.jpg)
លោក ហោ ណាំហុង នៅក្នុងពិធីមួយរបស់គណបក្សប្រជាជនកម្ពុជា នៅស្រុកកងមាស ខេត្តកំពង់ចាម នៅថ្ងៃទី ១៣ ខែមិថុនា ឆ្នាំ ២០១៨។ រូបថត FN
កំពង់ចាមៈ លោកឧបនាយករដ្ឋមន្ត្រី ហោ ណាំហុង បានចាត់ទុកសកម្មភាពរបស់ប្រធានចលនាសង្គ្រោះជាតិ លោក សម រង្ស៊ី ក្នុងការយុទ្ធនារបស់លោក ដែលជំរុញឲ្យពលរដ្ឋធ្វើពហិកា ក្នុងការបោះឆ្នោតជាតិ នាខែកក្កដាខាងមុខថា ជា«ការក្បត់ព្រះមហាក្សត្រ ជាការក្បត់ជាតិ ជាការក្បត់ប្រជាជន» និងជាការ«ល្ងង់ខ្លៅ»ក្នុងការប្រៀបធៀបខ្លួនលោក ទៅនឹងសម្ដេចឪ នរោត្តម សីហនុ ដែលបាននិរទ្ទេសខ្លួន ក្រោយរដ្ឋប្រហារយោធា ក្នុងទសវត្សទី ៧០ មុនពេលព្រះអង្គយាងចូលស្រុកវិញជាង ២ ទស្សវត្ស ក្រោយមកប៉ុន្តែអ្នកឃ្លាំមើលយល់ឃើញផ្ទុយពីនេះ។
កាលពីម្សិលមិញ សាស្ត្រាចារ្យល្បីឈ្មោះមួយរូប ដែលជំនាញអំពីអាស៊ាន បានប្រៀបធៀបកានិរទសខ្លួនដោយខ្លួនឯងរបស់លោក សម រង្ស៊ី ក្នុងការចូលរួមក្នុងការបោះឆ្នោតក្នុងឆ្នាំ ២០១៧ និង ២០១៨ ទៅនឹងការបោះឆ្នោតក្នុងទស្សវត្សឆ្នាំ ១៩៧២ ក្រោយរបបសាធារណរដ្ឋខ្មែរ ដែលធ្វើរដ្ឋប្រហារ ទម្លាក់សម្ដេចសីហនុ ពីប្រមុខរដ្ឋ។
ក្នុងបទសម្ភាសន៍មួយ ជាមួយសារព័ត៌មាន Fresh News ដែលផ្សព្វផ្សាយនៅថ្ងៃទី ១៣ ខែមិថុនា ឆ្នាំ ២០១៨ លោក ហោ ណាំហុង ដែលជាអតីតរដ្ឋមន្ត្រីក្រសួងការបរទេស លោកក៏មិនខុសពីលោកនាយករដ្ឋមន្ត្រី ហ៊ុន សែន ដែរ ដែលហៅទង្វើរបស់លោក សម រង្ស៊ី ថា ជាការ«ប្រមាថ»ព្រះមហាក្សត្រ នរោត្តម សីហមុនី ដែលទ្រង់បានចេញព្រះរាជសារបើកចំហមួយអំពាវនាវឲ្យពលរដ្ឋមានសិទ្ធិបោះឆ្នោតទាំងអស់ អញ្ជើញទៅបោះឆ្នោត ជ្រើសតាំងតំណាងរាស្ត្រ អាណត្តិទី ៦ នៅថ្ងៃទី ២៩ ខែកក្កដា ឆ្នាំ ២០១៨។
លោកបានបញ្ជាក់ថា៖«ខ្ញុំយល់ថា មិនមែនជាការប្រមាថព្រះរាជសារនោះទេ គឺជាការប្រមាថព្រះករុណា ជាអង្គម្ចាស់ជីវិតតម្កល់លើត្បូង ដែលប្រជាជនកម្ពុជាគោរពទូទាំប្រទេស។ នេះក៏ជាការក្បត់ជាតិរបស់មេដឹកនាំ អតីតគណបក្សប្រឆាំង ហើយនេះក៏ជាការក្បត់ប្រជាជនកម្ពុជា ដែលមានសិទ្ធិពេញទី ពុំអាចមាននរណាហាមឃាត់ បានឲ្យទៅបោះឆ្នោតជ្រើសរើសតំណាងរបស់ខ្លួនដើម្បីដឹកនាំប្រទេស។ ដូច្នេះនេះជាការក្បត់ព្រះមហាក្សត្រ ជាការក្បត់ជាតិ ជាការក្បត់ប្រជាជន»។
លោកក៏ឆ្លៀតវាយប្រហារលោក សម រង្ស៊ី ថា«ល្ងង់ខ្លៅ»ផងដែរ ដែលប្រៀបធៀបខ្លួន នឹងអតីតព្រះមហាក្សត្រនរោត្តម សីហនុ ដែលភៀសព្រះកាយ ទៅបរទេស បន្ទាប់ពីរដ្ឋប្រហារយោធាទម្លាក់ព្រះអង្គ ពីប្រមុខរដ្ឋក្នុងទសវត្សរ៍ទី ៧០ មុនព្រះអង្គវិលចូលស្រុកក្នុងទសវត្សរ៍ទី ៩០។
លោក ណាំហុង បន្តថា៖«ខ្ញុំយល់ថា ទណ្ឌិត សម រង្ស៊ី ដែលបានប្រៀបធៀបខ្លួន ជាមួយព្រះរាជបិតាជាតិ ព្រះបរមរតនកោដ្ឋ ដែលត្រូវគេធ្វើរដ្ឋប្រហារទម្លាក់ ហើយត្រូវនិរទេសរាប់ទសវត្សរ៍ ហើយបានត្រឡប់មកឡើងគ្រងរាជ្យវិញ ដូច្នេះគេចង់ប្រៀបធៀបខ្លូនគេថា កំពុងតែនិរទេស ទៅបរទេស ហើយថ្ងៃណាមួយ អាចវិលមកកាន់អំណាចវិញ។ ខ្ញុំយល់ថា ការប្រៀបធៀបនេះ ជាការល្ងង់ខ្លៅបំផុត»។
ថ្មីៗនេះលោក សម រង្ស៊ី បានចាត់ទុក ព្រះរាជសារព្រះមហាក្សត្រ នរោត្តម សីហមុនី ដែលអំពាវនាវឲ្យពលរដ្ឋទៅបោះឆ្នោតថា«ក្លែងក្លាយ»និងត្រូវបានធ្វើឡើងក្រោមការគំរាមកំហែង ដែលឈានដល់ការចាត់វិធានការផ្លូវច្បាប់ប្រឆាំងរូបលោកចំពោះបទ «ប្រមាថ»អង្គព្រះមហាក្សត្រ។
លោកសម រង្ស៊ី មិនបានឆ្លើយតប នឹងសំណើសុំអត្ថាធិប្បាយទេ គិតមកដល់ត្រឹមយប់ថ្ងៃទី ១៣ ខែមិថុនា។
លោក Paul Chambers សាស្ត្រាចារ្យនៅសកលវិទ្យាល័យ Naresuan ក្នុងទីក្រុងបាងកក បានថ្លែងថា លោក សម រង្សី មិនស្ថិតក្នុងគ្រួសាររាជវង្សដូច សម្ដេចឪ នរោត្តម សីហនុ នោះទេ ហើយនៅពេលដែលនិរទេសព្រះកាយនោះ ព្រះអង្គបានដាក់រាជ្យ មុនក្លាយជាអ្នកនយោបាយធម្មតាដូច លោក សម រង្សី សព្វថ្ងៃនេះ។
លោកបន្តថា៖«ប្រសិនបើ គេចង់ប្រៀបធៀបរដ្ឋប្រហារយោធា ជំនាន់លោក លន់ នល់ ក្នុងទសវត្សរ៍ឆ្នាំ ១៩៧០ ដែល បង្ខំសម្ដេច នរោត្តម សីហនុ ឲ្យយាងទៅក្រៅប្រទេស និងរបបលោក ហ៊ុន សែន ក្តោបក្តាប់អំណាចផ្ទាល់ខ្លួន ក្នុងឆ្នាំ ២០១៧- ២០១៨ នេះ លោកសម រង្សី...ហាក់ស្រដៀងទៅនិងសម្តេច នរោត្តម សីហនុ កាលបោះឆ្នោតនៅឆ្នាំ ១៩៧២ ដែរ។
លោកបន្តថា៖«ចំណុចសំខាន់គឺថា លោក សម រង្ស៊ី ចង់បញ្ជាក់ថា លោក ហ៊ុន សែន គឺស្រដៀងលោក សេនាប្រមុខលន់ នល់ ហើយការបោះឆ្នោតជាតិឆ្នាំ ២០១៨ គឺជាការបោះឆ្នោះ ដែលបានរៀបចំរួចរាល់ហើយ ដូចជាការ បោះឆ្នោតឆ្នាំ ១៩៧២ ដែរ»៕
