ភ្នំពេញៈ លោកនាយករដ្ឋមន្ដ្រី ហ៊ុន សែន បានថ្លែងនៅក្នុងថ្ងៃបុណ្យមាឃបូជាថា ព្រះពុទ្ធសាសនា មិនត្រឹមតែធ្វើឲ្យប្រជាពលរដ្ឋបានរួមរស់ជាមួយគ្នាដោយសុខសាន្ដក្នុងផ្លូវស្មារតីប៉ុណ្ណោះទេ ប៉ុន្ដែបានរួមចំណែកយ៉ាងសំខាន់ ក្នុងការពង្រឹងសណ្ដាប់ធ្នាប់ សន្ដិភាព ស្ថិរភាព និងបានរក្សាការពារអត្តសញ្ញាណជាតិ ខណៈមានព្រះសង្ឃនិងប្រជាពលរដ្ឋរាប់ម៉ឺនអង្គនាក់ចូលរួមពិធីបុណ្យនេះនៅភ្នំព្រះរាជទ្រព្យ។
បើតាម លោក ហ៊ុន សែន បុណ្យ មាឃបូជា ដែលបានធ្វើឡើងកាលពីម្សិលមិញ គឺជាពិធីបុណ្យមួយដ៏មានសារៈសំខាន់បំផុត នៅក្នុងព្រះពុទ្ធសាសនា ដែលជាសាសនារបស់រដ្ឋ។
លោកនាយករដ្ឋមន្ដ្រី បានសរសេរលើហ្វេសប៊ុករបស់លោកថា៖ «ព្រះពុទ្ធសាសនា មិនត្រឹមតែបានធ្វើឲ្យបងប្អូនប្រជាពលរដ្ឋយើង បានរួមរស់ជាមួយគ្នាដោយសុខសាន្តខាងផ្លូវស្មារតីប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ នៅក្នុងការពង្រឹងសណ្ដាប់ធ្នាប់ សុខសន្តិភាព ស្ថិរភាពសង្គម ការអភិវឌ្ឍលើគ្រប់វិស័យនិងថែរក្សាការពារអត្តសញ្ញាណជាតិទៀតផង»។
លោកបានរំឭកថា ពិធីបុណ្យមាឃបូជា គឺប្រារព្ធធ្វើឡើង ដើម្បីរំឭកដល់ថៃ្ងដែលព្រះសម្មាសម្ពុទ្ធទ្រង់ប្រកាសបង្កើត «ព្រះពុទ្ធសាសនា» ឡើងនៅឆ្នាំ ៥៨៨ មុនគ្រិស្តសករាជ នាថៃ្ងទី ១៥ កើត ខែមាឃ ក្រោយពីការត្រាស់ដឹងរបស់ព្រះអង្គចំនួន ៩ ខែគត់។
កាលពីម្សិលមិញ នៅភ្នំព្រះរាជទ្រព្យ ក្នុងស្រុកពញាឮ ខេត្តកណ្តាល ជាទីកន្លែងតម្កល់ព្រះសារីរឹកធាតុ គេឃើញមានព្រះសង្ឃ ប្រជាពលរដ្ឋ រាប់ម៉ឺន អង្គនាក់ បានចូលរួមពិធីបុណ្យនេះ។ លោកហេង សំរិន ប្រធានរដ្ឋសភា គណៈសង្ឃនាយក នាយករង មន្ត្រីសង្ឃ មន្ត្រីរាជការយ៉ាងច្រើនកុះករ និងឯកអគ្គរដ្ឋទូតជប៉ុនប្រចាំកម្ពុជា ក៏មានវត្តមានក្នុងពិធីបុណ្យមាឃបូជា ដែលធ្វើឡើងនៅទីលានឧបដ្ឋានសាលាខាងកើតព្រះមហាសក្យមុនីចេតិយនៅភ្នំព្រះរាជទ្រព្យផងដែរ ដោយមានពិធីរាប់បាត្រព្រះសង្ឃចំនួន ៣០០ អង្គ។
បើតាមលោក ខឹម សាម៉ុន អធិការស្រុកឧដុង្គ មានពុទ្ធបរិស័ទ និងប្រជាពលរដ្ឋរាប់ម៉ឺននាក់ បានទៅចូលរួមពិធីបុណ្យមាឃបូជា នៅភ្នំព្រះរាជទ្រព្យដោយពុំមានភាពអសន្ដិសុខណាមួយកើតឡើងទេ។
ចំណែកលោក សេង សុមុនី អ្នកនាំពាក្យក្រសួងធម្មការ និងសាសនា បានឲ្យដឹងថា បុណ្យមាឃបូជានៅភ្នំព្រះរាជទ្រព្យនេះ សរុបរួមទាំងមន្ដ្រីរាជការ ព្រះសង្ឃ ប្រជាពលរដ្ឋ និងពុទ្ធបរិស័ទ មានប្រមាណពី ៣ ម៉ឺន ទៅ ៥ ម៉ឺននាក់។ លោក សុមុនី ក៏លើកឡើងដែរថា ព្រះពុទ្ធសាសនា ពិតជាមានតម្លៃធំធេងណាស់សម្រាប់សង្គមជាតិកម្ពុជា ពិសេសទៅលើការអប់រំ ព្រះសង្ឃ និងពុទ្ធបរិស័ទទាំងឡាយ ឲ្យមានចំណេះជំនាញ បទពិសោធន៍ និងគុណធម៌ក្នុងខ្លួន។
លោកបន្ថែមថា៖ «ពុទ្ធសាសនា មានព្រះសង្ឃ និងពុទ្ធបរិស័ទទាំងអស់ បានរួមចំណែកធ្វើការងារនៅក្នុងសង្គម ដែលបានធ្វើឲ្យសង្គមមានការអភិវឌ្ឍ»។
ព្រះតេជគុណ គូ សុភាព គ្រូសូត្រស្តាំនៅវត្តគល់ទទឹង និងជាសាស្ត្រាចារ្យ បង្រៀនអំពីការអភិវឌ្ឍគុណធម៌ ចរិយាវិទ្យា ភាពជាអ្នកដឹកនាំព្រះពុទ្ធសាសនា និងចិត្តវិទ្យា នៅសាកលវិទ្យាល័យបញ្ញាសាស្ត្រមានសង្ឃដីកាថា បច្ចុប្បន្នពុទ្ធបរិស័ទ និងយុវជន មានការចាប់អារម្មណ៍ចូលរួមធ្វើបុណ្យ ក្នុងព្រះពុទ្ធសាសនានេះច្រើនជាងមុន ពិសេសបុណ្យមាឃបូជា និងវិសាខបូជា។
«គោលការអប់រំរួមរបស់ព្រះពុទ្ធសាសនា គឺប្រាប់ឲ្យយើងចៀសវាងពីអំពើអាក្រក់ទាំងពួង ដែលនាំឲ្យយើងមានបញ្ហាក្នុងគ្រួសារ និងក្នុងសង្គម ព្រោះបើមានអំពើអាក្រក់ច្រើនយើងក៏មិនបានសុខគេក៏មិនបានសុខដែរ»៕