ភ្នំពេញ៖ លោកនាយករដ្ឋមន្ត្រី ហ៊ុន សែន បានយល់ព្រមអនុញ្ញាតឱ្យក្រសួងសុខាភិបាលប្រើប្រាស់ជាផ្លូវការនូវវ៉ាក់សាំងចំនួន ២ ប្រភេទទៀតគឺ Sinovax''s Covid-19 និង AstraZeneca''s Covid-19 ក្នុងលក្ខខណ្ឌនៃការប្រើប្រាស់ជាបន្ទាន់ ប៉ុន្តែខាងក្រសួងសុខាភិបាលនៅមិនទាន់អាចបញ្ជាក់នៅឡើយថា តើវ៉ាក់សាំងទាំង ២ នេះនឹងមកដល់កម្ពុជាសម្រាប់ប្រើប្រាស់ពេលណានោះទេ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ បានចេញសេចក្តីប្រកាសព័ត៌មាន កាលពីថ្ងៃទី ១២ ខែ កុម្ភៈ ឆ្នាំ ២០២១ ថា៖ «ដោយមានការយល់ព្រមដ៏ខ្ពង់ខ្ពស់ពីសម្តេចតេជោនាយករដ្ឋមន្ត្រី ចុះថ្ងៃទី ១១ ខែកុម្ភៈ ក្រសួងសុខាភិបាលអនុញ្ញាតឱ្យប្រើប្រាស់ជាផ្លូវការនូវវ៉ាក់សាំង Sinovax''s Covid-19 ផលិតដោយសាធារណរដ្ឋប្រជាមានិតចិននិង AstraZeneca''s Covid-19 ដែលបានប្រើប្រាស់ប្រកបដោយសុវត្ថិភាពនៅក្នុងប្រទេសអង់គ្លេស»។
លោក ប៊ុនហេង បានលើកឡើងក្នុងសេចក្ដីប្រកាសព័ត៌មានដដែលនេះថា វ៉ាក់សាំងទាំងនេះ ត្រូវបានប្រើប្រាស់ប្រកបដោយសុវត្ថិភាពក្នុងប្រទេសចិន និងចក្រភពអង់គ្លេស ព្រមទាំងបណ្តាប្រទេសមួយចំនួន ក្នុងលក្ខខណ្ឌនៃការប្រើប្រាស់ជាបន្ទាន់។
លោកបញ្ជាក់ថា៖ «វ៉ាក់សាំងទាំង ២ នេះ ត្រូវបានដាក់ឱ្យអនុវត្តតាមពិធីសារស្តីពីយុទ្ធនាការចាក់វ៉ាក់សាំងកូវីដ ១៩ របស់រាជរដ្ឋាភិបាលចាប់ពីថ្ងៃចុះហត្ថលេខានេះតទៅ»។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ប្រាប់ ភ្នំពេញ ប៉ុស្តិ៍ ពីម្សិលមិញថា ក្រសួងមិនទាន់មានព័ត៌មានណាមួយ ពីកាលបរិច្ឆេទដែលវ៉ាក់សាំង Sinovax''s Covid-19 និង AstraZeneca''s Covid-19 នឹងមាននៅប្រទេសកម្ពុជា នោះទេ។ ក្រសួងសុខាភិបាលនឹងធ្វើការប្រកាសជាសាធារណៈនៅពេលដែលវ៉ាក់សាំងទាំងនេះបញ្ជូនមកដល់ប្រទេសកម្ពុជា។
ប្រទេសកម្ពុជា បានដាក់ឱ្យប្រើប្រាស់នូវវ៉ាក់សាំងកូវីដ ១៩ ស៊ីណូហ្វាម របស់សាធារណរដ្ឋប្រជាមានិតចិន ដែលបានផ្តល់ជូនដំបូងចំនួន ៦០ ម៉ឺនដូស ក្នុងចំណោម ១ លានដូស កាលពីថ្ងៃទី ១០ ខែ កុម្ភៈ ឆ្នាំ ២០២១។
លោកស្រី ឱ វណ្ណឌីន ឲ្យដឹងថាថា គិតពីថ្ងៃទី ១០ ដល់ថ្ងៃទី ១២ ខែកុម្ភៈ អ្នកដែលបានស្ម័គ្រចិត្តមកចាក់វ៉ាក់សាំងកូវីដ ១៩ មានចំនួន ១ ៩៤៧ នាក់ ក្នុងនោះស្រីចំនួន ៧៤១ នាក់។ ប៉ុន្តែអ្នកដែលបានចាក់វ៉ាក់សាំងនេះ មានចំនួន ១ ៤៩២ នាក់ (ស្រី ៤៩៣ នាក់) ដោយឡែកអ្នកដែលគ្រូពេទ្យមិនអនុញ្ញាតឱ្យចាក់មានចំនួន ៤៥៥ នាក់ (ស្រី ២៤៨ នាក់)។
ជាមួយគ្នានេះដែរលោកនាយករដ្ឋមន្ត្រី ហ៊ុន សែន បានបញ្ជាឱ្យអាជ្ញាធរនៅតាមបណ្តាខេត្តទាំងអស់ ដែលនៅជាប់នឹងព្រំដែនកម្ពុជា-ថៃ ត្រូវចាត់ចែងរៀបចំកម្លាំងល្បាតការពារឲ្យបានរឹងមាំ និងរឹតបន្តឹងឱ្យកាន់តែខ្លាំងបន្ថែមទៀត បន្ទាប់ពីមានពលករខ្មែរមកពីប្រទេសថៃ បានទៅដល់ខេត្តតាកែវ ច្រើនជាងប្រជាពលរដ្ឋខ្មែរមកពីប្រទេសវៀតណាម។
យោងតាមសារជាសំឡេងរបស់លោក ហ៊ុន សែន ដែល ភ្នំពេញ ប៉ុស្តិ៍ ទទួលបាននៅថ្ងៃម្សិលមិញ បានឱ្យដឹងថា បញ្ហាកាន់តែមានច្រើនហើយដោយសារនៅខេត្តតាកែវ មានអ្នកមកពីប្រទេសវៀតណាម តិចជាងមកពីប្រទេសថៃ ដែលជាហេតុធ្វើឱ្យលោកបានដាក់បទបញ្ជាជាថ្មីម្តងទៀត ទៅបណ្តាខេត្តដែលនៅតាមព្រំដែនកម្ពុជា-ថៃ ត្រូវរឹតបន្តឹងទៅដល់ពលករ ដែលមកពីប្រទេសថៃ។
លោកមានប្រសាសន៍ថា៖ «ត្រូវពិនិត្យមើលតាមច្រកដែលពលករធ្លាប់ឆ្លងមកត្រូវចាត់ចែងរៀបចំកម្លាំង ដើម្បីល្បាត ហើយត្រូវចាប់ឱ្យធ្វើចត្តាឡីស័កនៅឯទល់ដែន។ មានពលករដែលមកពីប្រទេសថៃ ធ្វើដំណើរមកដល់ខេត្តតាកែវ ហើយធ្វើចត្តាឡីស័កនៅខេត្តនេះ ដូចនេះបើពួកគាត់មានវិជ្ជមានកូវីដ ១៩ នោះវានឹងឆ្លងចូលក្នុងសហគមន៍ម្តងទៀតជាមិនខាន»។
លោក ហ៊ុន សែន បញ្ជាក់ថា៖ «នៅខាងខេត្តតាកែវ ត្រូវសួរចម្លើយពលករទាំងនោះថា តើអ្នកណានាំផ្លូវពួកគាត់ ដើម្បីយើងចាត់ការទៅលើអ្នកដែលនាំផ្លូវពលករ (មេខ្លោង) ដែលធ្វើឱ្យមានពលករជាង ១០ នាក់នេះបានឆ្លងពីព្រំដែនថៃ ទៅដល់ខេត្តតាកែវ។ ដូចនេះពិតជាមានអ្នកនាំផ្លូវហើយ»។
កាលពីថ្ងៃទី ១៣ ខែ កុម្ភៈ ឆ្នាំ ២០២១ នេះ ដែលជាថ្ងៃខួប ១ ឆ្នាំ (១៣ កុម្ភៈ ២០២០-១៣ កុម្ភៈ ២០២១) ដែលប្រទេសកម្ពុជា បានទទួលនាវាទេសចរណ៍ខ្នាតអន្តរជាតិ westerdam ដែលមានផ្ទុកអ្នកដំណើរប្រមាណ ១ ៤៥៥ នាក់ និងនាវិកចំនួន ៨០២ នាក់ មកពី ៤១ ប្រទេសឱ្យចូលចតនៅក្រុងព្រះសីហនុ។
លោក ហ៊ុន សែន ក៏បានបង្ហោះសារលើបណ្តាញសង្គមរបស់លោកថា កម្ពុជាតូចពិត ប៉ុន្តែកម្ពុជាមានបេះដូងគុណធម៌ធំទូលាយ។ លោកលើកឡើងថា៖ «យើងចាំច្បាស់ណាស់ គឺនៅពេលនោះពិភពលោកមានការភ័យខ្លាចរន្ធត់យ៉ាងខ្លាំង អំពីការរីករាលដាលជំងឺកូវីដ ១៩ ដែលបានធ្វើឱ្យប្រទេសជាច្រើនមិនអនុញ្ញាតឱ្យនាវាទេសចរណ៍ Westerdam ចូលចតដាច់ខាត ទោះបីបានដឹងថា នៅក្នុងនាវានោះ មានជីវិតមនុស្សរាប់ពាន់នាក់ ដែលកំពុងអស់សង្ឃឹមហើយប្រឈមនឹងអត់ស្បៀងអាហារ និងជាពិសេសប្រឈមនឹងគ្រោះកាចនៃជំងឺឆ្លងកូវីដ ១៩»។
លោកបន្តថា កម្ពុជាមានបេះដូងមនុស្សធម៌ធំទូលាយបានទទួលស្វាគមន៍នាវាចូលចត និងបានសង្គ្រោះអ្នកទេសចរ និងនាវិកទាំងអស់ ចេញពីនាវាហើយបានរៀបចំកន្លែងឱ្យស្នាក់នៅព្យាបាល និងបានរៀបចំឱ្យអ្នកទេសចរទាំងអស់បានធ្វើដំណើរតាមយន្តហោះវិលទៅជួបជុំក្រុមគ្រួសារនៅប្រទេសកំណើតខ្លួនវិញប្រកបដោយសុវត្ថិភាព។
ស្ថានទូតអូស្ត្រាលីប្រចាំកម្ពុជា បានលើកឡើងផងដែរថា រយៈពេល ១ ឆ្នាំហើយ ចាប់តាំងពីកប៉ាល់ទេសចរណ៍ Westerdam បានចូលចតនៅកំពង់ផែក្រុងព្រះសីហនុ ក្រោយពីត្រូវបានបដិសេធមិនអនុញ្ញាតចូលចតនៅប្រទេសផ្សេង។
សម្រាប់ស្ថានទូតអូស្ត្រាលីនៅភ្នំពេញ និងប្រទេសកម្ពុជា ទាំងមូល វាបានបង្ហាញពីការចាប់ផ្តើមឆ្នាំថ្មី ដែលមិនដូចជាឆ្នាំមុន។ ស្ថានទូតនេះ បានបន្តថា ក្នុងរយៈពេល ១២ ខែកន្លងមកស្ថានទូតបាន និងកំពុងធ្វើការមិនឈប់ឈរ ដើម្បីផ្តល់ជំនួយកុងស៊ុលដល់ប្រជាជនអូស្ត្រាលីនៅកម្ពុជា។
ស្ថានទូតក៏បានធ្វើការជាមួយដៃគូកម្ពុជាក្នុងការផ្តោតការយកចិត្តទុកដាក់ជាថ្មី លើកម្មវិធីកិច្ចសហប្រតិបត្តិការអភិវឌ្ឍន៍ ដើម្បីជួយដល់ការស្តារកម្ពុជាឡើងវិញបន្ទាប់ពីជំងឺកូវីដ ១៩ តាមរយៈការផ្តល់ថវិកាជាង ៦៥ លានដុល្លារអូស្ត្រាលីរាល់ឆ្នាំ ដើម្បីគាំទ្រដល់ការអភិវឌ្ឍសេដ្ឋកិច្ចសង្គម និង ៣៥,៧ លានដុល្លារអូស្ត្រាលី សម្រាប់ការទទួលបានវ៉ាក់សាំងជំងឺកូវីដ ១៩ ប្រកបដោយសុវត្ថិភាព និងប្រសិទ្ធភាពនៅកម្ពុជា។ «យើងសូមថ្លែងអំណរគុណដល់ប្រទេសកម្ពុជា ដែលបានទទួលស្វាគមន៍កប៉ាល់នេះ ព្រមទាំងបដិសណ្ឋារកិច្ចដែលបានផ្តល់ដល់ប្រជាជនអូស្ត្រាលីជាច្រើននាក់ដែលនៅលើកប៉ាល់។ ១ ឆ្នាំក្រោយមកហើយ យើងនៅតែស្ថិតនៅជាមួយគ្នា»។
បើតាមរបាយការណ៍របស់ក្រសួងសុខាភិបាលនៅថ្ងៃម្សិលមិល កម្ពុជាមានអ្នកមានអ្នកជំងឺកូវីដ ១៩ ចំនួន ៤៧៩ នាក់ ក្នុងនោះអ្នកដែលបានព្យាបាលជាសះស្បើយចំនួន ៤៦៦ នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ១៣ នាក់៕
វីដេអូ៖