.jpg)
លោកនាយករដ្ឋមន្ត្រី ហ៊ុន សែន នៅក្នុងពិធីសម្ពោធប្រព័ន្ធ ផ្គត់ផ្គង់ទឹកស្អាត នៅខេត្តកំពត កាលពីម្សិលមិញ។ SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានអះអាងជាសាធារណៈថាមិនបានប្រើប្រាស់ពាក្យអសុរោះដូចមេដឹកនាំហ្វីលីពីនទេ ហើយពាក្យដែលបានប្រើកន្លងមកគឺជា «គ្រាមភាសា» ប៉ុណ្ណោះ។
លោកបានថ្លែងដូច្នេះក្នុងពិធីសម្ពោធដាក់ឱ្យដំណើរការជាផ្លូវការនូវប្រព័ន្ធផ្គត់ផ្គង់ទឹកស្អាតខេត្តកំពត សាងសង់ឡើងក្រោមជំនួយរបស់រដ្ឋាភិបាលជប៉ុន ដែលធ្វើឡើងកាលពីថ្ងៃអង្គារម្សិលមិញ។ ដោយការថ្លែងបែបនេះគឺនៅពេលដែលមិនពេញចិត្តនឹងការវិភាគមួយចំនួនដែលលោកថា «មិនត្រឹមត្រូវ» នោះគឺការលើកឡើងថា ការដាច់ភ្លើងនៅកម្ពុជាគឺជាការផ្ដាច់ដើម្បីយកលេសសាងសង់វារីអគ្គិសនី។ លោកថា អ្នកដែលវិភាគបែបនេះសមនឹងកាត់ផ្ដាច់អគ្គិសនីពីផ្ទះរបស់ពួកគេ។
លោក ហ៊ុន សែន ថ្លែងថា៖ «ដល់ពេលគេនិយាយអ៊ីចឹងថាអូផ្ដាច់ការទៀតហើយ ហើយមាត់អាក្រក់។ តែខ្ញុំសុំបញ្ជាក់ ខ្ញុំអត់ទាន់ប្រើពាក្យសម្ដីដូចប្រធានាធិបតីហ្វីលីពីនទេ។ ប្រធានាធិបតីហ្វីលីពីន តែជេរឡើងកូនមីសំផឹងទាំងអស់។ សូម្បីតែប្រធានាធិបតីអាមេរិក អូបាម៉ា ក៏ប្រធានាធិបតីហ្វីលីពីនជេរ «កូនមីសំផឹងដែរ»។ ខ្ញុំអត់ទាន់ប្រើសម្ដីដល់ប៉ុណ្ណឹងទេ»។
លោកបន្តថា៖ «ហើយគាត់ជេរនោះធ្ងន់ធ្ងរណាស់ ជេរអាណាក៏គាត់ជេរដែរ។ អគ្គលេខាធិការរង អគ្គលេខាធិការអង្គការសហប្រជាជាតិ គាត់ជេរកូនមីសំផឹងទាំងអស់។ ខ្ញុំអត់ជេរដល់ថ្នាក់ប៉ុណ្ណឹងទេ។ តែខ្ញុំគ្រាន់តែប្រើប្រាស់ភាសាមួយចំនួន ភាសាគ្រាម គ្រាមភាសារបស់យើងដែលធ្លាប់ប្រើពីមុនមកមួយចំនួន។ វាហួសហេតុពេក ប្រយ័ត្នរន្ទះបាញ់»។
ប្រធានាធិបតីហ្វីលីពីន Rodrigo Duterte កាលពីឆ្នាំ ២០១៦ បានហៅអតីតប្រធានាធិបតីសហរដ្ឋអាមេរិក បារ៉ាក់ អូបាម៉ា ថាជា «កូនរបស់ស្ត្រីលក់ខ្លួន» ឆ្លើយតបនឹងការរិះគន់ការបង្ក្រាបគ្រឿងញៀនដែលអន្តរជាតិរិះគន់។
ប៉ុន្តែលោកបានសុំទោសដល់លោក អូបាម៉ា កាលពីឆ្នាំមុន។ នៅឆ្នាំ ២០១៨ លោកក៏បានវាយប្រហារលើក្រុមសិទ្ធិមនុស្សរបស់អង្គការសហប្រជាជាតិដែលគ្រោងនឹងស៊ើបអង្កេតរឿងបង្ក្រាបគ្រឿងញៀននៅហ្វីលីពីន ដោយលោកថា ក្រុមសិទ្ធិមនុស្សនោះគួរតែត្រូវ បោះឲ្យក្រពើស៊ី។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា លោក ហ៊ុន សែន ប្រើប្រាស់ពាក្យដែលស្ដាប់ទៅមិនពីរោះនៅក្នុងទិដ្ឋភាព ២ យ៉ាង គឺទី១ ដោយសារតែលោក ហ៊ុន សែន ជាកូនកសិករ ដូច្នេះលោកប្រើប្រាស់ពាក្យសម្ដីសាមញ្ញដូចដែលពលរដ្ឋទូទៅនិយាយឬគ្រាមភាសា។
លោកបន្តថា កត្តាទី២ នៃការប្រើភាសារគ្រោតគ្រាតរបស់គាត់គឺប្រើសម្រាប់បុគ្គលដែលធ្វើនយោបាយប្រឆាំងនឹងផលប្រយោជន៍ជាតិ។
លោកនិយាយថា៖ «អ្នកខ្លះគឺថាបើនិយាយល្អ ស្ដាប់អត់បានទេ ព្រោះឥរិយាបថរបស់គាត់គឺបែបហ្នឹង អ៊ីចឹងគាត់ប្រើភាសាមួយដែលសមនឹងឥរិយាបថទាំងនោះ»។
អ្នកវិភាគនយោបាយលោក ឡៅ ម៉ុងហៃ យល់ឃើញថា នៅពេលពាក្យសម្ដីរបស់មនុស្សម្នាក់ស្របទៅនឹងគោលបំណងឬគំនិត ឬអំពើជាក់ស្ដែង គេអាចនិយាយបានថា មនុស្សនោះជាមនុស្សស្មោះត្រង់។ ប៉ុន្តែនៅពេលពាក្យសម្ដីមិនស្របនឹងអំពើទេ គេថា គាត់មិនស្មោះត្រង់។
លោកថា៖ «ពាក្យអាក្រក់ៗបង្ហាញរូបភាពអាក្រក់ដល់អាកប្បកិរិយា និងបុគ្គលិកលក្ខណៈរបស់មនុស្ស ដោយសារតែពាក្យសម្ដីរបស់មនុស្សគឺជាតម្លៃរបស់គាត់ បើតាមពាក្យស្លោកខ្មែរ គឺដូចនឹងភ្លុកដំរីដែលអាចបញ្ជាក់ពីតម្លៃ របស់ដំរី»។
លោកបានបន្តថា៖ «ពាក្យសម្ដីអាក្រក់ បើទោះជាល្អជាងឬអាក្រក់ជាងសម្ដីមនុស្សដទៃទៀតក៏ដោយក៏នៅតែជាពាក្យអាក្រក់។ លើសពីនេះទៀត ពាក្យអាក្រក់បណ្ដុះនូវវិវាទ និងធ្វើឲ្យខូចភាពសុខុដុមរមនានៅក្នុងសង្គម ប៉ុន្តែជាអ្វីដែលសង្គមក្រោយរបបកុម្មុយនីស្តចង់បាន»៕
