.jpg)
ពលរដ្ឋខ្មែរវិលត្រឡប់មកពីប្រទេសម៉ាឡេស៊ីកាលពីពេលកន្លងមក។ រូបថត ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន ថ្លែងថាពលរដ្ឋខ្មែរជាង ២០០ នាក់ នៅប្រទេស ម៉ាឡេស៊ី នឹងបានវិលត្រឡប់មកកម្ពុជាវិញក្នុងពេលឆាប់ៗ ខណៈកម្ពុជាកំពុងចរចាជាមួយម៉ាឡេស៊ី ដើម្បីនាំយកពួកគេមកវិញ បន្ទាប់ពីការតម្រូវឲ្យធ្វើតេស្ត ដើម្បីបញ្ជាក់ឲ្យច្បាស់ថា ពលរដ្ឋទាំងនោះគ្មានជំងឺកូវីដ ១៩។
លោកនាយករដ្ឋមន្ត្រីបានសរសេរបង្ហោះនៅលើហ្វេសប៊ុករបស់លោកកាលពីម្សិលមិញថា គិតត្រឹមថ្ងៃចន្ទ កម្ពុជា និងពិភពលោកកំពុងសកម្មនាំគ្នាប្រយុទ្ធប្រឆាំងនឹងជំងឺឆ្លងកូវីដ១៩ ហើយមកទល់ពេលនេះពិភពលោកក៏មិនទាន់រកឃើញថ្នាំព្យាបាលជំងឺកូវីដ ១៩ ដ៏កាចសាហាវនេះនៅឡើយទេ។
លោកថ្លែងថា៖ «រាជរដ្ឋាភិបាលកម្ពុជាសូមអរគុណកូនក្មួយពលករជាង ២០០ នាក់ ដែលក្នុងនោះក៏មានកូនក្មួយអ្នកទោសចំនួន ៧៣ នាក់ផងដែរ ដែលត្រូវបានផ្អាកការធ្វើដំណើរវិលត្រឡប់មកកម្ពុជាកាលពីពេលថ្មីៗក្នុងពេលដែលដែលប្រទេសយើងកំពុងដាក់បម្រាមតឹងរ៉ឹងក្នុងការធ្វើដំណើរ»។
លោក ហ៊ុន សែន បន្តថាប៉ុន្តែនៅពេលនេះបម្រាមការធ្វើដំណើរក្នុងប្រទេសក៏បានលើក ដូច្នេះរាជរដ្ឋាភិបាលកម្ពុជាបានសម្រេចឲ្យកូនក្មួយពលករខ្មែរជាង ២០០ នាក់អាចវិលត្រឡប់មកកាន់មាតុប្រទេសវិញ។ ប៉ុន្តែត្រូវទុកពេលវេលាឲ្យខាងអាជ្ញាធរម៉ាឡេស៊ី គេធ្វើតេស្តសុខភាពសិន ដើម្បីបញ្ជាក់ថា កូនក្មួយគ្មានសញ្ញាវិជ្ជមាននៃជំងឺកូវីដ១៩។
លោកនាយករដ្ឋមន្ត្រីបញ្ជាក់ថា៖ «យើងទាំងអស់គ្នាទាំងអ្នកនៅក្នុងប្រទេស និងក្រៅប្រទេសគឺត្រូវមានការប្រុងប្រយ័ត្នជានិច្ច កុំនាំរោគឆ្លងពីក្រៅចូលក្នុង និងពីម្នាក់ទៅម្នាក់ ព្រោះជំងឺកូវីដ ១៩ នេះគឺងាយឆ្លងខ្លាំងណាស់»។
លោក ហ៊ុន សែន បានផ្តាំទៅពលរដ្ឋខ្មែរទាំងនោះកុំឲ្យមានការព្រួយបារម្ភ ដោយថ្លែងថា «ប្រសិនបើកូនក្មួយគ្មានជំងឺឆ្លងកូវីដ ១៩ ទេ គឺកូនក្មួយអាចវិលត្រឡប់មកកម្ពុជាវិញបានក្នុងពេលឆាប់ៗនេះ។ ផ្ទុយពីនេះបើខាងម៉ាឡេស៊ីពិនិត្យឃើញមានកូវីដ១៩ ទៅលើកូនក្មួយណាគឺត្រូវនៅសម្រាកព្យាបាលនៅទីនោះសិនរហូតដល់ជាសះស្បើយទើបអនុញ្ញាតឱ្យត្រឡប់មកកម្ពុជាវិញ»។
លោកបញ្ជាក់ទៀតថា៖ «ចំពោះកូនក្មួយដែលនឹងមកដល់កម្ពុជាវិញ គឺត្រូវធ្វើចត្តាឡីស័ក ១៤ ថ្ងៃ (រស់នៅដាច់ដោយឡែក) សិន ដើម្បីតាមដានសុខភាពជាបន្ត ហើយក៏មានការធ្វើចត្តាឡីស័ក ១៤ ថ្ងៃទៀតនៅតាមផ្ទះផងដែរ។
ជាមួយគ្នានេះលោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងក្នុងសន្និសីទសារព័ត៌មានពីម្សិលមិញថា គណៈកម្មការអន្តរក្រសួងដែលមានក្រសួងសុខាភិបាលផងនោះបានពិភាក្សាគ្នា ជុំវិញការនាំយកពលរដ្ឋកម្ពុជានៅម៉ាឡេស៊ីមកវិញហើយគោលការណ៍នេះក៏បានឯកភាពពីប្រមុខរដ្ឋាភិបាលផងដែរ។
លោកបន្តថា៖ «ជាការងារមួយដែលរាជរដ្ឋាភិបាលបានយកចិត្តទុកដាក់បំផុតលើប្រជាពលរដ្ឋរបស់យើងដែលនៅម៉ាឡេស៊ីនេះ។ ២ ថ្ងៃមុន ក្រសួងបានសុំគោលការណ៍ពីប្រមុខរដ្ឋាភិបាលកម្ពុជារួចហើយ ដោយតម្រូវឲ្យក្រសួងការបរទេសដាក់លិខិតផ្លូវការទៅប្រទេសម៉ាឡេស៊ី ដើម្បីសុំឲ្យអ្នកជាប់ទោស ៧៣ នាក់ និងកម្មករនេសាទ ១៤៩ នាក់បានវិលត្រឡប់មកកម្ពុជាវិញ»។
លោករដ្ឋមន្ត្រីបញ្ជាក់ថា៖ «លក្ខខណ្ឌសំខាន់បំផុតគឺថាសុំឲ្យភាគីម៉ាឡេស៊ី ធ្វើម៉េចធ្វើតេស្តរកកូវីដ១៩ លើអ្នកទាំងនោះ។ បើការធ្វើតេស្តរកឃើញមិនមានមេរោគកូវីដ-១៩ទេអាចឲ្យគាត់ត្រឡប់មកវិញ។ តែបើអ្នកមានមេរោគកូវីដត្រូវតែសម្រាកព្យាបាលនៅទីនោះឲ្យជា»។
លោក កុយ គួង អ្នកនាំពាក្យក្រសួងការបរទេសប្រាប់ភ្នំពេញប៉ុស្តិ៍ពីម្សិលមិញថា ស្ថានទូតកម្ពុជាប្រចាំប្រទេសម៉ាឡេស៊ីកំពុងធ្វើការជាមួយមន្ត្រីពាក់ព័ន្ធនៃប្រទេសនេះជុំវិញការរៀបចំបែបបទ ដើម្បីនាំយកពលរដ្ឋខ្មែរដែលមានបំណងចង់វិលត្រឡប់មកវិញ។ «ពេលវេលាដែលពលរដ្ឋយើងចង់មកនៅពេលណានោះ វាអាស្រ័យទៅនឹងការពិនិត្យសុខភាព ឬធ្វើតេស្តរួចរាល់ ហើយមានការកំណត់ពេលជាក់លាក់រវាងស្ថានទូតនៃប្រទេសទាំង ២»៕
វីដេអូ៖
