ភ្នំពេញ៖ ស្របពេលអះអាងទទួលបានជ័យជម្នះលើការភ្នាល់ជាមួយលោក សម រង្ស៊ី លោកនាយករដ្ឋមន្ត្រី ហ៊ុន សែន បានប្រកាសបន្តស្បថដាក់ជីវិតឱ្យស្លាប់មួយពូជជាមួយជនណាដែលនៅតែរិះគន់កម្ពុជាស្ថិតក្រោមការគ្រប់របស់លោក កាន់តែក្រីក្រទៅ។
ការបបួលស្បថដាក់ជីវិតនេះ ខណៈលោក ហ៊ុន សែន អះអាងថា បច្ចុប្បន្នកម្ពុជាកំពុងតែរីកចម្រើនគ្រប់វិស័យ ហើយប្រជាជនមានអាហារបរិភោគយ៉ាង សម្បូរ។
ថ្លែងនៅក្នុងពិធីបើកការដ្ឋានសាងសង់មន្ទីរពេទ្យ មិត្តភាព កម្ពុជា-ចិន ត្បូងឃ្មុំ ថ្ងៃទី២ មីនា លោក ហ៊ុន សែន បានប្រកាសបន្តដឹកនាំកម្ពុជាយ៉ាងតិចចំនួន ១០ ឆ្នាំទៀតដែលអាចរហូតទៅដល់អាណត្តិក្រោយ ហើយការសម្រេចចិត្តបន្តបោះឆ្នោតឱ្យគណបក្សប្រជាជនកម្ពុជាដែលមានលោកជាអ្នកដឹកនាំ គឺជាការជួយរក្សាសន្ដិភាពនិងអភិវឌ្ឍន៍។
ស្របពេលដឹកនាំកម្ពុជា អស់រយៈពេល ៣៤ ឆ្នាំ លោកបន្តលើកឡើងអំពីការរីកចម្រើនរបស់កម្ពុជា ក្រោយថ្ងៃរំដោះនៅឆ្នាំ ១៩៧៩ ថា ហេដ្ឋារចនាសម្ព័ន្ធចាំបាច់ជាច្រើនដូចជាស្ពាន ថ្នល់ មន្ទីរពេទ្យ សាលារៀនជាដើម ត្រូវបានសាងសង់រីកដុះដាលយ៉ាងឆាប់រហ័សនៅគ្រប់ទីកន្លែង ហើយពីប្រទេសមួយធ្លាប់មានប្រជាជនត្រឹមប្រហែល ៧ លាននាក់ខ្វះអង្ករបរិភោគ តែបច្ចុប្បន្នប្រជាជនកើនដល់ ១៦ លាននាក់ បែរជាកម្ពុជា នៅសល់ស្រូវប្រហែល ៦ លានតោនទៅវិញ។
បើតាមសម្ដីលោក ហ៊ុន សែន លើសពីនេះ កាលពីឆ្នាំ ២០១៨ ភ្ញៀវទេសចរណ៍បរទេសចំនួន ៦ លាន ២ សែននាក់ ក្នុងនោះមានជនជាតិ ចិន ចំនួន ២ លាន ២ សែននាក់ បានមកទស្សនាកម្ពុជា និងអ្នកវិនិយោគចិន បានជួយឱ្យកម្មកររោងចក្រកម្ពុជាកន្លះលាននាក់បានការងារធ្វើ។
ផ្ទុយទៅវិញលោក ហ៊ុន សែន បញ្ជាក់ថា បែរជាមានក្រុមអសិរពិសដែលចង់ផ្ដួលរំលំរដ្ឋាភិបាលរបស់លោកនិងជនមួយចំនួនដែលកំពុងសម្ភារៈទំនើបៗប្រើប្រាស់ មករិះគន់កម្ពុជាថាកាន់តែក្រីក្រទៅៗ ទៅវិញ។
លោក ហ៊ុន សែន អះអាងថា អ្នកណាដែលនៅតែចូលទៅបញ្ចេញមតិរិះគន់ក្នុងហ្វេកប៊ុករបស់លោកថា កម្ពុជាជាប្រទេសក្រីក្រ នោះមានន័យស្ម័គ្រចិត្តចូលរួមស្បងដាក់ជីវិតឱ្យស្លាប់ជាមួយលោក ប៉ុន្តែលោកថា អ្នកទាំងឡាយនោះប្រហែលមិនហ៊ានស្បថឡើយ ព្រោះពួកគេខ្លាចស្លាប់។
លោកថា «តើអ្នកហ៊ានស្បថទេថាពេលនេះក្រជាងឆ្នាំ ៧៩ តើហ៊ានស្បថឱ្យរន្ទះបាញ់ទេ។ តើហ៊ានស្បថឱ្យងាប់ទាំងកូនទាំងចៅទាំងពូជទាំងអម្បូរទេ។ ព្រោះវាមានអាអ្នកដែលហ៊ាននិយាយថា ដឹកនាំយូរៗទៅកាន់តែក្រទៅៗ តើហ៊ានស្បងទេ សុំសួរទៅពួកក្រុមអសិរពិសទាំងឡាយ តើហ៊ានស្បថទេ ថាកម្ពុជាក្រទៅៗមានន័យថាក្រជាងឆ្នាំ ៧៩»។
លោក ហ៊ុន សែន បន្តថា«បើអ្នកឯងមិនហ៊ានស្បថមានន័យថា អ្នកឯងទទួលស្គាល់ការពិត ប៉ុន្តែបើអ្នកឯងហ៊ានស្បថច្បាស់ជាអាយុខ្លី។ អាវាភ្នាល់ចេញឯងហើយវារត់ តែឥឡូវតែមានស្អីគឺបបួលស្បថតែម្ដង តែអាពួកហ្នឹងអត់ហ៊ានស្បថទេ ខ្លាចរន្ទះបាញ់ងាប់សឹងអី។ ម្នាក់ៗប្រើសុទ្ធតែស្មាតហ្វូន រួចហើយចូលមកខមមិន ជាមួយឯងថាដឹកនាំកាន់តែក្រទៅៗ តើអាអ្នកកាន់ស្មាតហ្វូនណុ៎ងវាហ៊ានស្បថទេ។ ថ្ងៃក្រោយអ្នកណាចូលមកខមមិនថាក្រទៅៗ គឺចាត់ទុកថា អ្នកឯងស្បថជាមួយខ្ញុំ»។
លោក មាស នី អ្នកសិក្សាស្រាវជ្រាវសង្គមលើកឡើងថា ថ្វីត្បិតកម្ពុជាកាន់តែរីកម្រើនទៅមុខក្ដី ប៉ុន្តែកម្ពុជាគឺជាប្រទេសមួយដែលក្រីក្រជាងគេនៅក្នុងតំបន់ ហើយការលើកឡើងថាជាប្រទេសក្រីក្រនេះ គឺមិនមែនជាការប្រៀបធៀបពីកម្ពុជាបច្ចុប្បន្នទៅអតីតកាលឡើយ តែជាការប្រៀបធៀបទៅនឹងប្រទេសជិតខាង។
លោក មាស នី ទទួលស្គាល់ថា ពលរដ្ឋកម្ពុជាក៏មានជីវភាពល្អប្រសើរដែរ ប៉ុន្តែគម្លាតរវាងអ្នកមាននិងអ្នកក្រក៏ហាក់កាន់តែមានទំហំធំឡើងដែរ រីឯអំពើអយុត្តិធម៌នៅក្នុងសង្គម ក៏រដ្ឋាភិបាលនៅពុំទាន់លុបបំបាត់ដោយជោគជ័យនៅឡើយ ហើយគេនៅតែឃើញអ្នកមានអំណាចនិងលុយកាកអាចជិះជាន់លើអ្នកស្លូតត្រង់បានជាដដែរ។
ទោះជាយ៉ាងណា លោក មាស នី មិនមានអ្វីលើកឡើងចំពោះការសម្រេចចិត្តស្បថដាក់ជីវិតរបស់លោក ហ៊ុន សែន នោះទេ ប៉ុន្តែលោកថាក្នុងនាមជាមេដឹកនាំគួរតែទទួលយកការរិះគន់មួយចំនួន ហើយមិនត្រូវចាត់ទុកអ្នករិះគន់ទាំងនោះ ជាជនអគតិឡើយ ព្រោះជីវិតជាសត្វលោកមិនដែលធ្វើអ្វីមួយល្អទាំងអស់នោះទេ។
លោកថា «សម្រាប់ខ្ញុំមិនមានខមមិនទេព្រោះជាចរិតរបស់អ្នកដឹកនាំ ធម្មតាចរិតមួយជាអ្នកដឹកនាំនិងមួយទៀតជាចរិតផ្ទាល់ខ្លួន ពេលខ្លះយើងក៏ឃើញចរិតអ្នកដឹកនាំផ្ទាល់ខ្លួនចេញអណ្ដែតមកម្ដងម្កាល»។
សម្រាប់លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជាយល់ឃើញថា ជារឿងធម្មតាប៉ុណ្ណោះ ព្រោះពលរដ្ឋខ្មែរតែងជ្រើសយកវិធីស្បថមកប្រើនៅពេលរឿងអ្វីមួយធ្លាក់ដល់ដំណាក់កាលមិនអាចនិយាយស្ដាប់គ្នាបាន។
ប៉ុន្តែលោក គិន ភា និយាយថា ក្នុងនាមជានាយករដ្ឋមន្ត្រី លោក ហ៊ុន សែន មិនគួរចាំបាច់ខ្វល់រហូតដល់ស្បថនោះទេ ផ្ទុយទៅវិញគ្រាន់លើកឡើងអ្វីជាការពិតបង្ហាញអំពីភាពរីកចម្រើនខាងសេដ្ឋកិច្ចបានហើយ។
លោកថា «មិនចាំបាច់ខ្វល់ថាកម្ពុជាក្រអីហ្នឹង គ្រាន់តែយើងបង្ហាញសូចនាករសេដ្ឋកិច្ចជាភស្ដុតាងវិញជាជាងបបួលពួកហ្នឹងទៅស្បថ ព្រោះស្បថពួកគាត់ក៏មិនជឿដែរ ព្រោះពួកគាត់មានរបៀបវារៈនយោបាយមួយនិយាយអំពីចំណុចអវិជ្ជមានរបស់រដ្ឋាភិបាល»។
បន្ថែមពីនេះ លោក គិន ភា មិនយល់ស្របចំពោះការលើកឡើងថាកម្ពុជាក្រីក្រជាងគេនៅក្នុងតំបន់ឡើយ ព្រោះកម្ពុជាមានរក្សាកំណើនសេដ្ឋកិច្ចជាប់គ្នាអស់រយៈពេលជាច្រើនឆ្នាំមកហើយ ដូច្នោះអ្នកលើកឡើងបែបនេះ ដោយសារពួកគេមាននិន្នាការប្រឆាំងនឹងការរីកចម្រើនរបស់ប្រទេសជាតិប៉ុណ្ណោះ។
ក្រៅពីលើកឡើងការស្បថដើម្បីបង្ហាញអំពីភាពរីកចំរើនរបស់កម្ពុជា លោក ហ៊ុន សែន បានសន្យាបន្តប្រើអភិក្រមទី៥ ក្នុងការកម្ចាត់មន្ត្រីតូចធំបន្ថែមទៀតដែលបំពានផលប្រយោជន៍ប្រជាជន និងធ្វើឱ្យរាំងស្ទះចំពោះកិច្ចខិតខំប្រឹងប្រែងរបស់រដ្ឋាភិបាលសម្រាប់អភិវឌ្ឍប្រទេសជាតិ។
ក្រោយពីបញ្ចប់ការថ្លែងនៅក្នុងពិធីបើកការដ្ឋានសាងសង់មន្ទីរពេទ្យមិត្តភាពកម្ពុជា-ចិនប្រហែលមួយម៉ោង លោក ហ៊ុន សែន ក៏បានចេញអនុក្រឹតដកតំណែងអភិបាលរងខេត្តព្រះសីហនុចំនួនពីររូប គឺលោក ស្រ៊ុន ស្រ៊ន់ និងលោក ផៃ ប៊ុនវណ្ណៈ ក្រោយពីកើតមានហេតុការណ៍កងអាវុធហត្ថនិងទាហានបើហិង្សា វាយដំនិងបាញ់កាំភ្លើងធ្វើឱ្យពលរដ្ឋរងរបួសក្នុងបញ្ហាជម្លោះដីធ្លីកាលពីថ្ងៃទី២៤ ខែមករា៕