានសហភាពការងារកម្ពុជា (CLC) ក៏បានឱ្យដឹងផងដែរថា ការស្នើសុំឱ្យអ្នកបញ្ជាទិញបន្តទិញទំនិញពីកម្ពុជាពីសំណាក់មន្ត្រីក្រសួងការងារនេះជារឿងធម្មតានៅពេលដែលគេនិយាយពីយុទ្ធសាស្ត្រនៅក្នុងការអនុវត្តច្បាប់ការងារប្រកបដោយនិរន្តរភាព រួមមានអ្នកបញ្ជាទិញ អង្គការ ILO ភាគីពាក់ព័ន្ធព្រមទាំងរាជរដ្ឋាភិបាល កម្មករ សហជីពជាដើម។
លោកបានថ្លែងថា៖ «តើគេចង់ឱ្យមានដើម្បីអី? គឺដើម្បីឱ្យមានសុខសុវត្ថិភាព និងការការពារសិទ្ធិកម្មករនេះឯង។ ដើម្បីគាំទ្រនូវដំណើរការនេះ រាជរដ្ឋាភិបាលបានស្នើឱ្យអ្នកបញ្ជាទិញបន្តទិញ និងបន្តគាំទ្រកម្ពុជាបន្តទៀត ហើយកម្ពុជាប្តេជ្ញាចិត្តក្នុងការធ្វើយុទ្ធសាស្ត្រនេះ»។
លោក អាត់ ធន់ បានបញ្ជាក់ថា បើតាមការជជែកគ្នាក្នុងសិក្ខាសាលាអ្វីដែលប៉ះពាល់ធ្ងន់ធ្ងរដល់វិស័យវាយនភណ្ឌកាត់ដេរ ផលិតស្បែកជើង គឺបញ្ហាកូវីដ ចំពោះរឿងការកាត់ផ្នែកខ្លះនៃ EBA ចំនួន ២០% នោះគឺមិនមានការប៉ះពាល់ធ្ងន់ធ្ងរទេ»។
យោងតាមស្ថិតិរបស់ក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា ចាប់តាំងពីមានករណីរីករាលដាលនូវជំងឺកូវីដ ១៩ រហូតមកដល់ពេលបច្ចុប្បន្ននេះនៅមានក្រុមហ៊ុនប្រមាណជា ៦៩ ក្រុមហ៊ុននៅតែបន្តព្យួររោងចក្រ និងក្រុមហ៊ុនដែលបានបិទទ្វារមានប្រមាណជា ១៣០ ក្រុមហ៊ុន ដែលមានកម្មករសរុបប្រមាណ ៧ ម៉ឺននាក់បាត់បង់ការងារ។
យោងតាមស្ថិតិរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា នៅក្នុងឆ្នាំ ២០១៩ នៅប្រទេសកម្ពុជាមានរោងចក្រសរុបចំនួន ១ ៧៣០ រោងចក្រ ក្នុងនោះរោងចក្រ កាត់ដេរ វាយនភណ្ឌ ស្បែកជើង និងសម្ភារធ្វើដំណើរមានចំនួន ១ ០៦៩ រោងចក្រ៕
វីដេអូ៖
