កំពង់ចាម៖ លោក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក និងលោក ហ៊ុន ម៉ានិត អគ្គនាយកនៃអគ្គនាយកដា្ឋនស្រាវជ្រាវចារកិច្ចនៃក្រសួងការពារជាតិបានជួយឧបត្ថម្ភគ្រែចំនួន ២៥០ គ្រែ ដល់រដ្ឋបាលខេត្តកំពង់ចាមសម្រាប់មន្ទីរពេទ្យមេគង្គកំពង់ចាម ដែលចាប់ផ្ដើមបើកដំណើរការព្យាបាលអ្នកជំងឺកូវីដ ១៩ នាដើមខែឧសភានេះ។
លោក អ៊ុន ចាន់ដា អភិបាលខេត្តកំពង់ចាមប្រាប់ ភ្នំពេញ ប៉ុស្តិ៍ នៅថ្ងៃទី ៣ ខែឧសភាថា ពេលនេះ ជាពេលដែលត្រូវរៀបចំសម្ភារបរិក្ខារនានាដូចជាគ្រែ សម្ភារពេទ្យ និងគ្រែសម្រាប់ព្យាបាលអ្នកជំងឺដែលកំពុងសម្រាកព្យាបាលនៅទីនោះ។
ជាទឹកចិត្ត និងការចូលរួមក្នុងការព្យាបាលដល់អ្នករងគ្រោះដោយសារជំងឺកូវីដ ១៩ ក្នុងខេត្តកំពង់ចាម លោក ហ៊ុន ម៉ាណែត និងលោក ហ៊ុន ម៉ានិត បានបរិច្ចាគនូវថវិកាផ្ទាល់ខ្លួន ទិញគ្រែផ្តល់ជូនដល់មន្ទីរពេទ្យមេគង្គកំពង់ចាមនេះ។
លោក អ៊ុន ចាន់ដា ថ្លែងថា៖ «នេះ គឺជាការចូលរួមចំណែកក្នុងនាមមនុស្សធម៌ ជាការគោរព ការស្រឡាញ់ និងឱ្យតម្លៃមកលើខេត្ត ដើម្បីដោះស្រាយមួយចំនួន ដើម្បីធ្វើយ៉ាងណាព្យាបាលអ្នកជំងឺឱ្យមានលក្ខណៈស្តង់ដាប្រកបដោយគុណភាពតាមក្បួនវេជ្ជសាស្ត្រតាមក្បួនខ្នាតរបស់ក្រសួងសុខាភិបាល»។
ទោះជាយ៉ាងណា លោក អ៊ុន ចាន់ដា មិនបានដឹងលម្អិតពីទំហំទឹកប្រាក់របស់លោក ហ៊ុន ម៉ាណែត និងលោក ហ៊ុន ម៉ានិត ដែលបានចំណាយទិញគ្រែសម្រាប់ព្យាបាលអ្នកជំងឺកូវីដ ១៩ នេះទេ ដោយលោកគ្រាន់តែដឹងពីការរៀបចំមន្ទីរពេទ្យមេគង្គកំពង់ចាមនេះ លោក ហ៊ុន ម៉ាណែត និងលោក ហ៊ុន ម៉ានិត ក៏បានទាក់ទងមក ដើម្បីសុំការជួយលើការទិញគ្រែនេះ។
បើតាម លោក អ៊ុន ចាន់ដា រដ្ឋបាលខេត្តបានប្រើប្រាស់ពេល ១ ខែ ក្នុងការប្រែក្លាយសណ្ឋាគារមេគង្គទៅជាមន្ទីរពេទ្យមេគង្គកំពង់ចាម សម្រាប់ព្យាបាលអ្នកឆ្លងជំងឺកូវីដ ១៩ ខណៈមន្ទីរពេទ្យបង្អែកខេត្ត ពេញលែងមានកន្លែងដាក់ព្យាបាលទៀតហើយនោះ។
យោងតាមលិខិតថ្លែងអំណរគុណរបស់រដ្ឋបាលខេត្តកំពង់ចាម លោក ហ៊ុន ម៉ាណែត និងភរិយា បានជួយឧបត្ថម្ភគ្រែពេទ្យចំនួន ១០០ គ្រែ និងលោក ហ៊ុន ម៉ានិត និងភរិយា បានជួយឧបត្ថម្ភគ្រែពេទ្យចំនួន ១៥០ គ្រែ ដល់រដ្ឋបាលខេត្តកំពង់ចាមសម្រាប់រៀបចំក្នុងមន្ទីរពេទ្យមេគង្គកំពង់ចាម។
ខេត្តកំពង់ចាមបានរកឃើញអ្នកឆ្លងជំងឺកូវីដ ១៩ ចំនួន ១១៥ នាក់ និងមានអ្នកស្លាប់ ១ នាក់។
រដ្ឋបាលខត្តនឹងផ្ទេរអ្នកជំងឺកូវីដ ១៩ ពីមន្ទីរពេទ្យបង្អែកខេត្ត មកសម្រាកព្យាបាលនៅមន្ទីរពេទ្យដែលទើបរៀបចំរួចរាល់នេះ។ បើសិនត្រូវរកឃើញអ្នកឆ្លងកូវីដ ១៩ ថ្មីនៅថ្ងៃ ទី ៣ ខែឧសភា ក៏នឹងត្រូវយកមកព្យាបាលនៅមន្ទីរពេទ្យមេគង្គកំពង់ចាមនេះដែរ៕