កំពង់ឆ្នាំងៈ មេបញ្ជាការកងទ័ពជើងគោកលោកឧត្តមសេនីយ៍ឯក ហ៊ុន ម៉ាណែត ប្រាប់កងទ័ពឱ្យប្រឆាំងដាច់ខាតចំពោះអ្នកនយោបាយខ្មែរណា ដែលញុះញង់ធ្វើឱ្យខ្មែរវាយខ្មែរ និងបំផ្លាញសុខសន្តិភាព ហើយត្រូវទប់ស្កាត់បុគ្គលដែលកៀរគរមនុស្ស ដើម្បីបង្កឱ្យមានចលាចល បាត់បង់ស្ថិរភាព និងវឹកវរក្នុងសង្គម។
ថ្លែងក្នុងពិធីបិទវគ្គបំប៉នថ្នាក់បញ្ជាការ សេនាធិការកាំភ្លើងធំជំនាន់ទី ១ និងថ្នាក់មេបញ្ជាការកងអនុសេនាតូច និងសេនាធំ កាំភ្លើងធំកងទ័ពជើងគោកនៅខេត្តកំពង់ឆ្នាំងកាលពីថ្ងៃទី ២៧ ខែតុលាលោក ហ៊ុន ម៉ាណែត ដែលក៏ជាអគ្គមេបញ្ជាការរងកងយោធពលខេមរភូមិន្ទផងនោះបញ្ជាក់ថា ភារកិច្ចស្នូលរបស់កងទ័ពគឺការពារជាតិ ប្រជាជន ការពារសន្តិសុខ និងការរីកចម្រើន។ កងទ័ពចូលរួមទប់ស្កាត់បុគ្គលណាដែលកៀរគរមនុស្សក្នុងគោលបំណងធ្វើឱ្យបាត់បង់ស្ថិរភាព និងសេចក្តីសុខរបស់ប្រជាជនជាង ១៦ លាននាក់ និងការពាររាជរដ្ឋាភិបាលស្របច្បាប់។
លោកថ្លែងថា៖ «ត្រូវឱ្យប្រជាជនសប្បាយរីករាយនៅក្នុងថ្ងៃបុណ្យទាន។ ដូច្នេះយើងគ្មានជម្រើសទេ រាជរដ្ឋាភិបាលត្រូវតែអនុវត្តច្បាប់ ចំពោះអ្នកណាដែលកៀរគរមនុស្ស ដើម្បីធ្វើឲ្យបាត់បង់ស្ថិរភាព បំផ្លាញសន្តិសុខសង្គម និងដើម្បីប្លន់អំណាចផ្តួលរំលំរដ្ឋាភិបាលដើម្បីមហិច្ឆតានយោបាយផ្ទាល់ខ្លួន។ ដូច្នេះយើងត្រូវថែរក្សាសុខសន្តិភាពស្ថិរភាព ការពាររាជរដ្ឋាភិបាលស្របច្បាប់។ ត្រូវស្មោះត្រង់ចំពោះជាតិ សាសនា ព្រះមហាក្សត្រ។ នេះគឺជាកិច្ចការធំ យើងត្រូវធ្វើ និងជាគោលដៅធំរបស់កងកម្លាំងប្រដាប់អាវុធ»។
លោកបន្តថាកងកម្លាំងប្រដាប់អាវុធគឺជាកងកម្លាំងថែរក្សាសុខសន្តិភាព ហើយសុខសន្តិភាពដែលកម្ពុជារកបាននៅឆ្នាំ ១៩៩៨ ដោយនយោបាយឈ្នះ ឈ្នះ របស់លោកនាយករដ្ឋមន្ត្រី ហ៊ុន សែន។ បើគ្មានការចូលរួមពីកងកម្លាំងប្រដាប់អាវុធខ្មែរក្រហម បើគាត់មិនទម្លាក់អាវុធឈប់ច្បាំងនោះទេប្រទេសកម្ពុជាប្រហែលនៅច្បាំងដល់សព្វថ្ងៃនេះ។
លោកថ្លែងថា៖ «សូមឱ្យបងប្អូនយល់ថា រឿងសតិអារម្មណ៍បន្តិចបន្តួចមិនស្មើនឹងការបាត់បង់ផលប្រយោជន៍ធំរបស់ជាតិនោះទេ។ ធម្មតាបញ្ហាជីវភាពរស់នៅ បញ្ហាការងារនៅកន្លែងការងារតែងតែមាន ប៉ុន្តែកុំឱ្យបាត់បង់នូវម្ចាស់ការ។ ត្រូវយល់ដឹងថាគោលការណ៍របស់រាជរដ្ឋាភិបាលយកចិត្តទុកដាក់ណាស់ ចំពោះកងកម្លាំងប្រដាប់អាវុធ ការកសាងកងទ័ពក៏ដូចជាយកចិត្តទុកដាក់ដល់ប្រជាពលរដ្ឋទាំងអស់»។
លោកបន្ថែមថា៖ «ប្រជាពលរដ្ឋចង់បានសេចក្តីសុខចង់បានសុខសប្បាយ។ លុយ ១ លានដុល្លារ ក៏មិនស្មើនឹងការបាត់បង់ តម្លៃនៃសេចក្តីសុខដែរ។ យកលុយមកមានន័យអ្វី បើប្រទេសយើងច្បាំងគ្នា ភូមិឃុំយើងច្បាំងគ្នា កូនចៅស្លាប់ដោយសារគ្រាប់ផ្លោងយកមកមានន័យអ្វីទៅ។ កាលពីជំនាន់ប៉ុលពតនៅពេលប្រទេសមានសង្គ្រាមយើងចាយលុយមិនបានទេ»។
លោកបន្តទៀតថា៖ «ដូច្នេះតើមានអ្វីដែលបាត់ស្មើនឹងតម្លៃនៃការបាត់បង់ក្តីសុខសម្រាប់ កូនចៅប្រជាពលរដ្ឋ។ ដូច្នេះភារកិច្ចកងទ័ពត្រូវការពារជាតិការពារ ទឹកដីកុំឲ្យខ្មែរវាយខ្មែរគ្នាឯង។ ប្រមាណជាង ៥០០ ឆ្នាំហើយ ដែលខ្មែរវាយខ្មែរ យើងត្រូវថែរក្សាការពារទឹកដីរបស់យើងឱ្យបានគង់វង្ស។ យើងត្រូវប្រឆាំងដាច់ខាតចំពោះអ្នកនយោបាយខ្មែរណាដែលធ្វើឲ្យប្រជាពលរដ្ឋខ្មែរវាយខ្មែរដើម្បីធ្វើបាបខ្មែរ និងបំផ្លាញសុខសន្តិភាព»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាចាត់ទុកប្រសាសន៍ និងបទបញ្ជារបស់លោក ហ៊ុន ម៉ាណែត ថាជារឿងត្រឹមត្រូវ។ លោកថ្លែងថា៖ «កងកម្លាំងប្រដាប់អាវុធគឺជាឧបករណ៍របស់រាជរដ្ឋាភិបាលក្នុងការការពារអធិបតេយ្យភាព និងបូរណភាពទឹកដី។ ជាពិសេសគឺសុខសន្តិភាពសម្រាប់ជាតិទាំងមូល។ ដូច្នេះកម្លាំងប្រដាប់អាវុធមានកាតព្វកិច្ចក្នុងការទប់ស្កាត់ ហើយបង្ក្រាបអ្នកនយោបាយណាមួយដែលបង្កអសន្តិសុខ និងអស្ថិរភាពនយោបាយ ឬក៏នាំហានិភ័យដល់ប្រទេស»។
លោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិ ស្វាគមន៍ការលើកឡើងរបស់លោក ហ៊ុន ម៉ាណែត ប៉ុន្តែលោកស្នើសុំរដ្ឋាភិបាលមិនត្រូវប្រើកងទ័ពក្នុងការទប់ស្កាត់ចលនារបស់លោក សម រង្ស៊ី នោះទេដោយសារតែប្រទេសកម្ពុជាមិនទាន់ធ្លាក់ក្នុងស្ថានការណ៍ប្រកាសអាសន្ននោះទេ។
លោកថ្លែងថា៖ «តែយើងមិនគួរប្រើប្រាស់កងទ័ពនោះទេ ប្រសិនស្ថានការណ៍មិនតម្រូវឲ្យនោះ លុះត្រាណាតែដាក់ប្រទេសក្នុងគ្រាមានអាសន្ន»។
លោក សុខ សំណាង ស្នងការនគរបាលខេត្តតាកែវបានណែនាំដល់កងកម្លាំងនគរបាលខេត្តប្រមាណជាង ៧០០ នាក់ក្នុងពិធីផ្សព្វផ្សាយសភាពការណ៍ថ្មីៗ កាលពីថ្ងៃទី ២៧ ខែតុលាស្តីពីផែនការការពារបុណ្យឯករាជ្យជាតិ បុណ្យអុំទូកនិងផែនការ ការពារការវិលត្រឡប់របស់ក្រុមលោក សម រង្ស៊ី ឱ្យត្រៀមកម្លាំងការពារសន្តិសុខ សុវត្ថិភាព សណ្តាប់ធ្នាប់សាធារណៈជូនប្រជាពលរដ្ឋ។
លោកបញ្ជាក់ថា៖ «អ្នកចូលរួមគាំទ្រ និងអ្នករង់ចាំទទួលទណ្ឌិត សម រង្ស៊ី ត្រូវបានច្បាប់ចាត់ទុកជាអំពើខុសច្បាប់។ ក្នុងនាមជាកងកម្លាំងប្រដាប់អាវុធ ត្រូវចាត់វិធានការយ៉ាងម៉ឺងម៉ាត់ ចំពោះអ្នកចូលរួម អ្នកគាំទ្រទាំងនោះមិនអនុញ្ញាតឱ្យពួកគេធ្វើអី្វខុសច្បាប់នោះឡើយ»។
អ្នកវិភាគនយោបាយលោក ឡៅ ម៉ុងហៃ បានថ្លែងថា៖ «សេចក្តីថ្លែងការណ៍នៃមេបញ្ជាការកងទ័ពរបស់យើងនឹងមានទម្ងន់ពេញលេញ ប្រសិនបើទង្វើដែលគាត់ប្រឆាំងជាបទឧក្រិដ្ឋនៅក្នុងច្បាប់របស់យើង។ បើមិនដូច្នោះទេ សេចក្តីថ្លែងការណ៍គ្រាន់តែជានយោបាយចេញដោយអ្នកដឹកនាំម្នាក់ក្នុងចំណោមអ្នកដឹកនាំផ្សេងៗនៃគណបក្សកាន់អំណាច»៕