.jpg)
ព្រះសង្ឃកំពុងនិមន្តកាត់តំបន់សន្តិសុខនៅសាលាឧទ្ធរណ៍។ ហុង មិនា
ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងទៅកាន់និស្សិតនៅព្រឹកនេះ ដោយមិនជឿថា នឹងមានការដោះលែងមេក្បត់ជាតិឡើយ ទន្ទឹមពេលដែលសាលាឧទ្ធរណ៍កំពុងបើសវនាការលើបណ្ដឹងសារទុក្ខរបស់លោក កឹម សុខា អតីតប្រធានគណបក្សសង្គ្រោះជាតិ ដែលប្ដឹងប្រឆាំងនិងការឃុំខ្លួនលោកបន្ត ៦ ខែទៀត។
ក្នុងពិធីចែកសញ្ញាបត្រដល់និស្សិតសាកលវិទ្យាល័អាស៊ីអឺរ៉ុប កាលពីព្រឹកមិញ នៅវិទ្យស្ថានជាតិអប់រំ លោក ហ៊ុន សែន ថ្លែងថា៖«ខ្ញុំមិនជឿថាព្រឹកនេះ សាលាឧទ្ធរណ៍នឹងដោះលែងអាមេក្បត់ជាតិ ព្រោះនេះជាអំពើក្បត់ជាតិ ប៉ុន្តែខ្ញុំគោរពសេចក្ដីសម្រេចរបស់តុលាការ ប្រសិនបើតុលាការដោះលែងឲ្យវានៅក្រៅឃុំ អាហ្នឹងខ្ញុំក៏មិនដឹងធ្វើម៉េច ប៉ុន្តែខ្ញុំមិនជឿទេថា តុលាការនឹងដោះលែងអាមេក្បត់ជាតិហ្នឹងទេ។ ហើយអ្នកដែលចាប់ខ្លួនដំបូង បញ្ជាចាប់ខ្លួនដំបូង គឺហ៊ុន សែន អ្នកបញ្ជា គ្មានអ្នកណាផ្សេងទេ បើគ្មានបទបញ្ជាពីហ៊ុន សែន គ្មានអ្នកណាហ៊ានចាប់ទេ»។
លោក ថ្លែងបន្តថា ៖«ប៉ុន្តែឥឡូវវានៅក្នុងដៃតុលាការ បើព្រឹកនេះតុលាការដោះលែងក៏ដោះលែងទៅ ដោះនៅក្រៅឃុំ ក៏ អាហ្នឹងជារឿងតុលាការអាហ្នឹងខ្ញុំត្រូវតែគោរព ប៉ុន្តែខ្ញុំមិនជឿថាតុលាការ ដើរទៅដល់ដំណាក់ការហ្នឹងទេ»។
ក្រុមនគរបាលសម្រាកខណៈសវនាការកំពុងដំណើរការក្នុងសាលាឧទ្ធរណ៍។ហុង មិនា
មន្ត្រីនគរបាលម្នាក់បានថ្លែងប្រាប់ភ្នំពេញប៉ុស្ដិ៍ថា លោក កឹម សុខា ត្រូវបាននាំខ្លួនចូលតុលាការចាប់តាំងពីម៉ោងធ្វើការចាប់ផ្ដើមដំបូងនៅពេលព្រឹកព្រលឹម ប៉ុន្តែលោក អ៊ូ ចាន់រិទ្ធ ថ្លែងថា មេធាវីលោក សុខា បានប្រាប់លោកថា សុខា មិនបានចូលមកតុលាការនៅម៉ោង ៧ ព្រឹកនោះទេ។
ច្រកចូលនៃសាលាឧទ្ធរណ៍ត្រូវបានបិទទ្វារនិងយាមយ៉ាងតឹងរឹងដោយកងកម្លាំងសន្តិសុខ ដប់ម្ភៃនាក់ មិនដូចសវនាការកាលពីខែកុម្ភៈនោះទេ សន្តិសុខត្រូវបានរឹតបន្តឹងខ្លាំងមិនឲ្យសាធារណៈជននៅក្បែរ។
លោក កឹម សុខា បាននិងកំពុងជាប់ឃុំនៅពន្ធនាគារខេត្តត្បូងឃ្មុំ ចាប់តាំងពីត្រូវបានចាប់ខ្លួននៅពាក់កណ្ដាលយប់ កាលពីដើមខែកញ្ញា ឆ្នាំ២០១៧ ជាប់ចោទពីបទក្បត់ជាតិ។ ការចាប់ខ្លួនបានធ្វើឡើងក្រោយពីមានការបែកធ្លាយវីឌីអូខ្លីបនៅឆ្នាំ ២០១៣ ដែលបានថ្លែងទៅកាន់អ្នកគាំទ្រថា មានការជួយគាំទ្រពីបរទេសនៅក្នុងការងារនយោបាយរបស់គណបក្ស៕
វីដេអូបង្ហាញពី លោក រ៉ុង ឈុន និងអ្នកគាំទ្រលោក កឹម សុខា ត្រូវបានសមត្ថកិច្ចដេញមិនឲ្យប្រមូលផ្ដុំ
