ភ្នំពេញៈ លោកនាយករដ្ឋមន្ត្រី ហ៊ុន សែន បានថ្លែងថា រាជរដ្ឋាភិបាលកម្ពុជា គឺផ្ដោតលើការយកចិត្តទុកដាក់ក្នុងការអនុវត្តតាមច្បាប់រដ្ឋធម្មនុញ្ញកម្ពុជា ជាជាងគោរពកិច្ចព្រមព្រៀងទីក្រុងប៉ារីស ដោយសារតែដំណាក់កាលរបស់ អ៊ុនតាក់ គឺត្រូវបានបញ្ចប់រួចជាស្រេចទៅហើយ ហើយបើអនុវត្តទៅតាមកិច្ចព្រមព្រៀងទីក្រុងប៉ារីស «ក៏មិនត្រូវមានព្រះប្រមុខរដ្ឋ និងព្រះមហាក្សត្រទេ គឺត្រូវមានក្រុមប្រឹក្សាជាតិជាន់ខ្ពស់»។
ការថ្លែងរបស់លោក ហ៊ុន សែន ធ្វើឡើងមួយថ្ងៃមុនពេលខួប ២៨ ឆ្នាំនៃកិច្ចព្រមព្រៀងទីក្រុងប៉ារីសដែលបាននាំភាគីជម្លោះខ្មែរចំនួន ៤ ទៅចុះកិច្ចព្រមព្រៀងបញ្ចប់សង្គ្រាមស៊ីវិលកាលពីថ្ងៃទី ២៣ ខែតុលា ឆ្នាំ ១៩៩១ នៅទីក្រុងប៉ារីសក្នុងនោះមានក្រុមអ្នកតស៊ូ រាជានិយមហ៊្វុនស៊ិនប៉ិចដឹកនាំដោយសម្តេចព្រះ នរោត្តម សីហនុ រណសិរ្សជាតិរំដោះប្រជាពលរដ្ឋខ្មែរ របស់លោក សឺន សាន ក្រុមខ្មែរក្រហមដែលដឹកនាំដោយលោក ប៉ុល ពត, អៀង សារី ខៀវ សំផន និងគណបក្សប្រជាជនកម្ពុជា ឬរដ្ឋកម្ពុជាដឹកនាំដោយលោក ហ៊ុន សែន ដោយមានបណ្តាប្រទេសចំនួន ១៨ ជាហត្ថលេខី។
កិច្ចព្រមព្រៀងនេះ បានផ្លាស់ប្តូររបបដឹកនាំប្រទេសកម្ពុជាពីកុម្មុយនីស្តមកប្រជាធិបតេយ្យសេរីពហុបក្សដោយបានចាប់ផ្តើមឲ្យមានការបោះឆ្នោតលើកដំបូងនៅក្នុងឆ្នាំ ១៩៩៣ និងមានការបោះឆ្នោតជាបន្តបន្ទាប់ក្នុងរយៈពេល ៥ ឆ្នាំម្តងរហូតមកដល់សព្វថ្ងៃ។
ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យ បៀលប្រាយ កាលពីម្សិលមិញលោក ហ៊ុន សែន បានថ្លែងថា រាជរដ្ឋាភិបាលមានសិទ្ធិធ្វើច្បាប់ ព្រាងច្បាប់ អនុម័តច្បាប់ (ក្នុងនីតិប្បញ្ញត្តិ) តែគ្មានសិទ្ធិបកស្រាយច្បាប់ឡើយ បូករួមទាំងរដ្ឋសភាទាំង ២ ហើយ ថាអ្នកដែលមានសិទ្ធិបកស្រាយច្បាប់គឺមានតែក្រុមប្រឹក្សាធម្មនុញ្ញប៉ុណ្ណោះ ដោយមិនអាចមានអ្នកណាម្នាក់ចេះតែបកស្រាយបានឡើយ។
លោកបញ្ជាក់ថា៖ «កិច្ចព្រមព្រៀងទីក្រុងប៉ារីសនេះកុំចេះតែចេញមកបកតាមចិត្តចង់។ ឥឡូវខ្ញុំមិននិយាយដល់កិច្ចព្រមព្រៀងទីក្រុងប៉ារីស ទេ! បើទោះបីថ្ងៃស្អែក ជាថ្ងៃខួបលើកទី ២៨ ឆ្នាំនៃកិច្ចព្រមព្រៀងទីក្រុងប៉ារីសដែលខ្ញុំមិនចាំបាច់និយាយទេ ដោយសារតែមានវាគ្មិនច្រើន គេនឹងចូលហើយក្នុងវិទ្យុនេះ វិទ្យុនោះ គេបកទុកឲ្យគេបក ហើយយើងនៅរង់ចាំមើលគេវិញ»។
លោកបន្តថារាជរដ្ឋាភិបាលកម្ពុជាគឺផ្ដោតលើការយកចិត្តទុកដាក់ក្នុងការអនុវត្តតាមច្បាប់រដ្ឋធម្មនុញ្ញកម្ពុជាជាជាងគោរពកិច្ចព្រមព្រៀងទីក្រុងប៉ារីស។
លោកគូសបញ្ជាក់ថា៖ «ខ្ញុំអត់និយាយទេ កិច្ចព្រមព្រៀងប៉ារីសទុកឲ្យគេបកស្រាយទៅពីព្រោះគេកំពុងតែធ្វើបាតុកម្មទាមទារឲ្យប្រទេសហត្ថលេខី គោរពកិច្ចព្រមព្រៀងប៉ារីសហើយបើគោរពកិច្ចព្រមព្រៀងប៉ារីសត្រូវដោះលែង ខៀវ សំផន ត្រឡប់មកវិញហើយត្រូវលុបចោល តុលាការ (ខ្មែរក្រហម) ហើយគ្រវាត់ចោលតុលាការហ្នឹង។ រឿងវាឈានដល់រដ្ឋធម្មនុញ្ញដែលត្រូវអនុវត្តពីព្រោះលែងមាន អ៊ុន តាក់ ហើយបើអនុវត្តកិច្ចព្រមព្រៀងប៉ារីសក៏មិនត្រូវមានព្រះប្រមុខរដ្ឋ និងព្រះមហាក្សត្រទេ ត្រូវមានក្រុមប្រឹក្សាជាតិជាន់ខ្ពស់»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាគាំទ្រការលើកឡើងរបស់លោកនាយករដ្ឋមន្ត្រីដោយថ្លែងថា ខ្លឹមសារនៅក្នុងកិច្ចព្រមព្រៀងទីក្រុងប៉ារីសបានដាក់បញ្ចូលនៅក្នុងរដ្ឋធម្មនុញ្ញកម្ពុជាអស់ហើយ ដូច្នេះប្រទេសកម្ពុជាមិនមានកាតព្វកិច្ចត្រូវគោរពតាមកិច្ចព្រមព្រៀងនោះទេ។
លោកបញ្ជាក់៖ «កិច្ចព្រមព្រៀងនេះគឺជាឯកសារប្រវត្តិសាស្ត្រ ឯកសារសម្រាប់ការសិក្សាពីការវិវឌ្ឍនៃនយោបាយប្រទេសកម្ពុជា។ វាមិនមានកាតព្វកិច្ចអ្វីដែលត្រូវគោរពទេតែអ្វីដែលត្រូវគោរពគឺរដ្ឋធម្មនុញ្ញប្រទេសកម្ពុជា»។
ប៉ុន្តែលោក ឡៅ ម៉ុងហៃ អ្នកវិភាគនយោបាយបានសរសេរបង្ហោះលើហ្វេសប៊ុកលោកថា ប្រទេសកម្ពុជាគឺជារដ្ឋហត្ថលេខីមួយក្នុងចំណោមរដ្ឋហត្ថលេខីទាំងអស់នៃកិច្ចព្រមព្រៀងសន្តិភាពទីក្រុងប៉ារីស ហើយពេលនោះកម្ពុជាតំណាងដោយក្រុមប្រឹក្សាជាតិជាន់ខ្ពស់នៃកម្ពុជាដែលមានសមាជិក ១២ រូបដែលចុះហត្ថលេខាលើកិច្ចព្រមព្រៀង។ លោកបញ្ជាក់ថា៖ «ទោះជាអ្នកចុះហត្ថលេខាទាំងនេះស្លាប់ក៏ដោយ ក៏កិច្ចព្រមព្រៀងនៅចងកម្ពុជារហូត ព្រោះកម្ពុជាអត់ស្លាប់ទេ»។
នៅក្នុងពិធីកាលពីម្សិលមិញនេះដែរលោក ហ៊ុន សែន ក៏បានស្នើឲ្យប្រជាពលរដ្ឋខ្មែរទាំងអស់ចូលរួមទទួលទានអំបុក ចេក ដូង ពិសេស ស្ករផែន ឲ្យបានគ្រប់ៗគ្នានៅថ្ងៃទី ៩ ខែវិច្ឆិកាដែលជាថ្ងៃបុណ្យឯករាជ្យជាតិ និងជាថ្ងៃកំណើតកងទ័ពខ្មែរ ដើម្បីថែរក្សា និងការពារជាតិ សាសនាព្រះមហាក្សត្រ។ លោកថាកងកម្លាំងសមត្ថកិច្ចគ្រប់ប្រភេទបាន «ទទួលបទបញ្ជារួចជាស្រេចទៅហើយ មិនចាំបាច់ថា តើគួរធ្វើអ្វី ទើបវាម៉េចអី របៀបម៉េច អត់មកនិយាយអ៊ីចឹងទេ គេមានរបៀបរបស់គេ»។
គួរបញ្ជាក់ផងដែរថាថ្ងៃទី ៩ ខែវិច្ឆិកាគឺជាថ្ងៃដែលលោក សម រង្ស៊ី និងមេដឹកនាំអតីតគណបក្សសង្គ្រោះជាតិដែលសមត្ថកិច្ចកំពុងតាមចាប់ខ្លួន ទៅតាមដីការបស់តុលាការក្រោមការចោទប្រកាន់ជាច្រើនបានប្រកាសវិលត្រឡប់មកកាន់ប្រទេសកម្ពុជាវិញ។
ពាក់ព័ន្ធករណីនេះលោក កេត សោផាន់ អ្នកនាំពាក្យក្រសួងការបរទេស បានឱ្យដឹងថានៅវេលាម៉ោង ៣ និង ៤ នាទីរសៀលថ្ងៃទី ២០ ខែតុលា ឆ្នាំ ២០១៩ លោកស្រី មូរ សុខហួរ បានចេញដំណើរពីទីក្រុងគូឡាឡាំពួ ប្រទេសម៉ាឡេស៊ី តាមជើងយន្តហោះ MH782 ហើយបានមកដល់ទីក្រុងបាងកកនៅម៉ោង ៤ និង ៣៤ រសៀល។
លោក កេត សោផាន់ បញ្ជាក់ថា៖ «ពេលមកដល់ប៉ុស្តិ៍ត្រួតពិនិត្យនគរបាលអន្តោប្រវេសន៍ថៃបានហាមឃាត់ មិនឲ្យ (មូរ សុខហួរ) ចូលដោយសារមានឈ្មោះក្នុងបញ្ជីខ្មៅដែលសមត្ថកិច្ចកម្ពុជាស្នើឲ្យហាមឃាត់។ សមត្ថកិច្ចថៃ ក៏បានចារពាក្យហាមឃាត់មិនឲ្យចូលលើលិខិតឆ្លងដែនរបស់ឈ្មោះ មូរ សុខហួរ។ ឈ្មោះ មូរ សុខហួរ បានចាកចេញពីថៃទៅម៉ាឡេស៊ីវិញនៅម៉ោង ៨ និង ១០ នាទីយប់តាមជើងហោះហើរ MH781»៕