The Phnom Penh Post Search

Search form




Logo of Phnom Penh Post newspaper Phnom Penh Post - លោក ហ៊ុន​ សែន ​គំរាម​ធ្វើ​វិសោធនកម្ម​ច្បាប់​គណបក្ស​នយោបាយ​ហាម​អ្នក​ទោស​ធ្វើ​ប្រធាន




លោក ហ៊ុន​ សែន ​គំរាម​ធ្វើ​វិសោធនកម្ម​ច្បាប់​គណបក្ស​នយោបាយ​ហាម​អ្នក​ទោស​ធ្វើ​ប្រធាន

Content image - Phnom Penh Post
សមាជិក​សភា​គណបក្ស​ប្រជាជន​លើក​ដៃ​សម្រេច​ដក​តួនាទី​លោក កឹម សុខា ពី​ម្សិលមិញ។ រូបថត NA

លោក ហ៊ុន​ សែន ​គំរាម​ធ្វើ​វិសោធនកម្ម​ច្បាប់​គណបក្ស​នយោបាយ​ហាម​អ្នក​ទោស​ធ្វើ​ប្រធាន

ភ្នំពេញ​: លោក​ ហ៊ុន​ សែន​​ នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​បាន​ថ្លែង​កាលពី​ម្សិលមិញ​ទៅ​កាន់​សមាជិក​សភា​មកពី​គណបក្ស​ប្រជាជន​កម្ពុជា​ត្រូវ​ចាំបាច់​ធ្វើ​វិសោធនកម្ម​នៃ​ច្បាប់​គណបក្ស​នយោបាយ​ដែល​នឹង​មិន​អនុញ្ញាត​ឲ្យ​អ្នក​ទោស​មាន​សិទ្ធិ​ឈរ​ឈ្មោះ​ធ្វើ​ជា​ប្រធាន​ និង​អនុប្រធាន​គណបក្ស​នយោបាយ​ ខណៈ​ដែល​សមាជិក​រដ្ឋសភា​មកពី​គណបក្ស​សង្គ្រោះ​ជាតិ​ធ្វើ​ពហិការ​បោះឆ្នោត​លើ​វិសោធនកម្ម​លុប​តំណែង​លោក​ កឹម​ សុខា ជា​ប្រធាន​តំណាងរាស្រ្ត​សំឡេង​ភាគ​តិច​ក្នុង​រដ្ឋសភា​​មាន​ឋានៈ​ស្មើ​នាយករដ្ឋមន្ត្រី​ដែល​ជា​តំណែង​ខ្យល់​។

លោក ហ៊ុន សែន ក៏​បាន​ស្នើ​ផង​ដែរ​ឲ្យ​​តំណាងរាស្រ្ត​​គណបក្ស​ប្រជាជន​កម្ពុជា​​​ធ្វើ​វិសោធនកម្ម​​​ច្បាប់​ស្តី​ពី​បក្ស​​​នយោបាយ​​​ដើម្បី​រារាំង​​អ្នក​ដែល​​មាន​ទោស​​​មិន​អាច​​ធ្វើ​ជា​ប្រធាន​គណបក្ស​នយោបាយ​។

លោក ហ៊ុន សែន ថ្លែង​​ថា​៖ «​ត្រូវ​ចាំបាច់​ធ្វើ​វិសោធនកម្ម​ច្បាប់​ស្ដីពី​បក្ស​នយោបាយ​ក៏​ត្រូវ​តែ​ធ្វើ​វិសោធនកម្ម​ ៥០ ​បូក​ ១ ​ដែរ​ដាក់​ថា​អ្នក​ដែល​មាន​ទោស​អត់​មាន​សិទ្ធិ​​ធ្វើ​ប្រធាន​បក្ស​នយោបាយ​ដាក់​ទៅ!​ ខ្ញុំ​មាន​សំណូមពរ​ធ្វើ​អាហ្នឹង​ដើម្បី​ឲ្យ​វា​អស់​សិទ្ធិ​តែ​ម្ដង​ទៅ!​ ​ព្រោះ​អ្នក​ឯង​កំពុង​ជាប់​ទោស​មក​ធ្វើ​បក្ស​អី តែ​សិទ្ធិ​បោះឆ្នោត​មិន​មាន​ផង​ចូល​មក​តែ​កុំ​ភ្លេច​ខ្នោះ​ទាល់​តែ​បាន​សុំ​បញ្ជាក់​»​។

លោក​នាយក​រដ្ឋមន្ត្រី​បាន​គំរាម​​ផង​ដែរ​​ថា​នឹង​បង្កក​ទ្រព្យ​សម្បត្តិ​ ឬ​លក់​ឡាយឡុង​ដូចជា​ទីស្នាក់ការ​កណ្ដាល​គណបក្ស​សង្គ្រោះ​ជាតិ​ និង​ដី​មួយ​​ចំនួន​ដូចជា​នៅ​ខេត្ត​ព្រះសីហនុ​ក៏​មាន​អ្នក​ស៊ើបអង្កេត​ហើយ​​ដែរ​រួម​ទាំង​អំពាវនាវ​ដល់​រដ្ឋអំណាច​កុំ​ឲ្យ​មាន​ការ​ដូរ​ឈ្មោះ​ ឬ​ផ្ទេរ​កម្មសិទ្ធិ។

លោក​ ហ៊ុន សែន ថ្លែង​ថា​៖ ​«​ខ្ញុំ​រង់ចាំ​សាលក្រម​ចូល​ស្ថាពរ​ទេ​លើក​នេះ​ខ្ញុំ​យក​លុយ​ហើយ​ខ្ញុំ​ទារ​មួយ​លាន​ដុល្លារ​បង្កក​ទ្រព្យ​សម្បត្តិ​ ​ឮ​ថា​ស្នាក់ការ​គណបក្ស​ដាក់​ឈ្មោះ​ សម រង្ស៊ី​អ៊ីចឹង​លក់​ស្នាក់ការ​ឡាយឡុង​ ទ្រព្យ​មាន​ច្រើន​ដី​នៅ​កំពង់សោម​ក៏​មាន​មាន​អ្នក​ស៊ើប​ហើយ​សុំ​អំពាវនាវ​រដ្ឋអំណាច​កុំ​ឲ្យ​ដូរ​ឈ្មោះ​លឿន​ពេក​ខ្ញុំ​យក​ទៅ​ធ្វើ​ផ្ទះ​ឲ្យ​ជនពិការ​»​។

ថ្លែង​អស់​រយៈពេល​ជិត​មួយ​ម៉ោង​​នៅក្នុង​សម័យ​ប្រជុំ​ពេញអង្គ​​របស់​រដ្ឋសភា​​ដើម្បី​ធ្វើ​វិសោធនកម្ម​មាត្រា​​ ៤៨ ​ថ្មី​ (៣) ​ទៅ​​មាត្រា​​ ៤៨ ​ថ្មី​ (៤) ​​ដោយ​តំណាងរាស្រ្ត​​គណបក្ស​ប្រជាជន​កម្ពុជា​ចំនួន​​ ៦៧ ​នៃ​ ៦៨ ​​រូប​ដើម្បី​លុប​​តំណែង​ប្រធាន​​​តំណាងរាស្រ្ត​​សំឡេង​ភាគ​ច្រើន​ និង​ភាគតិច​​​នៅ​ក្នុង​រដ្ឋសភា​​​រវាង​​លោក ស ខេង មេដឹកនាំ​គណបក្ស​កាន់​អំណាច​ ​និង​លោក​ កឹម សុខា មេដឹកនាំ​គណបក្ស​ប្រឆាំង ​កាលពី​ម្សិលមិញ​លោក​នាយក​រដ្ឋមន្រ្តី ហ៊ុន សែន ​ប្រធាន​គណបក្ស​កាន់​អំណាច​​បាន​​គំរាម​រឹបអូស​ទ្រព្យ​សម្បត្តិ​​របស់​លោក សម រង្ស៊ី​ ប្រធាន​គណបក្ស​សង្គ្រោះ​ជាតិ​នៅ​ពេល​លោក​ឈ្នះ​​​លោក សម រង្ស៊ី ​នៅ​ក្នុង​បណ្តឹង​បរិហារកេរ្តិ៍​​​ដែល​លោក​បាន​​ប្តឹង​ទាមទារ​​ ១ ​លាន​ដុល្លារ​​អាមេរិក​ពី​លោក សម​ រង្ស៊ី ​កាលពី​សប្តាហ៍​មុន​បន្ទាប់ពី​​លោក សម​ រង្ស៊ី ​ដែល​កំពុង​រស់នៅ​និរទេស​បាន​ចោទប្រកាន់​ថា​លោក​នាយក​រដ្ឋមន្រ្តី​បាន​សូកប៉ាន់​ប្រាក់​ ១ ​លាន​ដុល្លារ​​ដល់​​សកម្មជន​នយោបាយ​ កញ្ញា ធី សុវណ្ណថា ដើម្បី​បង្ក​រឿង​ជាមួយ​គណបក្ស​សង្គ្រោះ​ជាតិ​​។

ជាង​នេះ​ទៀត​លោក​នាយក​រដ្ឋមន្រ្តី​ក៏​បាន​គំរាម​ផង​ដែរ​ថា​ប្រសិន​បើ​លោក​ សម រង្ស៊ី​ ​​ហ៊ាន​​ត្រឡប់​មក​ស្រុក​វិញ​លោក​នឹង​ត្រូវ​ដាក់​ខ្នោះ​។

លោក​នាយក​រដ្ឋមន្រ្តី​បាន​ថ្លែង​នៅ​ក្នុង​សម័យ​ប្រជុំ​រដ្ឋសភា​ថា​៖ «​កុំ​ច្រឡំ​។ ​ខ្ញុំ​រង់ចាំ​​តែ​សាលក្រម​ចូល​ជា​ស្ថាពរ​។ ​លើក​នេះ​​ខ្ញុំ​យក​លុយ​មិន​យក​មួយ​រៀល​ [មួយ​ដុល្លារ​]​ ដូច​ [​សមាជិក​​ព្រឹទ្ធសភា​] ថាក់ ឡានី ទេ​។ ខ្ញុំ​ទាមទារ​​ ១ ​លាន​ដុល្លារ​​នៅពេល​សាលក្រម [​ចូល​ជា​ស្ថាពរ​] រឹប​អូស​ទ្រព្យសម្បត្តិ​សូម​ការពារ​ទ្រព្យ​សម្បត្តិ លក់​ទ្រព្យសម្បត្តិ​ទាំងអស់​នោះ​​​។​ ដោយ​ឮ​ថា​ទីស្នាក់ការ​គណបក្ស​​ដាក់​ឈ្មោះ​​លោក សម រង្ស៊ី ​ដូច្នេះ​លក់​​ទីស្នាក់ការ​បក្ស​លក់​ឡាយឡុង​»​។

លោក ហ៊ុន សែន បន្ត​ថា​លោក សម រង្ស៊ី ​មាន​ទ្រព្យ​សម្បត្តិ​ច្រើន​ដី​នៅ​ខេត្ត​ព្រះសីហនុ​ សម រង្ស៊ី​ ក៏​មាន​ដែរ ប៉ុន្តែ​លោក​រង់ចាំ​សាលក្រម​ចូល​ជា​ស្ថាពរ​សិន​។ ​ជាង​នេះ​ទៀត​លោក ហ៊ុន សែន ក៏​បាន​ជំរុញ​​ឲ្យ​ប្រធាន​រដ្ឋសភា​លោក ​ហេង សំរិន និង​​​ឧបនាយក​រដ្ឋមន្រ្តី ហោ ណាំហុង ដែល​បាន​ប្តឹង​​លោក​​ សម រង្ស៊ី ​ពី​បទ​បរិហារកេរ្តិ៍​ឲ្យ​ទាមទារ​​សំណង​ពី​​លោក ​សម​ រង្ស៊ី ​និង​​​សុំ​ឲ្យ​មាន​​ដីកា​រក្សា​ការពារ​​ដើម្បី​ការពារ​​ទ្រព្យ​សម្បត្តិ​​​របស់​លោក សម រង្ស៊ី សម្រាប់​ការ​រឹបអូស​។

ឆ្លើយតប​នឹង​​ការ​ចោទ​ប្រកាន់​​​ដែល​ថា​ការ​ដាក់​ទោស​​ និង​ការ​លើកលែង​​យក​រដ្ឋមន្រ្តី​ ហ៊ុន សែន បាន​បន្ត​ថា​ក្នុង​នាម​ជា​​នាយក​រដ្ឋមន្រ្តី​លោក​មាន​​អំណាច​​ពេញលេញ​​ទៅ​តាម​រដ្ឋធម្មនុញ្ញ​​ដើម្បី​សម្រេច​ផ្តល់​ការ​លើក​លែង​ទោស ​និង​ដាក់​ទោស​។

លោក ហ៊ុន សែន បាន​ថ្លែង​ថា​៖ «​​អំណាច​របស់​​នាយក​រដ្ឋមន្រ្តី​នៅ​ក្នុង​របប​នេះ​គឺ​ដូច​នេះ​។ ព្រះមហាក្សត្រ​សោយរាជ្យ​តែ​មិន​កាន់​អំណាច​»។ «​​ប្រធាន​រដ្ឋសភា​​ដឹកនាំ​រដ្ឋសភា​មិន​អាច​បញ្ជា​​រដ្ឋមន្រ្តី​ការពារ​ជាតិ​​​។ ​ប្រធាន​ព្រឹទ្ធសភា​​​ដឹកនាំ​ព្រឹទ្ធសភា​​មិន​អាច​​មក​​​បញ្ជា​​រដ្ឋមន្រ្តី​ក្រសួង​មហាផ្ទៃ​ទេ មិន​​អាច​ទេ​»​។

ពី​មុន​មាត្រា​​​ ៤៨ ​ថ្មី​ (៣) ​​ត្រូវ​បាន​ធ្វើ​វិសោធនកម្ម​​​ដោយ​មិន​មាន​ការ​ចូលរួម​ពី​​តំណាងរាស្រ្ត​គណបក្ស​​សង្គ្រោះ​ជាតិ​លោក ហ៊ុន សែន ​ក៏​បាន​ព្រមាន​ផង​ដែរ​ថា​តំណាងរាស្រ្ត​​គណបក្ស​សង្គ្រោះ​ជាតិ​​ត្រូវ​តែ​​​ប្រយ័ត្ន​ក្នុង​ការ​និយាយ​​ បើ​មិន​ដូច្នោះ​ទេ​ប្រាក់​ខែ​របស់​ពួកគេ​នឹង​ត្រូវ​កាត់​ហើយ​បាន​ព្រលយ​​ឲ្យ​គណបក្ស​​សង្គ្រោះ​ជាតិ​ធ្វើ​ពហិការ​ដោយ​និយាយ​​ស្វាគមន៍​​ដែល​គណបក្ស​​សង្គ្រោះ​ជាតិ​​មិន​ចូលរួម​សម័យ​ប្រជុំ​។

លោក​នាយក​រដ្ឋមន្រ្តី​បាន​ថ្លែង​​ថា​៖ «​​ថ្ងៃ​នេះ​កុំ​និយាយ​ថា​ទឹក​​​កន្លះ​ក្អម​​ប្រយ័ត្ន​អស់​​ប្រាក់​ខែ​និយាយ​ឲ្យ​​​ច្បាស់ [ខ្ញុំ] ​សូម​ស្វាគមន៍​​​ដែល [​គណបក្ស​សង្គ្រោះ​ជាតិ​] ​​មិន​ចូលរួម​»។

ការ​ធ្វើ​វិសោធនកម្ម​នៃ​មាត្រា​នេះ​​​​គឺ​ដោយសារ​​​ការ​ចរចា​នយោបាយ​​​រវាង​​គណបក្ស​ប្រជាជន​កម្ពុជា​​ និង​គណបក្ស​​សង្គ្រោះ​ជាតិ​មិន​ទៅ​មុខ ធ្វើឲ្យ ហ៊ុន សែន ខឹង​ដោយ​ថ្លែង​ថា​របៀបវារៈ​របស់​គណបក្ស​សង្គ្រោះ​ជាតិ​​ស្នើ​សុំ​ឲ្យ​មាន​ការ​ដោះលែង​​មន្រ្តី​​សិទ្ធិមនុស្ស​ ៤ ​​នាក់ មន្រ្តី​បោះឆ្នោត​ម្នាក់​ ​និង​សមាជិក​គណបក្ស​សង្គ្រោះ​ជាតិ​​ជាង​ ១០ ​នាក់​ទៀត​​​ដែល​កំពុង​ជាប់​ពន្ធនាគារ​ដូច្នេះ​លោក ហ៊ុន សែន ស្នើ​​​ឲ្យ​តំណាងរាស្រ្ត​​​គណបក្ស​ប្រជាជន​កម្ពុជា​​​ធ្វើ​វិសោធនកម្ម​​មាត្រា​​នេះ​ដើម្បី​លុប​​សំឡេង​ភាគតិច​​នៅ​ក្នុង​រដ្ឋសភា​​ដែល​ដឹកនាំ​​ដោយ​លោក កឹម សុខា ​និង​សំឡេង​​ភាគច្រើន​ដែល​ដឹកនាំ​ដោយ​ឧបនាយក​រដ្ឋមន្រ្តី ស ខេង​។

នៅ​ពេល​ទាក់ទង​ កាលពី​ថ្ងៃ​ម្សិលមិញ​ លោក សម រង្ស៊ី ​បាន​ផ្តល់​អត្ថាធិប្បាយ​ដោយ​ភរិយា​របស់​លោក​​ជា​អ្នក​​លើក​ទូរស័ព្ទ​​​​បាន​ថ្លែង​ថា​លោក​ សម រង្ស៊ី ​កំពុង​ជាប់​រវល់​ប្រជុំ​។

ជា​ការ​ឆ្លើយតប​​នៅ​លើ​ហ្វេសប៊ុក​កាលពី​ម្សិលមិញ​លោក សម រង្ស៊ី​ បាន​ថ្លែង​ថា​វា​គ្មាន​អ្វី​ប្លែក​ទេ​ចំពោះ​ការ​គំរាម​របស់​លោក ហ៊ុន សែន ​​ដោយសារ​លោក ហ៊ុន សែន ឥឡូវ​នេះ​កំពុង​ភិតភ័យ​​​នៅ​ពេល​ការ​បោះឆ្នោត​ជិត​មក​ដល់​។

លោក​បាន​សរសេរ​ថា​៖ «ការ​គំរាម​កំហែង​ទាំង​នេះ​បង្ហាញពី​ភាព​ស្លន់ស្លោរ​របស់​លោក ហ៊ុន សែន នៅ​ពេល​ដែល​ការ​បោះឆ្នោត​ឃុំ-សង្កាត់ ក្នុង​ខែ​មិថុនា ឆ្នាំ ២០១៧ និង​ការ​បោះឆ្នោត​រដ្ឋ​សភា​ក្នុង​ខែ​កក្កដា​ឆ្នាំ ២០១៨ កាន់​តែ​ឈាន​ចូល​មក​ជិត។ ដោយសារ​តែ​គាត់​យល់​ច្បាស់​ថា​គាត់​មិន​អាច​រារាំង​ឆន្ទៈ​ប្រជារាស្ត្រ​ខ្មែរ​ដែល​ចង់​ឲ្យ​មាន​ការ​ផ្លាស់ប្តូរ គាត់​បែរ​ជា​មក​រក​រឿង​កាន់​តែ​សាហាវ​ឡើង​មក​លើ​រូប​ខ្ញុំ​ពី​ព្រោះ​ខ្ញុំ​ជា​និមិត្តរូប​នៃ​ការ​តស៊ូ​ប្រឆាំង​អំណាច​ផ្តាច់ការ និង​ពុករលួយ​របស់​គាត់ និង​ក្រុម​គ្រួសារ​គាត់»។

«តាំង​ពី​យូរ​ឆ្នាំ​មក​ហើយ​លោក ហ៊ុន សែន បាន​ប្រើប្រាស់​តុលាការ​ក្រោម​បញ្ជា​របស់​គាត់​ឲ្យ​ផាត់​ខ្ញុំ​ចេញ​ពី​ឆាក​នយោបាយ​នៅ​ប្រទេស​កម្ពុជា​ហើយ​គាត់​ក៏​បាន​ប៉ុនប៉ង​កម្ចាត់ ​ឬ​បំបែក​គណបក្ស​សង្គ្រោះ​ជាតិ បន្ទាប់​ពី​គណបក្ស សម រង្ស៊ី។ ដូច្នេះ ​វា​គ្មាន​អ្វី​ប្លែក​ទេ​ក្នុង​ការ​ប៉ុនប៉ង​ដ៏​ថោក​ទាប​របស់​លោក ហ៊ុន សែន នេះ​។ គាត់​នឹង​ទទួល​បរាជ័យ​យ៉ាង​អាម៉ាស់​នឹង​ជា​ស្ថាពរ​ក្នុង​ពេល​ឆាប់ៗ​ខាង​មុខ​នេះ​ពី​ព្រោះ​គណបក្ស​សង្គ្រោះជាតិ​នៅ​តែ​រួបរួម​គ្នា​ហើយ​កាន់​តែ​រឹងមាំ​ឡើង​រហូត​ដល់​ទទួល​ជ័យជម្នះ​យ៉ាង​ត្រចះ​ត្រចង់​ក្នុង​ការ​បោះឆ្នោត​នៅ​ឆ្នាំ ២០១៧ ​និង ​២០១៨​»។

ប្រធាន​តំណាងរាស្រ្ត​គណបក្ស​សង្គ្រោះ​ជាតិ​លោក សុន ឆ័យ បាន​ថ្លែង​ថា​គណបក្ស​សង្គ្រោះ​ជាតិ​មិន​អាច​ទទួល​យក​បាន​ចំពោះ​​ការ​ធ្វើ​វិសោធនកម្ម​​មាត្រា​​ ៤៨ ​ថ្មី​ (៣) ​​នេះ​ដោយសារ​​គណបក្ស​សង្គ្រោះជាតិ​ចង់​​ពង្រឹង​ស្ថាប័ន​ជាតិ​ឲ្យ​រឹងមាំ​​​ដើម្បី​​​បម្រើ​សេវា​ឲ្យ​បាន​ល្អ​ដល់​ប្រជាជន​។ ​ជា​ការ​ឆ្លើយតប​នឹង​ការ​គំរាម​​របស់​លោក ហ៊ុន សែន ​​ដែល​ថា​នឹង​រឹបអូស​​ទ្រព្យសម្បត្តិ​របស់​​លោក សម រង្ស៊ី ​លោក សុន ឆ័យ បាន​ព្រមាន​ថា​ប្រសិន​បើ​លោក​នាយក​រដ្ឋមន្រ្តី​ហ៊ាន​ធ្វើ​ដូច​នេះ ​នេះ​នឹង​ធ្វើ​ឲ្យ​ប្រជាជន​គាំទ្រ​គណបក្ស​​​សង្គ្រោះជាតិ​កាន់តែ​ខ្លាំង​ឡើង​។

«​​ប្រព័ន្ធ​តុលាការ​​​របស់​យើង​​​ទទួល​ការ​រិះគន់​ធ្ងន់ធ្ងរ​ណាស់​មិនមែន​តែ​ក្នុង​ប្រទេស​ទេ ​ប៉ុន្តែ​ថែម​ទាំង​ក្រៅ​ប្រទេស​ អង្គការ​សហប្រជាជាតិ​​ក៏​បាន​រិះគន់​​ប្រព័ន្ធ​យុតិ្តធម៌​​របស់​យើង​ផង​ដែរ​​។ ​ប្រសិន​បើ​ការ​បាត់បង់​ទ្រព្យសម្បត្តិ​​ណា​មួយ​​​ធ្វើឲ្យ​មាន​ការ​លំបាក​សម្រាប់​ការ​ពង្រឹង​តួនាទី​ [​របស់​គណបក្ស​សង្គ្រោះជាតិ​] ​ខ្ញុំ​គិត​ថា​វា​មិនមែន​ជា​ចំណុច​​ធ្វើ​ឲ្យ​យើង​បារម្ភ​ទេ​។

[​បក្ស​សង្គ្រោះ​ជាតិ​] ​ធ្លាប់​ជួប​ការ​លំបាក​​ជាច្រើន​រួច​ហើយ​​។ ​យើង​មិន​ដែល​គិត​ថា​ការ​គាំទ្រ​របស់​ប្រជាពលរដ្ឋ​នឹង​មិនមែន​ដោយសារ​យើង​មិន​មាន​ទីស្នាក់ការ​​​នៅ​ទី​​នេះ​ទេ​។ ​ប្រជាពលរដ្ឋ​គាំទ្រ​ [​គណបក្ស​សង្គ្រោះ​ជាតិ​] ​ដោយសារ​យើង​​បាន​ព្យាយាម​ជំរុញ​ឲ្យ​មាន​​ការ​​ធ្វើ​កំណែ​ទម្រង់​​​កែតម្រូវ​ប្រទេស​»។

លោក សុន ឆ័យ បាន​ថ្លែង​បន្ត​ថា​៖ «​​នៅ​ក្នុង​ការ​គ្រប់គ្រង​ប្រទេស​យើង​យល់​ថា​ការ​ពង្រឹង​ស្ថាប័ន​​​គឺ​​សំខាន់​ណាស់​។ ​យើង​ជា​អ្នក​ដឹកនាំ​ប្រទេស ​យើង​ដឹកនាំ​មួយ​រយៈពេល​​ហើយ​​ដាក់​ចេញ​មេដឹកនាំ​បន្ទាប់​បន្ត​ដឹកនាំ​នៅ​ពេល​យើង​មាន​ស្ថាប័ន​ល្អ​ មិន​បង្ក​ឲ្យ​មាន​បញ្ហា​ស្មុគស្មាញ​»។

លោក​បាន​បន្ថែម​ថា​ ការ​ធ្វើ​វិសោធនកម្ម​ណា​មួយ​​ប៉ះពាល់​​ដល់​អត្ថប្រយោជន៍​​ជាតិ​គណបក្ស​សង្គ្រោះ​ជាតិ​នឹង​មិន​ចូលរួម​សម័យ​ប្រជុំ​នោះ​ទេ​៕ PS

អត្ថបទគួរចាប់អារម្មណ៍