.jpg)
លោកនាយករដ្ឋមន្ត្រី ហ៊ុន សែន នៅក្នុងពិធីបើកការដ្ឋានសាងសង់ គម្រោងការពារទឹកជំនន់ និងកែលម្អប្រព័ន្ធប្រឡាយ ក្នុងរាជធានីភ្នំពេញកាលពីម្សិលមិញ។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន ថ្លែងថា ទ្វារដែលបើកចំហសម្រាប់នីតិសម្បទានយោបាយ អាចបិទមុនឬក្រោយចូលឆ្នាំខ្មែរ ហើយគ្មានការសម្របសម្រួលនយោបាយណាមួយសម្រាប់មន្ត្រីដែលត្រូវបានតុលាការហាមឃាត់មិនឲ្យធ្វើនយោបាយឡើយ។
លោក ហ៊ុន សែន បានថ្លែងក្នុងពិធីបើកការដ្ឋានសាងសង់សំណង់គម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញជំហានទី៤ កាលពីម្សិលមិញថា៖ «តែទ្វារដែលបានបើកហើយ វាក៏អាចបិទទៅវិញដែរ។ បើអ្នកព្រងើយកន្តើយ ហើយចង់ទាមទារនេះ ទាមទារនោះ លក្ខខណ្ឌនេះ លក្ខខណ្ឌនោះ អ្នកក៏ត្រូវដឹងថា រង់ចាំដល់ខែវិច្ឆិកា ឆ្នាំ ២០២២ ទើបទទួលបាន។ អ្នកត្រូវចាំ! កុំរង់ចាំអ្វីទាំងអស់។ ត្រូវចាំ។ ប្រទេសនេះ គឺកំពុងស្ថិតក្នុងស្ថានភាពជាប្រទេសឯករាជ្យ អធិបតេយ្យ ប្រទេសមានប្រជាធិបតេយ្យ និងនីតិរដ្ឋ»។
ដោយសំដៅលើលោក កឹម សុខា លោកនាយករដ្ឋមន្ត្រីថ្លែងថា ពួកគេមិនចាំបាច់សង្ឃឹមថា នឹងមានការលើកលែងទោស ឬលើកលែងការចោទប្រកាន់ចំពោះអ្នកណានោះទៀត។ បើរង់ចាំមើលករណីលោក កឹម សុខា នោះពួកគេត្រូវរង់ចាំដល់ឆ្នាំ ២០២២ និង ២០២៣។
លោកបន្តថា៖ «ហើយកុំរង់ចាំថានឹងមានការសម្របសម្រួលនយោបាយណាមួយ នេះមិនមែនជារឿងនយោបាយទេតែជារឿងផ្លូវច្បាប់។ តុលាការត្រូវកាត់ទោសជនដែលកំពុងជាប់ដែលកំពុងតែស្ថិតនៅក្រោមការស៊ើបអង្កេតពីសំណាក់តុលាការជាបន្ត។ នៅពេលដែលគេបិទនូវការស៊ើបអង្កេត គេនឹងដំណើរការក្តី តាមអំណាចរបស់តុលាការ។ ខ្ញុំគ្រាន់តែឲ្យសារចុងក្រោយសម្រាប់អ្នក ហើយបើអ្នកព្រងើយកន្តើយ ទ្វារនឹងអាចបិទ នៅមុនចូលឆ្នាំខ្មែរឬក្រោយចូលឆ្នាំខ្មែរ ទោះបីអ្នកដាក់លិខិតសុំក៏មិនអើពើ»។
រហូតមកដល់ពេលនេះ មានតែមនុស្ស ៣ នាក់ប៉ុណ្ណោះដែលបានស្នើសុំសិទ្ធិធ្វើនយោបាយឡើងវិញ គិតចាប់ពីច្បាប់ស្តីពីគណបក្សនយោបាយ ត្រូវបានធ្វើវិសោធនកម្ម ដើម្បីបើកផ្លូវឲ្យអ្នកជាប់បម្រាម មានសិទ្ធិស្នើសុំនីតិសម្បទាឡើងវិញកាលពីខែមករា។
លោកនាយករដ្ឋមន្ត្រី បានព្រមានអ្នកជាប់បម្រាម ហើយរឹងរួសបន្តធ្វើនយោបាយទាំងខ្លួនជាប់បម្រាមថា ពួកគេអាចប្រឈមមុខជាប់ខ្នោះ។ មានអ្នកខ្លះ កំពុងរៀបចំរត់ការ ស្នើសុំសិទ្ធិធ្វើនយោបាយ ប៉ុន្តែអ្នកខ្លះកំពុងរារែក ដោយសារតែពួកគេ បានទទួលយោបល់ពីមនុស្សម្នាក់ ដែលលោកមិនបញ្ចេញឈ្មោះថាឲ្យរង់ចាំមើល ២-៣ សប្ដាហ៍ទៀត។
លោកថ្លែងថា៖ «ខ្ញុំសូមផ្ដាំអ្នក បើរង់ចាំដូច្នេះ សូមរង់ចាំរហូតដល់ខែ វិច្ឆិកា ឆ្នាំ ២០២២ គឺជាថិរវេលា នៃសាលដីកាតុលាការកំពូល។ ដូច្នេះអ្នកអត់មានឱកាសមកបង្កើតបក្សនយោបាយដើម្បីចូលរួមការបោះឆ្នោតឃុំ សង្កាត់ទេ»។
លោកថ្លែងថា អ្នកជាប់បម្រាម មានជម្រើសតែ ២ ទេ គឺស្នើសុំនីតិសម្បទានយោបាយ ឬមួយត្រូវរង់ចាំដល់ខែវិច្ឆិកា ២០២២ ដែលផុតថិរវេលាហាមឃាត់ដោយតុលាការកំពូល។ លោកបានផ្ញើសារច្បាស់ៗថា នឹងមិនមានដំណោះស្រាយតាមផ្លូវនយោបាយទេ។ «ខ្ញុំអត់ត្រូវការចរចានយោបាយអីទាំងអស់។ ខ្ញុំត្រូវទុកសិទ្ធិឲ្យតុលាការកាត់ក្ដី សម្រាប់អ្នកដែលត្រូវបានចាប់ខ្លួន និងកំពុងដាក់ក្រោមការត្រួតពិនិត្យរបស់តុលាការ។ នេះជាសារនយោបាយជាក់លាក់ដែល ហ៊ុន សែនមិនអាចធ្វើផ្ទុយពីនេះ»។
លោកបានបញ្ជាក់ថា មានអ្នកជាប់បម្រាមខ្លះ បានល្មើសនិងរំលោភលើសាលដីកាតុលាការកំពូលដោយបានរៀបចំការប្រជុំ នៅលើឡានក្រុង ដោយចេញដំណើរពីភ្នំពេញ ទៅភ្នំតាម៉ៅនិងនៅខេត្តកំពង់ធំនិងកំពង់ចាមព្រមទាំងនៅបឹងត្រកួន។ ទោះយ៉ាងណាលោកថា លោកមិនចាត់វិធានការទេ តែបើចាត់វិធានការវិញ សូមកុំចោទថា វាជាការ «បង្ក្រាបនយោបាយ»។
លោកនាយករដ្ឋមន្ត្រី បានរំឭកដល់អ្នកដែលរង់ចាំការដោះលែងលោក កឹម សុខា មុននឹងស្នើសុំថា ពួកគេមិនគួររង់ចាំទេ។ «បើមិនដោះមេខ្ញុំមុន ខ្ញុំមិនសុំទេ។ មុខអាហែងដូចម៉ែអញ! បើអាហែងមិនមកទេ ហី (ទៅ)។ អញកាន់តែស្រួលគ្រប់គ្រងសភាពការណ៍។ មានអី? និយាយឲ្យត្រង់ចឹងហ្មង។ ស្អីក៏មានតម្លៃខ្លាំងម្ល៉េះ? រហូតដល់យករដ្ឋមួយ ទៅនៅក្រោមបង្គាប់របស់អ្នកឯងហ៎? ក្នុងពេលដែលទោសរបស់អ្នកឯងមិនទាន់បានត្រូវកាត់ផង»។
លោកនាយករដ្ឋមន្ត្រី ហ៊ុន សែន និងឯកអគ្គរាជទូតជប៉ុន នៅក្នុងពិធីកាលពីម្សិលមិញ។ ហេង ជីវ័ន
លោកបានបង្ហើបឲ្យដឹងថា អ្នកគាំទ្រអតីតគណបក្សប្រឆាំង បានរៀបចំមនុស្ស ៥ នាក់ក្នុងមួយឃុំ ដើម្បីទៅទទួល លោក សម រង្ស៊ី។ លោកព្រមានថា៖ «អស់លោកធ្វើទៀតទៅ បន្តិចទៀត បានជាប់ខ្នោះហើយ»។
លោកស្រី ម៉េង សុភារី មេធាវីម្នាក់ ក្នុងចំណោម ៤ នាក់ដែលការពារក្តីលោក កឹម សុខា បានថ្លែងថា កូនក្តីលោកស្រីមិនអាចស្នើសុំនីតិសម្បទានយោបាយបានទេ ដោយសារតែលោកកំពុងជាប់បម្រាមនយោបាយមួយទៀត ពីចៅក្រមស៊ើបសួរ។
លោកស្រីថ្លែងថា៖ «គាត់អាចគិតមួយជំហានទៀតបាន បើសិនជាគាត់មិនជាប់បម្រាមរបស់ចៅក្រមស៊ើបសួរ ទើបគាត់អាចទៅសុំនីតិសម្បទាបាន»។
លោកស្រីបញ្ជាក់ថា បម្រាមនេះ គឺជាឆន្ទានុសិទ្ធិរបស់ចៅក្រមស៊ើប។លោកស្រី មូរ សុខហួរ អនុប្រធានអតីតគណបក្សសង្គ្រោះជាតិ បានថ្លែងកាលពីថ្ងៃចន្ទថា លោកស្រីនឹងមិនស្នើសុំនីតិសម្បទានយោបាយទេ ព្រោះការស្នើសុំបញ្ជាក់ថា ជាការទទួលស្គាល់ថាអតីតគណបក្សសង្គ្រោះជាតិបានប្រព្រឹត្តខុស។
លោកស្រីថ្លែងយ៉ាងខ្លីថា៖ «យើងនឹងបន្តការពារសិទ្ធិរបស់យើងរួមទាំងសិទ្ធិនយោបាយ»។
លោក អ៊ូ ច័ន្ទរ័ត្ន អតីតអ្នកតំណាងរាស្ត្រខេត្តតាកែវ នៃអតីតគណបក្សសង្គ្រោះជាតិ បានថ្លែងកាលពីម្សិលមិញថា លោកនិងមន្ត្រីបក្សប្រឆាំងស្ថិតក្នុងសម្ពាធពីមេដឹកនាំគណបក្សប្រឆាំង និងពីគណបក្សកាន់អំណាច។ លោកថា លោក សម រង្ស៊ី បានព្រមានរួចហើយថា អ្នកដែលស្នើសុំ គឺជាអ្នកក្បត់បក្ស ក្បត់ប្រជារាស្ត្រ និងអាចក្បត់ជាតិ។
លោកថ្លែងថា៖ «នៅពេលយើងនៅក្រោមសម្ពាធពីមេដឹកនាំបក្សប្រឆាំង និងពីបក្សកាន់អំណាច យើងស្ថិតក្នុងស្ថានភាពពិបាកដកដង្ហើម»។
ជាមួយគ្នានេះ លោកបានថ្លែងការពារលោក កឹម សុខា ថា ការចោទប្រកាន់រឿងក្បត់ជាតិ គឺជាការចោទប្រកាន់គ្មានភ័ស្តុតាង។
លោក ឡៅ ម៉ុងហៃ អ្នកវិភាគនយោបាយ បានថ្លែងថា ការកំណត់កាលកំណត់ដោយលោក ហ៊ុន សែន ធ្លាប់កើតមានហើយកាលពីកន្លងទៅ ដូចជានៅពេលដែលលោកបានពន្យារពេល សម្រាប់អតីតក្រុមប្រឹក្សាឃុំសង្កាត់ មន្ត្រីអតីតបក្សប្រឆាំងឲ្យចូលជាមួយបក្សកាន់អំណាច ពេលរំលាយគណបក្សសង្គ្រោះជាតិហើយឥឡូវលោក ហ៊ុន សែន បានគំរាមដាក់កាលកំណាត់ម្ដងទៀត សម្រាប់ការស្នើសុំនីតិសម្បទានយោបាយ។
លោកថ្លែងថា៖ «យ៉ាងណាក៏ដោយ វាជារឿងមិនស្របច្បាប់ ដែលទៅរារាំងការស្នើសុំការធ្វើនីតិសម្បទានយោបាយ ពីព្រោះវាជាការផ្ដល់អំណាចដោយច្បាប់ មិនមែនជាការអនុគ្រោះទេ»។
លោក សុខ ទូច ប្រធានរាជបណ្ឌិត្យសភាកម្ពុជា បានថ្លែងថា ការកំណត់ពេលវេលាបែបនេះ គឺគ្រាន់តែជាវិធីមួយរបស់លោក ហ៊ុន សែន ក្នុងការបន្លាចដល់អ្នកដែលមានការរារែក មិនហ៊ានបន្តទៅមុខ ក្នុងការទទួលបានសិទ្ធិធ្វើនយោបាយឡើងវិញ ដើម្បីចូលរួមក្នុងការប្រកួតប្រជែងនយោបាយ។
លោកបន្តថា អ្នកជាប់បម្រាមគួរតែស្នើសុំនីតិសម្បទានយោបាយ ហើយបង្កើតបក្សថ្មី ដើម្បីចូលប្រកួតប្រជែងព្រោះថា គណបក្សនយោបាយ CNRP មិនសំខាន់លើឈ្មោះទេ ប៉ុន្តែសំខាន់លើមនុស្ស។
លោកបញ្ជាក់ថា៖ «បើគេនៅតែគាំទ្រអ្នកមិនថាអ្នកមានបក្សនយោបាយ ក, ខ, គ, ឃ, អីទេ អ្វីដែលសំខាន់គឺមនុស្ស។ CNRP គ្រាន់តែជាឈ្មោះបក្សនយោបាយប៉ុណ្ណោះ។ ដូច្នេះ ពួកគេគួរពិចារណាចំណុចនេះ»៕
