.jpg)
លោក ហ៊ុន ម៉ាណែត (ស្ដាំ) ពេលទទួលសញ្ញាបត្រពីសាលាបណ្ឌិត្យសភាយោធាសហរដ្ឋអាមេរិក West Point។ រូបថត ហ្វេសប៊ុក Hun Manet
ភ្នំពេញៈ លោក ហ៊ុន ម៉ាណែត ដែលជាកូនប្រុសច្បងរបស់លោកនាយករដ្ឋមន្ត្រី ហ៊ុន សែន បានបបួលលោក សម រង្ស៊ី ភ្នាល់ដោយដាក់លក្ខខណ្ឌថា បើលោកចាញ់លោកនឹងលាលែងតួនាទីទាំងអស់នៅក្នុងកងកម្លាំងប្រដាប់អាវុធ ហើយធ្វើជាប្រជាជនស៊ីវិលជារៀងរហូត ចំណែកលោក សម រង្ស៊ី ត្រូវលាឈប់ពីនយោបាយជារៀងរហូត។
ការប្រកាសភ្នាល់ជាសាធារណ:របស់លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង កងយោធពល ខេមរភូមិន្ទ ជាមួយនឹងលោក សម រង្ស៊ី ធ្វើឡើងបន្ទាប់ពីលោក សម រង្ស៊ី បាននិយាយជាសាធារណៈទៅកាន់អ្នកគាំទ្ររបស់គាត់នៅសហរដ្ឋអាមេរិកកាលពីថ្ងៃទី ២៨ ខែកញ្ញា ឆ្នាំ ២០១៩ ថា សញ្ញាបត្ររបស់លោក ហ៊ុន ម៉ាណែត ដែលទទួលបានពីសាលាបណ្ឌិត្យសភាយោធាសហរដ្ឋអាមេរិក West Point ជាសញ្ញាបត្រក្លែងក្លាយជាសញ្ញាបត្រការទូតសម្រាប់ផ្តល់ឲ្យនិស្សិតយោធាបរទេសដើម្បីជាការលើកទឹកចិត្តតែប៉ុណ្ណោះ។
លោក សម រង្ស៊ី បានថ្លែងទៅកាន់អ្នកគាំទ្ររបស់ខ្លួនដូច្នេះថា៖ «សញ្ញាបត្រទី ២ គឺគេធ្វើសម្រាប់ជនជាតិបរទេស គេឲ្យតែជនជាតិបរទេសទេ ពេលចូលរៀនធូរមិនបាច់រៀនអីក៏បានដែរ (ពេល) ចេញប្រឡងលេងៗ ហើយគេឲ្យសញ្ញាបត្រដូចគ្នាអ៊ីចឹងគឺឈ្មោះ West Point ដូចគ្នាអ៊ីចឹង ប៉ុន្តែគេអត់ទទួលស្គាល់នៅស្រុកគេទេ»។
លោកបានបន្ថែមថា៖ «ចង់ធ្វើមេទ័ពនៅអាមេរិកស្អីឲ្យមកបំពេញតួនាទីដូចជនជាតិស្បែកសដែលគេទទួលបានសញ្ញាបត្រដែរគឺគេមិនឲ្យទេ។ គេថាអ្នកឯងយកទៅស្រុកអ្នកឯងយកទៅបង្អួតទៅ សញ្ញាបត្រប្រភេទទី ២ អាហ្នឹងគឺជាកិច្ចការទូត កិច្ចទំនាក់ទំនងនយោបាយ គេចង់មានទំនាក់ទំនងល្អ គេឲ្យទៅកូននាយករដ្ឋមន្ត្រីទៅកូនប្រធានាធិបតីឲ្យយកសញ្ញាបត្រក្លែងក្លាយប្រភេទទី ២ ទៅបង្អួតនៅស្រុកខ្លួនទៅ»។
ជាការឆ្លើយតបលោក ហ៊ុន ម៉ាណែត បានចោទសួរទៅកាន់លោក សម រង្ស៊ី ថា តើលោក សម រង្ស៊ី ហ៊ានភ្នាល់គ្នាជាមួយរូបលោកទេថា សញ្ញាបត្រពីសាលា West Point របស់លោកក្លែងក្លាយ ហើយថាបើលោកចាញ់លោក សម រង្ស៊ី ក្នុងការភ្នាល់នេះ លោកនឹងលាលែងពីតំណែងទាំងអស់ធ្វើជាជនស៊ីវិលជារៀងរហូត តែបើលោក សម រង្ស៊ី ចាញ់វិញលោក សម រង្ស៊ី ត្រូវលាចាកពីពិភពនយោបាយ។
លោក ហ៊ុន ម៉ាណែត បានលើកឡើងតាមរយ:បណ្តាញសង្គមហ្វេសប៊ុកកាលពីថ្ងៃចន្ទនេះថា៖ «តើលោក សម រង្ស៊ី ហ៊ានភ្នាល់គ្នាជាមួយខ្ញុំ ដើម្បីការពារសម្តីរបស់លោកទេ? ការភ្នាល់គ្នាជាសាធារណៈជារឿងមួយដែលខ្ញុំមិនសូវដែលចង់ធ្វើទេ ប៉ុន្តែពេលខ្លះគ្មានជម្រើសផ្សេងក្នុងការការពារកិត្តិយស និងសេចក្តីថ្លៃថ្នូររបស់ខ្ញុំ ដើម្បីឆ្លើយតបទៅនឹងការវាយប្រហារដោយគ្មានហេតុផលពីសំណាក់បុគ្គលមួយចំនួន»។
លោកបានថ្លែងថា បើសិនជាសាលាបណ្ឌិត្យសភាយោធាសហរដ្ឋអាមេរិក West Point មានការផ្ដល់សញ្ញាបត្រ ២ ប្រភេទដូចលោក សម រង្ស៊ី បានលើកនោះជាពិសេសគឺសញ្ញាបត្រប្រភេទ ២ ដែលជាសញ្ញាបត្រក្លែងក្លាយ ឬការទូតដែលសាលា West Point ផ្តល់ឲ្យនិស្សិតយោធាបរទេសនោះ ហើយបើការបណ្ដុះបណ្ដាលនៅសាលា West Point ពិតជាមានការបែងចែកស្តង់ដាខុសគ្នារវាងនិស្សិតយោធាបរទេស និង អាមេរិកមែននោ៖ «ខ្ញុំនឹងលាលែងតួនាទីទាំងអស់របស់ខ្ញុំក្នុងកងកម្លាំងប្រដាប់អាវុធហើយធ្វើជាប្រជាជនស៊ីវិលជារៀងរហូត»។
លោកបានបន្ថែមថា ប៉ុន្តែបើលោក សម រង្ស៊ី មិនអាចបង្ហាញថាសាលា West Point មានសញ្ញាបត្រ ២ ប្រភេទដែលមានតម្លៃខុសគ្នា ដោយមួយប្រភេទមានតម្លៃពិតប្រាកដសម្រាប់ផ្ដល់ដល់និស្សិតយោធាអាមេរិក និងមួយប្រភេទទៀតដែលជាសញ្ញាបត្រក្លែងក្លាយ ឬសញ្ញាបត្រការទូតសម្រាប់ផ្តល់ដល់និស្សិតនាយទាហានបរទេស ហើយការអប់រំបណ្ដុះបណ្ដាលនិស្សិតយោធាបរទេស និងនិស្សិតយោធាអាមេរិកមានស្តង់ដាខុសគ្នានៅ West Point នោះ «ខ្ញុំសូមឲ្យលោក សម រង្ស៊ី លាឈប់ពីនយោបាយជារៀងរហូត»។
លោកបានបន្ថែមថាលោក សម រង្ស៊ី ដែលបានតាំងខ្លួនជាអ្នកនយោបាយជើងចាស់ និងជាអ្នកចេះដឹងខ្ពស់មានសញ្ញាបត្រពីប្រទេសបារាំង ប្រាកដជាមិនខ្លាចនឹងការភ្នាល់គ្នាទេដើម្បីការពារនូវអ្វីដែលគាត់ហ៊ាននិយាយជាសាធារណៈ ព្រោះលោក សម រង្ស៊ី ពិតជាចង់រក្សាតម្លៃរបស់គាត់ដើម្បីជាគំរូដល់អ្នកគាំទ្រគាត់ ជាពិសេសយុវជនជំនាន់ក្រោយ។
លោកបានថ្លែងថា៖ «ប៉ុន្តែបើសិនជាលោក សម រង្ស៊ីមិនហ៊ានភ្នាល់ ឬមិនអាចបង្ហាញនូវភ័ស្តុតាងដើម្បីការពារនូវអ្វីដែលគាត់បាននិយាយនោះទេ គាត់នឹងបង្ហាញថាគាត់ជាអ្នកនយោបាយម្នាក់ដែលចាស់តែអាយុចំណេះដឹងខ្ពស់តែនៅលើក្រដាសសញ្ញាបត្រ និងគ្មានការទទួលខុសត្រូវ និងគ្មានភាពជាគំរូដល់យុវជនជំនាន់ ក្រោយឡើយ។ ខ្ញុំហ៊ាននិយាយ ខ្ញុំហ៊ានធ្វើ និងហ៊ានទទួលខុសត្រូវជាមួយនឹងសម្តីរបស់ខ្ញុំដែលបាននិយាយ»។
លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិបានចាត់ទុកថាការចោទប្រកាន់របស់លោក សម រង្ស៊ី ទៅលើលោក ហ៊ុន ម៉ាណែត ថា ការវាយប្រហារដែលធ្វើឲ្យខាតបង់ផលប្រយោជន៍ប្រជាជន និងអ្នកគាំទ្រ ហើយលោក សម រង្ស៊ី គួរឈប់យករឿងបុគ្គលយកមកវាយប្រហារបែបនេះ។
លោកថ្លែងថា៖ «ខ្ញុំមើលទៅមិនគួរយករឿងបុគ្គល រឿងផ្ទាល់ខ្លួនមកវាយប្រហារគ្នា វាមិនមានប្រយោជន៍»។
លោក សុខ ទូច ប្រធានរាជបណ្ឌិត្យសភាកម្ពុជាបានថ្លែងថា លោក ហ៊ុន ម៉ាណែត មិនគួរធ្វើការឆ្លើយតប និងភ្នាល់ជាមួយលោក សម រង្ស៊ី នោះទេដោយសារតែលោក សម រង្ស៊ី ជាមនុស្សតែងតែចូលចិត្តវាយប្រហារដោយគ្មានហេតុផលដើម្បីទទួលបានការឆ្លើយឆ្លង។
លោកបានបញ្ជាក់ថា៖ «មិនគួរឆ្លើយតបជាមួយនឹង សម រង្ស៊ី ទេ ពីព្រោះគាត់មិនមានអ្វីនិយាយគាត់ចេះតែថាទៅ ដើម្បីឲ្យយើងច្រឡោតដើម្បីប្រតិកម្មតវិញដើម្បីជាអាយ៉ៃឆ្លើយឆ្លង បើយើងមិនឆ្លើយតប វាអត់ទៅហើយ។ សម័យទំនើបសញ្ញាបត្រពិតប្រាកដ ឬមិនពិតប្រាកដយកតែអាយឌីចុចទៅឃើញភ្លាម។ (សម រង្ស៊ី) គឺមនុស្សឯកការចេះតែច្រៀងទៅ»។
លោក ឯម សុវណ្ណារ៉ា អ្នកវិភាគនយោបាយបានថ្លែងថា សញ្ញាបត្ររបស់សហរដ្ឋអាមេរិកគឺមានស្តង់ដាអប់រំខ្ពស់ហើយប្រសិនបើសញ្ញាបត្រ នោះជាសញ្ញាបត្រកិត្តិយសនោះ គេនឹងបញ្ជាក់នៅលើសញ្ញាបត្រនោះផងដែរ។
លោកបានថ្លែងថា៖ «ខ្ញុំគិតថាការផ្តល់សញ្ញបត្រក្លែងក្លាយ ឬកិត្តិយសគេនឹងមានការបញ្ជាក់ច្បាស់លាស់»។
លោក ហ៊ុន សែន បានសរសេរបង្ហោះនៅលើហ្វេសប៊ុករបស់លោកថា៖ «សូមស្តាប់កូនប្រុសខ្ញុំនិយាយទាក់ទងជាមួយការមួលបង្កាច់របស់ជនក្បត់ជាតិ។ ដល់វេនកូនចេញវាយបង្ក្រាប ចោរក្បត់ជាតិនេះហើយព្រោះ គេជាអ្នកចេញវាយកូនមុន»។
លោក សម រង្ស៊ី មិនអាចទាក់ទងបានទេ។ លោក ចាន់ សុផល នាយកមជ្ឈមណ្ឌលសិក្សាគោលនយោបាយ និងលោក ឡៅ ម៉ុងហៃ អ្នកវិភាគនយោបាយសុំមិនធ្វើអត្ថាធិប្បាយ៕
វីដេអូ៖
