.jpg)
មនុស្សចាស់ក្នុងពិធីបុណ្យភ្ជុំបិណ្ឌនៅសង្កាត់កោះដាច់។ ហុង មិនា
ភ្នំពេញៈ តាមរយៈសារាចរស្ដីពី «ការរៀបចំទិវាមនុស្សចាស់កម្ពុជា និងទិវាមនុស្សចាស់អន្តរជាតិថ្ងៃទី ១ ខែ តុលា ឆ្នាំ ២០១៩» លោកនាយករដ្ឋមន្ដ្រី ហ៊ុន សែន បានបញ្ជាក់ថា រាជរដ្ឋាភិបាលកំពុងយកចិត្តទុកដាក់ខ្ពស់ចំពោះមនុស្សវ័យចាស់ ខណៈអង្គការ សមាគម និងបណ្ដាញមនុស្សចាស់កម្ពុជាស្នើឲ្យមានការគាំទ្របន្ថែមលើសុខុមាលភាព និងថវិកាដល់មនុស្សចាស់។
លោកនាយករដ្ឋមន្ដ្រីតាមរយៈសារាចរខាងលើបានណែនាំដល់គ្រប់ក្រសួងស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិឲ្យប្រារព្ធទិវាមនុស្សចាស់ឲ្យបានផុសផុលទូទាំងប្រទេស។
លោកថ្លែងថា៖ «ការប្រារព្ធទិវានេះមានគោលបំណងលើកកម្ពស់កិច្ចគាំពារដ៏មានប្រសិទ្ធភាពសំដៅលើកស្ទួយសុខុមាលភាពរបស់មនុស្សវ័យចាស់ឱ្យកាន់តែប្រសើរឡើង ហើយទិវានេះក៏បង្ហាញឱ្យឃើញពីតួនាទីដ៏សំខាន់របស់មនុស្សវ័យចាស់ បុព្វការីជនដែលបានបង្កើតធនធានដ៏មានសារប្រយោជន៍ ព្រមទាំងផ្តល់នូវចំណេះដឹង ចំណេះធ្វើ និងបទពិសោធយ៉ាងច្រើនឥតគណនាសម្រាប់មនុស្សជំនាន់ក្រោយ»។
លោកបានបន្ដថាក្នុងគោលបំណងយកចិត្តទុកដាក់ខ្ពស់ចំពោះមនុស្សវ័យចាស់កម្ពុជា រាជរដ្ឋាភិបាលបានបង្កើតគណៈកម្មាធិការជាតិកម្ពុជា ដើម្បីមនុស្សចាស់ ដើម្បីអនុវត្តនូវតួនាទី និងភារកិច្ចដែលមានជាអាទិ៍រៀបចំគោលនយោបាយ ដើម្បីលើកស្ទួយសុខុមាលភាពរបស់មនុស្សវ័យចាស់ និងរៀបចំទិវាមនុស្សចាស់នៃព្រះរាជាណាចក្រកម្ពុជាដោយកំណត់យកថ្ងៃទី ១ ខែតុលា ជារៀងរាល់ឆ្នាំរួមជាមួយទិវាមនុស្សចាស់អន្តរជាតិ។
លោកនាយករដ្ឋមន្ដ្រីបញ្ជាក់ថា៖ «រាជរដ្ឋាភិបាលចាត់ទុកទិវាមនុស្សចាស់កម្ពុជា និងទិវាមនុស្សចាស់អន្តរជាតិជាទិវាបុណ្យរំឭកដល់គុណូបការៈរបស់មនុស្សវ័យចាស់កម្ពុជា បុព្វការីជន ជីដូនជីតា ឪពុកម្តាយ អ៊ំ ពូ មីង ដែលបានកសាង និងបន្សល់ទុកនូវកេរមរតកដ៏ថ្លៃថ្លាសម្រាប់កូនចៅជំនាន់នេះ និងជំនាន់ក្រោយៗទៀត»។
លោក តូច ចាន់នី អ្នកនាំពាក្យក្រសួងសង្គមកិច្ចអតីតយុទ្ធជន និងយុវនីតិសម្បទាថ្លែងថា រាជរដ្ឋាភិបាលក៏ដូចជាក្រសួងសង្គមកិច្ចកំពុងតែផ្សព្វផ្សាយផែនការយុទ្ធសាស្ដ្រជាតិសម្រាប់មនុស្សវ័យចាស់ ២០១៧-២០២៣ ដើម្បីចូលរួមលើកកម្ពស់សុខុមាលភាពមនុស្សវ័យចាស់។
លោកថ្លែងថា៖ «ផែនការនេះគឺជាផែនការសំខាន់ក្នុងការលើកកម្ពស់សុខុមាលភាព និងជួយដល់មនុស្សវ័យចាស់គ្រប់បែបយ៉ាងតាមរយៈផែនការនេះ ហើយបច្ចុប្បន្ននេះយើងកំពុងបន្តអនុវត្ដនូវផែនការគាំពារដល់មនុស្សវ័យចាស់នេះ។ ក្រសួងក៏កំពុងស្វែងរកការគាំទ្របន្ថែមពីដៃគូផ្សេងទៀតក្នុងការជួយគាំទ្រអនុវត្ដផែនការនេះផងដែរ ព្រោះផែនការនេះត្រូវការចំណាយធនធានច្រើនណាស់»។
លោកថា៖ «យើងកំពុងគិតចំពោះការផ្ដល់ការឧបត្ថម្ភ គាំទ្រចំពោះមនុស្សវ័យចាស់លើសុខុមាលភាពរបស់ពួកគាត់បន្ថែមទៀត»។
បើតាមលោក ចាន់នី តាមស្ថិតិពីក្រសួងផែនការក្នុងឆ្នាំ ២០១៨ កម្ពុជាមានមនុស្សចាស់ប្រមាណ ១ លាន ៣ សែននាក់ស្មើនឹង ៨,៣ ភាគរយនៃចំនួនប្រជាជនសរុបដែលចំនួននេះត្រូវបានព្យាករថានឹងកើនឡើងដល់ ១១ ភាគរយនៅឆ្នាំ ២០៣០។
តាមរយៈទិវាមនុស្សចាស់កម្ពុជា និងអន្តរជាតិឆ្នាំនេះ អង្គការមនុស្សចាស់កម្ពុជា សមាគម និងបណ្ដាញសមាគមមនុស្សចាស់កម្ពុជាចំនួន ១៨ បានដាក់លិខិតអំពាវនាវដល់រាជរដ្ឋាភិបាលឲ្យមានការឧបត្ថម្ភការគាំទ្របន្ថែមដល់មនុស្សវ័យចាស់លើផ្នែកសុខុមាលភាព និងហិរញ្ញវត្ថុ។
លិខិតបានបង្ហាញពីការសិក្សាស្រាវជ្រាវស្តីពី «តម្រូវការ និងបញ្ហាប្រឈមរបស់មនុស្សវ័យចាស់» របស់អង្គការមនុស្សចាស់តាមបណ្ដាខេត្តចំនួន ៥ នៅក្នុងខេត្តបាត់ដំបង បន្ទាយមានជ័យ សៀមរាប ពោធិ៍សាត់ និងខេត្តកំពង់ធំកាលពីចុងឆ្នាំ ២០១៨ កន្លងទៅដោយសហការជាមួយវិទ្យាស្ថានជាតិសង្គមកិច្ច និងក្រសួងស្ថាប័នពាក់ព័ន្ធមួយចំនួនរកឃើញថា មនុស្សចាស់ ជាពិសេសក្រុមមនុស្សចាស់ស្ត្រីនិងមនុស្សចាស់ដែលមានពិការភាពនៅតែមានបញ្ហាប្រឈមជាច្រើនទាក់ទងនឹងផ្នែកសុខភាព និងផ្នែកសន្តិសុខហិរញ្ញវត្ថុ។
លោក វ៉ន ប៊ុនរ៉េត ប្រធានផ្នែកទំនាក់ទំនង និងស្វែងរកការគាំទ្រនៃអង្គការមនុស្សចាស់កម្ពុជាថ្លែងថា អង្គការលោក និងសមាជិកប្រមាណជិត ១ ម៉ឺន ៦ ពាន់នាក់ពីខេត្ត-ក្រុងចំនួន ៥ ខាងលើនឹងរៀបចំទិវាមនុស្សចាស់ជាតិ ១ តុលាតាមបណ្ដាខេត្ដទាំងនោះ។ លោកថា៖ «ទិវានេះពិតជាមានសារៈសំខាន់ណាស់ដែលរាជរដ្ឋាភិបាលជាអ្នកផ្តួចផ្ដើមក្នុងការដឹកនាំរៀបចំឲ្យបានផុសផុលទាំងនៅថ្នាក់ជាតិ និងថ្នាក់ក្រោមជាតិដើម្បីគាំទ្រដល់មនុស្សវ័យចាស់នៅកម្ពុជា»៕
