.jpg)
លោក ហ៊ុន សែន និង លោក ហេង សំរិន និងមន្ត្រីជាច្រើនរូបទៀត នៅក្នុងមីទ្ធីងរំឭកខួបលើកទី ៦៨ កាលពីថ្ងៃសុក្រ។ YOUSOS APDOULRASHIM
ភ្នំពេញៈ លោកនាយករដ្ឋមន្ត្រី ហ៊ុន សែន បានលើកឡើងថា ក្នុងរយៈពេល ៦៨ ឆ្នាំ គណបក្សប្រជាជនកម្ពុជា ដែលមានឈ្មោះដំបូងថា គណបក្សបដិវត្តន៍ខ្មែរ តែងស្ថិតនៅជាមួយប្រជាពលរដ្ឋគ្រប់កាលៈទេសៈ និងបានជួយរំដោះកម្ពុជាចេញពីអាណានិគមបរទេស ការឈ្លានពានពីបរទេស និងជាពិសេសគណបក្សនេះបានខំប្រឹងទប់ស្កាត់បដិវត្តន៍ពណ៌របស់ក្រុមប្រឆាំងចាប់តាំងពីថ្ងៃផ្ដួលរំលំរបបប៉ុលពតមក។
លោកថ្លែងថា៖ «ខ្ញុំក៏សូមយកឱកាសនេះ ដើម្បីរំឭកជាថ្មីថា កម្ពុជាមិនស្ថិតនៅក្រោមការត្រួតត្រារបស់ប្រទេសណានោះទេ យើងមិនផ្ដល់ឱកាសសម្រាប់ឱ្យបរទេសមកជ្រៀតជ្រែកកិច្ចការផ្ទៃក្នុងរបស់យើងឡើយ។ យើងមិនត្រូវឱនក្បាលចំពោះមុខការគាបសង្កត់ ឬការគំរាមកំហែងណាមួយឡើយ»។
នៅក្នុងថ្ងៃមីទ្ទីងរំឭកខួបលើកទី៦៨ នៃថ្ងៃបង្កើតគណបក្សប្រជាជនកម្ពុជានៅថ្ងៃទី ២៨ មិថុនា លោក ហ៊ុន សែន បានឡើងថ្លែងសុន្ទរកថាប្រាប់ទៅដល់សមាជិកគណបក្សនៅកោះពេជ្រថា គណបក្សប្រជាជនកម្ពុជា គឺកើតឡើងចេញពីប្រភពនៃកម្លាំងស្នេហាជាតិប្រឆាំងរបបអាណានិគមនិយមបារាំង ហើយក្រោយមកបានឆ្លងកាត់ឧបសគ្គលំបាករាប់មិនអស់ និងបានចូលរួមយ៉ាងសកម្មចាប់ពី ១៩៥៣ ដល់ឆ្នាំ ១៩៧០ ដើម្បីការពារឯករាជ្យ សន្ដិភាព និងអធិបតេយ្យភាព។
លុះដល់កម្ពុជាធ្លាក់ក្នុងភ្លើងសង្គ្រាមឆ្នាំ ១៩៧០-១៩៧៥ គណបក្សបានធ្វើការតស៊ូរំដោះប្រទេសពីការឈ្លានពានរបស់បរទេស ហើយបន្តបន្ទាប់មកទៀតក៏បានរំដោះប្រទេសចេញពីរបបប្រល័យពូជសាសន៍ខ្មែរក្រហមនៅថ្ងៃទី ៧ មករា ឆ្នាំ ១៩៧៩ និងចាប់ពីពេលនោះមក គណបក្សបានទប់ស្កាត់របបនេះមិនឲ្យវិលមករកកម្ពុជាវិញ។
លោកថ្លែងថា៖ «គណបក្សបានធ្វើជាបង្អែកដ៏រឹងមាំក្នុងការការពាររដ្ឋធម្មនុញ្ញ ការពាររបបរាជានិយម ការពារឯករាជ្យ អធិបតេយ្យ និងបូរណភាពទឹកដី ថែរក្សាសន្ដិភាព ស្ថិរភាពនយោបាយ ទប់ស្កាត់ឧបាយកលបដិវត្តន៍ពណ៌ និងសកម្មភាពប្រទូស្ដរ៉ាយគ្រប់បែបយ៉ាងរបស់ក្រុមប្រឆាំង និងមជ្ឈដ្ឋានអគតិនានា ដែលចង់រុញច្រានកម្ពុជាឥតឈប់ឈរ ឃ្លាតឆ្ងាយពីមាគ៌ាប្រជាធិបតេយ្យ និងនីតិរដ្ឋ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានលើកឡើងដែរថា បើនិយាយអំពីការកកើតគណបក្សប្រជាជនកម្ពុជា គឺគេត្រូវបែងចែកជា ៤ ដំណាក់ នៃការវិវឌ្ឍរបស់គណបក្សនេះ ដូចជា ដំណាក់កាលមាននិន្នាការរបបកុម្មុយនិស្តអំឡុងសម័យអាណានិគមបារាំងដល់សម័យសង្គមរាស្ដ្រនិយម ដំណាក់កាលគ្រប់គ្រងដោយខ្មែរក្រហមពីឆ្នាំ ១៩៧៥-១៩៧៩ ដំណាក់កាលគ្រប់គ្រងដោយក្រុមសាធារណរដ្ឋប្រជាមានិតកម្ពុជាពីឆ្នាំ ១៩៧៩ ដល់ឆ្នាំ ១៩៩៣ បន្ទាប់ពីវាយផ្ដួលរំលំខ្មែរក្រហម និងដំណាក់ចុងក្រោយគណបក្សនេះបានផ្លាស់ប្ដូរមករកមនោគមន៍វិជ្ជាលទ្ធិប្រជាធិបតេយ្យសេរីទទួលយកពហុមតិក្នុងសង្គមប្រជាធិបតេយ្យ ការអនុវត្តរបស់គណបក្សប្រជាជនគឺផ្អែកលើគោលការណ៍ប្រជាធិបតេយ្យនិងនីតិរដ្ឋ»៕
