.jpg)
លោក ហ៊ីង ថូរ៉ាក់ស៊ី រដ្ឋលេខាធិការនៃទីស្ដីការគណៈរដ្ឋមន្ត្រី។ រូបថត ហ្វេសប៊ុក
ភ្នំពេញៈ លោក ហ៊ីង ថូរ៉ាក់ស៊ី រដ្ឋលេខាធិការនៃទីស្ដីការគណៈរដ្ឋមន្ត្រីបានធ្វើលិខិតបង្គាប់ឲ្យរដ្ឋមន្ត្រី និងគណៈអភិបាលខេត្តចំនួន ៣ ចាត់វិធានការពិនិត្យលើភាពមិនប្រក្រតីរបស់មន្ត្រីថ្នាក់ក្រោមដែលបានរំលោភយកដីប្រជាពលរដ្ឋ និងភាពមិនប្រក្រតីនៃការដោះស្រាយសំណង់បណ្ដោះអាសន្ន ដើម្បីរាយការណ៍ជូនលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ភាពមិនប្រក្រតីទាំងនោះកើតមាននៅក្នុងខេត្តបាត់ដំបង ប៉ៃលិន និងកំពង់ឆ្នាំងដែលត្រូវបានរកឃើញដោយប្រតិភូនៃគណបក្សនគរប្រជាធិបតេយ្យ និងគណបក្សសំបុកឃ្មុំសង្គមប្រជាធិបតេយ្យដែលជាសមាសភាពក្នុងឧត្តមក្រុមប្រឹក្សាពិគ្រោះ និងផ្តល់យោបល់នៃទីស្ដីការគណៈរដ្ឋមន្ត្រីកាលពីខែកុម្ភៈ និងខែមីនាដែលមានតួនាទីស៊ើបអង្កេត និងរាយការណ៍ភាពមិនប្រក្រតីដែលកើតមាន និងប៉ះពាល់ដល់ប្រជាពលរដ្ឋ។
យោងតាមរបាយការណ៍របស់លោក ហ៊ីង ថូរ៉ាក់ស៊ី ដែលបានជម្រាបជូនដល់ លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់លោកអភិបាលខេត្តបាត់ដំបង ប៉ៃលិន និងកំពង់ឆ្នាំងកាលពីថ្ងៃទី ៣០ ខែមីនា បានឲ្យដឹងថា គណបក្សនគរជាធិបតេយ្យ បានរកឃើញពីការបំភ្លៃអង្គហេតុ ដើម្បីយកដីចម្ការអាស្រ័យផលរបស់ប្រជាពលរដ្ឋទំហំ ៧ ហិកតាស្ថិតក្នុងភូមិដីក្រហម សង្កាត់អូរតាវ៉ៅ ខេត្តប៉ៃលិន មកដាក់ជាកម្មសិទ្ធិរបស់មន្ទីរកសិកម្ម រុក្ខាប្រមាញ់ និងនេសាទ។
លោកបានឲ្យដឹងទៀតថា ប្រតិភូគណបក្សដដែលនេះក៏បានរកឃើញពីការកំហែងយកដីរបស់ប្រជាពលរដ្ឋ ១២៦ គ្រួសារស្ថិតក្នុងឃុំទួលខ្ពស់ និងឃុំក្បាលទឹក ស្ថិតក្នុងខេត្តកំពង់ឆ្នាំងពីសំណាក់អាជ្ញាធរស្រុកយកទៅលក់ឲ្យក្រុមហ៊ុនឯកជន។ លោកថា ករណីនេះតម្រូវឲ្យអភិបាលនៃគណៈអភិបាលខេត្តកំពង់ឆ្នាំងចុះត្រួតពិនិត្យ និងរាយការណ៍ជូនប្រមុខរដ្ឋាភិបាល។
លោកក៏បានឲ្យដឹងផងដែរថា ប្រតិភូគណបក្សសំបុកឃ្មុំសង្គមប្រជាធិបតេយ្យក៏បានរកឃើញពីភាពមិនប្រក្រតីរបស់រដ្ឋបាលខេត្តបាត់ដំបងពាក់ព័ន្ធទៅនឹងការដោះដូរសំណង់បណ្តោះអាសន្នលើដីអតីតគម្រោងសួនព្រែកព្រះស្តេចស្ថិតក្នុងសង្កាត់ព្រែកព្រះស្តេច។
លោក ងួន រតនៈ អភិបាលខេត្តបាត់ដំបងបានលើកឡើងថា លោកនឹងបើកកិច្ចប្រជុំជាមួយមន្ត្រីពាក់ព័ន្ធដើម្បីដោះស្រាយ និងពិនិត្យលើករណីដែលបានលើកឡើងពីភាពមិនប្រក្រតីទាំងនោះ។ ប៉ុន្តែលោកមិនអាចបកស្រាយអ្វីបានក្នុងពេលនេះនោះទេ ព្រោះមិនទាន់ច្បាស់ថា ភាពមិនប្រក្រតីដែលប្រធានគណបក្សទាំងនោះបានរកឃើញផ្តោតទៅលើចំណុចត្រង់ណា ព្រោះតែការអនុវត្តច្បាប់កន្លងមកមានភាពស្មុគស្មាញ ហើយបញ្ហាដីធ្លីនេះក៏មានច្រើន។
លោកថ្លែងថា៖ «ទាល់តែខ្ញុំស្គាល់ករណីនេះសិន ពីព្រោះនៅក្នុងតំបន់នោះ វាមានករណីច្រើន មិនដឹងថា ឯកឧត្តមប្រធានគណបក្សសំបុកឃ្មុំសង្គមប្រជាធិបតេយ្យ គាត់លើកចំណុចណា ហើយគាត់សំដៅមករដ្ឋបាល ឬក៏បុគ្គល។ យើងនឹងមើលពីភាពមិនប្រក្រតីដែលគាត់បានលើកឡើងដែលវាជាព័ត៌មានមួយសម្រាប់យើង ព្រោះបញ្ហាដីធ្លី យ៉ាងម៉េចប្រាប់មិនទាន់បានទេ»។
លោក ម៉ម សុណង់ដូ ប្រភិភូឧត្តមក្រុមប្រឹក្សាពិគ្រោះ និងផ្តល់យោបល់មកពីគណបក្សសំបុកឃ្មុំសង្គមប្រជាធិបតេយ្យបានឲ្យដឹងថា បញ្ហារបស់ប្រជាពលរដ្ឋត្រូវបានលាតត្រដាងហើយតាមរយៈចំណាត់ការឧត្តមក្រុមប្រឹក្សា ប៉ុន្តែអ្វីជាបញ្ហាចោទគឺត្រង់ថា រដ្ឋាភិបាលក៏ដូចជាថ្នាក់ដឹកនាំ ដោះស្រាយយ៉ាងណានោះគឺជាការទទួលខុសត្រូវរបស់ពួកគេចំពោះមុខប្រជាពលរដ្ឋ។
លោកថា ដូចករណីនេះបើមានចំណារពីនាយករដ្ឋមន្ត្រីហើយលោកនឹងរង់ចាំមើលដំណោះស្រាយ និងបន្តតាមដានបន្ថែមទៀត។
លោក ម៉ម សូណង់ដូ បានថ្លែងឲ្យដឹងទៀតថា៖ «ការដោះស្រាយមិនបានគឺរឹតតែធ្វើឲ្យប្រពលរដ្ឋមានការឈឺចាប់ ហើយខ្ញុំសង្ឃឹមថា (បញ្ហានេះ) នឹងដោះស្រាយធ្វើយ៉ាងម៉េចឲ្យប្រជាពលរដ្ឋ គាត់សប្បាយចិត្តទទួលបានយុត្តិធម៌ពីសម្តេចតេជោ»៕
