ភ្នំពេញៈ លោកនាយករដ្ឋមន្ត្រី ហ៊ុន សែន ចាត់ទុកក្រុមដែលចោទថា កម្ពុជាលាក់ទិន្នន័យករណីជំងឺកូវីដ ១៩ ថា ជា «ក្រុមប្រតិកិរិយា» ហើយលោកបានរិះគន់មន្ត្រីស្ថានទូតមួយដែលចង់ឲ្យកម្ពុជាយកអ្នកដំណើរតាមកប៉ាល់ទេសចរណ៍ពីកំពង់ចាមមកស្នាក់នៅសណ្ឋាគារផ្កាយ ៥ នៅទីក្រុងភ្នំពេញ ខណៈដែលកាលពីម្សិលមិញកម្ពុជាបានរកឃើញបុរសបារាំងម្នាក់ទៀតមានវីរុសនេះ។
លោក ហ៊ុន សែន ថ្លែងនៅក្នុងពិធីបុណ្យទន្លេលើកទី ៦ នៅខេត្តបាត់ដំបង កាលពីល្ងាចថ្ងៃសៅរ៍ថា មានក្រុមប្រតិកិរិយាដែលចោទកម្ពុជាថា បានលាក់ទិន្នន័យអំពីករណីជំងឺនេះ ប៉ុន្តែការពិតកម្ពុជាមិនបានធ្វើការលាក់បាំងអ្វីឡើយ ផ្ទុយទៅវិញកម្ពុជាកំពុងធ្វើការជាមួយដៃគូផ្នែកសុខាភិបាលនានា និងអង្គការសុខភាពពិភពលោក។ កម្ពុជាគ្មានហេតុផលអ្វីដែលត្រូវលាក់ទិន្នន័យនោះទេ។
លោកថ្លែងថា៖ «បើសិនរដ្ឋាភិបាលចង់លាក់ក៏មិនអាចលាក់បានដែរ។ នេះគឺជារឿងពិតព្រោះសាមីខ្លួនគេ គេដឹងថាគេឈឺ ឬមិនឈឺ។ ផ្ទុយទៅវិញរាជរដ្ឋាភិបាលអង្វរករ និងអំពាវនាវឲ្យប្រជាពលរដ្ឋ ដែលមានការសង្ស័យថា មានការរីករាលដាលមានការឆ្លងជំងឺសូមទាក់ទងទៅវិស័យសុខាភិបាល ដើម្បីពិនិត្យនូវជំងឺនោះ។ យើងរៀបចំការឆ្លើយតប ទោះបីប្រទេសយើងក្រ តែទឹកចិត្តយើងមិនក្រនោះទេ»។
លោកក៏ប្រតិកម្មនឹងស្ថានទូតបរទេសមួយដែលលោកមិនបញ្ចេញឈ្មោះ ដែលបានស្នើសុំឲ្យយកអ្នកទេសចរក្នុងខេត្តកំពង់ចាម ដែលធ្វើដំណើរតាមកប៉ាល់ទេសចរណ៍ Viking Cruise Journey មកស្នាក់នៅសណ្ឋាគារទំនើបផ្កាយ ៥ នៅភ្នំពេញដូចអ្វីដែលកម្ពុជាធ្លាប់បានធ្វើសម្រាប់អ្នកដំណើរពីនាវា MS Westerdam កាលពីខែកុម្ភៈកន្លងទៅ។
លោក ហ៊ុន សែន បានបញ្ជាក់ថា នាវា MS Westerdam ដែលត្រូវបានអនុញ្ញាតឲ្យចូលចតនៅក្រុងព្រះសីហនុ ហើយអ្នកដំណើរមួយចំនួនត្រូវបានយកមកស្នាក់នៅសណ្ឋាគារក្នុងទីក្រុងភ្នំពេញនោះខុសពីករណីកប៉ាល់ទេសចរណ៍ Viking Cruise Journey ខេត្តកំពង់ចាមដែលមានអ្នកដំណើរ ៣ នាក់មានផ្ទុកជំងឺកូវីដ ១៩។
លោកថ្លែងថា៖ «ប៉ុន្តែនាវាទេសចរណ៍ ១ គ្រឿងនៅឯខេត្តកំពង់ចាមមានផ្ទុកនូវមេរោគនេះរួចទៅហើយ។ ដូច្នេះជាមួយនឹងពលរដ្ឋរបស់អស់លោកអ្នកចំនួនប៉ុន្មាននាក់នេះតើឲ្យយើងខ្ញុំយោគយល់ពលរដ្ឋរបស់អស់លោក ហើយបំផ្លាញនូវពលរដ្ឋរបស់យើងខ្ញុំ ១៦ លាននាក់បានទេ? នេះជាបញ្ហាដែលសុំឲ្យបងប្អូនជនរួមជាតិរបស់យើង ធ្វើការពិចារណា រាប់ទាំងបងប្អូនជនរួមជាតិមួយចំនួន ដែលធ្លាប់តែទិតៀនរាជរដ្ឋាភិបាល។ គេចង់ថា បង្ខំឲ្យរាជរដ្ឋាភិបាលរបស់យើងយកជនជាតិបរទេសនៅលើនាវានៅឯទីក្រុងកំពង់ចាមឲ្យមកដេកនៅសណ្ឋាគារផ្កាយ ៥ ហើយគេចេញលុយដោយខ្លួនឯង»។
លោកថា មន្ត្រីស្ថានទូតរូបនោះបានបំភ័យ និងព្រមានដល់អភិបាលខេត្តកំពង់ចាមថាអ្នកទេសចរនៅលើនាវានេះនឹងឡើងមកធ្វើបាតុកម្ម ហើយបង្ហោះលើហ្វេសប៊ុក។ លោកថា កម្ពុជាអនុញ្ញាតឲ្យអ្នកទេសចរទាំងនោះឡើងគោក ដើម្បីសម្អាតនាវា ហើយពួកគេអាចចុះទៅវិញបើសិនគេចង់។ ប៉ុន្តែនាវានេះមិនត្រូវបានអនុញ្ញាតឲ្យចល័តទៅណាឡើយរហូតដល់វិធានការដែលអង្គការសុខភាពពិភពលោកបានកំណត់ត្រូវបានអនុវត្ត។
លោកមានប្រសាសន៍ថា៖ «ខ្ញុំសូមជូនសារទៅមន្ត្រីស្ថានទូតនេះឲ្យបានជ្រាបថា នេះមិនមែនជាទឹកដីរបស់អ្នកហើយតម្រូវឲ្យខ្ញុំគិតគូរចំពោះតែជនជាតិរបស់អ្នកឯង ប៉ុន្មាននាក់ហើយខ្វះការគិតគូរចំពោះពលរដ្ឋរបស់ខ្ញុំ ១៦ លាននាក់នោះទេ។ សូមធ្វើការយោគយល់ ហើយអធ្យាស្រ័យគ្នារួមគ្នាប្រយុទ្ធ។ ពិតមែនតែសណ្ឋាគារនៅខេត្តកំពង់ចាមមានការលំបាក ប៉ុន្តែប្រសើរជាងទុកឲ្យអ្នកឯងនៅលើកប៉ាល់ ហើយឆ្លងដូចនៅ Princess Diamond ដូចនៅជប៉ុននោះដែលគេចាត់ទុកថា ជាការខុសឆ្គង»។
លោកបន្តថា៖ «នេះជាភ័ព្វសំណាងហើយ ដែលកម្ពុជាមានភាពអនុគ្រោះ ហើយពិនិត្យសំណាកហើយយកអ្នកទាំងនេះមកព្យាបាលនៅកន្លែងសមរម្យ។ ប៉ុន្តែអ្នកដទៃទៀត ត្រូវដាក់នៅដោយឡែករយៈពេល ១៤ ថ្ងៃ។ អ្នកឯងមិនអាចគំរាមកម្ពុជាឲ្យយកភ្ញៀវរបស់អ្នកឯង ត្រឹមតែប៉ុន្មាននាក់មកកាន់ទីក្រុងភ្នំពេញ ហើយឲ្យមានការភ័យខ្លាចនៅទីក្រុងភ្នំពេញទេ។ សូមយោគយល់»។
កាលពីថ្ងៃសៅរ៍ក្រសួងសុខាភិបាលកម្ពុជាបានដាក់ចេញនូវវិធានការទាំងពីខាងក្រៅ និងខាងក្នុងមួយចំនួន ដើម្បីទប់ស្កាត់ការរីករាលដាលជំងឺកូវីដ ១៩ ក្នុងប្រទេស កម្ពុជា។ វិធានការខាងក្រៅគឺការហាមឃាត់ជនបរទេសដែលធ្វើដំណើរមកពីប្រទេស ៥ រួមមាន អ៊ីតាលី បារាំង អាល្លឺម៉ង់ អេស្ប៉ាញ និងសហរដ្ឋអាមេរិក មិនឲ្យចូលមកកម្ពុជាចាប់ពីថ្ងៃអង្គារស្អែកនេះតទៅ។ នៅថ្ងៃអាទិត្យម្សិលមិញនេះដែរ ប្រទេស អ៊ីរ៉ង់ ត្រូវបានដាក់ចូលក្នុងបញ្ជីហាមឃាត់នេះដោយអនុវត្តចាប់ពីថ្ងៃទី ១៨ មីនា។ ការហាមឃាត់នេះមានរយៈពេល ៣០ ថ្ងៃ។
វិធានការស្រដៀងគ្នានេះគឺការហាមឃាត់ដោយក្រសួងសាធារណៈការ និងដឹកជញ្ជូនក្នុងការចូលនៃនាវាដឹកអ្នកដំណើរ និងកប៉ាល់ទេសចរណ៍ចូលមកកម្ពុជាតាមផ្លូវទឹកចាប់ពីថ្ងៃទី ១៣ មីនា រហូតដល់មានការជូនដំណឹងជាថ្មី។
វិធានការទប់ស្កាត់ពីខាងក្រៅនេះមិនបានហាមឃាត់មនុស្សដែលមកពីប្រទេសចិនដែលធ្លាប់ជាមណ្ឌលផ្ទុះឡើងនៃជំងឺនេះទេ។ ការមិនដាក់បញ្ចូលប្រទេសចិននេះធ្វើឲ្យមានមតិរិះគន់ក្នុងចំណោមអ្នកប្រើប្រាស់ហ្វេសប៊ុក។
ប៉ុន្តែលោក ហ៊ុន សែន បានវាយបកធ្ងន់ៗទៅលើអ្នករិះគន់ទាំងនោះដោយលោកពន្យល់ថា អត្រាឆ្លងនៅប្រទេសចិនបានធ្លាក់ចុះខ្លាំង ហើយចុងក្រោយអត្រាស្លាប់បានធ្លាក់ដល់សូន្យ។ ប៉ុន្តែប្រទេសភាគច្រើនដែលកម្ពុជាហាមឃាត់នោះទើបតែបានប្រកាសភាពមានអាសន្នពាក់ព័ន្ធនឹងជំងឺនេះ។
លោក ស្រី ឱ វណ្ណឌីន អ្នកនាំពាក្យក្រសួងសុខាភិបាលបានពន្យល់ថា ការហាមឃាត់សម្រាប់ប្រទេសទាំង ៦ នេះគឺធ្វើឡើងសម្រាប់អ្នកធ្វើដំណើរទាំងអស់ដែលចាកចេញពីប្រទេសទាំង ៦ នេះឆ្ពោះមកប្រទេសកម្ពុជា មិនថា ជនជាតិណានោះទេ។ ប៉ុន្តែ ប្រសិនបើបុគ្គលនោះជាជនជាតិនៃប្រទេសទាំង ៦ រស់នៅប្រទេសផ្សេងក្រៅពីប្រទេសទាំង ៦ នេះហើយប្រវត្តិ ១៤ ថ្ងៃរបស់ពួកគេមិនបានឆ្លងកាត់ប្រទេសទាំងនេះ ពួកគេអាចចូលមកកម្ពុជាបានធម្មតា។ ចំពោះពលរដ្ឋដែលរស់នៅកម្ពុជាបច្ចុប្បន្នលោកស្រីស្នើកុំឲ្យពួកគេចាកចេញទៅប្រទេសទាំង ៦ នេះចាប់ពីថ្ងៃចេញបម្រាមនេះ។
លោកស្រីថ្លែងថា៖ «ដូចយើងបានជម្រាបជូនហើយថា អ្នកដែលធ្វើដំណើរពីប្រទេសទាំងនោះសុំឲ្យមានការយោគយល់ ហើយកុំឲ្យមានការអាក់អន់ស្រពន់ចិត្តអី នេះជាវិធានការដែលយើងត្រូវប្រកាន់យក ដើម្បីកុំឲ្យមានការចម្លងតគ្នាពី ១ ទៅ ១»។
ដោយឡែកវិធានការទប់ស្កាត់ខាងក្នុងប្រទេសវិញក្រសួងអប់រំយុវជន និងកីឡាបានប្រកាសឲ្យសាលារៀននៅទីក្រុងភ្នំពេញ និងនៅក្រុងសៀមរាបវ៉ាកងតូចមុនពេលកំណត់ចាប់ពីថ្ងៃទី ១៤ ខែមីនា រហូតដល់មានថ្ងៃកំណត់ឲ្យចូលរៀនវិញ។ វិធានការនេះធ្វើឡើងបន្ទាប់ពីកម្ពុជាបានរកឃើញមានអ្នកផ្ទុកកូវីដ ១៩ សរុបចំនួន ៧ នាក់បូករួមទាំងជនជាតិចិនដែលបានជាសះស្បើយ និងចាកចេញពីកម្ពុជា ជនជាតិខ្មែរដែលឆ្លងពីជប៉ុន ជនជាតិអង់គ្លេស ៣ នាក់ធ្វើដំណើរតាមកប៉ាល់ Viking Cruise Journey និងចុងក្រោយនេះគឺជនជាតិកាណាដា និងជនជាតិបែលហ្ស៊ិកនៅភ្នំពេញ។
លោក អ៊ុន ចាន់ដា អភិបាលខេត្តកំពង់ចាមបដិសេធធ្វើអត្ថាធិប្បាយអំពីការស្នើសុំពីស្ថានទូតមួយឲ្យយកពលរដ្ឋរបស់គេទៅស្នាក់នៅភ្នំពេញ។ លោកថា បច្ចុប្បន្នអ្នកដំណើរទាំង ៥៨ នាក់ នៃកប៉ាល់ Viking Cruise Journey ដែលកំពុងស្នាក់នៅសណ្ឋាគារមួយនៅខេត្តកំពង់ចាមមានសភាពធម្មតា។ ចំណែកកប៉ាល់នោះត្រូវបានលាងសម្អាតបាញ់ថ្នាំសម្លាប់មេរោគ រួចហើយកាលពីថ្ងៃសៅរ៍។
ពាក់ព័ន្ធនឹងករណីឆ្លងនៃវីរុសកូវីដ ១៩ នេះក្រសួងសុខាភិបាលកាលពីម្សិលមិញបានចេញសេចក្តីជូនព័ត៌មានមួយថា កម្ពុជាបានរកឃើញបុរសជនជាតិបារាំងអាយុ ៣៥ ឆ្នាំម្នាក់នៅភ្នំពេញមានវីរុសកូវីដ ១៩។ បុរសរូបនេះមានប្រពន្ធ និងកូនប្រុសអាយុ ៤ ខែ (សរុបគ្នា ៣ នាក់) បានហោះហើរចេញពីទីក្រុងប៉ារីសទៅដល់សិង្ហបុរីនៅថ្ងៃទី ១៣ ខែមីនា ដោយមានអាការក្តៅខ្លួន ហើយអាជ្ញាធរសិង្ហបុរីបានធ្វើតេស្តសំណាក។
ក្នុងអំឡុងពេលត្រូវរង់ចាំលទ្ធផល (លទ្ធផលត្រូវផ្ញើមកតាមក្រោយ) បុរសរូបនេះបានហោះហើរមកកាន់ទីក្រុងភ្នំពេញ ហើយបានមកដល់ព្រលានយន្តហោះនៅម៉ោង ៨ និង ៣០ នាទីព្រឹកថ្ងៃទី ១៤ ខែមីនា ហើយបានទៅដល់ផ្ទះស្នាក់នៅរបស់គាត់នៅម្តុំផ្សារទួលទំពូងនៅវេលាម៉ោង ១០ ព្រឹកថ្ងៃដដែល។ ក្រោយពីចេញលទ្ធផលតេស្តរបស់គាត់វិជ្ជមានពីសិង្ហបុរីនារសៀលថ្ងៃទី ១៤ ខែមីនា ក្រសួងសុខាភិបាលបានទទួលព័ត៌មាននេះ និងបានធ្វើការស្រាវជ្រាវភ្លាមៗរកឃើញបុរសរូបនេះនៅវេលាម៉ោង ២០ និង ៣០ នាទីយប់ថ្ងៃដដែល។ បន្ទាប់ពីយកសំណាកទៅធ្វើតេស្តលទ្ធផលពីវិទ្យាស្ថានប៉ាស្ទ័រកម្ពុជានៅវេលាម៉ោង ១៤ និង ៣០ នាទីថ្ងៃទី ១៥ ខែមីនាបង្ហាញថា បុរសបារាំងរូបនេះវិជ្ជមានវីរុសកូវីដ ១៩ រីឯភរិយា និងកូនតម្រូវឲ្យមានការរង់ចាំលទ្ធផលបន្តទៀត។ បច្ចុប្បន្នបុរសបារាំងរូបនេះត្រូវដាក់ឲ្យនៅសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត៕
វីដេអូ៖