.jpg)
មន្ត្រីផ្សព្វផ្សាយពីវិធីការពារការឆ្លងជំងឺកូវីដ១៩ នាពេលកន្លងមក។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន បានលើកឡើងថា ការទប់ស្កាត់កុំឱ្យឆ្លងរាលដាលក្នុងសហគមន៍គឺអាស្រ័យទៅលើពលរដ្ឋម្នាក់ៗក្នុងការការពារខ្លួនពីជំងឺកូវីដ ១៩ ខណៈលោកព្រួយបារម្ភថា ការរាលដាលនៅក្នុងពិភពលោកនឹងអាចបន្តរយៈពេលយូរទៀត។ ការលើកឡើងនេះធ្វើឡើងក្រោយពីនិស្សិតខ្មែរចំនួន ៩ នាក់ទៀត ទើបមកពីក្រៅប្រទេសបានឆ្លងជំងឺកូវីដ ១៩។
លោក ហ៊ុន សែន ថ្លែងនៅពេលចុះជួបកសិករចិញ្ចឹមត្រីនៅខេត្តព្រៃវែងកាលពីថ្ងៃម្សិលមិញថា ក្នុងចំណោមអ្នកឆ្លងជំងឺកូវីដ ១៩ ទាំងអស់ដែលរកឃើញនៅកម្ពុជាគឺមានជនបរទេសពាក់កណ្ដាល និងជនជាតិខ្មែរពាក់កណ្ដាលដែលសុទ្ធតែជាករណីនាំចូលពីក្រៅប្រទេស ហើយកន្លងមកក៏ធ្លាប់មានអ្នកជំងឺខ្លះបានចម្លងជំងឺបន្តមកកាន់អ្នកនៅក្នុងប្រទេសដែរ។
ប៉ុន្តែលោកបន្តថា ជាភ័ព្វសំណាងដែលកម្ពុជាមិនទាន់មានស្លាប់ដោយសារជំងឺនេះនៅឡើយ។ លោកថា៖ «ជំងឺកូវីដអត់ទាន់ចប់ទេ ហើយអ្នកវិទ្យាសាស្ដ្រជាង ២០០ នាក់ បានសរសេរលិខិតទៅអង្គការសុខភាពពិភពលោក ថាមានលទ្ធភាពឆ្លងតាមរយៈខ្យល់អាកាស។ ឥឡូវតើវាពិត ឬមិនពិតហើយប្រសិនបើពិត អាលំអាលាយហើយ។ ព្រោះសូម្បីតែខ្យល់ដកដង្ហើម ក៏យើងត្រូវស្ពាយអុកស៊ីហ្ស៊ែនតាមខ្លួនដែរ»។
កាលពីថ្ងៃម្សិលមិញក្រសួងសុខាភិបាលបានប្រកាសថា និស្សិតខ្មែរមកពីប្រទេសអារ៉ាប៊ីសាអ៊ូឌីតចំនួន ៩ នាក់បន្ថែមទៀតត្រូវបានធ្វើតេស្ដរកឃើញជំងឺកូវីដ១៩កាលពីយប់ថ្ងៃទី ១៣ កក្កដា ហើយពួកគេត្រូវបានបញ្ជូនទៅសម្រាកព្យាបាលនៅមណ្ឌលសុខភាព ចាក់អង្រែរាជធានីភ្នំពេញ។ ករណីថ្មីទាំង ៩ នាក់នេះ បានធ្វើឱ្យចំនួននិស្សិតខ្មែរ ដែលធ្វើដំណើរមកពីប្រទេសអារ៉ាប៊ី សាអ៊ូឌីត មកដល់កម្ពុជាចាប់តាំងពីថ្ងៃទី ១០ កក្កដា កើនដល់ ២៤ នាក់ក្នុងចំណោមទាំង ៨០ នាក់ បានឆ្លងជំងឺកូវីដ ១៩ បន្ទាប់ពីនិស្សិត ១៥ នាក់ដំបូង ត្រូវបានក្រសួងសុខាភិបាលប្រកាសធ្វើតេស្ដវិជ្ជមានកាលពីថ្ងៃទី ១១ កក្កដា។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានថ្លែងថា នៅក្នុងចំណោមនិស្សិតទាំង ៨០ នាក់នេះ គឺបានធ្វើដំណើរទៅបន្តការសិក្សាថ្នាក់បរិញ្ញាបត្រ និងថ្នាក់អនុបណ្ឌិតលើមុនជំនាញខុសៗគ្នា នៅក្នុងប្រទេសអារ៉ាប៊ី សាអ៊ូឌីត ហើយបានធ្វើដំណើរមកស្រុកកំណើតនៅពេលនេះ គឺដោយសារមានការឈប់សម្រាកពីការសិក្សា។
លោកស្រីថា៖ «យើងសង្កេតឃើញការចម្លងដែលមានការកើនឡើង គឺច្រើនមែនទែន បណ្ដាលមកពីការធ្វើដំណើររបស់បុគ្គលដែលខ្វះការប្រុងប្រយ័ត្ន ហើយអាចនាំឱ្យមានការចម្លងពីបុគ្គលម្នាក់ទៅបុគ្គលម្នាក់។ ដូច្នេះ គឺមានការចាំបាច់ណាស់ ដែលប្រជាពលរដ្ឋទាំងអស់គ្នាត្រូវតែចូលរួមអនុវត្តនូវកិច្ចការពារខ្លួនឱ្យបានគ្រប់ៗគ្នា ដើម្បីចៀសវាងការចម្លងវីរុសកូវីដ១៩នេះចូលទៅក្នុងសហគមន៍របស់យើង»។
លោក ហ៊ុន សែន ព្រួយបារម្ភថាក្នុងចំណោមនិស្សិតទាំង ៨០ នាក់នេះអាចនឹងមានអ្នកកើតជំងឺកូវីដ១៩បន្ថែម ខណៈលោកក៏ព្រួយបារម្ភដែលសង្កេតឃើញប្រជាពលរដ្ឋលែងសូវភ័យខ្លាច និងប្រុងប្រយ័ត្នដូចមុន ស្របពេលរដ្ឋាភិបាលបានចាប់ផ្ដើមបន្ធូរបន្ថយវិធានការមួយចំនួនវិញ ដូចជាការបើកសាលារៀនមួយចំនួននៅក្នុងខែក្រោយ ការបើកក្លិបកម្សាន្តឱ្យប្រែក្លាយទៅជាភោជនីយដ្ឋាន ការបើកកាស៊ីណូ និងការកំណត់ថ្ងៃឈប់សងសម្រាប់ចូលឆ្នាំនៅក្នុងខែក្រោយនេះ ដែលពលរដ្ឋអាចឈប់សម្រាករហូតទៅដល់ ៩ ថ្ងៃ។
លោកថា៖ «ពីមុនប្រជាពលរដ្ឋខ្លាចជ្រុល ឥឡូវបន្លាចក៏លែងខ្លាច...។ ឥឡូវ (ធ្វើដំណើរ) មកតាមផ្លូវ (ពលរដ្ឋ) ១០ នាក់ គឺពាក់មួកសុវត្ថិភាពទាំង ១០ នាក់ ប៉ុន្តែម៉ាស់ឃើញតែ ១ សម្រាប់អ្នកជិះម៉ូតូ។ សូមស្នើសុំឱ្យខិតខំការពារខ្លួន ហើយគ្មានអ្នកណាជួយយើងក្រៅពីយើងនោះទេ គឺត្រូវចាប់ផ្ដើមពីមនុស្សម្នាក់ៗធ្វើអនាម័យផ្ទាល់ខ្លួន ដើម្បីកុំឱ្យជំងឺនេះឆ្លងចូលទៅក្នុងសហគមន៍ឱ្យសោះ»។ លោកនាយករដ្ឋមន្ត្រីរំពឹងថា ការបើកផ្ទះសំណាក់ និងសណ្ឋាគារសម្រាប់ទទួលអ្នកទេសចរក្នុងស្រុកនៅអំឡុងថ្ងៃឈប់សម្រាកខាងមុខនេះនឹងជួយកាត់បន្ថយការបាត់បង់ការងារ និងប្រាក់ចំណូលនៅក្នុងវិស័យសេវាទេសចរណ៍នេះ។
ប៉ុន្តែលោក ហ៊ុន សែន បញ្ជាក់ថាគិតមកដល់ពេលនេះកម្មករបម្រើការនៅតាមរោងចក្រកើនដល់ ១៧ ម៉ឺននាក់កំពុងបាត់បង់ការងារធ្វើហើយតម្រូវឱ្យរដ្ឋាភិបាលផ្ដល់ប្រាក់ ៤០ ដុល្លារ ក្នុង ១ ខែ សម្រាប់កម្មករម្នាក់ ខណៈគិតត្រឹមថ្ងៃទី ១៣ កក្កដា គ្រួសារក្រីក្រដែលទទួលបានសាច់ប្រាក់ឧបត្ថម្ភគឺកើនដល់ជាង ៥២ ម៉ឺនគ្រួសារ ដែលត្រូវចំណាយប្រាក់អស់ចំនួន ២៣ លានដុល្លារ។ «ខ្ញុំបានប្រកាសថា យើងធ្វើ ២ ខែហើយបើវាមិនធូរស្រាលទេ យើងធ្វើ ៤ ខែ ប៉ុន្តែយើងបានត្រៀមលុយសម្រាប់ ១០ ខែឯណោះ»។
នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបានប្រកាសនៅថ្ងៃម្សិលមិញដែរថា គិតចាប់តាំងពីកម្ពុជារកឃើញករណីឆ្លងជំងឺកូវីដ ១៩ លើកដំបូងក្នុងខែមករា គឺមកដល់ពេលនេះមានមនុស្សចំនួន ៤៦ ៨៦១ នាក់ ត្រូវបានធ្វើតេស្ដរកជំងឺកូវីដ ១៩ ហើយករណីធ្វើតេស្ដរកឃើញវិជ្ជមានទាំងអស់ចំនួន ១៦៥ នាក់ គឺត្រូវបានព្យាបាលសះស្បើយអស់ចំនួន ១៣៣ នាក់៕
