ថ្នាំវ៉ាក់សាំងប្រឆាំងកូវីដដែលទើបរក។ រូបថត សហការី
ភ្នំពេញៈ បន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសពីគម្រោងទិញវ៉ាក់សាំង ប្រឆាំងជំងឺកូវីដ ១៩ មក លោកសង្កេតឃើញថា មានចលនាគាំទ្រយ៉ាងធំធេង ទាំងតាមផ្លូវចិត្ត និងទាំងតាមរយៈការផ្តល់ថវិកាបានរហូតដល់ជាង ៣០ លានដុល្លារ ដើម្បីចូលរួមជាមួយនឹងរាជរដ្ឋាភិបាលដែលចលនាគាំទ្រពីប្រជាពលខ្មែរនេះគឺជា «ខឿនការពារសុខភាពរបស់ប្រជាជន»។
គិតត្រឹមល្ងាចថ្ងៃអង្គារម្សិលមិញថវិកាសប្បុរសជនចូលរួមទិញវ៉ាក់សាំងប្រឆាំងកូវីដបានជាង ៣០ លានដុល្លារ។
លោក ហ៊ុន សែន បានសរសេរបង្ហោះនៅលើបណ្តាញសង្គមរបស់លោកកាលពីម្សិលមិញថា៖ «នៅមានព្រះសង្ឃ និងប្រជាពលរដ្ឋជាច្រើនទៀតដែលចង់ចូលរួម ប៉ុន្ដែមិនដឹងថា ចូលនៅកន្លែងណា និងតាមរបៀបណា? ខ្ញុំព្រះករុណាខ្ញុំបានចាត់ចែងតាមច្រក ២ គឺចូលតាមរយៈលោក សេង ទៀង រដ្ឋលេខាធិការទីស្តីការគណៈរដ្ឋមន្ត្រីដែលមានលេខទូរស័ព្ទ ០១២ ៩៦១ ៩៧១ ប្រចាំការទទួលនៅទីស្តីការគណៈរដ្ឋមន្ត្រី និងតាមរយៈធនាគារ ABA លេខគណនី (001249176) Tep Sothy»។
នៅយប់ថ្ងៃទី ៧ ខែធ្នូលោក ហ៊ុន សែន បានផ្តល់ជាយោបល់ទៅដល់គណៈកម្មការប្រឆាំងកូវីដ ១៩ ទាក់ទងនឹងការផ្តល់អាទិភាពសម្រាប់អ្នកដែលមានហានិភ័យខ្ពស់ជាងគេដែលត្រូវធ្វើការផ្តល់វ៉ាក់សាំងក្នុងដំណាក់កាលដំបូង។
ក្នុងសារជាសំឡេង លោក ហ៊ុន សែន បានមានប្រសាសន៍ថា៖ «ខ្ញុំគ្រាន់តែលើកជាយោបល់ថា ក្នុង ១ លានដូស ដែលយើងគ្រោងនឹងទិញក្នុងជំហានដំបូងនេះ អ្នកដែលត្រូវបានមុនគេគឺសំដៅលើគ្រូពេទ្យ ព្រោះអ្នកទាំងនោះជាអ្នកដែលប្រឈមជាមួយនឹងគ្រោះថ្នាក់ជួរមុខតែម្តង»។
លោកបន្តថា៖ «បន្ទាប់មកយើងត្រូវផ្តល់ទៅឱ្យគ្រូបង្រៀនរបស់យើង ដែលមានប្រមាណជា ១២ ឬ ១៣ ម៉ឺននាក់ ឱ្យកម្លាំងប្រដាប់អាវុធដែលរួមមានកងទ័ពមានអាវុធហត្ថ មាននគរបាល មានមន្ត្រីពន្ធនាគារជាដើមដែលអ្នកទាំងនេះត្រូវប្រឈមជាមួយនឹងហានិភ័យខ្ពស់»។
លោកនាយករដ្ឋមន្ត្រីបានបញ្ជាក់ទៀតថា អ្នកដែលទទួលបន្ទាប់ មានមន្ត្រីយុត្តិធម៌ ដូចជាខាងព្រៃឈើ ជលផល បរិស្ថាន មន្ត្រីតុលាការមានចៅក្រម ព្រះរាជអាជ្ញា និងមេធាវីដែលពួកគាត់ទាំងអស់ត្រូវជួបមនុស្សច្រើន។ ជាការគិតត្រួសៗរបស់លោកគឺអស់ប្រហែលជា ៤០ ម៉ឺនដូស នៅសល់ប្រហែល ១០ ម៉ឺនដូសទៀត ក្រសួងនឹងសម្រេច ហើយជំហានបន្ទាប់លោកនឹងឈានទៅដំណាក់កាលទី២ ដោយមានការស្នើសុំជំនួយ ឬក៏ទិញបន្ថែម។
លោកបញ្ជាក់ថា៖ «យើងនឹងគិតបន្តទៀតថា តើត្រូវចាក់នៅតំបន់ណាមុន តំបន់ណាក្រោយដូចជាអាចសំដៅដល់និស្សិតដែលរៀននៅតាមបណ្តាមហាវិទ្យាល័យទាំងរដ្ឋ និងឯកជន ហើយអ្នកដែលរៀននៅតាមសាលាបណ្តុះបណ្តាលវិជ្ជាជីវៈ ឬឆ្ពោះទៅរកកម្មករសំណង់ ឬកម្មករដទៃទៀតនៅតាមទីក្រុងទីប្រជុំជនដែលអាចទទួលបានជាបន្តបន្ទាប់ថែមទៀតដែលយើងនឹងធ្វើការពិភាក្សាគ្នាបន្តទៀត»។
ជាមួយគ្នានេះដែរ លោកជានាយករដ្ឋមន្ត្រី ក៏បានលើកឡើងផងដែរពីការសាងសង់ឃ្លាំងសម្រាប់ស្តុកទុកវ៉ាក់សាំងដែលនៅក្នុងកន្លែងស្តុកទុកនោះអាចទុកក្នុងកម្រិតដែលមានសីតុណ្ហភាពរហូតទៅដល់ ៨០ អង្សាក្រោមសូន្យ (-៨០) ប៉ុន្តែក៏មានក្នុងកម្រិត-៤០ ឬ-៣០អង្សាដែរ ប៉ុន្តែកម្រិតអតិបរមា គឺបានទៅដល់-៨០ អង្សាឯណោះ។
លោកបន្តថា៖ «អ៊ីចឹង!កន្លែងស្តុកវ៉ាក់សាំង មិនមែនជាការពិបាកពេកទេ ជាមួយនឹងការសាងសង់ដោយសារទម្រាំតែការមានការកំណត់ការទិញ ការបញ្ជាទិញអាចល្មមស៊ីចង្វាក់គ្នានឹងការមកដល់នៃវ៉ាក់សាំងដែរ»។
គួរបញ្ជាក់ផងដែរថា លោកនាយករដ្ឋមន្ត្រីបានត្រៀមបម្រុងថវិកា ដើម្បីទិញវ៉ាក់សាំងប្រឆាំងវីរុសកូរ៉ូណា រហូតដល់ជាង ១ លានដូស ដើម្បីយកមកចាក់ជូនប្រជាពលរដ្ឋខ្មែរ ដោយឥតគិតថ្លៃក្នុងដំណាក់កាលដំបូង សម្រាប់អ្នកដែលធ្វើការនៅកន្លែងដែលមានហានិភ័យខ្ពស់។
បើតាមលោក ហ៊ុន សែន វ៉ាក់សាំង ១ លានដូសនេះចាក់បានត្រឹមតែមនុស្ស ៥០ ម៉ឺននាក់ប៉ុណ្ណោះ (ព្រោះម្នាក់ត្រូវការចាក់ ២ ដង) ក្នុងពេលដែលកម្ពុជាមានប្រជាជន ១៦ លាននាក់ទាំងចាស់ទាំងក្មេង ដែលក្នុងនោះអាចមានមនុស្សប្រមាណ ១០ លាននាក់ត្រូវការចាក់វ៉ាក់សាំង។
នៅថ្ងៃម្សិលមិញនេះដែរលោក កឹម សុខា ប្រធានអតីតគណបក្សសង្គ្រោះជាតិបានប្រកាសចូលរួមគាំទ្រដល់វិធានការនានារបស់រដ្ឋាភិបាល ដើម្បីទប់ស្កាត់ការរីករាលដាលនៃជំងឺកូវីដជាពិសេសនៅពេលថ្មីៗនេះនូវគម្រោងផែនការ ដែលដាក់ចេញមកដោយប្រមុខរាជរដ្ឋាភិបាលដែលលោកថា ជាវិធានការទាន់ពេលវេលាក្នុងការត្រៀមថវិកាសម្រាប់ទិញវ៉ាក់សាំងប្រឆាំងជំងឺកូវីដ ១៩ ដើម្បីចាក់ជូនពលរដ្ឋដោយឥតគិតថ្លៃ។
លោក កឹម សុខា បានសរសេរលើបណ្តាញសង្គមរបស់លោកថា៖ «ខ្ញុំសូមអបអរសាទរ និងកោតសរសើរក្រៃលែង ចំពោះសប្បុរសជនដែលបានចូលរួមជាថវិកា ដោយទឹកចិត្តជ្រះថ្លាជូនទៅរាជរដ្ឋាភិបាល ដើម្បីទិញវ៉ាក់សាំងការពារនឹងជំងឺកូវីដ១៩ សម្រាប់ចាក់ជូនប្រជាពលរដ្ឋខ្មែរ និងសូមលើកទឹកចិត្តប្រជាពលរដ្ឋខ្មែរទាំងក្នុង និងក្រៅប្រទេស មេត្តាចូលរួមជាថវិកាសម្រាប់ទិញវ៉ាក់សាំងនេះដោយទឹកចិត្តសប្បុរសធម៌ សាមគ្គីជាតិខ្មែរ ខ្មែរជួយខ្មែរ ក្នុងគ្រាមានអាសន្ននៃជំងឺកូវីដ ១៩ នេះ»។
ទន្ទឹមនឹងនេះដែរ លោក កឹម សុខា ក៏បានអំពាវនាវដល់សហគមន៍អន្តរជាតិប្រទេសអភិវឌ្ឍន៍មានធនធានមានមធ្យោបាយ សូមជួយផ្ដល់នូវវ៉ាក់សាំងប្រឆាំងកូវីដ១៩នេះដើម្បីចាក់ជូនដល់ពលរដ្ឋខ្មែរតាមលទ្ធភាពប្រកបដោយមនុស្សធម៌។
សប្បុរសជនដែលបានបរិច្ចាគថវិកាជួយដល់រាជរដ្ឋាភិបាលសម្រាប់ទិញវ៉ាក់សាំងមានលោក ហុង ពីវ អគ្គនាយក ក្រុមហ៊ុនបុរីពិភពថ្មី ៣ លានដុល្លារ លោក គិត ម៉េង ប្រធានក្រុមហ៊ុន រ៉ូយាល់គ្រុប ៣ លានដុល្លារ លោក ចេន ហ្ស៊ី ប្រធានក្រុមប្រឹក្សាភិបាលក្រុមហ៊ុនព្រីនស៍ហូលឌីងគ្រុប ៣ លានដុល្លារ ក្រុមហ៊ុន ជីប ម៉ុង គ្រុប ៣ លានដុល្លារ ក្រុមហ៊ុន ប៉េងហួតគ្រុប ៣ លានដុល្លារលោក ឡាវ ម៉េងឃីន ៣ លានដុល្លារ លោក លី យ៉ុងផាត់ ៣ លានដុល្លារ លោក ពុង ឃាវសែ ប្រធានក្រុមប្រឹក្សាភិបាលធនាគារកាណាឌីយ៉ា ៣ លានដុល្លារ លោក ឡេង ណាវ៉ាត្រា អគ្គនាយក ក្រុមហ៊ុនឡេងណាវ៉ាត្រា ១ លានដុល្លារ លោក ហេង សិទ្ធី ប្រធានក្រុមហ៊ុន ម៉ារីថាមគ្រុប ១ លានដុល្លារ លោក សុខ គង់ ប្រធានក្រុមប្រឹក្សាភិបាល ក្រុមហ៊ុនសូគីម៉ិច អ៊ិនវេសមេនគ្រុប ១ លានដុល្លារ រួមនឹងរដ្ឋមន្ត្រី និងមន្ត្រីរាជការជាច្រើនរូបទៀត។
អ្នកដែលបានចូលរួមបរិច្ចាគថវិកាជូនរាជរដ្ឋាភិបាលដើម្បីទិញវ៉ាងសាំងប្រឆាំងកូវីដ ដែលគិតត្រឹមល្ងាចថ្ងៃអង្គារម្សិលមិញបានទឹកប្រាក់ជាង ៣០ លានដុល្លារនោះគឺធ្វើឡើង ដោយមិនមានការអំពាវនាវពីប្រមុខរាជរដ្ឋាភិបាលឡើយ។
លោក គិត ម៉េង ថ្លែងថា លោក និងក្រុមគ្រួសារមានកិត្តិយសដែលបានចូលរួមចំណែកបរិច្ចាគថវិកាដើម្បីទិញវ៉ាក់សាំងកូវីដ ១៩ ជួយជីវិតប្រជាពលរដ្ឋខ្មែរ ដែលកំពុងជួបការលំបាកខ្លាំង។ លោកបន្តថា៖ «យើងសង្ឃឹមថា ការបរិច្ចាគទឹកប្រាក់ ៣ លានដុល្លារ សម្រាប់ការទិញវ៉ាក់សាំងកូវីដ១៩នេះនឹងជួយបានច្រើនដល់ប្រជាជនកម្ពុជាយើង»៕
វីដេអូ៖
.jpg)
