.jpg)
លោក Sylvain WASERMAN អនុប្រធានរដ្ឋសភានៃសាធារណរដ្ឋបារាំងបានជួបជាមួយលោក ហេង សំរិន ប្រធានរដ្ឋសភាកម្ពុជាកាលពីម្សិលមិញ។ ហេង ជីវ័ន
ភ្នំពេញៈ លោក Sylvain WASERMAN អនុប្រធានរដ្ឋសភានៃសាធារណរដ្ឋបារាំងបានជួបជាមួយលោក ហេង សំរិន ប្រធានរដ្ឋសភាកម្ពុជាកាលពីម្សិលមិញក្នុងដំណើរទស្សនកិច្ចមកកាន់កម្ពុជា ៦ ថ្ងៃបំណងដើម្បីពង្រឹង និងរឹតចំណងមិត្តភាព និងកិច្ចសហប្រតិបត្តិការរវាងប្រទេសទាំង ២។
សេចក្តីថ្លែងការណ៍របស់រដ្ឋសភាចេញផ្សាយកាលពីម្សិលមិញបានឲ្យដឹងថា៖ «ឯកឧត្តម ស៊ីលវ៉ាំង វ៉ាសឺម៉ង់ បានគូសបញ្ជាក់ថាដំណើរទស្សនកិច្ចរបស់ឯកឧត្តមនៅក្នុងឱកាសនេះក្នុងគោលបំណងពង្រឹងពង្រីកវិស័យការទូត រដ្ឋសភាជាមួយកម្ពុជា។ ឯកឧត្តមបានវាយតម្លៃខ្ពស់ចំពោះកិច្ចសហប្រតិបត្តិការ និងចំណងមិត្តភាពរវាងប្រទេសកម្ពុជា-បារាំង។ ជាចំណងមិត្តភាពជិតស្និទ្ធ ជឿជាក់ និងបើកចំហ។ តាមរយៈចំណងមិត្តភាពដ៏ល្អនេះបានជំរុញឲ្យមានគម្រោង និងជំនួយជាច្រើនរបស់បារាំងមកកាន់កម្ពុជា»។
លោក ហេង សំរិន ប្រធានរដ្ឋសភាបានថ្លែងតាមសេចក្ដីថ្លែងការណ៍ដដែលនេះថា ប្រទេសបារាំង ជាប្រទេសដែលផ្តល់ជំនួយសំខាន់មួយដល់កម្ពុជា ពិសេសបារាំងបានដើរតួនាទីយ៉ាងសកម្មនៅក្នុងការស្វែងរកសន្តិភាពឲ្យកម្ពុជារហូតបង្កើតបានកិច្ចព្រមព្រៀងសន្តិភាពទីក្រុងប៉ារីសឆ្នាំ ១៩៩១ ហើយរហូតមកដល់ពេលនេះ កម្ពុជា-បារាំង បានផ្លាស់ប្តូរដំណើរទស្សនកិច្ចគ្នាទៅវិញទៅមក ទាំងក្នុងក្របខ័ណ្ឌនីតិប្រតិបត្តិ និង នីតិប្បញ្ញតិ ហើយបានអះអាងផងដែរថា ទំនាក់ទំនងផ្នែកពាណិជ្ជកម្មរវាងប្រទេសទាំង ២ វិញមានការរីកចម្រើនជាលំដាប់ ពោលគឺទំហំទឹកប្រាក់វិនិយោគបានកើនដល់ជាង ១ ពាន់លានដុល្លារ។
សេចក្តីថ្លែងការណ៍នោះបញ្ជាក់ថា៖ «សម្តេចប្រធានរដ្ឋសភាបានផ្តាំផ្ញើដល់អនុប្រធានរដ្ឋសភាប្រទេសបារាំងជួយគាំទ្រ និងជំរុញអ្នកវិនិយោគ អ្នកទេសចរបារាំងមកវិនិយោគ និងទស្សនាកម្ពុជាឲ្យកាន់តែច្រើនបន្ថែមទៀត»។
លោក ស៊ីលវ៉ាំង វ៉ាសឺម៉ង់ បាន និងកំពុងមកបំពេញទស្សនកិច្ចជាផ្លូវការនៅកម្ពុជារយៈពេល ៦ ថ្ងៃចាប់ពីថ្ងៃទី ១៥ ដល់ថ្ងៃទី ២០ ខែធ្នូ ឆ្នាំ ២០១៨ ដើម្បីពង្រឹង និងរឹតចំណងមិត្តភាព និងកិច្ចសហប្រតិបត្តិការរវាងប្រទេសទាំង ២៕
