ភ្នំពេញៈ លោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោកបានផ្តល់រថយន្តចំនួន ៧៥ គ្រឿង ដែលជាជំនួយឥតសំណងពីសាធារណរដ្ឋប្រជាមានិតចិនទៅឱ្យកងទ័ពជើងគោកនៃកងយោធពលខេមរភូមិន្ទ ដើម្បីបែងចែកទៅបណ្តាអង្គភាពចំណុះចំនួន ៣២ អង្គភាព។
ពិធីប្រគល់ និងទទួលធ្វើឡើងនៅបញ្ជាការដ្ឋានកងទ័ពជើងគោកនាព្រឹកម្សិលមិញ ដោយលោក ហ៊ុន ម៉ាណែត បានប្រគល់ជូនលោកឧត្តមសេនីយ៍ឯក ម៉ៅ សុផាន់ មេបញ្ជាការរងកងទ័ពជើងគោក និងជាមេបញ្ជាការកងពលតូចលេខ ៧០។ ក្នុងនោះកងពលតូចលេខ ៧០ បានទទួលរថយន្តបញ្ជាការ (ហ្ស៊ីប) ចំនួន ២៥ គ្រឿង។
លោក ឈុំ សុជាត រដ្ឋលេខាធិការ និងជាអ្នកនាំពាក្យក្រសួងការពារជាតិ បានឱ្យដឹងថា រថយន្តទាំង ៧៥ គ្រឿងនោះ មានរថយន្តបញ្ជាការចំនួន ៥៥ គ្រឿង និងរថយន្តប្រភេទប្រតិបត្តិការចំនួន ២០ គ្រឿង។ ការប្រគល់រថយន្តចំនួន ៧៥ គ្រឿង ដល់អង្គភាពចំណុះចំនួន ៣២ អង្គភាពនេះ គឺសម្រាប់ប្រើប្រាស់ក្នុងការងារហ្វឹកហ្វឺន និងប្រតិបត្តិការរបស់អង្គភាពរៀងៗខ្លួន។
លោក សុជាតិ បានបញ្ជាក់ថា រថយន្តទាំងអស់ខាងលើនេះគឺជាជំនួយឥតសំណងពីសាធារណរដ្ឋប្រជាមានិតចិនក្នុងក្របខណ្ឌនៃកិច្ចសហប្រតិបត្តិការរវាងក្រសួងការពារជាតិនៃប្រទេសទាំង ២ កម្ពុជា-ចិន ជូនដល់កងទ័ពជើងគោកនៃកងយោធពលខេមរភូមិន្ទ ដើម្បីជួយពង្រឹងសមត្ថភាពក្នុងវិស័យការពារជាតិកម្ពុជា។
បើតាមលោក សុជាតិ តាមរយៈកិច្ចសហប្រតិបត្តិការទ្វេភាគី-ពហុភាគីជាមួយបណ្តាប្រទេសក្នុងតំបន់ និងសកលលោក កម្ពុជាតែងតែទទួលបាននូវជំនួយឧបត្ថម្ភជាច្រើនទាំងស្មារតី សម្ភារ និងថវិកាពីបណ្តាប្រទេសជាដៃគូ ហើយក្នុងនោះក៏មានសាធារណរដ្ឋប្រជាមានិតចិនផងដែរ ដែលជាប្រទេសផ្តល់ជំនួយដ៏ធំមួយសម្រាប់កម្ពុជា។
លោក សុជាតិ បានថ្លែងថា៖ «ជាក់ស្តែងជំនួយកិច្ចសហប្រតិបត្តិការយោធាចិនជូនដល់កងទ័ពជើងគោកនៃកងយោធពលខេមរភូមិន្ទនាពេលនេះគឺពិតជាបានបង្ហាញនូវចំណងមិត្តភាព ទំនាក់ទំនងល្អ និងភាពជាដៃគូយុទ្ធសាស្ត្រ គ្រប់ជ្រុងជ្រោយរវាងប្រទេសទាំង ២ កម្ពុជា-ចិន»។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានថ្លែងពីម្សិលមិញថា ការទទួលអំណោយពីប្រទេសមហាអំណាច ជាពិសេសអំណោយយោធា កម្ពុជាត្រូវតែមានភាពវៃឆ្លាតក្នុងការទទួល។ បើមានបច្ចេកទេស និងសមត្ថភាពក្នុងការទទួលបានច្រើនពីប្រទេសធំៗ ប្រទេសមហាអំណាចនោះរឹតតែជួយឱ្យកម្ពុជាអាចពង្រឹងខ្លួនលើវិស័យយោធានេះបានកាន់តែប្រសើរថែមទៀត។
ប៉ុន្តែលោក ចន្ទរឿន បញ្ជាក់ថា៖ «ប្រសិនបើយើងទទួលអំណោយតែពីប្រទេសមហាអំណាចណាមួយ ហើយទាត់ចោលអំណោយ ឬក៏ជំនួយពីប្រទេសមហាអំណាចផ្សេងទៀត នោះនឹងបង្កឱ្យមានការអាក់អន់ស្រពន់ចិត្ត ជាពិសេសគឺគេអាចមើលឃើញកម្ពុជាយើងហ្នឹងមានទំនោរ ឬក៏លម្អៀងទៅកាន់មហាអំណាចណាមួយដែលប្រាសចាកពីគោលការណ៍រដ្ឋធម្មនុញ្ញប្រទេសកម្ពុជា ដែលកាន់គោលការណ៍អព្យាក្រឹត»៕