ភ្នំពេញៈ អគ្គមេបញ្ជាការរងនៃកងយោធពលខេមរភូមិន្ទ និងមេបញ្ជាការកងទ័ពជើងគោកលោកឧត្តមសេនីយ៍ឯក ហ៊ុន ម៉ាណែត កាលពីម្សិលមិញបានអំពាវនាវដល់បេក្ខជនដែលចូលរួមប្រឡងជ្រើសរើសនាយទាហានកុំឲ្យចាញ់បោកអ្នករត់ការឲ្យជាប់ និងកុំឲ្យមានសុំការអន្តរាគមន៍ស្របពេលដែលការប្រឡងកំពុងដំណើរការជាមួយបេក្ខជនចំនួន ៨ ០០០ នាក់។
បើតាមសេចក្ដីជូនដំណឹងរបស់គណៈកម្មការរៀបចំការប្រឡងគឺពិធីនេះត្រូវចាប់ផ្ដើមពីថ្ងៃទី ២២ ដល់ថ្ងៃទី ២៦ ខែ ធ្នូ ឆ្នាំ ២០១៩ ដោយធ្វើនៅតាមមណ្ឌលប្រឡងរាជធានីភ្នំពេញ និងតាមបណ្ដាយោធភូមិភាគ រួមមានយោធភូមិភាគទី ១ ទី ២ ទី ៣ ទី ៤ និងទី ៥។ វិញ្ញាសាប្រឡងផ្ដោតលើចំណេះដឹងទូទៅ ភាសាបរទេស និងវិញ្ញាសាកីឡា កាយសម្បទា ដើម្បីជ្រើសរើសវគ្គនាយទាហានសកម្ម វគ្គនាយទាហានជើងគោក វគ្គនាយទាហានបន្តវេន និងវគ្គនាយទាហានជំនាញបច្ចេកទេសជាដើម។
ខណៈដែលលោកក៏ជាប្រធានអនុគណៈកម្មការប្រឡងផងនោះលោក ហ៊ុន ម៉ាណែត បានថ្លែងនៅចំពោះមុខបេក្ខជនដែលបានចូលរួមប្រឡងប្រមាណជិត ៤០០ នាក់ថា ការប្រឡងជ្រើសរើសនាយទាហាននឹងប្រព្រឹត្តទៅដោយរលូន ត្រឹមត្រូវ មានតម្លាភាព និងយុត្តិធម៌ហើយថា អ្នកដែលបានជោគជ័យនឹងត្រូវបានជ្រើសរើសយកធ្វើជាទាហាន គឺដោយសារតែសមត្ថភាពផ្ទាល់ខ្លួនរបស់ពួកគេ។
លោកបញ្ជាក់ថា៖ «ការប្រឡងត្រូវប្រឹងគ្រប់មុខជំនាញទាំងអស់ដែលយើងមាន ៣ វិញ្ញាសា ដូច្នេះមិនត្រូវអវត្តមានវិញ្ញាសាណាមួយនោះទេ។ បើប្អូនអវត្តមាន ១ វិញ្ញាសា ប្អូននឹងធ្លាក់ដោយស្វ័យប្រវត្តិ ដូច្នេះប្អូនត្រូវខិតខំប្រឡង។
បើបារម្ភថា ធ្វើមិនបានល្អចំណេះដឹងទូទៅត្រូវប្រឹងភាសាអង់គ្លេស និងកីឡាពីព្រោះពិន្ទុយើងបូកបញ្ចូលគ្នា។ យើងត្រូវប្រឹងគ្រប់មុខ។ ៨ ០០០ នាក់ យើងយក ៦២០ កុំអាលទន់ជើងប្អូន ដាក់ចិត្តថាខ្លួនឯងអាចធ្វើបាន»។
លោកបានបញ្ជាក់បន្ថែមថា៖ «គណៈកម្មការប្រឡងគឺធ្វើម៉េចប្រឡងនេះត្រឹមត្រូវ និងតម្លាភាព និងយុត្តិធម៌។ ប្អូនចេះប្អូនជាប់ អ្នកជាប់ដោយសមត្ថភាពខ្លួនឯង បើអត់ទាន់ជាប់ក៏អស់ចិត្តដែរពីព្រោះធ្វើត្រឹមត្រូវ។ ទី២ កុំបាច់ទៅរកពីណាអន្តរាគមន៍ស្អីទេ ពឹងឪពុកម្តាយ អ៊ំដែលនៅទាហានជួយអន្តរាគមន៍ឲ្យជាប់ អត់ទេ ហើយកុំពឹងអ្នកស៊ីឡាកដោយសារអាចមានដែលថានឹងជួយឲ្យជាប់ដោយសារតែថ្ងៃមុន អាប្អូននៅតាកែវមករអ៊ូប្រាប់បង មានគេសន្យា តែខ្ញុំអត់ជាប់។ កុំធ្វើបែបហ្នឹង...»។
ជាមួយគ្នានេះដែរលោកឧត្តមសេនីយ៍ ប៊ុត សុភាព នាយកសាលានាយទាហានសកម្ម និងជាអនុប្រធានប្រចាំការនៃអនុគណៈកម្មការប្រឡង និងជាប្រធានមណ្ឌលប្រឡងនៅភ្នំពេញបានថ្លែងថា ប្រាប់អ្នកសារព័ត៌មានថាអ្វីដែលគណៈកម្មការបាននិងកំពុងធ្វើនេះគឺមានភាពសុក្រឹត ច្បាស់លាស់ ត្រឹមត្រូវបំផុត។ កន្លងមកមានពាក្យចចាមអារ៉ាមថា ការប្រឡងចូលកងយោពលខេមរភូមិន្ទ នាយទាហាននៃកងយោធពលខេមរភូមិន្ទមានការសូកប៉ាន់ថវិកា តែពេលគណៈកម្មការធ្វើការស៊ើបអង្កេតគឺពុំមានការកើតឡើងគ្មានទាល់តែសោះ។
លោកបានបញ្ជាក់ថា៖ «អ្នកថា គឺចេះតែថាទេ តែយើងអនុវត្តប្រកាន់ខ្ជាប់គោលការណ៍ និងការរៀបចំឯកសារ ការចាត់តាំង និងការទទួលខុសត្រូវតាមជំនាញ។ មណ្ឌលប្រឡងនីមួយៗត្រូវបានរឹតបន្តឹងដោយមានកម្លាំងកងរាជអាវុធហត្ថ ប៉ូលិសក្រុងភ្នំពេញត្រួតពិនិត្យ និងឆែកឆេរត្រួតពិនិត្យជុំវិញមណ្ឌលប្រឡង និងជុំវិញអគារប្រឡង»។
លោកបានបន្ថែមថា៖ «យើងមានគោលបំណងឲ្យបេក្ខជនរបស់យើងគឺអ្នកចេះគឺជាប់។ បេក្ខជនទាំងអស់ត្រូវខិតខំប្រឹងប្រែងធ្វើវិញ្ញាសាទៅតាមសមត្ថភាពរបស់ខ្លួន...។ យើងនឹងប្រឹងប្រែងធ្វើឲ្យអស់លទ្ធភាពរបស់យើងហើយការអនុវត្តរបស់យើងនាពេលកន្លងមកទទួលបានលទ្ធផលល្អណាស់»។
បើតាមលោកឧត្តមសេនីយ៍ ប៊ុត សុភាព ចំនួនបេក្ខជនប្រឡងទាំងនោះរួមមានមណ្ឌលភ្នំពេញចំនួន ៣៤៦ នាក់ មណ្ឌលភូមិភាគទី ១ ខេត្តស្ទឹងត្រែងចំនួន ៥៥ នាក់ មណ្ឌលភូមិភាគទី ២ ខេត្តកំពង់ចាមចំនួន ៨៤ នាក់ មណ្ឌលភូមិភាគទី ៣ ខេត្តតាកែវចំនួន ៨១ នាក់ មណ្ឌលភូមិភាគទី ៤ ខេត្តសៀមរាបចំនួន ១៦៥ នាក់ និងមណ្ឌលភូមិភាគទី ៥ ខេត្តបាត់ដំបងចំនួន ១២៧ នាក់។ រីឯគណៈកម្មការរៀបចំការប្រឡងមានចំនួន ១០៨ នាក់៕
វីដេអូ៖