ភ្នំពេញៈ លោក ហ៊ុន ម៉ានិត ដែលកំពុងកាន់តំណែងខ្ពស់នៅក្នុងក្រសួងការពារជាតិត្រូវបានផ្ដល់ឋានៈបន្ថែមទៀតស្មើរដ្ឋមន្ត្រី និងតែងតាំងជាសមាជិកក្រុមប្រឹក្សាភិបាល និងទីប្រឹក្សាអមក្រុមប្រឹក្សាភិបាលមជ្ឈមណ្ឌល សកម្មភាពកំចាត់មីនកម្ពុជា។ យោងតាមព្រះរាជក្រឹត្យដែលភ្នំពេញប៉ុស្តិ៍ទើបទទួលបានកាលពីម្សិលមិញ។
លោក ហ៊ុន ម៉ានិត ជាសមាជិកម្នាក់ក្នុងចំណោមសមាសភាពក្រុមប្រឹក្សាភិបាល និងទីប្រឹក្សាអមក្រុមប្រឹក្សាភិបាលមជ្ឈមណ្ឌលសកម្មភាពកំចាត់មីនកម្ពុជា ១៤ រូបដែលត្រូវត្រាស់បង្គាប់តែងតាំង និងផ្ដល់ឋានៈដែលត្រូវបានព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាឡាយព្រះហស្តលេខាកាលពីទី ២ ខែវិច្ឆិកា ឆ្នាំ ២០១៨។
លោក ហ៊ុន ម៉ានិត អាយុ ៣៧ ឆ្នាំកំពុងកាន់តួនាទីជាអនុប្រធានគណៈកម្មាធិការត្រួតពិនិត្យផ្ទៃក្នុងរបស់គណបក្សប្រជាជនកម្ពុជា និងជាអគ្គនាយកនៃអគ្គនាយកដ្ឋានស្រាវជ្រាវចារកិច្ចក្រសួងការពារជាតិ។
ទោះជាយ៉ាងណាក៏ដោយលោក មាស នី អ្នកឃ្លាំមើលផ្នែកអភិវឌ្ឍន៍សង្គម បានអះអាងកាលពីម្សិលមិញដោយមិនមានការភ្ញាក់ផ្អើលនៃការតែងតាំងនោះទេ ព្រោះតែប្រទេសកម្ពុជាមានវប្បធម៌នៃការតែងតាំងគ្រួសារ និងសែស្រឡាយដែលជាយុទ្ធសាស្ត្រ ដើម្បីបន្តគ្រប់គ្រងអំណាច។
លោក នី បានថ្លែងថា៖ «យើងមើលឃើញវាជាទំនោរតាំងពីដើមមកដែលបាននិងកំពុងតែដើរទៅកាន់ប្រមូលអំណាចនៃគ្រួសារមួយឈានទៅកាន់កាប់ប្រទេសទាំងមូល ហើយការរៀបចំតែងតាំងនេះមិនខុសពីប្រទេសដទៃដែលឈានទៅរៀបចំខ្លួនដើម្បីកាន់កាប់អំណាចតកូនតចៅ»។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងការពារការតែងតាំងដោយអះអាងថា វាជាតម្រូវការរបស់ស្ថាប័នហើយការតែងតាំងនេះដើម្បីជួយជំរុញប្រសិទ្ធភាពក្នុងការងារ វាមិនទាក់ទងនឹងបក្ខពួក និងគ្រួសារនិយមនោះទេ។
លោកថ្លែងថា៖ «ការតែងតាំងគឺឆ្លើយតបនឹងសមត្ថភាពរបស់ឯកឧត្តម និងទី ២ វាជាតម្រូវការរបស់ក្រសួង និងស្ថាប័ននានាសម្រាប់ជួយជំរុញដំណើរការនៃប្រសិទ្ធភាពការងារខ្ញុំមើលមិនឃើញរឿងនេះថា ជារឿងបក្ខពួកនិយម ឬគ្រួសារនិយមនោះទេ»៕