.jpg)
លោកនាយករដ្ឋមន្ត្រី ហ៊ុន សែន ថតសែលហ្វ៊ី ជាមួយកម្មការិនី កាលពីថ្ងៃម្សិលមិញ។ ហ្វេសប៊ុក SPM
កណ្ដាលៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីម្សិលមិញបានអះអាងថា នាយករដ្ឋមន្ត្រីរូបនេះមិនងាយស្លាប់នោះទេ ហើយថែមទាំងផ្ញើសារបែបចំអកឡកឡាយដល់គូភាគីប្រឆាំង កុំរង់ចាំលោកស្លាប់ ដើម្បីបង្កើតឲ្យមានចលនាតស៊ូគ្រប់គ្រងអំណាច ហើយប្រាប់កម្មករកុំឲ្យបារម្ភរឿង EBA។
លោកបានថ្លែងក្នុងពិធីជួបសំណេះសំណាលជាមួយកម្មករកម្មការិនីជាង ១ ម៉ឺននាក់នៅស្រុកអង្គស្នួលខេត្តកណ្ដាល កាលពីម្សិលមិញ ដោយថ្លែងថា៖ «អ្នកខ្លះថា លោក ហ៊ុន សែន ឈឺ រង់ចាំលោក ហ៊ុន សែន ងាប់។ ណែ អា នយោបាយរង់ចាំ ហ៊ុន សែន ងាប់ ចាំជាតិក្រោយចុះអូន។ អានេះមិនងាយងាប់ទេ ហើយការប៉ុនប៉ងផ្ដួលរំលំ ហ៊ុន សែន ដោយហិង្សាមិនអាចទៅរួចទេ»។
លោក ហ៊ុន សែន ថ្លែងថា៖ «ធ្វើនយោបាយបន់ឲ្យគេងាប់? អ៊ីចឹងវាជាតិរច្ឆានសុទ្ធហើយ។ អ៊ីចឹងបើរង់ចាំ ហ៊ុន សែន ងាប់ ដើម្បីបង្កើតឲ្យមានចលនាតស៊ូគ្រប់គ្រងអំណាច រង់ចាំជាតិក្រោយទៅ ។ ហ៊ុន សែន មិនងាយងាប់ទេ ហើយពូជ ហ៊ុន សែន គ្មានអ្នកណាមួយមានជំងឺខួរក្បាលទេតាំងពីជីដូនជីតា ឪពុកម្ដាយអត់មានអ្នកណាមានជំងឺអ្វីដែលគួរឲ្យតក់ស្លុតទេ»។
លោក ហ៊ុន សែន អះអាងថា អ្នកផ្សេងមិនអាចដឹងថា តើនាយករដ្ឋមន្ត្រីរូបនេះកំពុងគិតពីអ្វីទេ ហើយមិនដឹងថា ងាកទៅឆ្វេង ឬទៅស្ដាំ។ ហេតុដូច្នេះហើយបានជាភាគីគូនយោបាយប្រឆាំង មិនដែលឈ្នះការប្រកួតជាមួយនៅក្នុងការបោះឆ្នោត។
លោក ហ៊ុន សែន ថ្លែងថា៖ «ប៉ុន្តែងាកឆ្វេងឬងាកស្ដាំ ប្រទេសនេះមិនដែលក្រឡាប់ចាក់ដោយសារការងាកឆ្វេង ឬងាកស្ដាំ ទៅមុខ ទៅក្រោយរបស់ ហ៊ុន សែន ទេ។ មិនដែលទេ មានតែដំណើរទៅមុខបន្ដិចម្ដងៗ»។
លោកបានរំឭកថា កាលពីក្រោយសង្គ្រាម មានការធានាលោកឲ្យទៅរស់នៅប្រទេសទី៣ រួមមាន កាណាដា បារាំង និងអូស្ត្រាលី ប៉ុន្តែលោកមិនបានរត់ចោលប្រជាជន កម្ពុជា ទេ ហើយសុខចិត្តនៅខាំស្មៅជាមួយប្រជាជនកម្ពុជា។
ទោះយ៉ាងណាក៏ដោយលោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានមើលឃើញថា ការលើកឡើងរបស់លោកនាយករដ្ឋមន្ត្រីអំពីការបន់ឲ្យលោកស្លាប់នោះ គឺលោក ហ៊ុន សែន ចង់សំដៅទៅលើថ្នាក់ដឹកនាំនៃអតីតគណបក្សសង្គ្រោះជាតិ ដែលមានអ្នកខ្លះតែងតែបង្ហោះសារ នៅលើហ្វេសប៊ុក ឬយូធូប មានលក្ខណៈប្រមាថដល់លោកនាយករដ្ឋមន្ត្រី។
លោក សម រង្ស៊ី ប្រធានអតីតគណបក្សសង្គ្រោះជាតិ។ ហុង មិនា
លោក គិន ភា ថ្លែងថា៖ «(ការបន់ឲ្យលោក ហ៊ុន សែន ស្លាប់) ពួកគាត់ (ក្រុមបក្សប្រឆាំង) ធ្លាប់បានអំពាវនាវឲ្យកងកម្លាំងប្រដាប់អាវុធឈប់ស្ថិតក្រោមការគ្រប់គ្រងរបស់រដ្ឋាភិបាល ហើយបែរកាណុងទៅប្រឆាំងនឹងរដ្ឋាភិបាលវិញ។ មានន័យថា ពួកគាត់ចង់បង្វែរការតស៊ូដោយការតស៊ូមតិ ទៅជាការតស៊ូដោយចុងកាណុង»។
លោក គិន ភា អះអាងថា កត្តាសុខភាព ជាកត្តាដែលអ្នកនយោបាយតែងអួតដាក់គ្នា រឿងជាក់ស្ដែងគ្មានអ្នកណាមើលឃើញសេចក្តីស្លាប់ដោយកត្តាសុខភាពទេ។
លោក ភា ថ្លែងថា៖ «ប៉ុន្តែកត្តាប្រដាប់អាវុធវិញ មិនអាចទៅរួចទេព្រោះកងកម្លាំងប្រដាប់អាវុធមានស្វាមីភក្ដិជាមួយលោក ហ៊ុន សែន រក្សាសន្តិភាព និងសមិទ្ធផលដែលបានសម្រេចឡើងក្រោមការដឹកនាំរបស់លោក ហ៊ុន សែន។ ការអំពាវនាវឲ្យកងទ័ពឈប់ស្ដាប់បង្គាប់វាជារឿងឥតប្រយោជន៍» ។
លោក ឡៅ ម៉ុងហៃ អ្នកវិភាគនយោបាយយល់ថាតាមប្រវត្តិសាស្ត្ររបស់ប្រទេសកម្ពុជា ការប្រកួតប្រជែងដោយសន្តិវិធីមិនដែលឈានដល់ការផ្លាស់ប្ដូរមេដឹកនាំទេ។
លោកថា លោកនាយករដ្ឋមន្ត្រី មិនចង់មានគូប្រកួតដែលខ្លាំងទេ។ «តាមរយៈកាត់ក្បាល និងរំលាយគណបក្សប្រឆាំង នាយករដ្ឋមន្ត្រីរបស់យើងមិនអាចអត់ធ្មត់ចំពោះគូប្រកួតដែលខ្លាំងណា ១ ទេ»។
លោក ហ៊ុន សែន ក៏បាននិយាយពាក់ព័ន្ធនឹងរឿង EBA ដែរដោយលោកបានអរគុណដល់ពលរដ្ឋកម្ពុជាដែលមិនមានការតក់ស្លុត ចំពោះអ្វីដែលជាសង្គ្រាមចិត្តសាស្ត្រ។
លោកថ្លែងថា៖ «រឿងទៅមុខ ក្មួយចាំមើលទៅ ពូបានបញ្ជាក់ថ្ងៃមុនហើយ ដរាបណាក្មួយៗមានការងារធ្វើនិងប្រាក់ចំណូល ក្មួយកុំខ្វល់ថាអ្នកណានិយាយពីអ្វីពូមានការលើកទឹកចិត្តណាស់ មិនបានឃើញប្រជាពលរដ្ឋរបស់យើងមានការតក់ស្លុតជាមួយនឹងអ្វីដែលជាការបំផុសសង្គ្រាមចិត្តសាស្ត្រទេ»។
ជាការបញ្ឈឺដល់លោក សម រង្ស៊ី លោក ហ៊ុន សែន បានស្នើឲ្យមានការចាក់ចម្រៀងមួយបទដែលលោកទើបតែងថ្មីៗ គឺបទ «ទទាយំឆ្លង» សម្រាប់ការរាំកម្សាន្តនានានៅឆ្នាំ ២០១៩ នេះ៕
