សៀមរាបៈ លោកនាយករដ្ឋមន្ត្រី ហ៊ុន សែន បានចាត់ទុកការឆ្លងកូវីដជាលើកដំបូងចូលទៅក្នុងសហគមន៍ ដោយពុំទាន់រកឃើញប្រភពថាតើវាចេញមកពីណា «ជាចំណុចដែលយើងមានការបារម្ភធំបំផុត» ដែល «ទាមទារឱ្យយើងធ្វើប្រតិបត្តិការយ៉ាងលឿន និងទ្រង់ទ្រាយធំ» ខណៈលោកបានប្រកាសផ្តល់ថវិកាជាង ១០០០ លានរៀល ដើម្បីប្រើប្រាស់ក្នុងការផ្តល់ជូនគ្រួសារពលរដ្ឋក្រីក្រទូទាំងប្រទេសដែលកំពុងធ្វើចត្តាឡីស័ករយៈពេល ១៥ ថ្ងៃ និងសម្រាប់ផ្គត់ផ្គង់ទៅដល់មជ្ឈមណ្ឌលធ្វើចត្តាឡីស័ក។
រាជរដ្ឋាភិបាលក៏បានបន្តប្រកាសឱ្យប្រជាពលរដ្ឋទាំងអស់ដែលមានការសង្ស័យក្នុងការពាក់ព័ន្ធនឹងព្រឹត្តិការណ៍សហគមន៍ ២៨ វិច្ឆិកាឲ្យមកធ្វើតេស្តរកកូវីដ១៩ ដោយការធ្វើតេស្តនេះមិនត្រូវការចំណាយថវិកាឡើយ។
លោកនាយករដ្ឋមន្រ្តីបានដាក់ឈ្មោះហេតុការណ៍ឆ្លងកូវីដ១៩ ចូលសហគមន៍នេះថា «ព្រឹត្តិការណ៍សហគមន៍ ២៨ វិច្ឆិកា» ដើម្បីកុំឱ្យមានការរើសអើងទៅលើក្រុមគ្រួសារលោក ឆែម សាវុធ អគ្គនាយកពន្ធនាគារ។
លោក ហ៊ុន សែន បានថ្លែងកាលពីម្សិលមិញក្នុងពិធីបើកការដ្ឋានសាងសង់ និងកែលម្អផ្លូវ ៣៨ ខ្សែនៅក្រុងសៀមរាបថា ប្រជាពលរដ្ឋតម្រូវឱ្យធ្វើចត្តាឡីស័ក ហើយអាជ្ញាធរមូលដ្ឋានត្រូវធ្វើការផ្គត់ផ្គង់ ពិនិត្យតាមដាន និងជួយផ្គត់ផ្គង់ស្បៀងអាហារដល់ក្រុមគ្រួសារក្រីក្រ ដោយសារសមាជិកគ្រួសារខ្លះដែលធ្វើចត្តាឡីស័ក ជាអ្នករកលុយផ្គត់ផ្គង់គ្រួសារ។
លោកបានថ្លែងថា នៅព្រឹកថ្ងៃទី ៣០ ខែវិច្ឆិកា លោកបានសម្រេចឱ្យបញ្ចេញសាច់ប្រាក់ជាង ១០០០ លានរៀលជូនទៅរាជធានី-ខេត្តនៅទូទាំងប្រទេសសម្រាប់ជួយដល់គ្រួសារក្រីក្រដែលត្រូវធ្វើចត្តាឡីស័កដែលគ្រួសារនីមួយៗនឹងទទួលបាន ២ ម៉ឺនរៀលក្នុង ១ ថ្ងៃ ដែលមានរយៈពេល ១៥ ថ្ងៃដែលថវិកាសរុបទទួលបាន ៣០ ម៉ឺនរៀលក្នុង ១ គ្រួសារ។
លោកបញ្ជាក់ថា៖ «សូមកុំមានការភាន់ច្រឡំថា ខ្ញុំតម្រូវឱ្យធ្វើចត្តាឡីសក័ ១៥ ថ្ងៃ។ ការធ្វើចត្តាឡីស័កត្រឹមតែ ១៤ ថ្ងៃប៉ុណ្ណោះ តែខ្ញុំផ្តល់ជូនថវិកាសម្រាប់ ១៥ ថ្ងៃក្នុងបំណងជួយដល់ប្រជាពលរដ្ឋក្រីក្រតែប៉ុណ្ណោះ»។
លោកមានប្រសាសន៍ថា៖ «ប្រាក់ឧបត្ថម្ភនេះផ្តល់ជូនតែគ្រួសារដែលមានបណ្ណក្រីក្រ និងត្រូវបានធ្វើចត្តាឡីស័កប៉ុណ្ណោះ។ ក្រសួងសុខាភិបាលត្រូវផ្តល់ថវិកាជូនមកអភិបាលខេត្តណាដែលមានតម្រូវការធ្វើចត្តាឡីស័ក ដើម្បីឱ្យពួកគាត់មានលទ្ធភាពសម្រាប់យកប្រាក់នោះ ទៅជួយដល់អ្នកដែលត្រូវធ្វើចត្តាឡីស័ក បើមិនដូច្នោះទេពួកគាត់នឹងធ្វើចត្តាឡីស័កដោយគ្មានអង្ករច្រកឆ្នាំង គឺវាមិនមែនជារឿងសមរម្យនោះទេ»។
លោក ហ៊ុន សែន ក៏បានលើកឡើងផងដែរថា នេះជាលើកដំបូងដែលមានការឆ្លងចូលក្នុងសហគមន៍ដែលជាព្រឹត្តិការណ៍នៅតែរកមិនទាន់ឃើញពីប្រភពនៃក្បាលកន្ទុយថា តើវាចេញមកពីទីណា ហើយវាកំពុងបង្កប់ខ្លួននៅទីណាទៀត។
លោកថ្លែងថា៖ «ចំណុចនេះជាចំណុចដែលយើងមានការបារម្ភធំបំផុត។ វាទាមទារឱ្យយើងធ្វើប្រតិបត្តិការយ៉ាងលឿន និងទ្រង់ទ្រាយធំ។ ពេលវេលានេះមិនមែនជាពេលវេលាស្តីបន្ទោសគ្នា ហើយក៏មិនមែនជាពេលវេលាទម្លាក់កំហុសឱ្យអ្នកនេះឱ្យអ្នកនោះទេ តែជាពេលវេលាត្រូវសាមគ្គីភាពគ្នា»។
លោកនាយករដ្ឋមន្រ្តីក៏បានបញ្ជាទៅដល់គ្រប់ខេត្តក្រុងទាំងអស់ត្រូវរៀបចំនូវមជ្ឈមណ្ឌលចត្តាឡីស័ក ដែលលោកបានឱ្យរៀបចំតាំងពីដើមឆ្នាំដោយត្រូវរៀបចំនៅទីនោះ សម្រាប់ការធ្វើចត្តាឡីស័កសម្រាប់អ្នកដែលគ្មានលទ្ធភាពធ្វើចត្តាឡីស័កនៅតាមផ្ទះ។ លោកបញ្ជាក់ផងដែរថា កម្ពុជាអាចគ្រប់គ្រងបាន ឬមិនបានស្ថិតក្នុងរយៈពេល ១៥ ថ្ងៃខាងមុខនេះជាពេលវេលានៃការខិតខំរបស់យើងទាំងរដ្ឋ និងប្រជាជន។
លោកបានថ្លែងថា៖ «ដូចនេះខ្ញុំសុំអំពាវនាវចាប់ពីថ្ងៃនេះទៅរយៈពេល ១៥ ថ្ងៃយ៉ាងតិច គឺជាដំណាក់កាលសាកល្បងដ៏ធំបំផុតរបស់កម្ពុជា ឆ្លងរួច ឬមិនរួចគឺវានៅក្នុងពេលនេះឯង។ បើប្រឹងតែរដ្ឋ ប្រជាពលរដ្ឋមិនប្រឹងទេ មិនចូលរួមទេនោះគឺមិនជោគជ័យទេ»។
ចំនួនប្រជាពលរដ្ឋដែលបានធ្វើតេស្តរកកូវីដ១៩នៅក្នុងទីក្រុងភ្នំពេញ និងតាមបណ្តាខេត្តមួយចំនួនរួមមាន សៀមរាបធ្វើតេស្តបាន ១៩២ នាក់ ត្បូងឃ្មុំបាន ៤ នាក់ ស្ទឹងត្រែងបាន ៧៨ នាក់ កំពង់ធំបាន ១៤ នាក់ បន្ទាយមានជ័យបាន ២៩៣ នាក់ដែលជាខេត្តធ្វើបានច្រើនជាងគេ បាត់ដំបងបាន ៦ នាក់ សណ្ឋាគារបាន ២១ នាក់ មន្ទីរពេទ្យមិត្តភាពខ្មែរ-សូវៀតបាន ១៤៩នាក់ ផ្សារអ៊ីអន ១ បាន ១ ១៦៩ នាក់ក្រសួងមហាផ្ទៃ ៨៧៩ នាក់ ពន្ធនាគារព្រៃសបាន ៣៨២ នាក់ ផ្ទះលោក ស ខេង រដ្ឋមន្ត្រីក្រសួងមហាផ្ទៃបាន ៩៣ នាក់ និងកងដឹកជញ្ជូនហោះហើរបាន ៣៨ នាក់។
រាជរដ្ឋាភិបាលកម្ពុជាតាមរយៈក្រសួងសុខាភិបាល បានផ្តល់ប្រាក់ឧបត្ថម្ភសម្រាប់ប្រជាពលរដ្ឋក្រីក្រក្នុងពេលធ្វើចត្តាឡីស័ក ១៥ ថ្ងៃក្នុងនោះមានរាជធានីភ្នំពេញចំនួន ១០០ លានរៀល សៀមរាប ៨០ លានរៀល ខេត្តចំនួន ១៥ ទៀតទទួលបាន ៥០ លានរៀលក្នុង ១ ខេត្តៗ និងខេត្តចំនួន ៨ បានទទួលចំនួន ៣០ លានរៀលក្នុង ១ ខេត្តៗដែលសរុបទាំងអស់មានទឹកប្រាក់ចំនួន ១ ១៧០ លានរៀល ឬប្រហែល ២៩ ម៉ឺនដុល្លារអាមេរិក។
ទាក់ទងនឹងថវិកានេះដែរលោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានប្រាប់ភ្នំពេញប៉ុស្តិ៍ពីម្សិលមិញថា ថវិកាបម្រុងទុកសម្រាប់ប្រយុទ្ធប្រឆាំងនឹងជំងឺកូវីដឆ្នាំ ២០២០ នេះនៅមានច្រើនទៀត រដ្ឋាភិបាលមិនទាន់ចំណាយអស់នៅឡើយទេ ហើយក្រសួងនឹងប្រើទៅលើអ្វីដែលជាការចាំបាច់។
លោកថ្លែងថា៖ «ការអភិវឌ្ឍហេដ្ឋារចនាសម្ព័ន្ធ យើងមានថវិកាបម្រុងទុកជាស្រេចហើយ ឯរឿងកូវីដ យើងរឹតតែមានការបម្រុងទុកទៀតដែលយើងសន្សំពីការចំណាយបេសកកម្ម»។
ក្រសួងសុខាភិបាលបានចេញសេចក្តីជូនព័ត៌មានកាលពីថ្ងៃម្សិលមិញថា លទ្ធផលធ្វើតេស្តអ្នកដែលបានប៉ះពាល់ក្នុងព្រឹត្តិការណ៍សហគមន៍ ២៨ វិច្ឆិកាបង្ហាញថា មានវិជ្ជមានវីរុសកូរ៉ូណាចំនួន ១៤ នាក់ (ដោយគិតទាំងអ្នកដែលបានរាយការណ៍ចំនួន ៦ នាក់នៅថ្ងៃទី ២៨ ខែវិច្ឆិការួចហើយ និងអ្នករកឃើញថ្មីចំនួន ៨ នាក់នៅថ្ងៃទី ២៩ ខែវិច្ឆិកា) លើចំនួនអ្នកដែលបានធ្វើតេស្តចំនួន ៣ ៣៣២ នាក់ (នៅភ្នំពេញ និងខេត្តចំនួន ៧) តែកាលវិភាគអាចធ្វើបានតែ ២ ២៤៨ នាក់ (ត្រឹមម៉ោង ១:៣០ នាទីព្រឹកថ្ងៃទី ៣០ ខែវិច្ឆិកា) ដែលមនុស្សចំនួន ២ ២៣៤ នាក់មានលទ្ធផលអវិជ្ជមាន ឯចំនួននៅសល់ចំនួន ១ ០៨៤ នាក់ទៀត ក្រសួងនឹងបន្តវិភាគនៅថ្ងៃនេះទៀត។
លោក ហ៊ុន សែន មិនទាន់ចាត់ទុកថា ព្រឹត្តិការណ៍ដែលកើតមានឡើងក្នុងប្រទេសកម្ពុជា គឺជាការបរាជ័យនោះទេ ដោយលោកសង្ឃឹមថា អ្នកដែលបានឆ្លងអាចនឹងមិនឈានទៅដល់ដំណាក់កាលនៃការស្លាប់ទេ ដោយសារគ្រូពេទ្យបានដាក់ថ្នាំខ្លាំងដែលគេបានព្យាបាលដោយមានប្រសិទ្ធភាពខ្ពស់។
លោកថ្លែងថា៖ «យើងមានត្រៀមបម្រុងថ្នាំសម្រាប់ការព្យាបាល ហើយយើងបានរកឃើញមេរោគនៅក្នុងគ្រួសាររបស់លោក ឆែម សាវុធ គឺធ្ងន់ធ្ងរដែលត្រូវប្រើកម្លាំងថ្នាំខ្លាំងដើម្បីដោះស្រាយបញ្ហាដែលនេះគឺជាបច្ចេកវិទ្យារបស់គ្រូពេទ្យ»។
លោកនាយករដ្ឋមន្រ្តីនឹងធ្វើការដឹកនាំបញ្ជាផ្ទាល់លើករណីនេះ ដោយលោកនឹងធ្វើការពីគេហដ្ឋានរបស់លោកដោយអាចនឹងមានការផ្សាយបន្តផ្ទាល់តាមទូរទស្សន៍ជាតិផងដែរដោយលោកចាត់ទុកបញ្ហានេះថា ធំធេងជាងសង្រ្គាមទល់ដែនទៅទៀត ដោយសារសង្រ្គាមប្រឆាំងនឹងកូវីដមិនមានពេលវេលានោះទេ។
កាលពីម្សិលមិញនេះដែរ លោកនាយករដ្ឋមន្រ្តីបានចេញសារជាសំឡេងបញ្ជាឱ្យលោក ឃួង ស្រេង អភិបាលរាជធានីភ្នំពេញ និងលោក ទៀ សីហា អភិបាលខេត្តសៀមរាប ធ្វើការផ្អាករាល់ការជួបជុំ ដែលមានមនុស្សច្រើនរាប់ទាំងអាពាហ៍ពិពាហ៍ ពិធីបុណ្យ និងការប្រជុំនានារាប់ពីថ្ងៃទី ០១ ខែធ្នូនេះរហូតដល់ថ្ងៃទី ១៥ ឬ ១៦ ខែធ្នូ។
លោក ហ៊ុន សែន បញ្ជាក់ថា៖ «ដោយមានសំណូមពរពីក្រសួងសុខាភិបាលក៏ដូចជា ការផ្តល់មតិពីអង្គការសុខភាពពិភពលោកតម្រូវឱ្យយើងយកវិធានការបន្ថែមសម្រាប់នៅទីក្រុងភ្នំពេញ និងខេត្តសៀមរាបតែម្តងនោះគឺការផ្អាកការជួបជុំដែលមានមនុស្សច្រើន រាប់ទាំងអាពាហ៍ពិពាហ៍រយៈពេល ១៥ ថ្ងៃរួមទាំងការប្រជុំនានាផងដែរ»។
លោកនាយករដ្ឋមន្រ្តីក៏សុំការអធ្យាស្រ័យចំពោះប្រជាពលរដ្ឋទាំងអស់សុំផ្អាកជាបណ្តោះអាសន្ននូវការជួបជុំក្នុងរយៈពេល ១៥ ថ្ងៃដែលមានមនុស្សចាប់ពី ២០ នាក់ឡើងទៅគឺមិនអាចធ្វើការជួបជុំបានទេ។
លោកថា ៖ «យើងមិនហាមឃាត់ការធ្វើដំណើរចេញទៅក្រៅក្នុងការធ្វើដំណើរតាមផ្លូវទេ ប៉ុន្តែសុំកុំឱ្យមានការកកស្ទះនៅតាមទីកន្លែងភ្លើងសញ្ញានានា កាត់បន្ថយការធ្វើដំណើរចេញក្រៅផ្ទះក្នុងរយៈពេល ១៥ ថ្ងៃ។ បើមិនធ្វើដូចនេះទេ យើងនឹងយឺតពេល»។
យោងតាមក្រសួងសុខាភិបាលបានឱ្យដឹងថា គិតត្រឹមថ្ងៃ ៣០ ខែវិច្ឆិកាឆ្នាំ ២០២០ ប្រទេសកម្ពុជាមានអ្នកឆ្លងវីរុសកូរ៉ូណាចំនួន ៣២៣ នាក់ (ស្រ្តី ៧១ នាក់) ប៉ុន្តែត្រូវបានព្យាបាលជាសះស្បើយចំនួន ៣០១ នាក់ ឯអ្នកជំងឺកំពុងសម្រាកព្យាបាលមានចំនួន ២២ នាក់ នៅមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែ៕