ភ្នំពេញៈ លោកនាយករដ្ឋមន្ត្រី ហ៊ុន សែន កាលពីម្សិលមិញបានបញ្ជាក់ថា លោកនឹងតស៊ូបន្ថែមទៀតប្រឆាំងនឹងអ្នកដែលចង់កម្ចាត់ត្រកូលហ៊ុន និងបានលើកឡើងថា ការសម្របសម្រួលនយោបាយអាចកើតមានក្រោយពេលអ្នកនយោបាយដែលជាប់សំណុំរឿងនៅតុលាការត្រូវបានតុលាការកាត់ទោសរួចរាល់។
ការថ្លែងរបស់លោកនាយករដ្ឋមន្ត្រីនេះបានធ្វើឡើងនៅក្នុងពិធីសំណេះសំណាលជាមួយក្រុមមេធាវីស្ម័គ្រចិត្ត ដែលការពារស្ត្រី និងជនក្រីក្រ កាលពីម្សិលមិញ ប៉ុន្តែមិនបានលើកចំឈ្មោះបុគ្គលណាម្នាក់ទេ ដោយគ្រាន់តែបញ្ជាក់ថា នយោបាយមានស៊ីអត់សែន មានសែនអត់ស៊ីត្រូវបានគេលើកឡើងតាំងពីឆ្នាំ ២០១៣ ដែលនេះសំដៅទៅលើបុគ្គលជាអតីតមេដឹកនាំនៃអតីតគណបក្សសង្គ្រោះជាតិ។
ទោះយ៉ាងណាក៏ដោយបើតាមលោកមេធាវី សំ សុគង់ បុគ្គលនៃអតីតគណបក្សសង្គ្រោះជាតិប្រមាណជា ១៥០ នាក់ ត្រូវបានជាប់ចោទដាច់ដោយឡែកពីគ្នាដូចជាជាប់ចោទពីបទឧបឃាត ញុះញង់ និងរួមគំនិតក្បត់។
លោក ហ៊ុន សែន មានប្រសាសន៍ថា៖ «បើដាក់គោលដៅបង្រួបបង្រួមខ្មែរ អូខេ។ បើដាក់គោលដៅកម្ចាត់ត្រកូល ហ៊ុន សុំផ្ដាំទៅ ទោះបីរលាយផែនដីក៏ ហ៊ុន សែន នៅតែតស៊ូ ផ្ដាំឱ្យហើយ។ ឥឡូវមិនមែនវ៉ៃតែ ហ៊ុន សែន ទេ វ៉ៃត្រកូល ហ៊ុន។ អ៊ីចឹងតម្រូវឱ្យខ្ញុំមានរឿងអីដែលត្រូវគិត។ ប្រធានាធិបតីអាមេរិកថ្មីដែលជាប់ឆ្នោតអាយុ ៧៨ ខ្ញុំទើបតែ ៦៨ គាត់ចាស់ជាងខ្ញុំ។ ខ្ញុំមានទាន់ចាស់ឯណា»។
លោកបន្តថា៖ «អ៊ីចឹងបើអ្នកឯងប្រុងប្រៀប តែប្រហារខ្ញុំ រឿងអីដែលខ្ញុំទុកឱ្យអ្នកឯងមានពេលប្រហារ ខ្ញុំត្រូវតែប្រហារអ្នកឯង។ រឿងវាអ៊ីចឹង។ គេថា លោក ហ៊ុន សែន អប់រំគេឱ្យចេះសម្របសម្រួល តែខ្លួនឯង អត់ព្រមសម្របសម្រួល។ ខ្ញុំសម្របសម្រួលអស់ប៉ុណ្ណឹងហើយ ខ្ញុំគ្មានពេលសម្របសម្រួលជាមួយអ្នកណាទៀតទេ។ ដំណើរការផ្លូវច្បាប់ធ្វើតាមច្បាប់ផុតពីរឿងច្បាប់ហើយ ចាំសម្រួលគ្នាខាងនយោបាយ។ អត់មានសម្រួលគ្នាខាងនយោបាយ មុនសម្រួលគ្នាខាងផ្លូវច្បាប់ សុំជូនសារនេះទុកឱ្យហើយ។ ដំណើរការផ្លូវច្បាប់នៅតែបន្ត អ្នកឯងជាប់គុកត្រូវជាប់គុកឱ្យហើយ ចាំមកនិយាយគ្នាខាងនយោបាយ។ អ្នកមិនទាន់កាត់ក្ដី ត្រូវតែកាត់ក្ដីឱ្យហើយ ចាំនិយាយគ្នារឿងនយោបាយ»។
កម្ពុជានឹងមិនមានដំណោះស្រាយនយោបាយទេ ព្រោះប្រទេសនេះគ្មានជម្លោះនយោបាយ ប៉ុន្តែមានតែជម្លោះជាមួយផ្លូវច្បាប់តែប៉ុណ្ណោះ។ នៅកម្ពុជាក៏គ្មានអ្នកទោសនយោបាយដែរ មានតែអ្នកនយោបាយជាប់ទោសព្រហ្មទណ្ឌតែប៉ុណ្ណោះ។ កម្ពុជាក៏នឹងគ្មានកិច្ចព្រមព្រៀងលើកទី ២ ហើយក៏គ្មានការលើកលែងទោសលើកទី ២ ទី ៣ ទី ៤ ទី ៥ នោះដែរ។ នេះជាការលើកឡើងរបស់លោក ហ៊ុន សែន។
លោកមានប្រសាសន៍ថា ការអះអាងពីការកម្ចាត់ត្រកូល ហ៊ុន ធ្វើឱ្យលោកកាន់តែប្រឹងតស៊ូតទៅទៀត។ លោករំឭកថា ពេលលោកកាន់តំណែងជារដ្ឋមន្ត្រីការបរទេសនៅថ្ងៃទី ៨ ខែមករាឆ្នាំ ១៩៧៩ លោកត្រូវបានអ្នកខ្លះហៅថា ជារដ្ឋមន្ត្រីមិនទាន់បាត់ធំក្លិនទឹកដោះគោ។ ភាសាមួយមាត់នេះធ្វើឱ្យលោកប្រឹងធ្វើការផង រៀនផង។
លោកបញ្ជាក់ដូច្នេះថា៖ «អ៊ីចឹងនៅពេលឮថា កម្ចាត់ត្រកូល ហ៊ុន បានសេចក្ដីថា កាន់តែធ្វើឱ្យខ្ញុំប្ដេជ្ញាចិត្តទាល់តែពួកឯងងាប់សិន។ ទាល់តែមេខ្លោងរបស់វាងាប់សិន បានអញថយ និយាយគ្នាឱ្យច្បាស់។ រឿងអីមកនិយាយដល់ត្រកូល ដល់គ្រួសារទាំងមូល? ទទួលយកអត់បានទេអាហ្នឹង»។
លោក អ៊ូ ច័ន្ទរ័ត្ន អតីតតំណាងរាស្ត្រពីអតីតគណបក្សសង្គ្រោះជាតិថ្លែងថា ជាគោលការណ៍របស់គណបក្សសង្គ្រោះជាតិមិនដែលចង់កម្ទេចដៃគូបដិបក្ខទេ គឺប្រកួតដោយឈរលើមាគ៌ាប្រជាធិបតេយ្យ។ ប៉ុន្តែលើសពីនេះលោកមិនដឹងទេ។
ពាក់ព័ន្ធនឹងការសម្របសម្រួលនយោបាយក្រោយពេលអ្នកនយោបាយបាយឆ្លងផុតនីតិវិធីតុលាការ លោក ច័ន្ទរ័ត្ន ថ្លែងថា មកទល់បច្ចុប្បន្ននេះ គណបក្សប្រឆាំងគ្មានជម្រើសអ្វីផ្សេងទេ។ លោកថា រឿងរ៉ាវដែលកើតមានឡើងមកទល់បច្ចុប្បន្ននេះគឺកើតចេញពីវោហាសាស្ត្រនយោបាយ។
លោកថ្លែងថា៖ «បើមកដល់ពេលនេះលោក [ហ៊ុន សែន] យល់ថា នេះជាជម្រើស ហើយអត់មានវិធីផ្សេង អ៊ីចឹងមានតែធ្វើតាមនោះហើយឆ្លងកាត់នីតិវិធីតុលាការសិនទៅ។ ទោះយើងមិនសប្បាយចិត្តឆ្លងកាត់ប៉ុនណា តែវាគ្មានជម្រើសទេ»។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លោក គិន ភា ថ្លែងថា នៅពេលនិយាយពីការកម្ទេចត្រកូល ហ៊ុន លោក ហ៊ុន សែន ទំនងជាសំដៅដល់អតីតមន្ត្រីបក្សប្រឆាំងមួយចំនួនដែលមានចរិតនយោបាយផ្ដោតលើបុគ្គលជាជាងលើគោលនយោបាយ។
លោកបន្តថា វាជារឿងខ្វះក្រមសីលធម៌ដែលអ្នកនយោបាយយករឿងបុគ្គល និងគ្រួសារនៃអ្នកដឹកនាំជាកម្មវត្ថុនៃការវាយប្រហារ។ ការធ្វើបែបនេះនឹងមិនអាចរកឃើញចំណុចរួមសម្រាប់សាមគ្គីជាតិ និងការកសាងជាតិ។
ចំពោះការសម្របសម្រួលនយោបាយនៅក្រោយពេលអ្នកនយោបាយបានឆ្លងកាត់នីតិវិធីតុលាការ លោក គិន ភា យល់ថាលោក ហ៊ុន សែន ធ្លាប់ថ្លែងថា នឹងមិនស្នើសុំលើកលែងទោសចំពោះលោក សម រង្ស៊ី ប៉ុន្តែលោកមិនធ្លាប់បាននិយាយបែបនេះចំពោះលោក កឹម សុខា ទេ ប៉ុន្តែការចរចានយោបាយអាចមាននៅក្រោយនីតិវិធីតុលាការ។
លោកបញ្ជាក់ថា ការសម្របសម្រួលនយោបាយអាចកើតមានឡើងនៅលើទិដ្ឋភាព ៣ ដែលមិនឱ្យភាគីណាមួយបាក់មុខមាត់។ ទិដ្ឋភាពទី ១ គឺគណបក្សប្រជាជនអាចសម្របសម្រួលក្នុងរូបភាពមួយដែលមិនស្ថិតក្រោមការដាក់សម្ពាធពីខាងក្រៅ។ ទិដ្ឋភាពទី ២ គឺអន្តរជាតិដូចជាសហភាពអឺរ៉ុប ត្រូវរក្សានូវតម្លៃរបស់ខ្លួនលើបញ្ហានយោបាយនៅកម្ពុជា។
លោកបន្តថា៖ «ទិដ្ឋភាពទី ៣ គឺក្រុមអតីតបក្សប្រឆាំងប្រសិនបើមានការសម្របសម្រួលនយោបាយណាមួយមិនត្រូវដើរស្រែកយកមុខ យកពិន្ទុថា ជាជោគជ័យរបស់ខ្លួនដែលបរទេសបានដាក់សម្ពាធនាំឱ្យរដ្ឋាភិបាលសុខចិត្តសម្របសម្រួលនោះទេ។ បើនិយាយបែបនេះគឺមានបញ្ហាវិញភ្លាមតែម្ដង។ ត្រូវរក្សាឥរិយាបថមួយបង្ហាញសុឆន្ទៈក្នុងការរួមគ្នាដើម្បីប្រទេសជាតិ នោះទើបបានសុខសប្បាយយូរអង្វែង»៕