ភ្នំពេញៈ លោក ហេង សំរិន ប្រធានរដ្ឋសភាបានបង្ហាញពីបទពិសោធនៃវប្បធម៌ចែករំលែកនៅកម្ពុជា និងការប្ដូរទិសដៅរបស់កម្ពុជាទៅលើវិស័យកសិកម្មក្នុងពេលប្រឈមនឹងវិបត្តិបង្កដោយកូវីដ ១៩ នៅក្នុងមហាសន្និបាតអន្តរសភាអាស៊ាន។
អន្តរសភាអាស៊ានហៅកាត់ថា អាយប៉ា កាលពីថ្ងៃអង្គារម្សិលមិញបានធ្វើមហាសន្និបាតលើកទី ៤១ របស់ខ្លួនដែលមានសភាប្រទេសវៀតណាមធ្វើជាម្ចាស់ផ្ទះក្នុងនាមប្រធានប្ដូរវេន។ លោក ហេង សំរិន បានជំរុញដល់ប្រទេសអាស៊ានឲ្យធ្វើសមាហរណកម្មតំបន់ឲ្យកាន់តែស៊ីជម្រៅថែមទៀត ដើម្បីសម្រួលដល់លំហូរទំនិញ សេវាកម្ម និងប្រជាជននៅក្នុងពេលមានវិបត្តិសេដ្ឋកិច្ចដ៏ធ្ងន់ធ្ងរ ដោយសារជំងឺកូវីដ ១៩។
លោកមានប្រសាសន៍ថា អាស៊ានត្រូវធ្វើការរួមគ្នា បង្កើនកិច្ចសហប្រតិបត្តិការ និងសាមគ្គីភាពអន្តរជាតិ ដើម្បីផលប្រយោជន៍រួម។ នៅក្នុងតំបន់អាស៊ានជំងឺរាតត្បាតនេះត្រូវបានគ្រប់គ្រងយ៉ាងសកម្ម និងទាន់ពេលវេលា ដោយបានចែករំលែកបទពិសោធ ចំណេះដឹង និងព័ត៌មានយ៉ាងទូលំទូលាយ។ លើសពីនេះអាស៊ានបានបង្កើតមូលនិធិអាស៊ាន សម្រាប់ឆ្លើយតបនឹងជំងឺកូវីដ១៩ ដើម្បីឆ្លើយតបនឹងតម្រូវការចាំបាច់នានា ដោយការប្រយុទ្ធប្រឆាំងនឹងជំងឺកូវីដ១៩នេះត្រូវការថវិកា សម្ភារ បរិក្ខារ ក៏ដូចជាកម្លាំងមនុស្សច្រើន។
លោកបន្តថា៖ «អ្វីដែលកម្ពុជាអាចផ្ដល់ជាបទពិសោធគឺការជំរុញ និងបំផុសនូវវប្បធម៌ចែករំលែកនោះគឺការចែករំលែកពីស្ថាប័នរដ្ឋ ឯកជនទៅប្រជាជន ការចែករំលែកពីដៃគូអភិវឌ្ឍន៍ និងអង្គការមិនមែនរដ្ឋាភិបាលទៅប្រជាជន និងការចែករំលែករវាងប្រជាជននៅក្នុងមូលដ្ឋាន។ វប្បធម៌នេះបង្ហាញយ៉ាងច្បាស់អំពីស្មារតីចែករំលែក សាមគ្គីភាព និងរួបរួមជាតិតែមួយ»។
នៅក្នុងការពុះពារងើបចេញពីវិបត្តិសេដ្ឋកិច្ចដ៏អាក្រក់នេះលោក ហេង សំរិន ជំរុញឲ្យអាស៊ាន ធ្វើសមាហរណកម្មតំបន់ឲ្យកាន់តែស៊ីជម្រៅថែមទៀត ដើម្បីសម្រួលដល់លំហូរទំនិញសេវាកម្ម និងប្រជាជន។ កន្លងមកអាស៊ានរក្សាបានស្ថិរភាពនៃខ្សែចង្វាក់ផ្គត់ផ្គង់ទំនិញសំខាន់ៗដើម្បីឆ្លើយតបទៅនឹងតម្រូវការចាំបាច់ក្នុងពេលមានវិបត្តិដ៏ធ្ងន់ធ្ងរនេះ។
ដោយឡែកនៅកម្ពុជាវិញលោកថា រដ្ឋាភិបាលបានប្ដូរទិសដៅយុទ្ធសាស្ត្រអភិវឌ្ឍន៍របស់ខ្លួនដោយផ្អែកលើអត្ថប្រយោជន៍ប្រៀបធៀប និងឧត្តមភាពប្រកួតប្រជែង។ រាជរដ្ឋាភិបាលបានដាក់ចេញនូវយុទ្ធសាស្ត្រផ្ដោតសំខាន់លើវិស័យកសិកម្ម កសិឧស្សាហកម្ម ការប្រែក្លាយផ្នែកឌីជីថល និងទេសចរណ៍ក្នុងស្រុកដែលជាវិស័យអាទិភាព។
លោកបានបញ្ជាក់ដូច្នេះថា៖ «សភាកម្ពុជាគាំទ្រការខិតខំប្រឹងប្រែងរបស់អាស៊ាននៅក្នុងការថែរក្សា និងលើកកម្ពស់សន្តិភាព សន្តិសុខ ស្ថិរភាពក្នុងតំបន់ ការដោះស្រាយជម្លោះដោយសន្តិវិធី ឈរលើគោលការណ៍ច្បាប់អន្តរជាតិ និងយន្តការការទូត ចៀសវាងការប្រើប្រាស់កម្លាំងអាវុធ»។
មហាសន្និបាតអន្តរសភាអាស៊ានដែលចាប់ផ្តើមធ្វើឡើងកាលពីថ្ងៃម្សិលមិញ នឹងបន្តរហូតដល់ថ្ងៃទី ១០ ខែកញ្ញា ក្រោមប្រធានបទ «ការទូតសភា ដើម្បីសម្រេចបានសហគមន៍អាស៊ានប្រកបដោយភាពស្អិតល្មួត និងឆ្លើយតប»៕