The Phnom Penh Post Search

Search form




Logo of Phnom Penh Post newspaper Phnom Penh Post - លោក ហ៊ុន សែន គ្រោង​ទៅ វៀតណាម ស្រប​ពេល​នយោបាយ​ឡើង​កម្ដៅ

លោក ហ៊ុន សែន គ្រោង​ទៅ វៀតណាម ស្រប​ពេល​នយោបាយ​ឡើង​កម្ដៅ

លោក ហ៊ុន សែន គ្រោង​ទៅ វៀតណាម ស្រប​ពេល​នយោបាយ​ឡើង​កម្ដៅ

ភ្នំពេញៈ លោក​នាយក​រដ្ឋ​មន្រ្តី ហ៊ុន សែន គ្រោង​នឹង​ធ្វើ​ទស្សនកិច្ច​ទៅ​ប្រទេស វៀតណាម រយៈ​ពេល ៣ថ្ងៃ នៅ​ចុង​សប្តាហ៍​នេះ ខណៈ​ដែល​ចំនួន​បាតុករ​រាប់​ម៉ឺន​នាក់​មក​ពី​គណបក្ស ប្រឆាំង​ទាមទារ​យ៉ាង​ខ្លាំង​ឲ្យ​លោក​ចុះ​ចេញ​ពី​តំណែង ឬ​រៀបចំ​បោះឆ្នោត​ឡើង​វិញ។

ចាប់​តាំង​ពី​ថ្ងៃ ទី១៥ ខែ ធ្នូ មក គណបក្ស​សង្គ្រោះ​ជាតិ បាន​រៀបចំ​ធ្វើ​បាតុកម្ម​នៅ​សួន​សេរីភាព ហើយ​បាន​ដើរ​ដង្ហែ​តាម​វិថី​នានា​ក្នុង​រាជធានី​ភ្នំពេញ ទាមទារ​ឲ្យ​ធ្វើ​ការ​បោះឆ្នោត​ឡើង​វិញ​និង​ឲ្យ​លោក ហ៊ុន សែន នាយក​រដ្ឋ​មន្រ្តី លាលែង​ចេញ​ពី​តំណែង ដែល​លោក​កាន់​កាប់​ចាប់​តាំង​ពី​ឆ្នាំ ១៩៨៥ មក។

គម្រោង​ទស្សនកិច្ច​របស់​លោក ហ៊ុន សែន ទៅ វៀតណាម ពី​ថ្ងៃ​ព្រហស្បតិ៍​ដល់​ថ្ងៃ​សៅរ៍​ត្រូវ​បាន​គេ​បង្ហោះ​លើ​ទំព័រ​បណ្តាញ​សង្គម​សំឡេង​ប្រជាធិបតេយ្យ​ដែល​អ្នក​ប្រើ​ប្រាស់​រាប់​រយ​នាក់​រិះគន់​ថា ដំណើរ​ទស្សនកិច្ច​នេះ​គឺ​ដើម្បី​ទៅ​សុំ​យោបល់​ពី វៀតណាម ស្តីពី​ស្ថានការណ៍​នយោបាយ​នៅ ភ្នំពេញ។

អ្នក​ប្រើ​ប្រាស់ ហ្វេសប៊ុក បាន​សរសេរ​ថា៖ «ទៅ​ទទួល​ការ​ណែនាំ​ពី វៀតណាម ថា​តើ​ត្រូវ​គ្រប់​គ្រង​ស្ថានការណ៍​ដោយ​របៀប​ណា ព្រម​ទាំង​ថា តើ​ត្រូវ​ប្រឆាំង​បាតុកម្ម​ដោយ​របៀប​ណា»។

ទោះ​ជា​យ៉ាង​ណា លោក ខៀវ កាញារីទ្ធ រដ្ឋ​មន្រ្តី​ក្រសួង ព័ត៌មាន បាន​ជំទាស់​ចំពោះ​ការ​អះអាង​នៅ​លើ​បណ្តាញ​សង្គម ហើយ​បាន​ថ្លែង​ថា ដំណើរ​ទស្សនកិច្ច​របស់​លោក ហ៊ុន សែន ទៅ វៀតណាម ធ្វើ​ឡើង បន្ទាប់​ពី​ការ​បង្កើត​រដ្ឋាភិបាល​ថ្មី​ហើយ​ត្រូវ​ទៅ​ធ្វើ​ទស្សនកិច្ច នៅ​រដ្ឋ​សមាជិក​អាស៊ាន។

លោក​បន្ត​ថា៖ «នេះ​ជា​ទម្លាប់ ដែល​រដ្ឋាភិបាល​ថ្មី ត្រូវ​ធ្វើ​ទស្សនកិច្ច​ទៅ​រដ្ឋ​សមាជិក​អាស៊ាន។ អ្នក​ដឹង​ច្បាស់​អំពី ហ្វេសប៊ុក ប៉ុន្តែ ប្រសិន​បើ​សម្តេច ហ៊ុន សែន ត្រូវ​ការ​យោបល់​ដូច​ដែល​គេ​ចោទ​នោះ ហេតុ​អ្វី​ចាំ​បាច់​ទៅ វៀតណាម ជា​សាធារណៈ​នោះ?»។

យោង​តាម​សេចក្តី​ថ្លែង​ការណ៍​ដែល​ចេញ​ផ្សាយ​ដោយ​ក្រសួង ការ​បរទេស កាល​ពី​ម្សិលមិញ​បាន​ឲ្យ​ដឹង​ថា កម្ពុជា និង វៀតណាម នឹង​ចុះ​ហត្ថលេខា​លើ​ឯកសារ ៨ ក្នុង​អំឡុង​ដំណើរ​ទស្សនកិច្ច​របស់​លោក​នាយក​រដ្ឋ​មន្រ្តី ទៅ​ទីក្រុង ហាណូយ។ កិច្ច​ព្រម​ព្រៀង​នោះ រាប់​បញ្ចូល​ទាំង​សន្ធិ​សញ្ញា​បត្យាប័ន​ការ​ផ្លាស់​ប្តូរ​ពាណិជ្ជកម្ម ព័ត៌មាន និង​ការ​អប់រំ ។ល។ ផង​ដែរ។

ក្រៅ​ពី​ចុះ​ហត្ថលេខា​លើ​កិច្ច​ព្រមព្រៀង លោក​នាយក​រដ្ឋ​មន្រ្តី​នឹង​ជួប​ពិភាក្សា​ទ្វេ​ភាគី​ជាមួយ​នឹង​លោក​នាយក​រដ្ឋ​មន្រ្តី វៀតណាម ហើយ​គ្រោង​ជួប​ប្រធាន​រដ្ឋសភា​ប្រធាន​រដ្ឋ វៀតណាម និង​លោក អគ្គ​លេខាធិការ​បក្ស​កុម្មុយនីស្ត​វៀតណាម​ផង​ដែរ។

លោក​ស្រី ជា វណ្ណាត បាន​ថ្លែង​ថា ដំណើរ​ទស្សនកិច្ច​របស់​លោក​នាយក​រដ្ឋ​មន្រ្តី គឺជា​រឿង​ធម្មតា ប៉ុន្តែ​ក្រៅ​ពី​នេះ លោក​អាច​ពិភាក្សា​អំពី​ស្ថានការណ៍​នយោបាយ​នៅ កម្ពុជា ព្រោះ​វៀតណាម អាច​ភ័យ​ខ្លាច​អំពី​ផល​ប៉ះពាល់​មក​លើ​អាជីវកម្ម​របស់​ខ្លួន​នៅ កម្ពុជា។ លោក​ស្រី​ថ្លែង​ថា «ខ្ញុំ​ជឿ​ជាក់​ថា នឹង​មាន​កិច្ច​ពិភាក្សា​អំពី​បញ្ហា​នយោបាយ​ដែល​កើត​ឡើង​នៅ​កម្ពុជា។

លោក ហ៊ុន សែន មាន​បទ​ពិសោធ​ដឹក​នាំ​ប្រទេស ៣០ ឆ្នាំ​ហើយ ខ្ញុំ​គិត​ថា មិន​ចាំ​បាច់​ស្នើ​សុំ​យោបល់​ពី វៀតណាម ទេ ប៉ុន្តែ ក្នុង​នាម​ជា​ប្រទេស​ជិត​ខាង និង​រដ្ឋ​ជា​សមាជិក​អាស៊ាន​គេ​អាច​និយាយ​អំពី​បញ្ហា​នេះ​បាន»៕ TK

អត្ថបទគួរចាប់អារម្មណ៍